ɄPaulo ilʉta kʉ Yelusalemu
21
Ye tʉvahwesisie avaloleleli vala ava kʉ Efeso,
tʉkapanda ɨngalava,
tʉkavʉʉka pala kuhanga tʉkafika mʉ ɨɨsi ɨja Kosi,
jɨno jɨlyale pakate pa nyanja.
Ɨkɨghono ɨkya vʉvɨlɨ,
tʉkafika mʉ ɨɨsi ɨja Lodo jɨno joope jɨlyale pakate pa nyanja.
Kuhʉma apuo tʉkalʉta mʉ lɨkaaja ɨlya Patala.
2 Apuo tʉkajaagha ɨngalava ɨjɨngɨ jɨno jilʉta kʉ Foinike,
pe tʉkapanda na kulʉta ʉkuo.
3 Ye tʉfikile pano ɨɨsi ɨja Kipulo jivoneka,
tʉkakila ʉlʉbale ʉlwa kʉndio,
pe tʉkafika mʉ lɨkaaja ɨlya Tiilo,
mʉ kɨghavo ɨkya Silia.
Apuo tʉkiika mʉ ngalava ɨjio,
ʉlwakʉva jɨkava jikwisia amasigho.
4 Ye tʉvaghile pala avavɨngɨlɨli va Mʉtwa,
tʉkikala palɨkɨmo na veene ifighono lekelalʉbale.
Mʉ ngʉfu isa Mhepo ʉMwɨmɨke,
avavɨngɨlɨli avuo vakava vikʉmʼbʉʉla ʉPaulo kuuti,
naangalʉtaghe kʉ Yelusalemu.
5 Neke ʉnsiki ʉghwa kʉvʉʉka ghʉkafika.
Pe avɨtɨki vooni ava mʉ Tiilo,
avaghoosi na vadala vaave na vaana vaave,
vakatʉhɨngɨlɨsia kuhʉma mʉ lɨkaaja lɨla kuhanga kufika kʉ nyanja.
Ʉkuo tʉkafughama,
tʉkifuunya.
6 Pepano tʉkahwesania,
ʉsue tʉkapanda ɨngalava,
aveene vakagomoka kʉvanave.
7 Kuhʉma kʉ Tiilo tʉkafika mʉ lɨkaaja ɨlya Tolemai,
apuo tʉkavahʉngɨla avɨtɨki avajiitu na kukukala navo ɨkɨghono kɨmo.
8 Ɨkɨghono ɨkya vʉvɨlɨ tʉkavʉʉka pala,
tʉkalʉta kʉ lɨkaaja ɨlya Kaisalia.
Ʉkuo tʉkikala mʉ nyumba ɨja Filipo jʉno akapʉlɨsyagha ɨMhola ɨNofu ɨja Mʉtwa ʉYesu.
Ʉmuunhu ʉjuo,
alyale ʉmo mʉ vatangɨli lekelalʉbale vano valyasalulue kʉ Yelusalemu.a
9 Alyale na valɨve vane,
vano navalyatolilue.
Avalɨve avuo vakapʉlɨsyagha ɨmhola kuhʉma kwa Ngʉlʉve.
10 Ye tukalile ifighono finga pa Kaisalia,
akiisa ʉmʼbɨli jʉmonga kuhʉma kʉ Yudea jʉno akatambʉlwagha Agabo.b
11 Ʉmʼbɨli ʉjuo akiisa na kutoola ʉlʉkova ʉlwa Paulo,
akipinya mʉ maghʉlʉ na mʉ mavoko akati,
“ɄMhepo ʉMwɨmɨke iiti,
‘Ʉmuunhu ʉnya lʉkova ʉlʉ,
aVayahudi vamonga fye kyavikʉmpinya kʉ Yelusalemu na kʉkʉmʼbɨɨka mʉ mavoko gha vaanhu vano naVayahudi.’ ”
12 Ye tʉsipʉliike isio,
ʉsue palɨkɨmo na vɨtɨki avajiitu vano pwevalyale pala,
tʉkansʉʉma fiijo ʉPaulo kuuti aleke kulʉta kʉ Yelusalemu.
13 Neke ʉmwene akamʉla akati,
“Kɨki mulɨla na kʉkʉndendevʉla?
Ʉne nitavwile kudindilua,
nambe kufua kʉ Yelusalemu ʉkuo vwɨmɨla ɨlɨtavua lya Mʉtwa ʉYesu.”
14 Ye tʉvwene naɨkʉtʉkʉnda ʉsue,
tʉkamʉleka,
tʉkajova tʉkati,
“Sino ʉMʉtwa akeliile,
sivombeke.”
15 Pambele ye tukalile ifighono ndafilɨngi,
tʉkalɨngʼhania amasigho ghiitu,
tʉkavʉʉka tulʉta kʉ Yelusalemu.
