ɄPaulo ilʉta kange kʉ kɨghavo ɨkya Makedonia nɨ kya Akaya
20
Amabaatu ye ghasilile,
ʉPaulo akavakongʼhania avavɨngɨlɨli va Yesu na kʉkʉvakangasia amoojo.
Pe akavalagha,
akavʉʉka ilʉta kʉ kɨghavo ɨkya Makedonia.
2 Akava ikila mʉ ɨɨsi jɨla ɨkʉvavʉʉla avavɨngɨlɨli va Yesu amasio minga agha kʉvakangasia amoojo.
Pambele akafika kʉ Akaya.a
3 Ʉkuo akikala ameesi ghatatu.
Ye ikulɨngʼhania kulʉta nɨ ngalava kʉ kɨghavob ɨkya Silia,
akapʉlɨka kuuti aVayahudi vilonda kʉkʉmwʉvɨla.
Pe akalamʉla kugomoka na kukilila ɨsɨla ɨja kʉ Makedonia.
4 Ʉnsiki ʉghuo ʉPaulo akava ikyʉla nʉ Timoti,
nʉ Sopatilo,
ʉmwana ghwa Pilo kuhʉma mʉ lɨkaaja ɨlya Beloya,
ʉAlisitaliko nʉ Sekundo kuhʉma mʉ lɨkaaja ɨlya Tesalonike,
ʉGayo kuhʉma mʉ lɨkaaja ɨlya Delibe,
ʉTikiko nʉ Tulofimo kuhʉma mʉ kɨghavo ɨkya Asia.
5 Avaanhu ava valyalongwile kulʉta kʉkʉtʉghulila kʉ lɨkaaja ɨlya Tuloa.
6 Neke ʉsue ye fisilile ifighono ifya kyɨmɨke ɨkya makate ghano naghavɨkilue ɨkɨlʉle,
tʉkapanda ɨngalava kuhʉma kʉ lɨkaaja ɨlya Filipi.
Kuhʉma apuo,
tʉkaghenda ifighono fihaano kuhanga kufika kʉ Tuloa.
Apuo tʉkatangʼhana na vajiitu vano valyalongwile,
tʉkikala ifighono lekelalʉbale.
ɄPaulo ɨkʉnsyʉsia ʉEutiko
7 Ɨkɨghono ɨkya pa Nywabaahac tʉkakongʼhaana kuuti tʉhangɨlanɨle ʉnkate.d
ɄPaulo akava ijova na vaanhu ɨmhola ɨja Mʉtwa,
kuhanga kufika mʉ kɨlo nkate,
ʉlwakʉva akalamwile kuvʉʉka ɨkɨghono ɨkya vʉvɨlɨ.
8 Mʉ kyʉmba ɨkya gholoofa muno tʉlyakongʼhanile,
mwesilyale itaala nyinga sino sikavikagha.
9 Ʉnʼdɨɨmi jʉmonga jʉno akatambʉlwagha Eutiko alikalile pa lɨdiliisa mʉ kyʉmba kɨla.
ɄPaulo ye ifijova na vaanhu ʉnsiki ntali,
ʉnʼdɨɨmi jʉla akatengʉla pikʉkɨɨla.
Itʉlʉ ye sinkolile kyongo,
akaghua paasi kuhʉma ɨgholoofa ɨja vʉtatu.
Avaanhu ye vikʉmwinamʉla,
vakavona afwile.
10 ɄPaulo akiika paasi,
akalambalala pakyanya pa mʼbɨlɨ ghʉla,
akaghʉghumbatɨla,
akavavʉʉla avaanhu akati,
“Mʉleke pisukunala,
ʉjʉ mwʉmi!”
11 Pambele akatogha kange kʉ kyʉmba kɨla,
akatoola ʉnkate,
akalia.
Akapʉlɨsia kange kʉ nsiki ntali kuhanga kufika pano kuhenga,
pe akavʉʉka ilʉta.
12 Avaanhu vala vakantoola ʉnʼdɨɨmi jʉla mwʉmi,
vakantwala kʉ kaaja jaake,
amoojo ghaave ghakanyamala.
ɄPaulo ilʉta kʉ Mileto
13 Ʉsue tʉkapanda ɨngalava kulongola kulʉta kʉ lɨkaaja ɨlya Asosi,
kuuti tʉkamʉghuule ʉPaulo kʉla.
ɄPaulo alyalaghiile ʉluo,
ʉlwakʉva ʉmwene alyalamwile kughenda lʉghʉlʉ kulʉta kʉ lɨkaaja ɨlio.
14 Ye atʉvwene pa Asosi,
tʉkantoola nɨ ngalava,
tʉkalʉta palɨkɨmo kʉ lɨkaaja ɨlya Mitilene.
15 Ɨkɨghono ɨkya vʉvɨlɨ,
tʉkavʉʉka kange nɨ ngalava,
tʉkafika piipi nɨ ɨɨsi ɨja Kio jɨno jɨlyale pakate pa nyanja.
Ɨkɨghono ɨkya vʉtatu,
tʉkafika mʉ ɨɨsi ɨja Samo jɨno joope jɨlyale pakate pa nyanja.
Ɨkɨghono ɨkya vʉne,
tʉkafika mʉ lɨkaaja ɨlya Mileto.
16 ɄPaulo alyalamwile kuuti tʉleke pikwika pa Efeso,
ʉlwakʉva naakalondagha pidɨɨla mʉ kɨghavo ɨkya Asia.
