ɄPaulo na vasungʼhua ava vʉdesi
11
Poope nambe nijova hwene nɨlɨ nʼjasu,
nisʉʉma mʉmhʉlɨkɨsie.
2 Ʉne nɨlɨ nɨ kɨvavɨlɨsi numue,
ɨkɨvavɨlɨsi ɨkɨhʉma kwa Ngʉlʉve,
ʉlwakʉva mʉlɨ ndavʉle ʉmhɨnja jʉno naammanyile ʉmʉghoosi,
jʉno nɨkantavwile kutolua nʉ mʉghoosi jʉmo,
jʉno ghwe Kɨlɨsite.
3 Neke lɨno nikwoghopa kuuti,
ndavʉle ʉEefa vʉle alyasyangilue nɨ njoka jɨla ɨsʉfu,
na jʉmue kyande musyangua,
mʉkʉvʉleka ʉvʉgholofu nʉ lʉghano lwinu ʉlwa kyangʼhaani kwa Kɨlɨsite.
4 Nijova enendɨɨkɨ,
ʉlwakʉva ʉmue mʉlɨ vangʉfi kukwʉpɨla ʉmuunhu jʉno ikwisa kupʉlɨsia ʉYesu ʉjʉnge,
jʉno ʉsue natʉkampʉlisie.
Kange,
mukwʉpɨla ʉmhepo ʉjʉnge nambe ɨmhola ɨjɨngɨ,
jɨno namʉkʉpiile kuhʉma kʉlyʉsue.
5 Ʉne nakwekʉti nɨlɨ nʼdebe kukila avuo vano vikuvona ve “vasungʼhua vavaha.”
6 Nambe nivoneka nanijova vʉnono,
ʉvʉkagʉsi vwango vʉkome.
Tʉhʉfisie ʉluo kʉlyʉmue ʉnsiki ghwoni ni mbale sooni.
7 Asi,
nɨkavombile fivi vʉle nikijisisie mʉlwa kʉpʉlɨsia ɨMhola ɨNofu ɨja Ngʉlʉve kʉlyʉmue kɨsila lʉhombo,
kuuti ʉmue mʉghinisivue?
8 Ye nivomba ɨmbombo kʉlyʉmue,
nʉpɨlagha ʉlʉtango kuhʉma kʉ fipʉgha ifingi ifya vɨtɨki.
Mʉ ʉluo nɨkaale hwene nikuunya ifiinu fyave,
neke nɨvatange ʉmue.
9 Ʉnsiki ye nɨlɨ palɨkɨmo numue,
pano naghɨlwagha nanɨkaale nsigho kwa muunhu,
ʉlwakʉva avɨtɨki vano vakahʉmile kʉ Makedonia vakamheliile fino nɨkaale nilonda.
Mʉ ʉluo,
nɨkaale nikulolelela kuuti nɨleke kuuva nsigho kʉlyʉmue nambe padebe,
kange nifikulolelelagha.
10 Nijova niiti,
ndavʉle ʉvwakyangʼhaani vwa Kɨlɨsite vʉle vʉlɨvuo nkate mʉlyʉne,
nakwale ʉmuunhu nambe jʉmo mʉ lɨkaaja lyoni ɨlya Akaya,
jʉno kyaɨkʉsigha kukughinia vwɨmɨla ɨmhola ɨjɨ.
11 Pano nijova enendɨɨkɨ nakwekʉti nanɨvaghanile,
ʉNgʉlʉve akagwile kuuti nɨvaghanile.
12 Nifivombagha ndavʉle nivomba lɨno,
kuuti avasungʼhua avuo vano viiti ve vavaha,
vakunue ɨkya kughinia kuuti vivomba ndavʉle ʉsue.
13 Avaanhu ndavʉle avuo vasungʼhua va vʉdesi,
ve vavombi avasyangi,
vikuvɨɨka hwene vasungʼhua va Kɨlɨsite.
14 Mʉ ʉluo natudegha,
ʉlwakʉva najʉ Setano jʉjuo ikuvɨɨka hwene nyamhola ghwa lʉmuli.
15 Kange,
natudegha pano voope avavombi vaake vikuvɨɨka hwene vavombi vagholofu.
Ʉvʉsililo vwave vilikwʉpɨla sino silɨngʼhiine ni mbombo saave.
ɄPaulo ikughinia vwɨmɨla ʉlʉpumuko lwake
16 Nɨkʉvavʉʉla kange niiti,
ʉmuunhu naangasaghaghe kuuti ʉne nɨlɨ nʼjasu!
Neke nambe mwiti nɨlɨ nʼjasu,
nɨkʉvasʉʉma mʉmhʉlɨkɨsie,
neke na jʉʉne nighinie padebe.
