26
Pepano ʉAgilipa akamʼbʉʉla ʉPaulo akati,
“Ghukwɨtɨkɨsɨvua kukujoleka jʉʉve.”
Pe ʉPaulo akinula ʉlʉvoko lwake kuuti vampʉlɨkɨsie,
pe akatengʉla kukujoleka akati,
2 “Ghwe ntwa Agilipa,
ʉmʉsyʉghʉ nɨlɨ nʉ lʉkeelo ʉlwakʉva nɨmile pamaaso ghaako kukujoleka sooni sino aVayahudi vikʉhɨgha.
3 Nijova enendɨɨkɨ,
ʉlwakʉva ʉve ʉsimanyile vʉnono inyiiho sooni isa Vayahudi,
na sino vikanɨngʼhana.
Lɨno,
nɨkʉkʉsʉʉma ʉmhʉlɨkɨsie nʉ lugudo.
4 “AVayahudi vooni vakagwile vʉle nɨlyasʉngilue kuhʉma ʉvwana vwango.
Kuhʉma ye nɨlɨ nʼdebe,
nɨkʉliile pakate pa Vayahudi avajango,
kyongo mʉ Yelusalemu.
5 Vangʼhagwile kuhʉma kali,
kange vale vighane,
vale vikwoleka kuuti nɨkaale ʉmo mʉ kɨpʉgha ɨkya Vafalisayi.
Mʉ lwɨtɨko lwitu ɨkɨpʉgha ɨkɨ kivɨngɨlɨla fiijo indaghɨlo isa Ngʉlʉve kukila ifipʉgha fyoni.
6 Lɨno ʉmʉsyʉghʉ nihɨghua,
ʉlwakʉva nihʉvɨɨla ʉlʉfingo lʉno ʉNgʉlʉve alyavalaghile avakʉʉlʉ viitu.
7 Vwɨmɨla ʉlʉfingo ʉluo,
avaanhu va fisina fiitu kɨjigho na fivɨlɨ vikʉmwɨmɨka ʉNgʉlʉve pakɨlo na pamwisi,
ʉlwakʉva vihʉvɨɨla kuuti,
ʉNgʉlʉve ilikʉvavombela ndavʉle alyafingile.
Ghwe ntwa,
aVayahudi vikʉhɨgha vwɨmɨla ʉlʉhʉvɨɨlo ʉluo!
8 Kɨki ʉmue muvona lʉtalamu kyongo kuuti ʉNgʉlʉve isyʉsia avafue?
9 “Na jʉʉne ʉlʉtasi nɨkavwene nɨnoghiile kuvomba sooni isa kʉsigha ɨlɨtavua lya Yesu ʉMʉnasaleti kuuti nalɨngapʉlɨsivwaghe.
10 Isio se sino nɨlyavombile kʉ Yelusalemu.
Ʉne ye nɨpelilue ʉvʉtavʉlɨlua na vavaha va vatekesi,
nɨlyale nɨkʉvadindila mʉ ndinde avɨtɨki vinga.
Nambe pano vahɨghilue kuuti vabudue,
na jʉʉne nɨkɨtɨngʼhanagha nʉ vʉhɨghi ʉvuo.
11 Kekinga nɨkalʉtagha mʉ masinagogi ghooni kʉkʉvapumusia avɨtɨki.
Nɨkavʉmɨlɨsyagha kukaana kuvɨngɨlɨla ʉlwɨtɨko lwave.
Kange,
nɨlyale nɨkʉvakalalɨla kyongo kuhanga kulʉta kʉ makaaja agha kʉ vʉtali kʉkʉvapumusia.
ɄPaulo ikwoleka vʉle alyavangwike
12 “Ɨkɨghono kɨmonga ye nɨlɨ mʉ mbombo ɨjio,
nɨkava nilʉta kʉ lɨkaaja ɨlya Damesiki,
nɨlɨ nʉ vʉtavʉlɨlua kuhʉma kʉ vavaha va vatekesi.
13 Ghwe ntwa!
Ye nɨlɨ mʉ sɨla,
akavalɨlo aka ntanda pamwisi,
nɨkalwagha ʉlʉmuli kuhʉma kʉkyanya lʉno lumulika fiijo kukila ɨlɨjʉva.
Ʉlʉmuli ʉluo lʉkamulika ʉne imbale sooni palɨkɨmo na vajango vano tʉlyaghendinie,
14 tweni tʉkaghua paasi.
Nɨkapʉlɨka ɨlɨsio lɨkʉmbʉʉla mʉ njovele ɨja Kɨebulania liiti,
‘Savʉli,
Savʉli,
kɨki ʉkʉmhumusia?
Pano ghulua nʉ Mʉtwa,
ghukulemasia jʉʉve.’a
15 “Pe nɨkaposia nɨkati,
‘Ntwa,
veeve veeni?’
Ghwope akanyamʉla akati,
‘Ʉne neene Yesu ne jʉno ʉkʉmhumusia.
16 Lɨno inamʉka,
ghwɨme!
