ɄPaulo ilonda akahɨghue kwa Kaisali
25
ɄFesito akafika kʉ Kaisalia akatengʉla kutema.
Ye fikilile ifighono fitatu,
akavʉʉka pa Kaisalia akalʉta kʉ Yelusalemu.
2 Ʉkuo,
avavaha va vatekesi palɨkɨmo nɨ kɨpʉgha ɨkya valongosi ava Vayahudi vakalʉta kwa mwene kʉkʉmʼbʉʉla ʉvʉhosi vwa Paulo.
Vakansʉʉma ʉFesito
3 alaghɨle kuuti ʉPaulo aletue kʉ Yelusalemu,
ʉlwakʉva aveene vakapʉlɨngʼhiine kuuti vamwʉvɨle mʉ sɨla,
vamʼbude.
4 Neke ʉFesito akavamʉla akati,
“ɄPaulo ijigha ilolelelua mʉ ndinde kʉ Kaisalia,
na jʉʉne nɨlɨ piipi pilʉta ʉkuo.
5 Lɨno,
mʉsalʉle avalongosi vamonga mʉlyʉmue nɨlʉte navo,
kuuti nave kʉlɨ lʉviivi lʉmonga lʉno ʉPaulo avombile,
vakajove.”
6 ɄFesito akikala na vaanhu vala ifighono lekelakwoni nambe kɨjigho ndɨɨkɨ,
pe akagomoka kange kʉ Kaisalia.
Ɨkɨghono ɨkya vʉvɨlɨ akikala pa kɨtengo kyake ɨkya vʉhɨghi,
akalaghɨla kuuti ʉPaulo aletue.
7 ɄPaulo ye afikile pala,
aVayahudi vano vakisile kuhʉma kʉ Yelusalemu vakansyʉngʉtɨla na kutengʉla kukwoleka si nyinga inhalamu isa kuuti ahɨghue.
Neke sooni sino vakajovagha,
vakakunua kulʉngɨka ʉvwakyangʼhaani.
8 Pe ʉPaulo akatengʉla kukujoleka akati,
“Ʉne nanɨhokile kɨmonga vwɨmɨla indaghɨlo isa Vayahudi,
nambe ɨnyumba ɨnyɨmɨke ɨja kufunyila,
nambe indaghɨlo isa Kaisali.”a
9 Neke ʉlwakʉva ʉFesito akalondagha kukuvɨɨka nnofu kʉ Vayahudi,
akamposia ʉPaulo akati,
“Asi,
ghulonda kulʉta kʉ Yelusalemu kuuti ʉnkole ghwako nɨkahɨghɨle kʉla?”
10 ɄPaulo akamwamʉla akati,
“Ʉne nɨmile pamaaso gha mʉlamʉsi jʉno avɨkilue nʉ Kaisali,
apa pepano nɨnoghiile kuhɨghua.
Ndavʉle jʉʉve vʉle ʉkagwile vʉnofu,
ʉne nanɨhokile kɨmonga kʉ Vayahudi.
11 Nave nɨhokile nambe kuvomba kɨmonga kɨno kɨkʉmhelela kuhɨghua kuuti nɨbudue,
nanikaana.
Looli nave sino aVayahudi vikʉhɨgha nasakyangʼhaani,
nakwale jʉno anoghiile kʉkʉmbɨɨka mʉ mavoko ghaave.
Nilonda kuuti ʉnkole ghwango ghʉkahɨghue kwa Kaisali.”b
12 Apuo ʉFesito akapʉlɨngʼhana na vatangɨli vaake.
Pe akamwamʉla akati,
“Ʉsʉmile kuuti ʉnkole ghwako ghʉkahɨghue kwa Kaisali,
nɨtiike,
lɨno ghulʉta kuhɨghua kwa mwene!”
ɄFesito isʉʉma amasaaghe kwa ntwa ʉAgilipa
13 Ye fikilile ifighono fidebe,
ʉntwa ʉAgilipac palɨkɨmo nʉ lʉmbʉ ʉBelinike vakalʉta kʉ Kaisalia kʉkʉmʉghendela ʉFesito.d
14 Ʉkuo,
vakikala ifighono finga.
Mʉ fighono ifio ʉFesito akamwoleka ʉntwa ʉAgilipa,
ʉnkole ghwa Paulo akati,
“Apa pwale ʉmuunhu jʉno ʉFeliki akamʉlekile mʉ ndinde.
15 Ye nɨlʉtile kʉ Yelusalemu,
avavaha va vatekesi na vagojo va Vayahudie vakambʉlile ʉvʉhosi vwa muunhu ʉjuo.
