Mbombo sa Vasungʼhua 22

“Mwe vanyalʉkolo vango, numue vanhaata vango, mʉmhʉlɨkɨsie nɨvoleke vʉle lʉkaale.”2 Avaanhu vala ye vapʉliike kuuti, ʉPaulo ijova mʉ njovele jaave ɨja Kɨebulania, vakajika kɨmihe lwoni. Pe ʉPaulo akavavʉʉla akati,3 “Ʉne nɨlɨ Mʉyahudi, nɨlyaholilue mʉ lɨkaaja ɨlya Taliso mʉ kɨghavo ɨkya Kilikia. Neke nɨlyasʉngilue mʉ lɨkaaja ɨlɨ ɨlya Yelusalemu. ɄGamalieli ghwe jʉno amʼbʉlanisie vʉnofu indaghɨlo sooni sino valyatʉlekiile avakʉʉlʉ viitu. Nɨkitavwile ni ngʉfu sooni kʉkʉmʼbombela ʉNgʉlʉve, ndavʉle ʉmue vʉle mukutavʉla ʉmʉsyʉghʉ.4 Avaanhu vano vavɨngɨlɨlagha ɨSɨla ɨja Mʉtwa ʉYesu, nɨkavapumusyagha na kʉkʉvabuda, nɨkavakolagha avakɨnhaata na vakɨjʉʉva na kʉkʉvadindila mʉ ndinde.5 Ʉntekesi ʉmʼbaha palɨkɨmo nɨ kɨpʉgha ɨkya valongosi, vanoghiile kuhʉmia ʉvwolesi kuuti, sino nikwoleka sa kyangʼhaani. Ʉlwakʉva aveene ve vano valyamheliile ɨkalata ɨja kʉvatwalɨla aVayahudi avajiitu vano valyale mʉ lɨkaaja ɨlya Damesiki. Nɨlyalʉtile ʉkuo kuuti nɨvakole avavɨngɨlɨli avuo, na kʉkʉvaleeta pa Yelusalemu apa, kuuti vapumusivue.

6 “Ye nɨlɨ mʉ sɨla piipi kufika kʉ Damesiki, akavalɨlo aka ntanda pamwisi, nakalɨngi ʉlʉmuli ʉlʉkome kuhʉma kʉkyanya lʉkamulika ʉne imbale sooni. 7 Nɨkaghua paasi, nɨkapʉlɨka ɨlɨsio lɨkʉmbʉʉla liiti, ‘Savʉli, Savʉli, kɨki ʉkʉmhumusia?’ 8 Ʉne nɨkamʉla nɨkati, ‘Ntwa, veeve veeni?’ Ghwope akanyamʉla akati, ‘Ʉne neene Yesu ʉMʉnasaleti, ne jʉno ʉkʉmhumusia.’ 9 Avajango vano tʉlyale lʉmo vakalwagha ʉlʉmuli, neke amasio ghano nɨkavʉlwagha navalyaghatangʼhinie. 10 Pe nɨkaposia nɨkati, ‘Ghwe Mʉtwa, nɨvombe kɨki?’ Ʉmwene akanyamʉla akati, ‘Ɨma, ghwingile mʉ Damesiki. Ʉmuo ghuvʉlua imbombo sooni sino ghulondua kuvomba.’ 11 Ʉnsiki ʉghuo nanɨkava nilola, ʉlwakʉva ʉlʉvalatɨko ʉlwa lʉmuli lʉla lʉlyabofwile amaaso. Pe avajango vakangʼhola ʉlʉvoko, vakandongosia kufika mʉ lɨkaaja ɨlya Damesiki.

12 “Apuo pwealyale ʉmuunhu jʉmonga jʉno akatambʉlwagha Anania. Ʉmuunhu ʉjuo akamwɨmɨkagha ʉNgʉlʉve vwɨmɨla kuvɨngɨlɨla fiijo indaghɨlo siitu. AVayahudi vooni vano vakikalagha ʉkuo vakamʉghiniagha kuuti muunhu nnofu. 13 Ʉmuunhu ʉjuo akiisa, akɨɨma piipi nuune, akambʉʉla akati, ‘Nyalʉkolo ghwango Savʉli, ʉlolaghe kange!’ Nakalɨngi amaaso ghango ghakadinduka, nɨkamwagha. 14 Pe akambʉʉla akati, ‘ɄNgʉlʉve ghwa vakʉʉlʉ viitu, akʉsalwile kuuti ʉkagʉle ʉvughane vwake, ʉmwaghe jʉno Ghwa Kyangʼhaani na kupʉlɨka ɨlɨsio kuhʉma kwa ʉjuo. 15 Kange, ʉNgʉlʉve ilonda ʉvavʉlaghe avaanhu vooni sooni sino ʉsivwene na kʉkʉsipʉlɨka kuhʉma kwa mwene ʉjuo. 16 Lɨno, ʉleke pidɨɨla! Ɨma! Ghwofughue, ʉvalasɨvue inyɨvi saako vwɨmɨla kʉkʉmhʉvɨɨla ʉMʉtwa ʉYesu.’

