Ɨnjoka jɨkʉnngʼenya ʉPaulo mʉ lʉvoko
28
Ye tʉkulwike mʉ nyanja,
tʉlɨ mʉ ɨɨsi jɨno jɨlɨ pakate pa nyanja,
pe tʉkakagʉla kuuti ɨɨsi ɨjio jitambʉlua Melita.
2 Avaanhu va pala vakatwʉpɨla vʉnofu fiijo,
napano navalyatʉmanyile.
Vakatʉpembela ʉmwoto ʉghwa kwota,
ʉlwakʉva jɨlyale mhepo,
kange ɨfula jɨlyale jitoonya.
3 ɄPaulo akasweva isanjala.
Ye ipemba,
ɨnjoka jɨkahʉma ngʼhaningʼhaani mʉ sanjala sila vwɨmɨla ɨlɨfuke ɨlya mwoto,
jɨkanngʼenya mʉ lʉvoko.
4 Avaanhu va pala,
ye vavwene ɨnjoka jɨla jiswembeela mʉ lʉvoko lwa Paulo,
vakavʉlana vakati,
“Kyangʼhaani luvoneka ʉmuunhu ʉjʉ mʼbudi.
Nambe akulwike mʉ nyanja,
ʉngʉlʉve ʉmʼbomba mʉ vwakyangʼhaania naangamʉleke ajighe mwʉmi.”
5 Looli ʉPaulo akakungʼunila ɨnjoka jɨla pa mwoto,
neke naalyalemiile nambe padebe.
6 Avaanhu vala vakasaghagha kuuti,
ʉPaulo ndepoonu ifimba nambe kughua paasi na kufua.
Neke ye vaghuliile ʉnsiki ntali kɨsila kʉlwagha lʉmonga,
vakandʉla amasaaghe ghaave vakava viiti,
ʉjʉ ghwe ʉmo mʉ mangʉlʉve.
ɄPaulo ɨkʉnsosia ʉviise ghwa mʼbaha ghwa ɨɨsi ɨja Melita
7 Pano tʉlyale tukwota ʉmwoto,
palyale piipi nʉ mʉghʉnda ghwa mʼbaha ʉghwa ɨɨsi ɨjio.
Ʉmʼbaha ʉjuo akatambʉlwagha Pubulio.
Ʉmuunhu ʉjuo akatwʉpɨla na kʉkʉtʉtengelela vʉnono kʉ kaaja kwa mwene ifighono fitatu.
8 Ʉnsiki ʉghuo,
ʉviise ghwa mʼbaha ʉjuo alyaghonile pa kɨtala,
ʉlwakʉva alyale nɨ mhʉngʉ,
kange akahalɨsyagha ɨdanda.
ɄPaulo akingila mwa ntamu,
akansʉmɨla kwa Ngʉlʉve,
akavɨɨka amavoko ghaake pa mwene,
akansosia.
9 Ye sivombiike isio,
avatamu avange vooni ava mʉ ɨɨsi ɨjio ɨja Melita,
vakamwisila ʉPaulo,
voope akavasosia.
10 Avaanhu va pala vakatwoghopagha fiijo,
vakatʉtengelelagha mʉ nyinga.
Ye tukulɨngʼhania pivʉʉka nɨ ngalava,
vakatʉpeela na kuvɨɨka mʉ ngalava ifiinu fyoni fino twalondagha kuuti fitʉtange mʉ lʉghendo.
ɄPaulo ifika mʉ lɨkaaja ɨlya Looma
11 Kuhʉma tufika mʉ ɨɨsi ɨja Melita kuhanga tuvʉʉka,
tʉlikalile ameesi ghatatu.
Pambele tʉkavʉʉka nɨ ngalava jɨno jɨlyale pala jighuula ʉnsiki ʉghwa mhepo ghʉsile.
Ɨngalava ɨjio jɨlyale ja kʉ Alekisandilia,
kʉvʉlongolo jɨlyale ni fihwani ifya mangʉlʉve amapasa.
12 Pambele,
tʉkafika mʉ lɨkaaja ɨlya Silakusa,
ʉmuo tʉkikala ifighono fitatu.
