Inyivonelo sa Paulo nʉ vʉvotevote vwake
12
Nɨnoghiile kukughinia nambe nakuvʉmbʉlɨla kɨmonga.
Lɨno,
nitapikughinia vwɨmɨla inyivonelo ni mhola isingi sino ambonisie ʉMʉtwa ʉYesu.
2 Nɨmmanyile ʉmuunhu jʉmo ʉmʼbɨngɨlɨli ghwa Kɨlɨsite,
jʉno amaaka kɨjigho na ghane ghano ghakilile,
alyatolilue kuhanga kufika kʉ vʉlanga ʉvwa kʉkyanya fiijo.a
Ye itolua,
apuo nanɨkagwile pamo alyale mʉ mʼbɨlɨ ʉghʉ,
pamo naalyale mʉ mʼbɨlɨ ʉghʉ,
looli ʉNgʉlʉve ghwe mwene akagwile.
3-4 Nɨkagwile kuuti ʉmuunhu ʉjuo alyatolilue kuhanga kufika kʉ Paladɨsi.b
Neke nanɨkagwile kuuti,
pamo alyatolilue mʉ mʼbɨlɨ ʉghʉ,
pamo naalyale mʉ mʼbɨlɨ ʉghʉ,
looli ʉNgʉlʉve ghwe mwene akagwile.
Ʉkuo akapʉlɨka amasio agha kʉdegha kyongo ghano ʉmuunhu naangajove,
kange naanoghiile kujova.
5 Lɨno,
nikughinia vwɨmɨla ʉmuunhu ʉjuo.
Ʉne nanikughinia vʉle nɨlɨvuo,
ʉlwene nikughinia vwɨmɨla ʉvʉvotevote vwango.
6 Nambe nale nɨlondaghe kukughinia,
nanaale niiva nʼjasu,
ʉlwakʉva niiva nijova isa kyangʼhaani.
Lɨno,
nikusigha kukughinia,
kuuti ʉmuunhu ghweni alekaghe kʉkʉmbona ʉne kuuti nɨnoghiile kyongo kukila sino vikʉsivona na kʉkʉsipʉlɨka kuhʉma kʉlyʉne.
7 Neke kuuti nɨleke kukughinia kyongo vwɨmɨla inyinga isa kʉdegha sino ʉMʉtwa ʉYesu ambonisie,
nɨkapelua ʉlʉpumuko mʉ mʼbɨlɨ ghwango lʉno lʉlɨ hwene mufua.
Ʉlʉpumuko ʉluo nsungʼhua ghwa Setano,
asungʼhilue kuuti amhumusie,
neke nɨleke kukughinia kyongo.
8 Nɨkansʉʉma ʉMʉtwa katatu kuuti amhoke mʉ lʉpumuko ʉluo.
9 Neke ʉmwene akambʉʉla akati,
“Ʉlʉsʉngʉ lwango lʉkʉkʉkwɨla,
ʉlwakʉva mʉ vʉvotevote mwe muno ingʉfu sango sivoneka.”
Mʉ ʉluo nikughiniagha nʉ lʉkeelo ʉlʉkome vwɨmɨla ʉvʉvotevote vwango,
kuuti ingʉfu sa Kɨlɨsite sivisaghe nuune.
10 Lɨno,
nɨlɨ nʉ lʉkeelo vwɨmɨla ʉvʉvotevote,
kulighua,
kuuva mʉ nhalamu,
kuuva mʉ lʉpumuko na kuhangajɨsɨvua vwɨmɨla ʉKɨlɨsite;
ʉlwakʉva pano niiva mʼbotevote,
pepano niiva ni ngʉfu.
Inganighani sa Paulo vwɨmɨla aVakolinto
11 Lɨno,
nijova hwene nɨlɨ nʼjasu,
ʉmue mwemue mʉmheleliile nɨjove enendɨɨkɨ.
Ʉmue mʉveele mʉnoghiile kʉkʉnginia,
ʉlwakʉva nambe nivoneka kuuti nanɨnoghiile,
ʉne nanɨlɨ nsungʼhua nʼdebe kukila vano mwiti ve “vasungʼhua vavaha.”
