ɄPaulo ɨkʉvamʉla vano vikʉmʼbenapʉla
10
Lɨno,
ʉne ne Paulo ne jʉno nivoneka nɨlɨ mhʉʉgʉ pano nɨlɨ palɨkɨmo numue,
neke nivoneka nɨlɨ nkali pano nɨlɨ kʉtali numue,
nɨkʉvasʉʉma mʉ lujisio na mʉ vʉhʉʉgʉ vwa Kɨlɨsite,
2 niliiva nisile kʉlyʉmue mʉlekaghe kʉkʉmhelela kuuva nkali.
Ʉlwakʉva nɨnoghiile kuuva nkali kʉ vaanhu vooni vano visaagha kuuti ʉsue tuvɨngɨlɨla isa mʉ ɨɨsi.
3 Poope nambe tukukala mʉ ɨɨsi,
natulua ɨlɨlʉgʉ ndavʉle ava mʉ ɨɨsi.
4 Ifilwɨlo fino tulwɨla ɨlɨlʉgʉ ɨlio nafya mʉ ɨɨsi,
looli fili ni ngʉfu kuhʉma kwa Ngʉlʉve,
finangania amalinga ghooni agha valʉgʉ.
Tunangania amasio ghooni agha vʉdesi,
5 agha kughinia ghano ghisigha avaanhu kuuti valeke kʉkʉnkagʉla ʉNgʉlʉve.
Kange,
tughoma amasaaghe ghooni kuuti ghankʉndaghe ʉKɨlɨsite.
6 Neke muliiva mʉkʉndile lwoni,
ʉsue tulɨngʼhanisie kuhɨgha inongua sooni sino nasa vʉkʉndi.
7 Ʉmue mulola fino fivoneka pamaaso ghiinu.
Ʉmuunhu ghweni jʉno ikuvona kuuti ʉmwene ghwa Kɨlɨsite,
akagʉlaghe kuuti na jʉsue tʉlɨ vaanhu va Kɨlɨsite,
ndavʉle ʉmwene.
8 Nanivona soni kukughinia vwɨmɨla ʉvʉtavʉlɨlua vʉno ʉMʉtwa atʉpeliile,
ʉlwakʉva ʉvʉtavʉlɨlua ʉvuo navʉkʉvanangania,
looli vʉkʉvatanga mʉ lwɨtɨko.
9 Pano nɨkʉvalembela ikalata,
nanilonda pikʉvoghofia.
10 Ʉlwakʉva vamonga viiti,
“Ikalata sa Paulo sili na masio amakali,
kange sili na masio amatalamu.
Neke pano alɨ palɨkɨmo nusue iiva nsila ngʉfu,
kange amasio ghaake naghikola.”
11 Ʉmuunhu jʉno ijova enendɨɨkɨ akagʉlaghe kuuti,
sino tʉkʉvalembela pano tʉlɨ kʉtali,
se sino kyatuvomba pano tʉlɨ numue.
12 Natukuvɨɨka nambe padebe mʉ kɨpʉgha kɨmo nambe kukuhwanania na vaanhu vano vikughinia vavuo.
Avaanhu vano vikulɨngʼhania na kukuhwanania vavuo,
navakɨtangʼhinie kɨmonga.
13 Neke ʉsue natʉngighinie kukila ɨkɨghelelo ɨkya mbombo jɨno atʉpeliile ʉNgʉlʉve.
Ɨmbombo ɨjio je jɨno tuvomba kwoni kʉlyʉmue.
14 Natukughinia kukila ɨkɨghelelo ɨkya mbombo jiitu pano tujova nʉ vʉtavʉlɨlua kʉlyʉmue,
kange ʉsue tʉlyale va kwanda kʉkʉvaletela ɨMhola ɨNofu ɨja Kɨlɨsite.
15 Kange,
natukughinia vwɨmɨla ɨmbombo ɨja vaanhu avange.
Looli tuhʉvɨɨla kuuti vʉle ʉlwɨtɨko lwinu lukwongelela,
pe ɨmbombo jiitu pakate palyʉmue jikwongelelagha.
16 Apuo pe kyande tupʉlɨsia ɨMhola ɨNofu kʉ ɨɨsi isingi kʉno ɨMhola ɨjio najɨpʉlɨsivue.
Ʉlwakʉva natulonda kukughinia vwɨmɨla ɨmbombo jɨno jɨvombilue mʉ ɨɨsi nʉ muunhu ʉjʉnge.
17 AMalembe aMɨmɨke ghiiti,
“Ʉmuunhu jʉno ikughinia,
ighiniaghe vwɨmɨla ʉMʉtwa.”a
18 Ʉlwakʉva ʉmuunhu ghweni jʉno ikughinia jʉjuo naikwɨtɨkɨsɨvua,
looli jʉno ighinisivua nʉ Mʉtwa.