16 Avavɨngɨlɨli vamonga ava pa Kaisalia pala,
vakatʉhɨngɨlɨsia,
vakatʉfikisia kʉ kaaja kwa Munasoni,
kʉno tʉkalamwile kuuti tukukala.
Ʉmuunhu ʉjuo alyale ihʉma mʉ ɨɨsi ɨja Kipulo,
alyale ʉmo mʉ vɨtɨki avatasi.
ɄPaulo ifika kʉ Yelusalemu
17 Ye tʉfikile kʉ Yelusalemu,
avɨtɨki avajiitu vakatwʉpɨla nʉ lʉkeelo.
18 Ɨkɨghono ɨkya vʉvɨlɨ ʉPaulo akalʉta nusue kʉkʉmhʉngɨla ʉYakovo.
Avaloleleli vooni ava kɨpʉgha ɨkya vɨtɨki pwevalyale pala.
19 ɄPaulo ye avahʉngiile,
akavoleka sooni sino ʉNgʉlʉve akavombile kukilila ɨmbombo jɨno avombagha kʉ vaanhu vano naVayahudi.
20 Ye vapʉliike imhola isio,
vakamʉghinia ʉNgʉlʉve.
Pe vakamʼbʉʉla ʉPaulo vakati,
“Nyalʉkolo,
ʉlolile aVayahudi imbilima ni mbilima vʉle vamwɨtiike ʉYesu.
Avuo vooni vivɨngɨlɨla fiijo indaghɨlo sa Moose.
21 Neke aVayahudi avuo vapʉliike kuuti,
ʉkʉvavʉlanɨsia aVayahudi vooni vano vikukala mʉ ɨɨsi isa vaanhu vano naVayahudi,
kuuti navangasivɨkɨlaghe mwojo indaghɨlo sa Moose,
navangavavombelaghe ɨkɨvʉngo ɨkya kʉdumula ɨngola ɨja kɨdɨɨmi avaana vaave,c
nambe kʉkʉsivɨngɨlɨla inyiiho siitu twe Vayahudi.
22 Avaanhu ava ndalʉve ndaani vipʉlɨka kuuti ghwisile apa.
Tʉsivombe kɨki!
23 Lɨno,
ʉvombe sino tʉkʉkʉvʉʉla.
Apa pwevale avakɨnhaata vane vano vafingile ʉlʉfingo kwa Ngʉlʉve.
24 Ʉlʉte na vaanhu ava,
kʉ nyumba ɨnyɨmɨke ɨja kufunyila,
ghufuunye mʉlwa kuvalasia palɨkɨmo na veene,e
ʉvahʉmɨkɨsie ɨlɨtekelo lɨno vilondua kuhʉmia aveene neke vakeete ɨlɨnyele lyave.d
Pepano avaanhu vooni kyavikagʉla kuuti,
sooni sino vakasipʉliike vwɨmɨla ʉve sa vʉdesi.
Kange,
kyavikagʉla kuuti na jʉʉve ʉkʉsivɨngɨlɨla indaghɨlo sa Moose.
25 Neke vwɨmɨla avaanhu vano naVayahudi vano vamwɨtiike ʉYesu,
tʉkavalembiile ɨkalata kʉkʉvavʉʉla ʉvʉlamʉsi vwitu kuuti,
navangalisaghe inyama sino vatekiile kʉ mangʉlʉve,
nambe ɨdanda,
nambe inyama isa fikanu fino vabudile vʉbunga,
kange navangavisaghe vavwafu.”
26 Ɨkɨghono ɨkya vʉvɨlɨ,
ʉPaulo akavatoola avakɨnhaata vala,
akifuunya palɨkɨmo na veene mʉlwa kuvalasia.
Pambele akingila mʉ lʉvɨɨka ʉlwa nyumba ɨnyɨmɨke ɨja kufunyila,
kuuti avavʉʉle avatekesi ɨkɨghono kɨno kyavimala pikuvalasia,
neke viise vahʉmie nʉjʉnge ɨlɨtekelo lyake.
ɄPaulo ikolua
27 Ifighono ifio lekelalʉbale ifya kuvalasia ye fitapisila,
aVayahudi vamonga vano valyahʉmile mʉ kɨghavo ɨkya Asia vakamwagha ʉPaulo mʉ lʉvɨɨka ʉlwa nyumba ɨnyɨmɨke ɨja kufunyila.
Pe vakahovelesia ɨlɨpʉgha lyoni ɨlya vaanhu vano valyale pala,
vakankola ʉPaulo,
28 vakatengʉla kukwova viiti,
“Mwe vakɨnhaata mwe Vaisilaeli,
mʉtʉtange!
