ɄPaulo itwalua kʉ Looma
27
Pambele vakalamʉla kuuti tʉvʉʉke nɨ ngalava kulʉta kʉ ɨɨsi ɨja Italia.
Pe vakamʼbɨɨka ʉPaulo na vadindilua avange mʉ mavoko gha mʉlongosi jʉmonga ʉghwa vasikali jʉno akatambʉlwagha Yulio.
Ʉjuo alyale mʼbaha ghwa kɨpʉgha kya vasikali va Kaisali.
2 Pe tʉkapanda ɨngalava jɨmonga ɨja kʉ lɨkaaja ɨlya Adulamitio jɨno jɨkava jilʉta kʉ bandalia simonga mʉ kɨghavo ɨkya Asia.
Tʉkavʉʉka pa Kaisalia pala palɨkɨmo nʉ Alisitaliko ʉmhʉma mʉ lɨkaaja ɨlya Tesalonike mʉ kɨghavo ɨkya Makedonia.
3 Ɨkɨghono ɨkya vʉvɨlɨ,
tʉkafika pa bandali ɨja lɨkaaja ɨlya Sidoni.
Apuo ʉYulio akamʼbombela vʉnofu ʉPaulo,
akantavʉla kuuti alʉte atangʼhane na vamanyaani vaake,
neke vantange fino aghilue.
4 Ye tuvʉʉka apuo,
ɨmhepo ɨmbaha jɨkatʉsighagha kʉno tulʉta,
pe tʉkakilila ʉlʉbale ʉlʉnge ʉlwa ɨɨsi ɨja Kipulo,
ɨɨsi jɨno jɨlyale pakate pa nyanja.
5 Pepano tʉkalʉta ʉlʉbale ʉlʉnge ʉlwa nyanja ɨjio,
kukilila mʉlʉbale ʉlwa kɨghavo ɨkya Kilikia nɨ kya Pamfilia,
pe tʉkafika mʉ lɨkaaja ɨlya Mila mʉ ɨɨsi ɨja Likia.
6 Apuo,
ʉmʉlongosi jʉla ʉghwa vasikali,
akajaagha ɨngalava ɨja kʉ lɨkaaja ɨlya Alekisandilia jɨno jilʉta kʉ ɨɨsi ɨja Italia,
pe akatwingisia tweni mʉ ngalava jɨla.
7 Kuhʉma apuo,
tʉkafilʉtagha nɨ ngalava lʉkelʉke ifighono finga kange nʉ lʉpumuko ʉlʉkome,
kuhanga tʉkava piipi nɨ lɨkaaja ɨlya Nido.
Apuo ɨmhepo ɨmbaha jɨkatʉsigha kʉno twalondagha kukilila.
Pe tʉkafilʉtagha kuhanga tʉkafika ʉlʉbale ʉlʉnge ʉlwa ɨɨsi ɨja Kilete jɨno jɨlyale pakate pa nyanja,
piipi ni Salumoni.
8 Tʉkafilʉtagha nɨ ngalava mʉ mʉlʉbale mʉ nyanja nʉ lʉpumuko ʉlʉkome.
Pambele tʉkafika pamonga pano pakatambʉlwagha Bandali ɨNofu,
piipi nɨ lɨkaaja ɨlya Lasea.
9 Ifighono finga fikava fikilile tʉjiighe tufikyʉla kuhanga nafi fighono ifya kʉvʉhɨɨla kulia mʉlwa kufuunyab fikava fikilile.
Kange,
lʉkavoneka kuuti,
ʉnsiki ʉghuo naghʉkava nnofu kukyʉla mʉ nyanja.
Pe ʉPaulo akavapavɨla akati,
10 “Vajango,
nɨvwene kuuti ʉlʉghendo lwitu luuva lwa lʉpumuko kyongo,
ndepoonu ɨngalava ɨjɨ palɨkɨmo na masigho ghooni agha,
fisovela mʉ nyanja.
Kange,
na jʉsue ndepoonu tufua.”
11 Neke ʉmʉlongosi jʉla ʉghwa vasikali akabenapʉla amasio gha Paulo,
akʉpɨla amasio gha jʉno ighendesia ɨngalava na masio gha nya ngalava jɨla.
12 Ʉlwakʉva pa bandali apuo napakava panofu kukukala ʉnsiki ghwa mhepo,
avaanhu vinga mʉ ngalavac jɨla vakɨtɨngʼhana kuuti tʉvʉʉke pala.
Avaanhu avuo vakasaghagha kuuti nave lʉnoghiile tʉfike kʉ bandali ɨjɨngɨ ɨja Kilete,
jɨno jɨkatambʉlwagha Foenikisi,
kuuti tukale pala ʉnsiki ʉghuo ʉghwa mhepo.
Ɨbandali ɨjio jɨlyalolile kʉvʉseemo.
