ɄPaulo ihɨghua kwa mʼbaha ghwa kɨghavo ʉFeliki
24
Ye fikilile ifighono fihaano,
ʉntekesi ʉmʼbaha ʉAnania palɨkɨmo na vagojo avange ava Vayahudi,
vakafika mʉ lɨkaaja ɨlya Kaisalia.
Avaanhu ava valyalongosinie nʉ muunhu jʉmonga ʉntangɨli ghwave ʉghwa kʉhɨgha ʉnkole jʉno akatambʉlwagha Telitulo.
Avaanhu avuo vakalʉta kʉkʉmʼbʉʉla ʉmʼbaha ghwa kɨghavo ʉFeliki sino vakaale vikʉmhɨgha ʉPaulo.
2 ɄPaulo ye akemelilue,
ʉTelitulo akatengʉla kukwoleka amasio ghano vikʉmhɨgha ʉPaulo akati,
“Ghwe mwoghopua Feliki,
mʉ vʉlongosi vwako ʉvʉnono nʉ vʉkagʉsi vwako,
vʉtʉpeliile kuuti tʉʉve nʉ lʉtengaano ʉlʉvaha mʉ fighono fyoni ifi,
najɨ ɨɨsi jiitu jikalile vʉnono.
3 Ghwe mwoghopua Feliki,
imbale sooni na mʉ sɨla sino sili papinga tukwʉpɨla sooni isi nʉ lʉhongesio ʉlʉkome.
4 Lɨno,
nanilonda kuuti nɨkʉkatasie kyongo,
ʉlwene nɨkʉkʉsʉʉma mʉ vʉkoola vwako ʉtʉpʉlɨkɨsie amasio ghiitu amadebe.
5 “Ʉsue tʉkagwile kuuti ʉmuunhu ʉjʉ mʼbiivi kyongo,
ghwe jʉno ipela na kuhovelesia amabaatu kʉ Vayahudi ava mʉ ɨɨsi sooni,
kange ghwe mʼbaha ghwa kɨpʉgha ɨkya vɨtɨki ɨkya Vanasaleti.a
6 Kange,
aghela na pinyasiab ɨnyumba ɨnyɨmɨke ɨja kufunyila.
Pe twankola ngʼhaningʼhaani.
Twalondagha kʉkʉmhɨgha mʉ ndaghɨlo siitu,
7 looli ʉmʼbaha ʉghwa vasikali ʉLusia iisa ampoka kʉ ngʉfu mʉ mavoko ghiitu.
8 Pe alaghɨla kuuti,
vano vikʉmhɨgha viise voleke kʉlyʉve sino sipelela kuuti ahɨghue.c
Nambe jʉʉve ʉngamposie,
kyaghukagʉla kuuti sooni isi sino tujova kuuti ahokile,
sa kyangʼhaani.”
9 AVayahudi avange vala voope vakajova kuuti,
sooni sino ajovile ʉTelitulo sa kyangʼhaani.
ɄPaulo ikujoleka kwa Feliki
10 Pe ʉmʼbaha ʉFeliki akahʉfia lʉmonga kwa Paulo kuvonia kuuti ghwope ajove.
Pe ʉPaulo akatengʉla kujova akati,
“Ʉne nɨkagwile kuuti,
ʉve ʉhɨghile amakole amaaka minga mʉ kɨghavo ɨkɨ.
Ɨlio lye lɨno lɨkʉmʼbɨɨka kuuti nijoleke pamaaso ghaako nʉ lʉkeelo.
11 Jʉʉve ndepoonu ghukagʉla kuuti,
nafikilile ifighono kɨjigho kɨmo na fivɨlɨ,
kuhʉma ɨkɨghono kɨno nɨkalʉtile kʉ Yelusalemu kukufuunya.
12 Avaanhu ava,
vano vikʉhɨgha ʉne navakanyaghile nikanɨngʼhana nʉ muunhu ghweni mʉ nyumba ɨnyɨmɨke ɨja kufunyila,
nambe kuhovelesia ɨlɨpʉgha lya vaanhu mʉ nyumba ɨjio,
nambe mʉ masinagogi ghaave,
nambe pavʉnge pooni mʉ lɨkaaja ɨlio.
13 Amasio agha ghano vikʉhɨgha,
navangalʉngɨke kuuti gha kyangʼhaani.
14 “Looli nikwɨtɨka pamaaso ghaako kuuti,
ʉne nɨkʉmwɨmɨka ʉNgʉlʉve ʉghwa vakʉʉlʉ viitu mʉlwa kʉvɨngɨlɨla ɨSɨla ɨja Mʉtwa ʉYesu,d
jɨno aveene viiti kɨpʉgha kya vʉdesi.
