ɄPaulo ipʉlɨsia kʉ Efeso
19
ɄApolo ye alɨ kʉ Akaya,
mʉ lɨkaaja ɨlya Kolinto,
ʉPaulo akava mʉ lʉghendo ikila kʉ ɨɨsi ɨja fidunda,
mʉ kɨghavo ɨkya Asia.
Pambele akafika kʉ lɨkaaja ɨlya Efeso.
Ʉkuo akatangʼhana na vavɨngɨlɨli vamonga ava Yesu,
2 akavaposia akati,
“Asi,
ye mʉmwɨtiike ʉYesu,
mʉkʉpiile ʉMhepo ʉMwɨmɨke?”
Vakamwamʉla vakati,
“Ndali!
Natʉghelile nambe kupʉlɨka kuuti kwale ʉMhepo ʉMwɨmɨke.”
3 ɄPaulo akavaposia kange akati,
“Lɨno,
pe mʉkofughue ʉlwofugho lʉki?”
Vakamwamʉla vakati,
“Tʉkofughue ʉlwofugho ʉlwa Yohani.”
4 ɄPaulo akavavʉʉla akati,
“Ʉlwofugho lwa Yohani lʉlyale lwa kʉvonia kuuti,
avaanhu valatile inyɨvi saave.
Kange,
ʉYohani akavavʉlagha avaanhu kuuti vamwɨtɨkaghe jʉno ikwisa mʉmbele mwa mwene,
ʉjuo ghwe Yesu.”
5 Avaanhu vala ye vapʉliike amasio aghuo,
vakofughua mʉ lɨtavua ɨlya Mʉtwa ʉYesu.
6 Pe ʉPaulo akavɨɨka amavoko ghaake pa veene,
ʉMhepo ʉMwɨmɨke akavisila,
vakatengʉla kujova ɨnjovele ɨmhia,
na kupʉlɨsia ɨmhola kuhʉma kwa Ngʉlʉve.
7 Avaanhu vooni avuo valyale vakɨnhaata kɨjigho na vavɨlɨ ndɨɨkɨ.
8 Ʉnsiki ʉghwa meesi ghatatu,
ʉPaulo akalʉtagha mʉ sinagogi na kujova na vaanhu kɨsila vwoghofi,
ɨkʉvavʉʉla kuuti vɨtɨke imhola isa Vʉtwa vwa Ngʉlʉve.
9 Neke vamonga vakakaana kukwɨtɨka,
vakatengʉla kujova fivi vwɨmɨla ɨSɨla ɨja Mʉtwa ʉYesua pa lɨpʉgha lya vaanhu.
Pepano ʉPaulo akavaleka,
akavatoola avavɨngɨlɨli,
akalʉta navo kʉ nyumba ɨja kʉvʉlanɨkɨsia,
jɨno jaale ja muunhu jʉmonga jʉno akatambʉlwagha Tilano.
Ʉkuo akavʉlanɨsyagha imhola isa Yesu ifighono fyoni.
10 ɄPaulo akavomba ʉluo amaaka ghavɨlɨ.
Pe avaanhu vooni vano vakikalagha mʉ kɨghavo ɨkya Asia,
aVayahudi palɨkɨmo na vano naVayahudi,
vakapʉlɨka ɨlɨsio lya Mʉtwa.
Avaana va Sikeva vitovua nʉ muunhu ʉnya lɨpepo ɨlɨlamafu
11 Ʉnsiki ʉghuo,
ʉNgʉlʉve akavombagha ifidegho ifivaha kukilila ʉPaulo.
12 Avaanhu vakatwalagha kʉ vatamu ifitambala na menda ghano ʉPaulo abasisie,
neke avatamu vakasokagha,
na vano valyale na mapepo amalamafu ghakavahʉmagha.
13 Kwevalyale aVayahudi vamonga vano vakaghendagha imbale ni mbale vivomba ɨmbombo ɨja kʉdaga amapepo amalamafu.
Avaanhu avuo vakaghela kuvomba ʉluo mʉ lɨtavua lya Mʉtwa ʉYesu viiti,
“Mʉ lɨtavua ɨlya Yesu jʉno ʉPaulo ɨkʉmpʉlɨsia,
nɨkʉvavʉʉla,
hʉma mwa muunhu ʉjʉ!”
14 Mʉ vano vakavombagha ʉluo,
mwevalyale avaanhu lekelalʉbale vano vaale vaswambe va Sikeva,
ʉntekesi ʉmʼbaha ʉghwa Kɨyahudi.
