Ʉmwojo ʉghwa kʉvatanga avange
8
Lɨno vanyalʉkolo viitu,
tulonda tʉvavʉʉle ndavʉle ʉNgʉlʉve afisʉngʉkiile ifipʉgha fya vɨtɨki kʉ Makedonia ʉmwojo ʉghwa kʉtavʉla.
2 Palɨkɨmo nakʉti avɨtɨki avuo valyale vakotofu kyongo na kuuva mʉ mhumuko sino silyale papinga,
valyale nʉ lʉkeelo ʉlʉkome lʉno lʉkavapelela kuuva vakoola fiijo kutavʉla ifiinu fyave.
3 Nɨkʉvavʉʉla kuuti valyatavwile ifiinu finga,
kukila vʉle valyale.
Kange,
valyatavwile mʉ vughane vwave
4 na kʉkʉtʉpelepesia kuuti,
voope vavisaghe mʉ mbombo ɨja kʉvatanga avɨtɨki ava kʉ Yelusalemu.
5 Valyavombile ʉluo kukila vʉle tʉlyale tuhʉvɨɨla.
Vakitavwile taasi kwa Mʉtwa,
neke vakitavʉla kʉlyʉsue.
Vakavombile ʉluo ndavʉle ikeela ʉNgʉlʉve.
6 Lɨno,
tʉkampelepesia ʉTiito kuuti iise avatange kumala ɨmbombo ɨjio,
ʉlwakʉva ghwe jʉno akatengwile ɨmbombo ɨjio kʉlyʉmue.
7 Ndavʉle mʉlɨ vamofu mʉ sooni:
mʉ lwɨtɨko,
mʉ kɨpelua ɨkya kʉpʉlɨsia,
mʉ vʉkagʉsi,
kughimba mʉ sooni inofu,
palɨkɨmo nʉ lʉghano lwinu kʉlyʉsue,a
lɨno mʉvisaghe vamofu na mʉ mbombo ɨjɨ ɨja kʉvatanga avange.
8 Pano nijova isi nakwekʉti nilonda kʉkʉvʉmɨlɨsia,
ʉlwene nɨkʉvavʉʉla imhola isa vange ndavʉle vighimba,
kange nilonda kulola ʉlʉghano lwinu nave lwa kyangʼhaani.
9 Ʉlwakʉva ʉmue mʉkagwile vʉle ʉMʉtwa ghwitu ʉYesu Kɨlɨsite akavasʉngʉkiile,
napano alyale mmofu,
akivɨɨka nkotofu vwɨmɨla ʉmue,
neke mʉ vʉkotofu vwake,
ʉmue mʉʉve vamofu.
10 Lɨno,
vwɨmɨla ɨmhola ɨjɨ,
nɨkʉvavʉʉla lʉno lʉnoghiile kʉlyʉmue:
Mʉnoghiile kumala sino mwatengʉla ʉmwaka ghʉno ghwakila.
Ʉmwaka ʉghuo,
ʉmue mwava vatasi kuhʉfia ʉvʉfumbue ʉvwa kʉsangʉla na kutengʉla kuvomba ʉluo.
11 Lɨno,
ndavʉle mʉkaale munoghelua fiijo kuvomba ʉluo ye mutengʉla,
mʉmale ɨmbombo ɨjio,
mutavʉle na kuhʉmia kulɨngʼhana na fino mʉlɨ nafyo.
12 Nave ʉmuunhu itavʉla mʉ vughane vwake,
ʉNgʉlʉve ɨkʉmwʉpɨla,
ʉlwakʉva ʉNgʉlʉve ikwʉpɨla kulɨngʼhana na fino ʉmuunhu alɨ nafyo,
nakwekʉti fino naalɨ nafyo.
13 Ʉvʉfumbue vwitu,
nakwekʉti ʉmue mʉdʉjue nʉ nsigho ʉghwa kʉtanga avange,
neke aveene vavisaghe kwaki,
ʉlwene nilonda mʉlɨngʼhanaghe.
14 Ʉnsiki ʉghʉ pano mʉlɨ ni fiinu finga,
mʉvatangaghe vano navalɨ nafyo,
neke voope pano viliiva ni fiinu finga vilikʉvatanga ʉmue.
Mʉ ʉluo muuva mʉlɨngʼhiine,
15 ndavʉle lɨlembilue,
“Jʉno akakongʼhanisie finga,
naakaale ni fya kʉsighala,
jʉno akakongʼhanisie fidebe naakaghilue.”b
ɄTiito na vanine visungʼhua kʉ Kolinto
16 Nɨkʉmhongesia ʉNgʉlʉve jʉno ampeliile ʉTiito ʉmwojo ʉghwa kughimba kʉkʉvatanga ʉmue,
ndavʉle nɨlɨ naghwo ʉne.
17 Ʉlwakʉva ye tʉkʉnsʉʉma kuuti iise kʉlyʉmue,
akakʉndile.
Kange,
ghwope jʉjuo alɨ nʉ vʉsyʉkue ʉvʉkome ʉvwa kwisa kʉkʉvatanga.
18 ɄTiito ʉjuo,
tʉkʉnsuungʼha nʉ nyalʉkolo ghwitu ʉjʉnge jʉno ifipʉgha fyoni ifya vɨtɨki fikʉmʉghinia mʉ mbombo ɨja kʉpʉlɨsia ɨMhola ɨNofu.
19 Kange,
ifipʉgha ifya vɨtɨki finsalwile ʉnyalʉkolo ghwitu ʉjuo,
kuuti avisaghe palɨkɨmo nusue pano tutwala ʉlʉtango kʉ vaanhu.
Ɨmbombo ɨjio,
jɨkʉmʉghinia ʉMʉtwa,
kange jihʉfia vʉle tughimba kʉkʉvatanga avange.
20 Natulonda tʉpɨkwaghe nʉ muunhu ghweni vwɨmɨla ʉvwɨmɨlɨli ʉvwa kʉtwala ifiinu fino avaanhu vatavwile mʉ vʉkoola vwave.
21 Ʉvʉfumbue vwitu,
tulonda kuvomba vʉnono pamaaso gha Mʉtwa na pamaaso gha vaanhu.
22 Tʉkʉnsuungʼha ʉnyalʉkolo ghwitu ʉjʉnge aave palɨkɨmo na va Tiito.
Ʉnyalʉkolo ʉjuo kekinga tʉmwaghile kuuti alɨ nɨ kɨvavɨlɨsi kuvomba ɨmbombo,
neke lɨno alɨ nɨ kɨvavɨlɨsi ɨkɨkome kukila ʉlʉtasi,
ʉlwakʉva ɨkʉvahʉvɨɨla fiijo ʉmue.
23 Lɨno,
nave ʉmuunhu ilonda kukagʉla imhola sa Tiito,
ʉjʉ mʼbomba mbombo palɨkɨmo nuune mʉlwa kʉvatanga ʉmue.
Neke nave ilonda kukagʉla imhola sa vange,
avuo vanyalʉkolo viitu,
vasungʼhilue ni fipʉgha fya vɨtɨki,
voope vikʉmʉghinia ʉKɨlɨsite.
24 Lɨno,
mʉvahʉfyaghe avaanhu avuo ʉlʉghano lwinu,
neke ifipʉgha ifya vɨtɨki fikagʉle kuuti sino tukughinia vwɨmɨla ʉmue,
se seene.