12 Ye nɨlɨ kʉlyʉmue,
nɨkaale nʉ lugudo na kuvomba ifidegho ni fivalɨlo fino fyahʉfyagha kuuti ʉne nɨlɨ nsungʼhua.
13 Nakwekɨlɨ kɨmonga kɨno nɨvombile kʉ fipʉgha ifingi ifya vɨtɨki,
neke nanɨvombile kʉlyʉmue.
Pamo navahoka pano nanɨkaale nsigho kʉlyʉmue.
Nave ʉvuo vwe vʉviivi vwango,
mʉsaghɨle!
14 Lɨno,
nikulɨngʼhania kukwisa kʉlyʉmue ʉlwa vʉtatu,
neke nanɨngave nsigho kʉlyʉmue.
Nanilonda ifiinu fiinu,
looli nɨkʉvalonda ʉmue.
Nijova ʉluo,
ʉlwakʉva avaana navanoghiile kuvuta ifiinu kuuti fiive fya vapaafi,
looli avapaafi vanoghiile kuvuta ifiinu kuuti fiive fya vaana.
15 Ʉne nɨlɨ nʉ lʉkeelo kuhʉmia ifiinu fyango na kukuhʉmia jʉʉne kʉkʉvatanga ʉmue.
Neke lɨno luvoneka kuuti pano ʉne nifikʉvaghana fiijo,
ʉmue pe mufikepʉsia kʉkʉngana.
16 Nambe mwɨtɨke kuuti nanɨkaale nsigho kʉlyʉmue,
neke vamonga mʉlyʉmue viiti,
“ɄPaulo nsʉfu,
avakovile nʉ vʉsyangi.”
17 Asi,
nɨkavafumbilingʼhinie kuuti nɨtoole kɨmonga kʉlyʉmue kukilila avaanhu vano nɨkavasungʼhile?
18 Nɨkansʉmile ʉTiito palɨkɨmo nʉ nyalʉkolo ghwitu ʉjʉnge kuuti iise kʉlyʉmue.
Asi,
ʉTiito akatolile kɨmonga kʉlyʉmue?
Ongo ʉne nʉ mwene tʉlɨ mwojo ghʉmo mʉ mbombo,
kange nagha maghendele ghiitu ghe ghamo!
19 Pamo musaagha kuuti ʉnsiki ghwoni ʉghʉ,
tukujoleka neke mʉleke kʉkʉtʉvona kuuti tʉlɨ vaviivi pamaaso ghiinu.
Ʉsue tujova isi,
ʉlwakʉva tʉlɨ vavombi va Kɨlɨsite,
najʉ Ngʉlʉve akagwile.
Vanyalʉkolo,
isi sooni tuvomba kʉkʉvatanga ʉmue mʉ lwɨtɨko.
20 Lɨno nikwoghopa kuuti,
niliiva nikwisa kʉlyʉmue nilikʉvaagha mʉlɨ nʉ lʉveelo lʉno nanikeela ʉne.
Ʉluo,
lulikʉmhelela kuvomba sino namukeela ʉmue.
Nikwoghopa kuuti ndepoonu nilikʉvaagha mʉlɨ na mabaatu,
nɨ giila,
nɨ ngʼhalaasi,
nʉ vʉsʉlani,
na kudeselanɨla,
na kuhehana,
na kukughinia na kuuva na matilingano.
21 Kange,
nikwoghopa kuuti niliiva nikwisa kʉlyʉmue,
ʉNgʉlʉve ghwango ilikʉmbɨɨka nɨvone soni pamaaso ghiinu.
Nilisukunala kuvona avaanhu vinga mʉlyʉmue vano vakavombile inyɨvi ʉlʉtasi,
navalatile.
Vajiighe na maghendele agha vʉvwafu,
ʉvʉghendamwalu nʉ vʉnoghelua ʉvʉnge vʉno vakaale navwo.