5
Tʉkagwile kuuti,
amavɨlɨ ghiitu kyeve kya nsiki nʼdebe mʉ ɨɨsi muno.
Neke kyaghanangiike,
ʉNgʉlʉve ilikʉtʉpeela ʉvukalo kʉkyanya,
ʉvwa kʉvʉsila kʉsila,
vʉno navʉlɨ ndavʉle ɨnyumba jɨno jɨjengilue na mavoko gha vaanhu.
2 Ʉlwakʉva mʉ ɨɨsi muno amoojo ghiitu ghipumuka,
mʉ ʉluo tʉlɨ nʉ vʉsyʉkue ʉvʉkome ʉvwa kʉlʉta kʉ vukalo vwitu ʉvwa kʉkyanya,
ʉkuo ʉNgʉlʉve ilikʉtʉfwɨka amavɨlɨ amapia.
3 Tʉngafwɨkue,
apuo natuuva vʉfuula.
4 Pano tʉjiighe mʉ mavɨlɨ agha ghano kyeve kya nsiki nʼdebe,
tupumuka mʉ moojo ghiitu mʉlwa kʉdʉjua mʉ nyinga.
Nakwekʉti tulonda kufuula ʉmʼbɨlɨ ʉghʉ ghʉno ghufua,
ʉlwene tulonda kʉfwɨkua ʉmʼbɨlɨ ghʉno naghufua,
kuuti ʉmʼbɨlɨ ʉghʉ ghʉno ghufua ghʉgulubikue na ghʉno naghufua.
5 ɄNgʉlʉve ghwe mwene atʉlɨngʼhanɨkisie ʉluo,
atʉpeliile ʉMhepo ghwake,
neke tʉkagʉle kuuti kyangʼhaani fye luliiva.
6 Lɨno,
jaatu tʉlɨ nʉ lʉhʉvɨɨlo nambe tʉkagwile kuuti,
pano tʉlɨ mʉ mʼbɨlɨ ʉghʉ,
tʉlɨ patali nʉ Mʉtwa.
7 Tukukala vwɨmɨla ʉlwɨtɨko,
nakwekʉti vwɨmɨla fino fivoneka.
8 Kyangʼhaani tʉlɨ nʉ lʉhʉvɨɨlo,
kange tuvona yekʉba twale tʉghʉleke ʉmʼbɨlɨ ʉghʉ,
na kulʉta kukukala nʉ Mʉtwa.
9 Lɨno,
tʉʉve mʉ vukalo ʉvʉ,
nambe natʉʉve mʉ vukalo ʉvʉ,
ʉvʉfumbue vwitu kʉkʉmhovosia ʉMʉtwa.
10 Ʉlwakʉva ʉsue tweni tulikwɨma pamaaso gha Kɨlɨsite na kuhɨghua nʉ mwene.
Neke nʉjʉnge ilikwʉpɨla ʉlʉhombo vwɨmɨla sino ivomba mʉ ɨɨsi muno,
siive nofu nambe siive mbiivi.
Ɨmbombo ɨja kʉsambania
11 Lɨno,
ʉlwakʉva tʉkagwile kuuti lʉnoghiile kʉkʉmwoghopa ʉMʉtwa,
tughimba kʉkʉvavʉʉla avaanhu kuuti vamwɨtɨkaghe.
ɄNgʉlʉve atʉkagwile vʉnono vʉle tʉlɨvuo,
na jʉʉne nihʉvɨɨla kuuti na jʉmue mʉtʉkagwile vʉnono.
12 Natulonda pikughinia kange kʉlyʉmue,
looli tulonda kʉkʉvavʉʉla kɨno mʉnoghiile kukughinia vwɨmɨla ʉsue,
kuuti mʉʉve na masio agha kʉvamʉla vano vikughinia vwɨmɨla sino sivoneka na maaso,
vileka isa mʉ mwojo.
13 Nave tuvoneka tʉlɨ vanya lʉkwale,
tʉlɨ enendɨɨkɨ vwɨmɨla ʉNgʉlʉve,
neke nave tuvoneka tʉlɨ nʉ lʉhala,
apuo tʉlɨ enendɨɨkɨ vwɨmɨla ʉmue.
14 Ʉlʉghano lwa Kɨlɨsite lʉkʉtʉlongosia ʉsue,
ʉlwakʉva tʉkagwile kuuti ʉmuunhu jʉmo alyafwile vwɨmɨla avaanhu vooni,
mʉ ʉluo avaanhu vooni valyafwile.
15 Ʉmuunhu ʉjuo,
alyafwile vwɨmɨla avaanhu vooni kuuti,
avaanhu valekaghe kukukala mʉ vughane vwave,
looli mʉ vughane vwa jʉno alyafwile na kusyʉka vwɨmɨla aveene.
16 Lɨno,
kuhʉma ʉnsiki ʉghʉ,
natʉkʉnkagʉla ʉmuunhu mʉlwa mʼbɨlɨ.
Napano ʉnsiki ghʉmonga tʉkankagwile ʉKɨlɨsite mʉlwa mʼbɨlɨ,
neke lɨno natʉkʉnkagʉla mʉ ʉluo.
17 Ʉmuunhu ghweni jʉno alɨ mwa Kɨlɨsite,
ʉjuo avʉmbiike vʉpia,
isa mʼbʉkʉʉlʉ sikilile,
lɨno ʉvʉmuunhu vwake vʉpia!
18 Neke isi sooni sihʉma kwa Ngʉlʉve jʉno alyansungʼhile ʉKɨlɨsite atʉsambanie ʉsue nʉ mwene.
Na jʉsue atʉpeliile ɨmbombo ɨja kʉpʉlɨsia ɨmhola ɨjio ɨja kʉsambana nʉ mwene.
19 Kwekʉti kukilila ʉKɨlɨsite,
ʉNgʉlʉve akava ɨkʉvasambania avaanhu nʉ mwene,
kɨsila kʉvalɨlɨla ʉvʉhosi vwave.
Kange,
ʉNgʉlʉve atʉpeliile ɨmbombo ɨja kʉvavʉʉla avaanhu ɨmhola ɨja lʉsambanio.
20 Lɨno,
ʉKɨlɨsite atʉsungʼhile kuvomba ɨmbombo jaake,
neke kukilila ʉsue ʉNgʉlʉve ɨkʉvasimilisia kusambana nʉ mwene.
Fye nambe tʉkʉvasʉʉma vwɨmɨla ʉKɨlɨsite kuuti,
mʉsambane nʉ Ngʉlʉve.
21 ɄNgʉlʉve alyamʼbɨkile ʉKɨlɨsite ʉnsila vʉhosi,
kuuva mhosi vwɨmɨla ʉsue,
kuuti pano tuuva vaanhu va Kɨlɨsite ʉjuo,
tʉvisaghe vagholofu pamaaso gha Ngʉlʉve.