Ʉlʉtango kʉ vɨtɨki ava kʉ Yelusalemu
9
Lɨno,
nɨlɨ nsila ɨkya kʉvalembela vwɨmɨla ʉlʉtango lwinu kʉ vɨtɨki ava kʉ Yelusalemu,
2 ʉlwakʉva nɨkagwile ʉmwojo ghwinu ʉghwa kʉvatanga avange,
na jʉʉne nikughinia vwɨmɨla ʉmue kʉ vaanhu ava kʉ Makedonia,
kuuti,
“Ɨkɨpʉgha ɨkya vɨtɨki ava kʉ kɨghavo ɨkya kʉ Akaya vakilɨngʼhanisie kutavʉla kuhʉma ʉmwaka ghʉno ghwakila.”
Ʉmwojo ghwinu ʉghuo ghʉvapeliile vinga mʉ veene kuuva nʉ mwojo ʉghwa kʉtavʉla.
3 Lɨno,
nɨvasungʼhile avanyalʉkolo viitu ava,
kuuti mʉvombe ndavʉle nɨkavaghinisie kʉ vaanhu ava kʉ Makedonia,
neke sino tʉkavavʉlile vwɨmɨla ʉmue sileke kuvoneka kuuti twavaghiniagha vʉvʉle.
4 Ʉlwakʉva nave niise ʉkuo palɨkɨmo na Vamakedonia na kuvona namulɨngʼhanisie,
apuo muuva mʉngʼhosisie isoni vwɨmɨla ʉlʉhʉvɨɨlo lwitu kʉlyʉmue.
Kange,
na jʉmue kyande muuva ni soni sino nasili vʉjovo.
5 Lɨno,
nɨvwene lʉnono nɨvasʉʉme avanyalʉkolo viitu ava,
valongole ʉkuo,
kuuti valɨngʼhanie ifiinu fino mʉkalaghile.
Mʉ ʉluo muuva mʉtavwile nʉ mwojo ʉmʼbalafu,
nakwekʉti jʉmonga iiva avʉmɨlisie.
Kutavʉla ɨlɨtekelo nʉ mwojo ʉmʼbalafu
6 Mʉkʉmbʉkaghe kuuti,
“Ʉmuunhu jʉno ivyala fidebe,
ipeta fidebe;
jʉno ivyala finga,
ipeta finga.”
7 Ʉmuunhu ghweni atavʉlaghe ndavʉle alamwile mʉ mwojo ghwake,
alekaghe kutavʉla nʉ lʉsukunalo nambe kukwʉmɨlɨsɨvua,
ʉlwakʉva ʉNgʉlʉve ɨkʉmʉghana ʉmuunhu jʉno itavʉla nʉ mwojo ʉmʼbalafu.
8 Pe ʉNgʉlʉve ɨkʉvafunyagha mʉ nyinga,
kuuti jaatu mʉvisaghe ni fiinu fyoni fino mulonda,
neke mʉvisaghe vaanhu va kʉvomba inofu nyinga isa kʉvatanga avange.
9 Ndavʉle lɨlembilue mʉ Malembe aMɨmɨke kuuti,
“Atavwile nʉ mwojo ghwoni,
kʉkʉvapeela avakotofu.
Ʉvʉkoola vwake vwa fighono fyoni.”a
10 ɄNgʉlʉve ghwe jʉno ɨkʉmpeela ʉmuunhu ɨmbeju ɨja kʉvyala nʉ nkate ʉghwa kʉlia,
ɨkʉvapeela ɨmbeju ɨja kʉvyala na kʉkʉvongelesia.
Kwekʉti,
ɨkʉvapeela na kʉkʉvongelesia ʉmwojo ʉghwa vʉkoola.
11 Ɨkʉvapelagha ʉvʉmofu mʉ sooni kuuti,
mʉvisaghe vapeesi ifighono fyoni.
Mʉ ʉluo avaanhu vikʉmhongesyagha ʉNgʉlʉve vwɨmɨla ifiinu fino tʉkʉvatwalɨla kuhʉma kʉlyʉmue.
12 Ʉlwakʉva ɨmbombo ɨjɨ jɨno muvomba,
nakwekʉti jitanga va vɨtɨki vano vaghilue,
looli jipelela avaanhu vinga vamhongesyaghe fiijo ʉNgʉlʉve.
13 Ɨmbombo ɨjio jihʉfia kuuti ʉmue mʉlɨ vavombi vanofu,
mʉ ʉluo avaanhu vikʉmʉghinia ʉNgʉlʉve.
Vikʉmʉghinia vwɨmɨla ʉvʉkʉndi vwinu ʉvwa kwɨtɨka ɨMhola ɨNofu ɨja Kɨlɨsite pamaaso gha vaanhu.
Kange,
vikʉmʉghinia pano vikʉvwagha ʉvʉkoola vwinu mʉlwa kʉhangɨlanɨla ifiinu fiinu palɨkɨmo na veene na vange vooni.
14 Pe vikʉvasʉmɨlagha kwa Ngʉlʉve nʉ mwojo ghwoni,
vwɨmɨla ʉlʉsʉngʉ lʉno ʉNgʉlʉve avapeliile.
15 Tʉmhongesyaghe ʉNgʉlʉve vwɨmɨla ɨkɨpelua ɨkɨvaha ɨkya kʉdegha,
kɨno atʉpeliile.