Ɨkalata ɨja vʉvɨlɨ ɨja Paulo kʉ
Vakolinto
Ʉlʉhʉngɨlo
1
Ɨkalata ɨjɨ jɨhʉmile kʉlyʉne ne Paulo,
ne jʉno ʉNgʉlʉve angʼhemelile mʉ vughane vwake nɨɨve nsungʼhua ghwa Yesu Kɨlɨsite.
Ʉne nʉ nyalʉkolo ghwitu ʉTimoti tʉkʉvahʉngɨla ʉmue mwe kɨpʉgha kya vɨtɨki,
mwe vano mʉlɨ mʉ lɨkaaja ɨlya Kolinto,
palɨkɨmo na vɨmɨke vooni vano valɨ mʉ kɨghavo ɨkya Akaya.
2 Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata ghwitu,
na kwa Mʉtwa ʉYesu Kɨlɨsite,
fivisaghe numue.
Ʉlʉkangasio lwa Ngʉlʉve mʉ mhumuko
3 Aghinwaghe ʉNgʉlʉve,
ʉNhaata ghwa Mʉtwa ghwitu ʉYesu Kɨlɨsite,
ʉNhaata ʉnya lʉsʉngʉ,
kange ghwe Ngʉlʉve jʉno ɨkʉtʉkangasia mʉ sooni.
4 Ʉmwene ɨkʉtʉkangasia mʉ mhumuko sooni,
kuuti na jʉsue tʉvakangasyaghe avange vano valɨ mʉ mhumuko sino sili papinga.
Tʉkʉvakangasia ndavʉle ʉNgʉlʉve vʉle ɨkʉtʉkangasia ʉsue.
5 Ʉlwakʉva ndavʉle ʉsue tupumuka vwɨmɨla ʉKɨlɨsite,
enendɨɨkɨ ʉNgʉlʉve fye ifikʉtʉkangasia kukilila ʉKɨlɨsite.
6 Nambe tupumuka,
tupumuka vwɨmɨla ʉlʉkangasio nʉ vʉpoki vwinu.
Kange,
pano ʉsue tukangasivua,
pe na jʉmue mukwʉpɨla ʉlʉkangasio lʉno lʉkʉvapelela kukuguda mʉ mhumuko sino na jʉsue tupumuka.
7 Ʉlʉhʉvɨɨlo lwitu kʉlyʉmue lʉkome,
ʉlwakʉva tʉkagwile kuuti vʉle mupumuka ndavʉle ʉsue,
fye mukangasivua ndavʉle ʉsue.
8 Vanyalʉkolo viitu,
tulonda mʉkagʉle vʉle tʉlyapumwike kʉ kɨghavoa ɨkya Asia.
Imhumuko sino silyatʉvwene silyatʉlemile kyongo,
twatisagha tufua.
9 Kyangʼhaani tʉlyale hwene vaanhu vano vahɨghilue kubudua.
Ʉluo lʉkahʉmiile kuuti tʉleke kuhʉvɨɨla ingʉfu siitu,
looli tʉmhʉvɨlaghe ʉNgʉlʉve,
jʉno isyʉsia avafue.
10 Ʉmwene ghwe jʉno alyatʉpokile ye tʉlɨ mʉ lʉtalamu ʉlwa kʉfua,
kange ifikʉtʉpokagha.
Ʉsue tʉkʉmhʉvɨɨla ʉmwene kuuti ivombagha ʉluo jaatu,
11 vwɨmɨla ʉmue kʉkʉtʉtanga mʉ nyifuunyo siinu kwa Ngʉlʉve.
Ʉmwene ipʉlɨka inyifuunyo siinu na kʉkʉtʉfuunya ʉsue.
Pe avaanhu vinga vikʉmhongesyagha ʉNgʉlʉve vwɨmɨla ʉlʉsʉngʉ lwake kʉlyʉsue.
ɄPaulo ikwandʉla ʉvʉtavɨke vwake ʉvwa kʉlʉta kʉ Kolinto
12 Lɨno,
ʉsue tukughinia mʉ ʉlʉ:
Tukuvona mʉ moojo ghiitu kuuti,
pa ɨɨsi apa,
kyongo pakate palyʉmue,
tukalile mʉ vʉgholofu na mʉ vwakyangʼhaani kuhʉma kwa Ngʉlʉve.