15 Neke ɨkɨghono kɨmonga ye vidaga ɨlɨpepo ɨlɨlamafu mwa muunhu jʉmonga,
ɨlɨpepo ɨlio lɨkavamʉla lɨkati,
“ɄYesu nɨmmanyile,
ghwope ʉPaulo nɨmmanyile,
lɨno ʉmue mwemue vaveeni?”
16 Pe ʉmuunhu jʉno akaale nɨ lɨpepo ɨlɨlamafu akavalʉkɨla vooni,
akavatova kyongo,
akavatola.
Pe vakahʉma lʉvɨlo mʉ nyumba jɨla valɨ vʉfuula,
kange valemiile.
17 Imhola isio sikapʉlɨkɨka kʉ Vayahudi na kʉ vano naVayahudi vano vakikalagha mʉ Efeso.
Vooni lʉkavakola ʉlʉdwesi,
vakalɨghinia ɨlɨtavua ɨlya Mʉtwa ʉYesu.
18 Avaanhu vinga mʉ vano vakamwɨtiike ʉYesu,
vakalʉta kulaata inyɨvi saave sino vavombagha,
na kukwoleka inyɨvi isio pamaaso gha vaanhu.
19 Avaanhu vinga mʉ vano vakavombagha isa vʉhavi kupela ifidegho,
vakakongʼhania ifitabu fyave fino vakavombelagha,
vakanyaanya pamaaso gha vaanhu vooni.
Ifitabu fila vakavalile na kuvona fyale fya ndalama nyinga.
Filyale fya ndalama imbilima fijigho fihaano ndɨɨkɨ,
mʉ mbalɨlo sa ndalama saave.b
20 Fye enendɨɨkɨ ɨlɨsio lya Mʉtwa lɨkava ni ngʉfu lɨkafikwɨlagha imbale ni mbale.
Amabaatu amavaha kʉ Efeso
21 Ye sivombiike isio,
ʉPaulo akalamʉla kulʉta kʉ Yelusalemu,
kukilila kʉ kɨghavo ɨkya Makedonia nɨ kya Akaya.
Akati,
“Nɨngafike kʉ Yelusalemu,
lʉnoghiile nɨfike kwope kʉ Looma.”
22 Pe akavasuungʼha avaanhu vavɨlɨ mʉ vatangɨli vaake ʉTimoti nʉ Elasito,
valongole kʉ Makedonia.
Neke ʉmwene akajigha ifighono ndafilɨngi mʉ kɨghavo ɨkya Asia.
23 Ifighono ifio ghakahʉmɨla amabaatu amavaha kʉ Efeso vwɨmɨla ɨSɨla ɨja Mʉtwa ʉYesu.
24 Amabaatu aghuo ghalyatengwile ndɨɨkɨ:
Kwealyale ʉmuunhu jʉmonga ʉmponda fyʉma,
jʉno akatambʉlwagha Demetilio.
Ʉmuunhu ʉjʉ akatendagha ifijumba ifya kyʉma,
fino fyale kɨhwani kya nyumba ɨnyɨmɨke ɨja ngʉlʉve ghwave ʉmʉkɨjʉʉva,
jʉno akatambʉlwagha Alitemi.
Ɨmbombo ɨjio jɨkavapelagha avaponda fyʉma indalama nyinga.
25 ɄDemetilio akakongʼhania avaponda fyʉma avajaake palɨkɨmo na vange vano vakavombagha ɨmbombo ndavʉle jɨla,
akavavʉʉla akati,
“Mwe vakɨnhaata ʉmue,
mʉkagwile kuuti mʉ mbombo ɨjɨ mwe tukavɨla ɨkyʉma.
26 Lɨno,
mʉpʉliike na kulola vʉle ʉPaulo ɨkʉvafunda avaanhu vinga pa Efeso apa na mʉ kɨghavo kyoni ɨkya Asia,
ɨkʉvavʉʉla kuuti,
amangʉlʉve ghano ghitendua na vaanhu namangʉlʉve gha kyangʼhaani.
Avaanhu vinga vɨtiike imbʉlanɨsio isio.
27 Lɨno,
ɨmbombo jiitu ɨjɨ jɨno tuvomba jitapibenapʉlua,
nakwekʉti jɨ mbombo jiitu jeene,
looli najɨ nyumba ɨja ngʉlʉve ghwitu ʉmʼbaha ʉmʉkɨjʉʉva ʉAlitemi.