ɄPaulo na vajaake vipumuka mʉ nyanja
13 Pambele,
ɨmhepo ɨndebe kuhʉma kʉmavemba jɨkatengʉla pipuula.
Pe avavombi ava mʉ ngalava jɨla vakahʉvɨɨla kuuti ndepoonu vifika ndavʉle vasaghagha.
Pe vakatosia ɨnanga ɨja ngalava,d
vakavʉʉka pala,
vakakila mʉlʉbale mʉ ɨɨsi ɨja Kilete.
14 Neke ʉnsiki nʼdebe vʉvʉle,
jɨkiisa ɨmhepo ɨmbaha kyongo kuhʉma kʉ Kilete jɨno jɨkatambʉlwagha Mhepo ja Kʉvwehe.
15 Ɨmhepo ɨjio jɨkasighagha ɨngalava kulʉta kʉvʉlongolo,
kuhanga tʉkakunua kʉkʉjɨlʉngɨka.
Pe tʉkajɨleka jikungʼilisivua nɨ mhepo.
16 Pe tʉkakila ʉlʉbale lʉmonga ʉlwa ɨɨsi ɨndebe ɨja Kauda,
jɨno jɨlyale pakate pa nyanja.
Ɨɨsi ɨjio jɨkasigha padebe ɨmhepo jɨla jɨno jɨkava jigugula.
Pepano tʉkingisia ʉntumbwie na kupinya vʉnono mʉ ngalava,
napano lwale lʉtalamu lʉkome.
17 Ʉntumbwi ghʉla ye ghwingisivue,
avavomba mbombo vakapinya ɨngalava ni ngoji kuuti jɨleke pinangɨka.
Neke ʉlwakʉva vakoghopagha kuuti ndepoonu vitwalua na kukwʉmɨlɨla mʉ lɨhanga ɨlya mʉ nyanja kʉ Siliti,
mʉ ɨɨsi ɨja Libia,
vakisia ɨnanga kuuti ɨngalava jɨleke kulʉta lʉvɨlo,
pe vakajɨleka jɨkungʼilisivwaghe nɨ mhepo.
18 Ɨkɨghono ɨkya vʉvɨlɨ ye tʉvwene ɨmhepo jifigugula kyongo,
avavomba mbombo va mʉ ngalava vakatengʉla kutaagha amasigho mʉ nyanja.
19 Ɨkɨghono ɨkya vʉtatu,
vakataagha mʉ nyanja nafi fyombo fimonga ifya kʉghendekesia ɨngalava.
20 Ye fikilile ifighono finga kɨsila kʉlyagha ɨlɨjʉva nambe nhondue,
kange najɨ mhepo pano jɨkafigugulagha kyongo,
tʉkava vasila lʉhʉvɨɨlo ʉlwa kʉkuluka.
21 Avaanhu vala ye vikalile ifighono finga kɨsila kʉlia kɨmonga,
ʉPaulo akɨɨma pakate pa veene,
akavavʉʉla akati,
“Mwe vakɨnhaata ʉmue,
mwale mʉmhʉlɨkɨsie ʉnsiki ghʉla ye nɨkʉvapavɨla kʉ Kilete kuuti natʉngavʉkaghe,
natwale tupumuka enendɨɨkɨ,
nafi fiinu fyoni namwale mutaagha.
22 Lɨno,
nɨkʉvasʉʉma mukangasyaghe,
ʉlwakʉva nakwale nambe jʉmo mʉlyʉmue jʉno kyaifua,
looli ɨngalava je jɨno kyajinangɨka.
23 Ʉlwakʉva ʉNgʉlʉve jʉno ʉne nɨlɨ muunhu ghwake,
kange nɨkʉmwɨmɨka,
ɨkɨlo ɨja mʉsyʉghʉ ansungʼhile ʉnyamhola ghwake kʉlyʉne.
Ʉnyamhola ʉjuo aveele ɨmile piipi nuune,
24 ambʉlile atiile,
‘Paulo,
nʉngoghopaghe!
Ʉnoghiile kukwɨma pamaaso gha Kaisali.f
Kange,
pʉlɨkɨsia,
ʉNgʉlʉve akʉsʉngʉkiile,
ɨkʉkʉpoka ʉve palɨkɨmo na vaanhu vooni vano valɨ nuuve.’
25 Lɨno mwe vakɨnhaata ʉmue mukangasyaghe,
ʉne nɨkʉmhʉvɨɨla ʉNgʉlʉve kuuti sino ambʉlile,
sivombeka.
26 Looli ɨmhepo kyajɨkʉtʉtaagha mʉ ɨɨsi jɨmonga jɨno jɨlɨ pakate pa nyanja.”
27 Mʉ kɨlo nkate ɨkɨghono ɨkya kɨjigho kɨmo na fine ye tukungʼilisivua nɨ mhepo mʉ nyanja ɨja Adiliani,
avavombi va mʉ ngalava vakavona hwene tʉlɨ piipi kufika kʉnji kʉ nyanja.