Vakasʉʉma nɨmhɨghe kuuti mhosi.
16 Looli ʉne nɨkavamwile kuuti,
nalwiho lwitu twe Valooma kʉkʉmhɨgha ʉmuunhu kɨsila kʉtangʼhana na vano valɨ nɨ lɨsio nʉ muunhu ʉjuo na kukujoleka mʉ sino ihɨghua.
17 “Pepano vakiisa apa palɨkɨmo nuune.
Ye tʉfikile,
nanɨkadɨɨla kupʉlɨkɨsia ʉnkole ghwave.
Ɨkɨghono ɨkya vʉvɨlɨ,
nɨkikala pa kɨtengo ɨkya vʉhɨghi,
nɨkalaghɨla kuuti ʉmuunhu ʉjuo aletue.
18 Ye aletilue,
avalongosi vala vakɨɨma,
vakatengʉla kujova sino vikʉmhɨgha ʉPaulo.
Neke amasio ghano vamhɨghagha,
naghakaale maviivi,
ndavʉle nasaghagha.
19 Looli vakanɨngʼhanagha vwɨmɨla imhola isa lwɨtɨko lwave,
ni sa muunhu jʉmonga jʉno alyafwile,
ɨlɨtavua lyake ghwe Yesu.
ɄPaulo akaale iiti ʉmuunhu ʉjuo mwʉmi.
20 Ʉlwakʉva nanɨkajaagha ɨsɨla ɨja kʉkagʉla ʉvwakyangʼhaani vwɨmɨla amasio aghuo,
pe nɨkamposia ʉPaulo nave ikwɨtɨka kuuti ʉnkole ghwake ghʉkahɨghue kʉ Yelusalemu.
21 Looli ʉPaulo akasʉʉma kuuti,
ʉnkole ghwake ghʉtwalue kʉvʉlongolo,
ghʉkahɨghue nʉ ntwa ʉmʼbaha ʉKaisali.
Pe nɨkalaghɨla avasikali kuuti,
vamʉlolelelaghe kuhanga pano nɨkʉntwala kwa Kaisali.”
22 Pe ʉAgilipa akamʼbʉʉla ʉFesito akati,
“Nilonda kuuti nɨmpʉlɨkɨsie jʉʉne ʉmuunhu ʉjuo.”
ɄFesito akamwamʉla akati,
“Kyaghʉkʉmpʉlɨkɨsia pakɨlaavo.”
ɄPaulo pamaaso gha ntwa ʉAgilipa
23 Ɨkɨghono ɨkya vʉvɨlɨ ʉAgilipa palɨkɨmo nʉ Belinike vakingila nʉ lʉtogo muno avaanhu vakakongʼhanagha,
vakalongosinie na vavaha va vasikali,
na vavaha va lɨkaaja.
Pepano ʉFesito akalaghɨla avasikali kuuti vamʉleete ʉPaulo.
24 Pe ʉFesito akati,
“Ghwe ntwa Agilipa,
na jʉmue mwe vano mʉkongʼhanile apa palɨkɨmo nusue!
Ʉmuunhu ʉjʉ jʉno mʉkʉmwagha apa,
ghwe mwene aVayahudi vooni vakakutile kʉlyʉne ye nɨlɨ kʉ Yelusalemu,
nambe ye nɨgomwike apa,
vakaale vikwova viiti anoghiile kubudua.
25 Neke ʉne nanɨkavʉvwene ʉvʉviivi vʉmonga ʉvwa kʉmpelela kuuti abudue.
Looli ʉmwene akasʉʉma kuuti,
ʉnkole ghwake ghʉkahɨghue kʉ Looma kwa ntwa ʉmʼbaha ʉKaisali.
Pe nɨkalamʉla atwalue.
26 Neke nanɨkalʉvwene nambe lʉmonga lʉno ndepoonu nɨkʉmʉlembela ʉKaisali vwɨmɨla ʉmuunhu ʉjʉ.
Fye nambe nɨmʉletile pamaaso ghiinu mweni,
kyongo pamaaso ghaako ghwe ntwa Agilipa,
kuuti kyatʉmalile kʉkʉmposia pe niiva nɨ lɨsio ɨlya kʉmʉlembela ʉKaisali.
27 Ʉlwakʉva kʉkʉntwala ʉnʼdindilua kwa Kaisali kɨsila kwoleka sino ihɨghua ʉmuunhu ʉjuo,
niiva nanɨsaghile vʉnono.”