6
Lɨno,
ʉlwakʉva tuvomba ɨmbombo palɨkɨmo nʉ Ngʉlʉve,
tʉkʉvasʉʉma kuuti ʉlʉsʉngʉ lwa Ngʉlʉve lʉno mwʉpiile,
mʉlekaghe kuuti lʉsove vʉvʉle.
2 Ʉlwakʉva ʉNgʉlʉve iiti,
“Ʉnsiki ghʉno ghʉkanoghiile,
nɨkakʉpʉliike;
ɨkɨghono ɨkya vʉpoki,
nɨkakʉtangile.”a
Pʉlɨkɨsia,
ʉnsiki ghʉno ghʉnoghiile ghwe ʉghʉ,
ɨkɨghono ɨkya vʉpoki kye ɨkɨ!
Ʉlugudo mʉ mbombo ja Mʉtwa
3 Lɨno,
natuvomba lʉmonga lʉno lukʉvasia avange,
kuuti ʉvʉvombi vwitu vʉleke kujovua fivi.
4 Ʉlwene mʉ sooni tuhʉfia kuuti tʉlɨ vavombi va Ngʉlʉve.
Tuhʉfia ʉluo mʉlwa kuguda fiijo mʉ lʉpumuko na mʉ nhalamu nyinga.
5 Pamonga tutovua,
tudindilua mʉ ndinde,
tukwovelua na mapʉgha gha vaanhu,
tuvomba ɨmbombo ɨnhalamu,
tughona maaso,
tulɨndɨla na kughonela.
6 Kange,
tuhʉfia mʉ vʉgholofu,
mʉ vʉkagʉsi,
mʉ lugudo,
mʉ vʉkoola,
mʉlwa kʉlongosivua nʉ Mhepo ʉMwɨmɨke,
mʉ lʉghano ʉlʉsila vʉkedʉsi.
7 Kange,
tuhʉfia mʉlwa kʉpʉlɨsia ɨmhola ɨja kyangʼhaani,
tuvomba isio sooni mʉ ngʉfu sa Ngʉlʉve.
Ʉvʉgholofu,
kye kɨlwɨlo kiitu,
ʉlʉbale lwa kʉndio na kʉngʼhɨghɨ.b
8 Ʉsue tutavwile,
avaanhu vatʉghinie nambe vatʉbenapʉle;
vatʉpaale nambe vatʉjove fivi.
Tuvoneka tʉlɨ vadesi,
hɨmbe tujova isa kyangʼhaani;
9 tuvoneka natʉkagʉliike,
hɨmbe tʉkagʉliike vʉnono;
tuvoneka tʉfwile,
hɨmbe tʉlɨ vʉʉmi;
tʉtovilue kyongo,
neke natʉfwile.
10 Kange,
tuvoneka hwene tʉsukuniile,
neke jaatu tʉlɨ nʉ lʉkeelo;
tuvoneka tʉlɨ vakotofu,
neke vinga tʉvapeliile ʉvʉmofu;
tuvoneka tʉlɨ vasila kɨmonga,
neke tʉlɨ ni fiinu fyoni.
11 Mwe Vakolinto,
tʉjovile numue kɨsila kʉfisa kɨmonga,
kange tʉjovile mʉ lʉghano ʉlʉkome.
12 Ʉsue natʉvʉhɨlile kʉkʉvaghana ʉmue,
looli ʉmue,
mwemue mʉvʉhɨlile kʉkʉtʉghana ʉsue.
13 Lɨno,
nijova numue hwene nijova na vanango,
mʉvisaghe nʉ lʉghano ʉlʉkome kʉlyʉsue,
ndavʉle ʉsue vʉle tʉlɨvuo.
Ʉvʉhangɨlanɨsi na vaanhu vano navɨtɨki
14 Namʉngavisaghe vʉhangɨlanɨsi na vaanhu vano navɨtɨki.
Asi,
ʉvʉgholofu nʉ vʉhosi ndepoonu fiiva vʉmo ndaani?
Nambe ʉlʉmuli nɨ ngʼhiisi ndepoonu fiiva pepamo?
15 Kange,
ʉKɨlɨsite nʉ Setano ndepoonu vipʉlɨngʼhana?
Nambe ʉmwɨtɨki na jʉno namwɨtɨki,
ndepoonu viiva vʉhangɨlanɨsi vʉki?
16 Ɨnyumba ɨnyɨmɨke ɨja Ngʉlʉve ndepoonu jiiva vʉmo ni fihwani ifya mangʉlʉve?
Ʉsue tʉlɨ nyumba nyɨmɨke ja Ngʉlʉve jʉno mwʉmi!
Ndavʉle ʉNgʉlʉve jʉjuo vʉle alyajovile,
“Nilikukala mʉ veene na kughenda palɨkɨmo na veene.
Niliiva Ngʉlʉve ghwave,
voope viiva vaanhu vango.”c
17 Lɨno,
ʉMʉtwa iiti,
“Mʉvʉʉke pakate pa veene,
mubaghʉle navo.
Namʉngakolaghe ɨkɨɨnu ɨkɨlamafu,
na jʉʉne pe kyanɨkʉvʉpɨla.”d
18 Niiva Nhaata ghwinu,
na jʉmue muuva vaswambango na valɨvango.
ɄMʉtwa ʉNgʉlʉve ʉNyangʉfu Sooni,
ijova!