17 “Pepano nɨkagomoka kʉ Yelusalemu. Ye nikufuunya mʉ nyumba ɨnyɨmɨke ɨja kufunyila, sikanyisila inyivonelo. 18 Mʉ nyivonelo isio nɨkamwagha ʉMʉtwa ʉYesu, ɨkʉmbʉʉla iiti, ‘Ghwangʉpe, ʉvʉʉke ngʼhaningʼhaani mʉ Yelusalemu, ʉlwakʉva avaanhu ava lɨkaaja ɨlɨ, navangɨtɨke ʉvwolesi vwako vwɨmɨla imhola sango.’ 19 Ʉne nɨkamwamʉla nɨkati, ‘Ghwe Mʉtwa, aveene aVayahudi vakagwile vʉnofu kuuti, ʉne nɨkalʉtagha mʉ masinagogi ghaave, nɨkavadindilagha mʉ ndinde na kʉkʉvatova vano vikʉkwɨtɨka ʉve. 20 Nambe ye ibudua ʉmwolesi ghwako ʉSitefani, ʉne nɨlyɨmile baaho, nɨlyɨtɨngʼhiine kuuti abudue, kange nɨkava nilolelela amakooti gha vano vikʉmʼbuda.’ 21 Pe ʉMʉtwa akanyamʉla akati, ‘Lʉtagha! Ʉlwakʉva ʉne kyanɨkʉkʉsuungʼha ʉlʉte kʉ vʉtali kʉ vaanhu vano naVayahudi.’ ”

ɄPaulo ikujoleka kuuti ʉmwene Mʉlooma

22 Ɨlɨpʉgha lɨla lɨkava lifikʉmpʉlɨkɨsia ʉPaulo. Neke ye ijova ɨlɨsio ɨlio kuuti isungʼhua kʉ vano naVayahudi, vakatengʉla kukwova viiti, “Ʉjuo abudue, naanoghiile kujigha mʉ ɨɨsi!” 23 Vakava vifikwova kʉmo visyʉngʉsia amakooti ghaave na kutululula ʉlʉnuluulu. 24 Pe ʉmʼbaha ghwa vasikali akavavʉʉla avasikali vaake kuuti, vamwingisie ʉPaulo mʉ nyumba ɨja vasikali, neke vankope ni mijeledi, kuhanga oleke sino sipeleliile avaanhu vala vamwovelele enendɨɨkɨ. 25 Avasikali vala ye vampinyile ʉPaulo ni ngoji kuuti vankope ni mijeledi, ʉPaulo akamposia ʉmʉlongosi ghwave jʉno alyɨmile pala akati, “Asi, indaghɨlo siinu sikwɨtɨkɨsia kʉkʉnkopa ʉMʉlooma jʉno ʉnkole ghwake naghʉhɨghilue?”

26 Ʉmʉlongosi jʉla ʉghwa vasikali ye apʉliike isio, akalʉta kʉkʉmʼbʉʉla ʉmʼbaha ghwake akati, “Ghulonda pivomba kɨki? Ʉmuunhu ʉjʉ Mʉlooma!” 27 Pe ʉmʼbaha jʉla akalʉta kwa Paulo, akamposia akati, “Ʉmbʉʉle, ʉve ʉlɨ Mʉlooma?” ɄPaulo akamʉla akati, “Eena, nɨlɨ Mʉlooma.” 28 Ʉmʼbaha jʉla akamʼbʉʉla akati, “Ʉne nɨlɨ Mʉlooma vwɨmɨla kughʉla ni ndalama nyinga.” Pe ʉPaulo akamʼbʉʉla akati, “Ʉne nɨlɨ Mʉlooma vʉholua.” 29 Ʉnsiki ʉghuo avasikali vano vakalondagha kʉkʉmposia ʉPaulo, vakavʉʉka pala ngʼhaningʼhaani. Ghwope ʉmʼbaha ghwave akoghopa, ʉlwakʉva akakagʉla kuuti ʉPaulo Mʉlooma, kange akampinyile ni nyololo.

Avalongosi va Vayahudi vighavɨngʼhana vwɨmɨla ʉPaulo

30 Pepano ʉmʼbaha ʉghwa vasikali akava ilonda kukagʉla kɨno kɨpeleliile aVayahudi kuuva nɨ lɨbaatu nʉ Paulo. Pe ɨkɨghono ɨkya vʉvɨlɨ, akamʼbopola ʉPaulo inyololo, na kʉkʉvavʉʉla avavaha va vatekesi palɨkɨmo nɨ kɨpʉgha ɨkya valongosi va Vayahudi kuuti vakongʼhaane. Pe akamʉleeta ʉPaulo, akamwɨmia pamaaso ghaave.