Nihʉfisie kʉlyʉve kʉkʉkʉvʉʉla kuuti,
nɨkʉsalwile ʉve kuuva mʼbombi ghwango na kuuva mwolesi ghwa mhola sooni sino ʉsivwene ʉmʉsyʉghʉ,
ni singi sooni sino kyanɨkʉkʉhʉfia.
17 Nɨkʉkʉpokagha kuhʉma mʉ mavoko gha Vayahudi avajaako,
na vano naVayahudi.
Nɨkʉkʉsuungʼha kʉ veene
18 kuuti ʉvadindule amaaso ghaave,
vahʉme mʉ ngʼhiisi na mʉ vʉkamɨngʼhanɨlua vwa Setano,
vingile mʉ lʉmuli lwa Ngʉlʉve,
neke vapyanɨlue inyɨvi saave na kuuva palɨkɨmo na vange vooni vano vavalasivue vwɨmɨla kʉkʉnyɨtɨka ʉne.’
19 “Ghwe ntwa Agilipa,
ye nɨsivwene inyivonelo isio kuhʉma kʉkyanya,
nɨkavwene nalʉnoghiile kukaana.
20 Pe nɨkatengʉla kupʉlɨsia kʉ Damesiki,
pambele kʉ Yelusalemu ni mbale sooni isa kɨghavo ɨkya Yudea na kʉ vano naVayahudi.
Nɨkapʉlɨsyagha kuuti valaate inyɨvi saave,
vansyetʉkɨle ʉNgʉlʉve na maghendele ghaave ghahʉfyaghe ʉlʉlaato lwave.
21 Isio se sino sikavapelela aVayahudi kuuti vangʼhole mʉ nyumba ɨnyɨmɨke ɨja kufunyila,
na kulonda kʉkʉmbuda.
22 Looli ʉNgʉlʉve anhangile kuhanga kufika ɨkɨghono ɨkya mʉsyʉghʉ,
fye nambe nɨmile pamaaso gha vooni,
avagojo na vadebe kuhʉmia ʉvwolesi.
Ʉne nanijova imhola isingi,
looli si sino avavɨli nʉ Moose valyajovile kuuti silivombeka.
23 Ʉlwakʉva vooni avuo valyajovile kuuti ʉKɨlɨsite anoghiile kupumuka,
na kuuva ghwa kwanda kusyʉka kuhʉma kʉ vafue,
neke asipʉlɨsie imhola isa lʉmuli ʉlwa vʉpoki kʉ Vayahudi,
na kʉ vano naVayahudi.”
24 ɄPaulo ye ikujoleka,
ʉFesito akamwangʼɨla,
akajova fiijo akati,
“Ʉve Paulo!
Ʉlɨ nʉ lʉkwale!
Kukwɨmba kyongo kʉkʉpeliile ʉlʉkwale!”
25 ɄPaulo akamʉla akati,
“Ghwe mwoghopua Fesito,
ʉne nanɨlɨ nʉ lʉkwale.
Isi sino nijova sa kyangʼhaani,
kange nijova nɨlɨ nʉ lʉhala lwoni.
26 Imhola sino nijova ghwope ʉntwa ʉAgilipa asikagwile vʉnofu.
Nɨkagwile kuuti mʉ mhola isi,
nakwelʉle nambe lʉmo lʉno naalʉtangʼhinie,
ʉlwakʉva sikavombiike pa vʉvalafu.
Fye nambe nijova pamaaso ghaake kɨsila vwoghofi.
27 Ghwe ntwa Agilipa,
ghukwɨtɨka imhola isa vavɨli?
Ʉne nɨkagwile kuuti ghukwɨtɨka.”
28 Pe ʉAgilipa akamʼbʉʉla ʉPaulo akati,
“Pe ghusaagha kuuti kʉ nsiki ʉnʼdebe ndavʉle ʉghʉ,
ndepoonu ʉkʉnyandʉla kuuva Nkɨlɨsite?”
29 ɄPaulo akamʉla akati,
“Ghʉʉve nsiki nʼdebe,
nambe nkome,
nɨkʉnsʉʉma ʉNgʉlʉve kuuti,
ʉve palɨkɨmo na vaanhu vooni vano vikʉmhʉlɨkɨsia ʉmʉsyʉghʉ,
mʉʉve ndavʉle ʉne,
looli kɨsila nyololo isi sino nɨpinyilue.”
30 Pe ʉntwa ʉAgilipa,
nʉ lʉmbʉ ʉBelinike,
nʉ mʼbaha ghwa kɨghavo ʉFesito,
na vange vano valikalile palɨkɨmo na veene,
vakɨɨma.
31 Ye vavʉkile pala,
vakajovagha vakatisagha,
“Ʉmuunhu ʉjʉ naavombile kɨmonga ɨkya kʉmpelela kubudua,
nambe kudindilua.”
32 ɄAgilipa akamʼbʉʉla ʉFesito akati,
“Ʉmuunhu ʉjʉ asaleka kusʉʉma kuuti ʉnkole ghwake ghʉkahɨghue nʉ Kaisali,
ngale ʉmʉlekisie.”