Natwavombagha ʉluo nʉ lʉhala lwitu,
looli mʉ lʉsʉngʉ lwa Ngʉlʉve.
13-14 Mʉ ʉluo natʉkʉvalembela amasio amatalamu,
looli ghano ndepoonu mukwɨmba na kʉkʉghatangʼhania vʉnono.
Napano ʉnsiki ʉghʉ mʉkʉtʉtangʼhania padebe,
nihʉvɨɨla kuuti mulikʉtʉtangʼhania lwoni.
Pe ɨkɨghono kɨno alaava igomoka ʉYesu,
mulikughinia vwɨmɨla ʉsue,
ndavʉle ʉsue vʉle tukughinia vwɨmɨla ʉmue.
15 Ʉlwakʉva nɨkaale nʉ lʉhʉvɨɨlo ʉluo,
nɨkavɨkile ʉvʉtavɨke ʉvwa kwisa taasi kʉlyʉmue.
Mʉ ʉluo mwale muvʉmbʉlɨla fiijo mʉlwa kwisa ʉne kavɨlɨ.
16 Nɨkalamwile kukwisa kʉlyʉmue pano nilʉta kʉ Makedonia,
neke kyande nɨhʉmile kʉ Makedonia,
nɨgomoke kange kʉlyʉmue kuuti mʉmheele ʉlʉtango ʉlwa kʉlʉta kʉ Yudea.
17 Asi,
pano nɨkalamwile kukwandʉla ʉvʉtavɨke vwango ʉvwa kwisa kʉlyʉmue,
musaagha kuuti nɨlɨ nsyetʉngʼhani?
Pamo musaagha kuuti ʉne nilongosivua nʉ vughane vwango,
kuuti nɨɨti,
“Eena,”
neke kange nɨɨti,
“Ndali.”
18 Neke lɨno ndavʉle ʉNgʉlʉve vʉle ghwa kyangʼhaani,
sino tʉkavavʉlile ʉmue,
nasikaale sa kʉti,
“Eena,”
neke kange tʉʉti,
“Ndali.”
19 Ʉlwakʉva ʉYesu Kɨlɨsite ʉMwana ghwa Ngʉlʉve jʉno ʉne,
nʉ Silwano nʉ Timoti tʉkampʉlisie kʉlyʉmue,
naalyale muunhu ghwa kʉhasɨngʼhania amasio ati,
“Eena,”
neke kange ati,
“Ndali.”
Looli ʉmwene jaatu ghwe “Eena,”
kwekʉti sino ijova sa kyangʼhaani.
20 Ʉlwakʉva sooni sino ʉNgʉlʉve alyalaghile kuuti ɨkʉtʉpeela vwɨmɨla ʉKɨlɨsite,
sa kyangʼhaani.
Fye nambe mwa Yesu Kɨlɨsite twiti,
“Ameni,”
kwekʉti sa kyangʼhaani,
vwɨmɨla kʉkʉmʉghinia ʉNgʉlʉve.
21 ɄNgʉlʉve ghwe jʉno ɨkʉtʉvɨɨka ʉsue numue kusindamala mwa Kɨlɨsite.
Kange,
ghwe mwene atʉsalwile
22 na kʉkʉtʉvɨɨka ɨkɨvalɨlo kuuva vaanhu vaake,
na kuvɨɨka mʉ moojo ghiitu ʉMhepo ʉMwɨmɨke,
kuuti lʉvisaghe lwe lʉfingo lwake kʉ fino alaghile kʉkʉtʉpeela.
23 Nanɨkisile kange kʉ Kolinto ʉkuo,
ʉlwakʉva nanɨkaale nilonda kulemasia amoojo ghiinu.
Isi nijova sa kyangʼhaani,
najʉ Ngʉlʉve akagwile.
24 Nakwekʉti ʉsue tulonda kʉkʉvalamʉlɨla sino mʉnoghiile kugadɨlɨla mʉ lwɨtɨko,
ʉlwakʉva ʉmue mʉkangiile mʉ lwɨtɨko.
Kɨno kilondua kʉlyʉsue,
kwe kʉvomba ɨmbombo palɨkɨmo numue kuuti mʉhovokaghe.