28 Pe vakisia ɨkɨghelelo mʉ malenga,
vakavona kufika paasi pa nyanja sili mita fijigho fitatu na lekelalʉbale.
Ye vavelile pavʉlongolo padebe,
vakisia kange ɨkɨghelelo kɨla mʉ nyanja,
vakavona kufika paasi sili mita fijigho fivɨlɨ na lekelakwoni.
29 Ʉlwakʉva vakoghopagha kuuti,
ɨngalava ndepoonu jiginyala mʉ mavue amakome,
vakisia inanga ine isa kʉnsana kʉ ngalava.
Pe vakava vikufuunya kuuti kʉkie ngʼhaningʼhaani.
30 Avavomba mbombo va mʉ ngalava vakalondagha kukɨmbɨla,
vakisia ʉntumbwi,
vakahwanagha vilʉta kukwisia inanga isa kʉvʉlongolo kʉ ngalava.
31 Neke ʉPaulo akamʼbʉʉla ʉmʉlongosi ʉghwa vasikali palɨkɨmo na vasikali vaake akati,
“Avavomba mbombo ava,
nave navijigha palɨkɨmo nusue mʉ ngalava ɨjɨ,
ʉmue namʉngakuluke!”
32 Pe avasikali vala vakadumula ingoji sino sikapinyile ʉntumbwi ghʉla,
vakaghʉleka ghʉlʉtaghe mʉ nyanja.
33 Ye kutapikia,
ʉPaulo akavasʉʉma avajaake vooni kuuti valie ɨkyakʉlia,
akavavʉʉla akati,
“Ʉmʉsyʉghʉ kɨghono kya kɨjigho kɨmo na fine mʉjiighe nʉ lʉdwesi kange namʉliile kɨmonga.
34 Lɨno,
nɨkʉvasʉʉma mʉlie,
neke mʉjighe vʉʉmi,
ʉlwakʉva nakwale nambe jʉmo mʉlyʉmue jʉno kyaisofia nambe lʉnyele lwake.”
35 Ye amalile kujova amasio aghuo,
akatoola ʉnkate,
akamhongesia ʉNgʉlʉve pamaaso gha vaanhu vooni,
akamenyʉla,
akatengʉla kulia.
36 Pepano avaanhu vooni vakikangasia,
voope vakalia.
37 Mʉ ngalava jɨla tʉlyale filʉndo fivɨlɨ ni fijigho lekelalʉbale na ntanda.
38 Avaanhu vooni ye valiile vikwite,
vakataagha ɨngano mʉ nyanja,
kuuti vakepʉsie ʉvʉsito mʉ ngalava.
ɄPaulo na vajaake vikuluka mʉ nyanja
39 Ye kʉkiile,
avavombi ava mʉ ngalava vakajɨvona ɨɨsi,
neke navakajɨmanya.
Vakapaagha pamonga pano ɨnyanja jingiile mʉ ɨɨsi ɨjio neke mʉlʉbale mweghwale ʉnsanga.
Pe vakasaagha kuuti,
nave lʉnoghiile vajɨtwale ɨngalava apuo.
40 Pe vakadumula inanga na kʉkʉsileka mʉ nyanja,
kange vakahʉdʉla nasi ngoji isa vʉsukaani ʉvwa ngalava.
Pe vakatosia ʉmwenda ʉghwa kʉvʉlongolo ʉghwa kʉghendekesia ɨngalava,g
kuuti ɨmhepo jɨkungʼilisyaghe ɨngalava kutwala mʉlʉbale mʉ nyanja.
41 Neke ɨngalava jɨla ye jɨvelile pa nhangʼhano ɨja filʉto fivɨlɨ ifya malenga,
jɨkakunua kulʉta,
ʉlwakʉva ʉlʉbale ʉlwa kʉvʉlongolo lʉlingiile mʉ nsanga,
jɨkʉmɨlɨla.
Lwope ʉlʉbale ʉlwa kʉnsana lʉkava lutovua na mavɨngo kuhanga jɨkanangɨka.
42 Pe avasikali vakasaagha kuuti vavabude avakʉngua vooni,
ʉlwakʉva vakoghopagha kuuti ndepoonu vikwogheela kuhanga kufika kʉnji na kukɨmbɨla.
43 Neke ʉlwakʉva ʉmʉlongosi ghwave naakava ilonda vamʼbude ʉPaulo,
akavakaana kuvomba ʉluo.
Pe akavavʉʉla avaanhu vooni kuuti,
vano vakɨmanyile kukwogheela vijughuje taasi mʉ malenga neke vogheele kuhanga vafike kʉnji kʉ nyanja.
44 Looli vano navakɨmanyile,
vatoole imbavo nambe ifitapa ifya ngalava jɨno jɨnangiike,
fivatange kufika kʉnji kʉ nyanja.
Apuo tweni tʉkafika vʉnono.