Ʉlʉpavɨlo ʉlwa vʉsililo
13
Ʉlʉ luuva lwa vʉtatu ʉne kukwisa kʉlyʉmue.
AMalembe aMɨmɨke ghiiti,
“Ʉvwolesi vʉkagʉlɨke na vaanhu vavɨlɨ nambe vatatu.”a
2 Ye nisile kʉlyʉmue ʉlwa vʉvɨlɨ,
nɨkavavʉlile kuuti,
niliiva nikwisa naniliiva nɨ kɨsa na vaanhu vano vavombile inyɨvi.
Lɨno,
nɨkʉvavʉʉla ʉluo kange kuuti,
naniliiva nɨ kɨsa kʉ veene na vange vooni.
3 Nilivomba ʉluo,
ʉlwakʉva mulonda ɨkɨvalɨlo ɨkya kʉkagʉla nave ʉKɨlɨsite ijova kukilila ʉne.
ɄKɨlɨsite ʉjuo namʼbotevote,
looli nya ngʉfu,
ghwe jʉno ivomba ɨmbombo pakate palyʉmue.
4 Poope nambe ʉKɨlɨsite alyale nsila ngʉfu ye ikomelelua pa kɨkovekano na kufua,
lɨno mwʉmi mʉ ngʉfu sa Ngʉlʉve.
Fye enendɨɨkɨ,
na jʉsue tʉlɨ vasila ngʉfu mwa Kɨlɨsite,
neke pano tʉkʉvavombela ʉmue,
tuuva vʉʉmi palɨkɨmo nʉ mwene mʉ ngʉfu sa Ngʉlʉve.
5 Lɨno,
mughelaghe jʉmue,
neke mʉkagʉle nave mʉlɨ nʉ lwɨtɨko.
Asi,
namʉkʉlʉtangʼhania kuuti,
ʉYesu Kɨlɨsite alɨ nkate mʉlyʉmue?
Nave namʉkʉlʉtangʼhania,
apuo mʉkunilue.
6 Neke nihʉvɨɨla kuuti ʉmue kyamʉkʉlʉtangʼhania kuuti ʉsue natʉkunilue.
7 Tʉkʉnsʉʉma ʉNgʉlʉve kuuti namʉngavombaghe inyɨvi.
Nakwekʉti tulonda tʉvoneke tʉnoghiile,
ʉlwene tulonda ʉmue mʉvombaghe inofu,
nambe ʉsue tuvoneka hwene tʉkunilue.
8 Ʉlwakʉva natʉlɨ ni ngʉfu isa kʉsigha ʉvwakyangʼhaani,
looli kughina kupʉlɨsia ʉvwakyangʼhaani.
9 Tuhovoka,
ʉlwakʉva ʉsue tʉlɨ vavotevote,
neke ʉmue mʉlɨ ni ngʉfu.
Tʉkʉnsʉʉma ʉNgʉlʉve avatange mʉʉve vagholofu.
10 Nɨkʉvalembela amasio agha pano nɨkyale kukwisa,
kuuti niliiva nikwisa kʉlyʉmue,
nanɨngasivonaghe sino ndepoonu sikʉmhelela nɨɨve nkali vwɨmɨla ʉvʉtavʉlɨlua vʉno amheliile ʉMʉtwa.
Ʉlwakʉva ʉMʉtwa naamheliile ʉvʉtavʉlɨlua ʉvwa kʉvanangania,
looli ʉvwa kʉvatanga mʉ lwɨtɨko.
Amasio agha kʉhwesia
11 Lɨno vanyalʉkolo vango,
nɨkʉvalagha niiti,
mʉvisaghe vagholofu,
mʉnyamasaniaghe,
mʉvisaghe vʉmo,
mʉvisaghe nʉ lʉtengaano.
Najʉ Ngʉlʉve ʉnya lʉghano nʉ lʉtengaano iiva palɨkɨmo numue.
12 Mʉhʉngɨlanaghe mʉ lʉghano lwa Kɨlɨsite.
13 Avɨtɨki vooni vano tʉlɨ lʉmo,
vikʉvahʉngɨla.
14 Ʉlʉsʉngʉ lwa Mʉtwa ʉYesu Kɨlɨsite,
nʉ lʉghano lwa Ngʉlʉve,
nʉ vʉhangɨlanɨsi vwa Mhepo ʉMwɨmɨke,
fivisaghe palɨkɨmo numue mweni.