Ʉmwene akalondagha kuuti,
nave lukwɨtɨngʼhana afike ngʼhaningʼhaani kʉ Yelusalemu pa kyɨmɨke ɨkya Pentekositi.e
ɄPaulo ɨkʉvalagha avaloleleli ava kɨpʉgha ɨkya vɨtɨki kʉ Efeso
17 ɄPaulo ye alɨ kʉ Mileto,
akasuungʼha avaanhu kuuti vavakemeele avaloleleli ava kɨpʉgha ɨkya vɨtɨki kʉ Efeso,
kuuti vatangʼhane nʉ mwene.
18 Avaloleleli vala ye vafikile,
akavavʉʉla akati,
“Ʉmue mʉkagwile vʉle nɨkikalile numue ʉnsiki ghwoni,
kuhʉma ɨkɨghono ɨkya kwanda ye nifika mʉ kɨghavo ɨkɨ ɨkya Asia.
19 Mʉkagwile vʉle namʼbombelagha ʉMʉtwa nʉ lujisio lwoni,
na misosi ni mhumuko sino silyanyaghile vwɨmɨla ɨkɨvini ɨkya Vayahudi.
20 Mʉkagwile kuuti,
nɨkitavwile lwoni kupʉlɨsia kʉlyʉmue imhola sooni isa kʉvatanga.
Kange,
nɨkihʉmisie kuvʉlanɨsia mʉ mapʉgha gha vaanhu,
na mʉ nyumba siinu.
21 Navapavɨlagha vooni,
aVayahudi na vano naVayahudi,
kuuti valaate inyɨvi saave,
vansyetʉkɨle ʉNgʉlʉve na kʉkʉmwɨtɨka ʉMʉtwa ghwitu ʉYesu Kɨlɨsite.
22 “Lɨno,
mʉkagʉlaghe kuuti,
ʉMhepo ʉMwɨmɨke ɨkʉsuungʼha kulʉta kʉ Yelusalemu,
napano nanɨkagwile sino kyasikʉmbona ʉkuo.
23 Looli kɨno nɨkagwile kye ɨkɨ:
Mʉ makaaja ghooni ghano nikila,
ʉMhepo ʉMwɨmɨke ɨkʉhʉfia kuuti,
ɨndinde ni mhumuko fikʉnguula.
24 Neke ʉvwʉmi vwango nanivɨkɨla mwojo,
ʉlwene nilonda kumala vʉnono ɨmbombo jɨno nɨkʉpiile kuhʉma kwa Mʉtwa ʉYesu,
ɨmbombo ɨja kʉpʉlɨsia avaanhu ɨMhola ɨNofu ɨja lʉsʉngʉ lwa Ngʉlʉve.
25 “Naghendagha kʉlyʉmue imbale ni mbale,
kupʉlɨsia ʉVʉtwa vwa Ngʉlʉve.
Lɨno,
nɨkagwile kuuti,
nakwale nambe jʉmo mʉlyʉmue jʉno kyaɨkʉmbona kange.
26 Ʉmʉsyʉghʉ nɨkʉvavʉʉla mweni kuuti,
ʉne nɨlɨ nsila nkole vwɨmɨla ʉmuunhu ghweni jʉno ifwɨla mʉ nyɨvi saake,
27 ʉlwakʉva nɨkitavwile kupʉlɨsia kʉlyʉmue ʉvʉfumbue vwoni ʉvwa Ngʉlʉve.
28 Lɨno,
mulolelelaghe amoojo ghiinu,
kange mʉlolelelaghe ɨkɨpʉgha kɨno ʉMhepo ʉMwɨmɨke avavɨkile ʉmue kuuti mʉvisaghe valoleleli.
Mʉdɨmaghe vʉnono ɨkɨpʉgha ɨkio ɨkya Ngʉlʉve kɨno akɨvangɨle nɨ danda ɨja Mwanaake.f
29 Nɨkagwile kuuti nɨngavʉʉke,
avavʉlanɨsi va vʉdesi vikwisa kʉlyʉmue viiva vakali hwene ngʼhekeeva,
navikʉkɨvonelagha ɨkɨsa ɨkɨpʉgha ɨkya vɨtɨki.
30 Nambe kuhʉma mʉlyʉmue,
vilivoneka avaanhu vano vijovagha imhola isa vʉdesi,
kuuti avavɨngɨlɨli va Mʉtwa ʉYesu,
vavavɨngɨlɨlaghe aveene.
31 Lɨno,
mʉvisaghe maaso!
Mʉkʉmbʉkaghe vʉle nanakatalagha kʉkʉmpavɨla ʉmuunhu ghweni mʉlyʉmue kuhanga kulɨla.
Nɨvapaviile amaaka ghatatu,
pakɨlo na pamwisi.
32 “Lɨno,
nɨkʉvavɨɨka mʉ vʉloleleli vwa Ngʉlʉve na mʉ lɨsio ɨlya lʉsʉngʉ lwake lɨno lɨlɨ ni ngʉfu isa kʉvakangasia na kʉkʉvapeela ʉvʉhaasi vʉno mʉvɨkilue ʉmue na vɨmɨke avange vooni.
33 Nananoghelwagha nambe padebe indalama isa muunhu ghweni,
nambe isahabu nambe ʉmwenda ghwake.
34 Jʉmue mʉkagwile kuuti,
nɨkaale nivomba ɨmbombo na mavoko ghango agha,
neke nɨkave ifiinu fino nalondagha ʉne na vajango.
35 Navombagha sooni isio kʉkʉvahʉfia kuuti,
tʉnoghiile kughimba kuvomba ɨmbombo,
neke tʉkave ifya kʉvatanga avavotevote.
Tʉkʉmbʉkaghe amasio ghano ʉMʉtwa ʉYesu jʉjuo alyajovile kuuti,
‘Vafunyilue vano vitavʉla ifiinu fyave kukila vano vikwʉpɨla.’ ”