23
ɄPaulo akakɨlʉngʉvalɨla ɨkɨpʉgha kɨla ɨkya valongosi,
akavavʉʉla akati,
“Vanyalʉkolo vango,
kuhanga kufika ʉmʉsyʉghʉ,
mʉ mwojo ghwango nikuvona nɨlɨ nsila nkole vwɨmɨla amaghendele ghango pamaaso gha Ngʉlʉve.”
2 Ʉntekesi ʉmʼbaha ʉAnania ye apʉliike amasio aghuo,
akavavʉʉla vano vɨmile piipi nʉ Paulo kuuti vamʼbapʉle ʉmʉlomo.
3 Pe ʉPaulo akamʼbʉʉla akati,
“ɄNgʉlʉve ɨkʉkʉvapʉla na jʉʉve ghwe nkedʉsi.a
Lwandaani ghukalile apuo kʉkʉhɨgha ʉne vwɨmɨla indaghɨlo,
kange jʉʉve naghʉkʉsivɨngɨlɨla indaghɨlo mʉlwa kuuti vambapʉle kɨsila kʉhɨghua?”
4 Avaanhu vano valyɨmile piipi nʉ Paulo vakamʼbʉʉla vakati,
“Naghukwoghopa kʉkʉmʉligha ʉntekesi ʉmʼbaha ʉghwa Ngʉlʉve?”
5 ɄPaulo akavavʉʉla akati,
“Vanyalʉkolo vango,
nanɨveele nɨkagwile kuuti ghwe ntekesi ʉmʼbaha,
ʉlwakʉva lɨlembilue kuuti,
‘Nʉnganʼjovaghe fivi ʉmʉlongosi ghwa vaanhu vaako.’b ”
6 Ʉlwakʉva ʉPaulo alyakagwile kuuti,
mʉ kɨpʉgha kɨla ɨkya valongosi vamo valyale Vasadukayi,
avange valyale Vafalisayi,c
akajova fiijo akati,
“Vanyalʉkolo vango,
ʉne nɨlɨ Mfalisayi,
nɨlɨ mwana ghwa Vafalisayi.
Ʉne apa nihɨghua vwɨmɨla kuhʉvɨɨla kuuti avafue vilisyʉka!”
7 Amasio aghuo ghano alyajovile ʉPaulo ghakapelela aVafalisayi na Vasadukayi vatengʉle kukanɨngʼhana kyongo.
Pe vakaghavɨngʼhana,
vakava fipʉgha fivɨlɨ,
8 ʉlwakʉva aVasadukayi navakɨtɨkagha kuuti avafue vilisyʉka,
kange navakɨtɨkagha kuuti kwevale avanyamhola,
nambe imhepo.
Looli aVafalisayi vakɨtɨkagha kuuti fyoni ifio kwefili.
9 Pe ʉlʉkaani lʉkava lʉvaha kyongo mʉ kɨpʉgha kɨla ɨkya valongosi.
Vamo mʉ vavʉlanɨsi va ndaghɨlo vano vaale Vafalisayi vakɨɨma kʉmo vikanɨngʼhana kʉ ngʉfu viiti,
“Natʉvʉvwene ʉvʉviivi ʉvwa muunhu ʉjʉ.
Pamo ʉmhepo nambe ʉnyamhola ghwe jʉno ajovile nʉ muunhu ʉjʉ.”
10 Ye vajiighe vifikanɨngʼhana kyongo,
ʉmʼbaha ghwa vasikali akoghopa kuuti,
kyande vikʉmwalʉkɨla ʉPaulo na kʉkʉmʼbuda.
Pe akavavʉʉla avasikali vaake kuuti valʉte pakate pa Vayahudi,
vamʼbʉsie ʉPaulo kʉ ngʉfu,
vantwale mʉ nyumba jaave.
11 Ɨkɨlo ɨja kɨghono ɨkio,
ʉMʉtwa ʉYesu akɨɨma piipi nʉ Paulo akamʼbʉʉla akati,
“Ghukangasyaghe!
Ʉlwakʉva sino ghwoliike pa Yelusalemu apa vwɨmɨla imhola sango,
enendɨɨkɨ fye ʉnoghiile pikwoleka kʉ lɨkaaja ɨlya Looma.”
AVayahudi vipʉlɨngʼhana kʉkʉmʼbuda ʉPaulo
12 Ye kʉkiile,
aVayahudi vamonga vakapʉlɨngʼhana vwɨmɨla ʉPaulo,
vakajɨɨgha vakati,
“Natʉngalie nambe kunyua kuhanga tʉmʼbude ʉPaulo.”
13 AVayahudi vano vakapʉlɨngʼhanagha ʉluo valyale kukila ifijigho fine.
14 Pe vakalʉta kʉ vavaha va vatekesi na kʉ vagojo va Vayahudi,
vakavavʉʉla vakati,
“Tʉjɨghile kuuti natʉngapunde kɨmonga,
kɨsila kʉmʼbuda ʉPaulo.
15 Lɨno,
ʉmue palɨkɨmo nɨ kɨpʉgha ɨkya valongosi,
mʉnsʉʉme ʉmʼbaha ghwa vasikali kuuti avaletele ʉPaulo.
Muvɨɨke hwene mulonda kukagʉla vʉnono imhola sino mʉkʉmhɨgha,
neke ʉsue tʉkʉmwʉvɨla mʉ sɨla na kʉkʉmʼbuda ye akyale pifika apa.”
16 Neke ʉnswambe ghwa lʉmbʉ ghwa Paulo akasipʉlɨka imhola isio.
Ye asipʉliike,
akalʉta mʉ nyumba ɨja vasikali,
akamʼbʉʉla ʉPaulo.
