7
Lɨno vaghanɨke vango,
ʉlwakʉva ʉNgʉlʉve afingile kʉkʉtʉpeela isio sooni sino atʉlaghile,
tuvalasyaghe mʉ sooni sino sikʉtʉpelela kuuva valamafu amavɨlɨ na moojo ghiitu.
Tʉvisaghe vɨmɨke mʉlwa kʉmwoghopa ʉNgʉlʉve.
Ʉlʉkeelo lwa Paulo
2 Mʉtwʉpɨle mʉ moojo ghiinu,
ʉlwakʉva nakwale jʉno tʉmhokile,
nakwale jʉno tʉmʉlemisie mʉ lʉmonga,
nambe jʉno tʉnsyangile.
3 Nanijova amasio agha,
kʉkʉvahɨgha,
ndavʉle nɨkajovile ʉlʉtasi,
ʉmue mʉlɨ nkate mʉ moojo ghiitu,
tʉlɨ palɨkɨmo numue mʉ vwʉmi ʉvʉ,
nambe kʉʉve kwe kʉfua.
4 Pano nijova numue nɨlɨ nsila vwoghofi,
kange nikughinia fiijo vwɨmɨla ʉmue.
Mʉngʼhangisie fiijo,
napano tupumuka mʉ nyinga,
mʉmbɨkile nɨɨve nʉ lʉkeelo ʉlʉkome.
5 Ye tʉfikile kʉ Makedonia tʉkakunilue kupʉʉma,
ʉlwakʉva tʉkaale ni mhumuko imbale sooni:
kʉnji kʉkaale nʉ vʉlʉgʉ,
nkate mʉ moojo ghiitu mʉkaale nʉ lʉdwesi.
6 Neke ʉNgʉlʉve ʉnya kʉvakangasia vano valɨ mʉ vʉkamɨngʼhanɨlua mʉ moojo ghaave,
akatʉkangasia mʉlwa kwisa ʉTiito.
7 Nakwekʉti tʉkakangasivue mʉlwa kwisa ʉTiito lwene,
looli na vʉle mʉkankangisie ʉmwene.
Akatwoliike vʉle mʉsyʉkilue ʉne,
na vʉle musukunala na kʉkʉhangajɨkɨla ʉne.
Isio simheliile kuhovoka kyongo.
8 Palɨkɨmo na kuuva ɨkalata jɨno nɨkavalembiile jɨkavapeliile ʉlʉsukunalo,
nanikupɨɨka.
Nambe nɨkipɨkile padebe ʉlwa kwanda,
ɨkalata ɨjio jɨkavapeliile ʉlʉsukunalo ʉnsiki nʼdebe vʉvʉle.
9 Neke nɨlɨ nʉ lʉkeelo,
nakwekʉti nɨlɨ nʉ lʉkeelo ʉlwakʉva mʉkaale nʉ lʉsukunalo,
jeeje!
Ʉlwene nɨlɨ nʉ lʉkeelo,
ʉlwakʉva ʉlʉsukunalo lwinu lʉkavapeleliile mʉlaate ʉvʉhosi vwinu.
Ʉlʉsukunalo lwinu lʉkaale mʉ vughane vwa Ngʉlʉve,
mʉ ʉluo natʉkavalemisie vwɨmɨla sino tʉkavalembiile.
10 Ʉlʉsukunalo lʉno lukwisa vwɨmɨla ʉvughane vwa Ngʉlʉve lupelela ʉlʉlaato.
Ʉlʉlaato ʉluo,
lwe lʉno lupelela ʉvʉpoki.
Ʉlʉsukunalo ndavʉle ʉluo nalwa kupɨɨka.
Looli ʉlʉsukunalo lʉno lukwisa vwɨmɨla imbombo sa mʉ ɨɨsi,
luleeta ʉvʉfue.
11 Lolagha,
ʉlʉsukunalo lʉno lukwisa vwɨmɨla ʉvughane vwa Ngʉlʉve,
lʉvapeleliile kuuva nɨ kɨvavɨlɨsi ɨkya kʉvomba sino sinoghiile,
lʉvapeleliile kukujoleka kuuti sino muvomba sa kyangʼhaani,
kukalalɨla ʉvʉhosi,
kʉkʉmwoghopa ʉNgʉlʉve,
kusyʉkua kʉkʉmbona,
na kuvona kuuti jʉno ahokile ʉpiile ʉlʉhombo lwake.
Mʉ isio sooni muhʉfisie kuuti mʉlɨ vasila nkole mʉ mhola ɨjɨ.
12 Lɨno,
nambe nɨkavalembiile ɨkalata jɨla,
nanɨkalembile vwɨmɨla ʉmuunhu jʉno amhokile ʉjʉnge,
nambe jʉno avombilue fivi.
Looli nalondagha kuuti mʉkagʉle jʉmue pamaaso gha Ngʉlʉve,
vʉle mʉkaghimbile kukutavʉla vwɨmɨla ʉsue.
13 Mʉ ʉluo mʉtʉkangisie.
Palɨkɨmo nʉluo,
tʉkaale nʉ lʉkeelo ʉlʉkome ʉTiito ye atʉvʉlile vʉle mʉkamhovwisie mʉ mwojo.
14 Ʉne nɨkavaghinisie fiijo ʉmue pamaaso ghaake,
na jʉmue namʉngʼhosisie isoni.
Sooni sino twavavʉlagha sikaale sa kyangʼhaani.
Enendɨɨkɨ,
na sino tʉkavaghinisie ʉmue kwa Tiito,
soope sivoniike kuuti sa kyangʼhaani.
15 Ʉlʉghano lwa Tiito kʉlyʉmue lufikwongelela,
pano ikʉmbʉka ʉvʉkʉndi vwinu mweni na vʉle mʉkamwʉpiile vʉnono,
kange nʉ vwoghofi.
16 Nɨhovwike fiijo vwɨmɨla ʉmue,
ʉlwakʉva lɨno nɨnoghiile kʉkʉvahʉvɨɨla lwoni.