Kange,
ʉvʉvaha vwa ngʉlʉve ʉjuo,
jʉno tʉkʉmwɨmɨka ɨkɨghavo kyoni ɨkya Asia ni ɨɨsi isingi sooni,
kyande vupepʉlua.”
28 Avaponda fyʉma avajaake ye vapʉliike isio,
vakakalala kyongo,
vakatengʉla pikwova viiti,
“ɄAlitemi ʉghwa Vaefeso ghwe mʼbaha!”
29 Nakalɨngi ɨlɨkaaja lyoni ɨlya Efeso lɨkava na mabaatu,
avaanhu vinga vakakongʼhaana.
Pe vakankola ʉGayo nʉ Alisitaliko avahʉma kʉ Makedonia,
vano vakaghendaniagha nʉ Paulo,
vakavatwala pa kɨvanja pano avaanhu vakakongʼhanagha.
30 ɄPaulo akalondagha pilʉta pa lɨpʉgha ɨlya vaanhu vala kuuti ajove navo,
neke avavɨngɨlɨli vakansigha.
31 Nava vavaha vamonga ava kɨghavo ɨkya Asia vano valyale vamanyaani vaake,
vakasuungʼha avaanhu kʉkʉnkaana ʉPaulo kuuti,
naangalʉtaghe kʉ kɨvanja ɨkio.
32 Ʉnsiki ʉghuo avaanhu vakava vikwova,
vamo vakajovagha ɨlɨ,
avange lɨla.
Ɨlɨpʉgha lyoni lɨkava lɨsila mapʉlɨngʼhano,
kange vinga mʉ veene navakakagwile kɨno vakongʼhaniile pala.
33 AVayahudi vamonga vakamwɨmia ʉAlekisanda pamaaso gha vaanhu na kʉkʉmʼbʉʉla amasio agha kʉjova.
Pe ʉAlekisanda akagholosia ʉlʉvoko kuuti avaanhu vajike kɨmihe,
ʉlwakʉva akalondagha pikwoleka pamaaso ghaave kuuti,
aVayahudi namwevale mʉ nongua ɨjio.
34 Neke avaanhu mʉ lɨpʉgha lɨla ye vakagwile kuuti ʉmwene Mʉyahudi,
vooni vakava vikwova palɨkɨmo ʉnsiki ʉghwa fivalɨlo fivɨlɨ viiti,
“ɄAlitemi ʉghwa Vaefeso ghwe mʼbaha!”
35 Pambele ʉkalaani ʉghwa lɨkaaja lɨla akavajikisia avaanhu.
Akajova akati,
“Mwe vakɨnhaata va mʉ Efeso,
kwoni avaanhu vooni vakagwile kuuti,
ɨlɨkaaja ɨlya Efeso lye lɨno lilolelela ɨnyumba ɨnyɨmɨke ɨja Alitemi ʉngʉlʉve ʉmʼbaha,
palɨkɨmo nɨ kɨhwani kyake kɨno kɨkikile kuhʉma kʉkyanya.
36 Lɨno,
ʉlwakʉva nakwale jʉno ndepoonu ikaana ɨmhola ɨjɨ,
mʉnoghiile kujika kɨmihe,
mʉleke kʉkʉjɨlʉtɨla ngʼhaki ɨmhola ɨjɨ.
37 Avaanhu ava,
vano mʉvaletile apa navahɨjile kɨmonga mʉ nyumba ɨnyɨmɨke ɨja kufunyila ɨja ngʉlʉve ghwitu ʉmʉkɨjʉʉva,
nambe kʉkʉmʉligha ʉngʉlʉve ghwitu ʉmʉkɨjʉʉva.
38 ɄDemetilio na vaponda fyʉma avajaake nave valɨ nɨ lɨsio nʉ muunhu jʉmonga,
vanoghiile kutwala ɨnongua ɨjio pa vahɨghi.
39 Kange,
nave mʉlɨ nɨ lɨsio ɨlɨngɨ,
mʉnoghiile kutwala pa lʉgono lʉno lʉlɨ mʉ vʉtavɨke vwa ndaghɨlo isa lɨkaaja liitu.
40 Sino sivombiike ʉmʉsyʉghʉ,
ndepoonu sikʉtwambʉsia tʉhɨghue kuuti tʉpelile amabaatu.
Nave vatʉhɨghe,
tʉlɨ vasila ɨkya kwoleka vwɨmɨla ɨlyovo ɨlɨ.”
41 Ye amalile kujova isio,
akavavʉʉla avaanhu va lɨpʉgha lɨla kuuti vapalasane.