Ʉmuunhu ʉjʉ ghwe jʉno ivʉlanɨsia avaanhu vooni imbale ni mbale kuuti,
vatʉbenapʉlaghe ʉsue twe Vayahudi,
nasi ndaghɨlo isa Moose,
nɨ nyumba ɨjɨ ɨnyɨmɨke ɨja kufunyila.
Kange,
anyasisief ɨnyumba ɨjɨ ɨja kufunyila mʉlwa kʉvingisia avaanhu vano naVayahudi.”g
29 Vakajovagha isio,
ʉlwakʉva vakamʼbwene ʉPaulo mʉ Yelusalemu,
alɨ lʉmo nʉ Tulofimo ʉghwa kʉ Efeso jʉno naalyale Mʉyahudi.
Vakasaagha kuuti,
ʉPaulo amwingisie ʉTulofimo mʉ nyumba ɨnyɨmɨke ɨja kufunyila.
30 Pepano ɨlɨkaaja lyoni ɨlya Yelusalemu lɨkava nɨ lyovo.
Avaanhu kuhʉma imbale sooni vakaguuna kulʉta kʉ lʉvɨɨka ʉlwa nyumba ɨnyɨmɨke ɨja kufunyila.
Vakingila mula,
vakankola ʉPaulo na kʉkʉnkwesela kʉnji.
Pe amalyango agha nyumba ɨnyɨmɨke ɨja kufunyila ghakadindua ngʼhaningʼhaani.
31 Avaanhu vala ye vilonda pikʉmʼbuda ʉPaulo,
imhola sikafika kwa mʼbaha ʉghwa vasikali ava Kɨlooma kuuti,
ɨlɨkaaja lyoni ɨlya Yelusalemu kʉlɨ mabaatu.
32 Pe ʉmʼbaha jʉla akavatoola ngʼhaningʼhaani avalongosi va vasikali palɨkɨmo na vasikali avange,
vakalʉta lʉvɨlo kʉno kwelɨlyale ɨlɨpʉgha lya vaanhu.
Avaanhu vala ye vikʉmwagha ʉmʼbaha ghwa vasikali na vasikali avange,
vakavʉhɨɨla kʉkʉntova ʉPaulo.
33 Pe ʉmʼbaha jʉla akamʼbelelela ʉPaulo,
akankola,
akavavʉʉla avasikali vaake kuuti vampinye ni nyololo ivɨlɨ.
Pepano akaposia akati,
“Ʉjʉ ghwe veeni?
Avombile kɨki?”
34 Avaanhu vala vakatengʉla pikwova,
vamo vakajovagha ɨlɨ,
avange lɨla.
Neke vwɨmɨla ɨlyovo lɨla,
ʉmʼbaha jʉla akakunua kukagʉla sino sihʉmiile.
Pe akavavʉʉla avasikali vaake kuuti,
vantwale ʉPaulo mʉ nyumba ɨja vasikali.
35 Ye vamfikisie pa fitoghelo ifya nyumba jɨla,
avasikali vala vakampɨnda kuuti vankulusie,
ʉlwakʉva ɨlɨbaatu lɨlyale lɨvaha kyongo.
36 Ɨlɨpʉgha lya vaanhu lɨkavɨngɨlɨlagha kʉnsana kwa Paulo kʉmo vikwova viiti,
“Abudue!”
ɄPaulo ikujoleka pamaaso gha Vayahudi
37 Avasikali vala ye vikʉmwingisia ʉPaulo mʉ nyumba jaave,
ʉPaulo akamposia ʉmʼbaha ghwave akati,
“Ndepoonu nikwɨtɨkɨsɨvua kujova lʉmonga kʉlyʉve?”
Ʉmʼbaha jʉla akamʉla akati,
“Ʉkɨmanyile kujova ɨKɨyunaani?
38 Ʉve naveeve Mʉmisili jʉla jʉno ifighono fino filyakilile akapelile amabaatu,
na kʉkʉvalongosia avagalʉsi avabudi imbilima ine kulʉta kʉ lɨhaka?”
39 ɄPaulo akamʉla akati,
“Ʉne nɨlɨ Mʉyahudi,
nɨholilue mʉ lɨkaaja ɨlɨvaha ɨlya Taliso,
mʉ kɨghavo ɨkya Kilikia.
Sivuo nɨkʉkʉsʉʉma nɨjove na vaanhu ava.”
40 Ʉmʼbaha jʉla akamwɨtɨkɨsia.
Pe ʉPaulo akɨɨma pa fitoghelo ifya nyumba jɨla,
akagholosia ʉlʉvoko kuuti vajike kɨmihe.
Avaanhu vala ye vajikile kɨmihe,
ʉPaulo akatengʉla kujova navo mʉ njovele jaave ɨja Kɨebulania akati,