17 Pepano ʉPaulo akankemeela ʉmo mʉ valongosi va vasikali,
akamʼbʉʉla akati,
“Ʉntwale ʉnʼdɨɨmi ʉjʉ kwa mʼbaha ghwinu,
ʉlwakʉva alɨ nɨ lɨsio ɨlya kʉmʼbʉʉla.”
18 Pe ʉmʉlongosi ʉjuo akantwala ʉnʼdɨɨmi jʉla kwa mʼbaha ghwave,
akamʼbʉʉla akati,
“Ʉnʼdindilua jʉla ʉPaulo,
angʼhemelile,
asʉmile kuuti nɨmʉleete kʉlyʉve ʉnʼdɨɨmi ʉjʉ,
alɨ nɨ lɨsio ɨlya kʉkʉvʉʉla.”
19 Ʉmʼbaha ʉjuo akankola ʉlʉvoko ʉnʼdɨɨmi jʉla,
akalʉta naghwo kʉ vʉsyefu.
Akamposia akati,
“Ghulonda pikʉmbʉʉla kɨki?”
20 Ʉnʼdɨɨmi jʉla akamʉla akati,
“AVayahudi vapʉlɨngʼhiine kuuti,
vakʉsʉʉme ʉntwale ʉPaulo pakɨlaavo pa kɨpʉgha ɨkya valongosi,
vikwisa kʉkʉkʉsyanga kuuti,
vilonda kukagʉla vʉnofu sino vikʉmhɨgha.
21 Neke ʉve nʉngɨtɨkaghe,
ʉlwakʉva kwevale avakɨnhaata kukila ifijigho fine vano vamwʉviile ʉPaulo mʉ sɨla.
Vajɨghile kuuti navangalie nambe kunyua kuhanga vamʼbude ʉPaulo.
Lɨno vilɨngʼhanisie,
vighuula ʉvɨtɨkɨsie.”
22 Pe ʉmʼbaha ʉjuo akamʼbʉʉla ʉnʼdɨɨmi jʉla akati,
“Nʉngamʼbʉlaghe nambe muunhu kuuti ʉmbʉlile imhola isi.”
Pe akantavʉla kuuti alʉtaghe.
ɄPaulo itwalua kʉ lɨkaaja ɨlya Kaisalia
23 Pe ʉmʼbaha jʉla akavakemeela avalongosi vavɨlɨ va vasikali,
akavavʉʉla akati,
“Mʉlɨngʼhanie avasikali filʉndo fivɨlɨ,
palɨkɨmo na vasikali avange avanya kwangalɨla ifalaasi fijigho lekelalʉbale,
na vanya mhalala filʉndo fivɨlɨ.
Avuo vooni vavʉʉke apa akavalɨlo aka vʉtatu pakɨlo,
valʉte kʉ Kaisalia.
24 ɄPaulo ghwope mʉmpeele ɨfalaasi,
mʉntwale vʉnofu kwa Feliki,
ʉmʼbaha ghwa kɨghavo.”
25 Pe ʉmʼbaha ghwa vavaha va vasikali akalemba ɨkalata jɨno jiiti,
26 “Ʉne ne Kilaudio Lusia,
nɨkʉkʉhʉngɨla ʉve Feliki,
ghwe mwoghopua,
ghwe mʼbaha ghwa kɨghavo kiitu.
27 Nɨmʉletile kʉlyʉve ʉmuunhu ʉjʉ,
akakolilue na Vayahudi,
valondagha pikʉmʼbuda.
Neke nalʉta na vasikali vango,
nampoka,
ʉlwakʉva nakagʉla kuuti ʉmwene Mʉlooma.
28 Nalondagha kukagʉla kɨno aVayahudi viiti ahokile,
pe nantwala pa kɨpʉgha ɨkya valongosi vaave.
29 Navona vikʉmhɨgha vwɨmɨla indaghɨlo saave.
Neke napwelyava nambe lɨsio lɨmo ɨlya kʉmpelela kuuti adindilue nambe kubudua.
30 Ye nɨpʉliike ɨmhola kuuti kwevale aVayahudi vamonga vilonda kʉkʉmʼbuda ʉPaulo,
nɨsungʼhile avasikali kuuti vamʉleete kʉlyʉve ngʼhaningʼhaani.
Navavʉʉla vano vikʉmhɨgha kuuti,
voope viise vajove kʉlyʉve ifiteghe fino vikʉmhɨghɨla.”
31 Pepano avasikali avuo vakantoola ʉPaulo ndavʉle vakavʉlilue,
vakantwala jɨkɨlo jɨjio mʉ lɨkaaja ɨlya Antipatili.
32 Ye kʉkiile,
avasikali avaghenda lʉghʉlʉ vakagomoka kʉ nyumba jaave ɨja vasikali,
vakavaleka avasikali avangalɨla falaasi vikʉntwala ʉPaulo.
33 Avasikali vala ye vafikile pa Kaisalia,
vakampeela ɨkalata ʉFeliki,
ʉmʼbaha ghwa kɨghavo na kʉkʉntavʉla ʉPaulo mʉ vʉtavʉlɨlua vwake.
34 Ʉmʼbaha jʉla ye amalile pikwɨmba ɨkalata jɨla,
akamposia ʉPaulo kuuti ihʉma kʉʉghi.
Ye amʼbʉlile kuuti ihʉma mʉ kɨghavo ɨkya Kilikia,
35 akamʼbʉʉla ʉPaulo akati,
“Kyanipʉlɨkɨsia ʉnkole ghwako kyande visile vano valɨ nɨ lɨsio nuuve.”
Pe akavavʉʉla avasikali kuuti,
vamʉlolelelaghe ʉPaulo mʉ nyumba ɨja kɨtwa ɨja Helode.