17 Amasio ghano nijova lɨno agha kughinia,
nanɨlaghilue nʉ Mʉtwa,
looli nijova hwene muunhu nʼjasu.
18 Ʉlwakʉva vinga vikughinia vwɨmɨla isa mʉ ɨɨsi,
na jʉʉne nighinie.
19 Ʉmue mukuvona mʉlɨ nʉ lʉhala,
fye nambe mukuguda na kʉkʉvakʉnda nʉ lʉkeelo avaanhu avajasu.
20 Mukuguda na kʉkʉnkʉnda nambe ʉmuunhu jʉno ɨkʉvavɨɨka mʉ vʉkami,
ɨkʉvahɨjɨla na kukuunya ifiinu fiinu,
kange ikughinia na kʉkʉvaligha na kʉkʉvavapʉla.
21 Nivona soni kujova kuuti,
pe ʉsue tʉkaale vavotevote kuleka kuvomba isio.
Lɨno nijova hwene nɨlɨ nʼjasu,
nave kwale ʉmuunhu jʉno anoghiile kukughinia vwɨmɨla kɨmonga,
na jʉʉne nɨnoghiile kukughinia.
22 Nave aveene Vaebulania,
na jʉʉne nɨlɨ Mʉebulania;
nave aveene Vaisilaeli,
na jʉʉne nɨlɨ Mʉisilaeli;
nave aveene kɨkolo kya Abulahamu,
na jʉʉne nɨlɨ ghwa kɨkolo kya Abulahamu.
23 Lɨno nɨjove hwene nɨhasɨngʼhiine ʉlʉhala,
nave aveene vavombi va Kɨlɨsite,
ʉne neene mʼbombi ghwa Kɨlɨsite kukila aveene.
Ʉne nɨghimbile kuvomba ɨmbombo kukila,
kekinga nɨdindilue mʉ ndinde,
kekinga navisagha mʉ lʉtalamu ʉlwa kʉfua,
kange nɨtovilue kyongo.
24 Nɨkopilue na Vayahudi ingʼhwegho fijigho fitatu na budikalʉbale,
nɨvombilue ʉluo kahaano.
25 Nɨkopilue na Valooma katatu,
nɨtovilue na mavue kamo,
ɨngalavaa jɨnangɨkiile katatu,
kange nɨkikalile mʉ nyanja pakɨlo na pamwisi.
26 Kekinga pano nakyʉlagha,
navisagha mʉ lʉtalamu ʉlwa kʉsyolua ni ndenga,
mʉ lʉtalamu ʉlwa kʉkolua na vahɨjɨvabudi,
mʉ lʉtalamu ʉlwa kʉtovua na Vayahudi avajango na vaanhu vano naVayahudi.
Navisagha mʉ lʉtalamu ʉlwa valʉgʉ vango mʉ makaaja ni fikanu kʉ lɨhaka,
mʉ lʉtalamu ʉlwa mʉ nyanja na mʉ lʉtalamu ʉlwa kʉpumusivua na vano vikuvɨɨka vɨtɨki vajiitu.
27 Nɨvombile ɨmbombo ɨnhalamu na kupumuka,
kekinga nɨghonile maaso,
nɨpumwike nɨ njala nɨ kyʉmɨlua,
kekinga nikalile kɨsila kyakʉlia,
na kukukala kʉ mhepo kɨsila menda.
28 Palɨkɨmo nisio sooni,
jaatu nisaagha vwɨmɨla ifipʉgha fyoni ifya vɨtɨki.
29 Nave jʉmonga mʼbotevote,
na jʉʉne nikupʉlɨka mʼbotevote;
nave jʉmonga vankʉvisie,
na jʉʉne niiva nʉ vʉvafi.
30 Nave lʉnoghiile kukughinia,
nikughinia vwɨmɨla ʉvʉvotevote vwango.
31 ɄNgʉlʉve,
ʉNhaata ghwa Mʉtwa ʉYesu,
jʉno anoghiile kughinisivua ifighono fyoni,
akagwile kuuti nanijova vʉdesi.
32 Ye nɨlɨ mʉ lɨkaaja ɨlya Damesiki,
ʉmʉlongosi jʉno akalongosyagha ɨkɨghavo kɨno kyale mʉ vʉtwa vwa ntwa ʉAleta,
alyavɨkile avaloleleli mʉ malyango agha lɨkaaja ɨlio kuuti vangʼhole.
33 Looli avaanhu vamonga vakanyisia mʉ kiivo kukilila pa lɨdiliisa lɨno lɨlyale mʉ lʉvʉmba ʉlwa lɨkaaja,
nɨkakuluka kukolua.b