Kange,
nikwɨtɨka amasio ghooni ghano ghalembilue mʉ fitabu ifya Moose ni fya vavɨli.
15 Ʉne nɨkʉmhʉvɨɨla ʉNgʉlʉve,
ndavʉle aveenee vʉle vihʉvɨɨla kuuti,
ʉNgʉlʉve ilikʉvasyʉsia avafue vooni,
avagholofu na vahosi.
16 Fye nambe nighimba ifighono fyoni kuuti,
mʉ mwojo ghwango nɨɨve nsila nkole pamaaso gha Ngʉlʉve na pamaaso gha vaanhu.
17 “Ye nikalile kʉ vʉtali amaaka minga,
nɨkagomoka kʉ Yelusalemu,
kuuti nɨtwale indalama isa kʉvatanga avakotofu mʉ ɨɨsi jiitu na kuhʉmia ɨlɨtekelo kwa Ngʉlʉve.
18 Ye nɨlɨ mʉ nyumba ɨnyɨmɨke ɨja kufunyila,
vakanyaghile nɨmalile pikufuunya mʉlwa kuvalasia,
kange nanɨkaale nɨ lɨpʉgha ɨlya vaanhu nambe ɨlɨbaatu napwelɨkaale.
19 Looli aVayahudi vamonga kuhʉma kʉ Asia vano pwevakaale,
ve vano vaveele vanoghiile kuuva pamaaso ghaako apa na kʉkʉhɨgha,
nave valɨ nɨ lɨsio lɨmonga ɨlya kʉhɨgha ʉne.
20 Nambe avaanhu ava,
vano pwevale apa vajove ʉvʉhosi vʉno vakavʉvwene kʉlyʉne ye nihɨghua pa kɨpʉgha ɨkya valongosi vaave.
21 Pamo vikʉhɨgha vwɨmɨla ɨlɨsio lɨno nɨkajovile fiijo kuuti,
‘Ʉmʉsyʉghʉ nihɨghua pamaaso ghiinu vwɨmɨla kukwɨtɨka kuuti avafue vilisyʉka.’ ”
22 Pe ʉFeliki akahaghɨka ʉnkole ghʉla,
ʉlwakʉva alyakagwile vʉnofu ɨSɨla ɨja Mʉtwa ʉYesu.
Akavavʉʉla akati,
“Kyanimala ʉnkole ghwinu angiise ʉmʼbaha ʉghwa vasikali ʉLusia.”
23 Pe akamʼbʉʉla ʉmʉlongosi ghwa vasikali kuuti anʼgomosie ʉPaulo mʉ ndinde,
looli aleke kʉkʉmpinya ni nyololo,
kange naangavasighaghe avamanyaani vaake kʉkʉntanga fino ilonda.
ɄPaulo ikwoleka imhola sa Yesu kwa Feliki ʉmʼbaha ghwa kɨghavo
24 Ye fikilile ifighono fidebe,
ʉFeliki akafika palɨkɨmo nʉ nʼdala ghwake ʉDulusila jʉno alyale Mʉyahudi,
akalaghɨla kuuti vamʉleete ʉPaulo.
ɄPaulo ye afikile,
akatengʉla kʉkʉvavʉʉla ɨmhola ɨja kʉmwɨtɨka ʉYesu Kɨlɨsite,
aveene vakava vikʉmpʉlɨkɨsia.
25 ɄPaulo ye ijova vwɨmɨla ʉvʉgholofu pamaaso gha Ngʉlʉve na kukulolelela,
palɨkɨmo nɨ kɨghono ɨkya vʉhɨghi vwa Ngʉlʉve,
ʉFeliki akoghopa.
Akamʼbʉʉla ʉPaulo akati,
“Lɨno lʉtagha,
kyande nɨkʉkʉkemeela kange nɨngave nʉ vweleefu.”
26 Ʉmwene akahʉvɨlagha kuuti,
pamo ʉPaulo kyaɨkʉmpeela amasaka,
mʉ ʉluo kekinga akankemelagha kujova naghwo.
27 Ye ghakilile amaaka ghavɨlɨ,f
ʉPolikio Fesito akapyanɨla pa Feliki kutema.
Neke ʉlwakʉva ʉFeliki akalondagha kukuvɨɨka nnofu kʉ Vayahudi,
akamʉleka ʉPaulo mʉ ndinde.