13 Kuhʉma apuo tʉkafika mʉ lɨkaaja ɨlya Legio.
Ye kɨkilile ɨkɨghono kɨmo,
jɨkiisa ɨmhepo kuhʉma kʉmavemba.
Ɨmhepo ɨjio jɨkatʉtanga tʉkafika mʉ lɨkaaja ɨlya Puteoli ɨkɨghono ɨkya vʉvɨlɨ.
14 Apuo tʉkavaagha avɨtɨki vamonga avajiitu,
vakatʉsʉʉma kuuti tukale na veene ifighono lekelalʉbale.
Pambele tʉkalʉngama kulʉta kʉ lɨkaaja ɨlya Looma.
15 Avɨtɨki avajiitu ava kʉ Looma ye vapʉliike kuuti tʉlɨ mʉ sɨla tulʉta kʉ veene,
ye tʉjiighe kʉtali vakiisa kʉkʉtʉtangʼhanɨsia.
Vamonga vakava vikʉtʉghulila pa lɨghʉlɨlo lya Apio,
avange vakava vikʉtʉghulila pano pitambʉlua Nyumba iTatu isa Vagheesi.
ɄPaulo ye avavwene,
akamhongesia ʉNgʉlʉve,
akapata ingʉfu.
16 Ye tʉfikile mʉ lɨkaaja ɨlya Looma,
ʉPaulo akɨtɨkɨsɨvua kukukala mwene mʉ nyumba jɨmonga.
Pe vakamʼbɨɨka nʉ nsikali ʉghwa kʉmʉlolelela.
ɄPaulo ipʉlɨsia kʉ Looma
17 Ye fikilile ifighono fitatu,
ʉPaulo akavakemeela avavaha va Vayahudi ava pala.
Ye vakongʼhanile,
akavavʉʉla akati,
“Mwe vanyalʉkolo vango,
nakwale ʉmuunhu mʉ kɨsina kiitu jʉno nɨkamhokile,
nambe kuhoka vwɨmɨla inyiiho sino valyatʉlekiile avakʉʉlʉ viitu.
Napano ʉne nanɨkahokile kɨmonga,
nɨkakolilue kʉ Yelusalemu,
na kuvɨkua mʉ mavoko gha Valooma.
18 AValooma vala ye vamhoselisie,
vakavona nɨlɨ nsila nkole ʉghwa kʉmhelela kuuti nɨbudue,
pe valondagha kʉkʉndindulila.
19 Neke aVayahudi vakava vikaana kuuti nɨleke kudindulilua.
Pe nɨkakunua ɨkya kʉvomba,
nɨkasʉʉma kuuti ʉnkole ghwango ghʉhɨghue kʉno nʉ Kaisali,
napano nanalondagha kuhɨghana na Vayahudi avajango.
20 Mʉ ʉluo,
nɨvakemelile kuuti tʉtangʼhane na kujova numue,
ʉlwakʉva ʉne nɨpinyilue ni nyololo isi vwɨmɨla ʉlʉhʉvɨɨlo ʉlwa Vaisilaeli vooni.”
21 Pe avavaha va Vayahudi vakamwamʉla vakati,
“Ʉsue natwʉpiile ɨkalata jɨmonga kuhʉma kʉ Yudea jɨno jɨkʉkʉtambʉla ʉve.
Nambe aVayahudi avajiitu vano vahʉmile ʉkuo,
navajovile ɨmhola jɨmonga nambe ʉvʉviivi vwɨmɨla ʉve.
22 Lɨno,
tughulila kupʉlɨka amasaaghe ghaako,
ʉlwakʉva ʉsue tʉkagwile kuuti,
ɨkɨpʉgha kɨno ghuvɨngɨlɨla kijovua fivi imbale sooni.”
23 Pe vakɨtɨngʼhana nʉ Paulo kuuti,
vatangʼhane ɨkɨghono ɨkɨngɨ mʉ nyumba jɨno ikalagha.
Ɨkɨghono ɨkio ye kɨfikile,
aVayahudi vinga kukila ɨkɨghono ɨkɨlongosi vakakongʼhaana mʉ nyumba ɨjio.
Kuhʉma palwakɨlo kuhanga kufika pakɨvwilile ʉPaulo akava ɨkʉvavʉʉla si nyinga.
Akava ɨkʉvoleka imhola isa Vʉtwa vwa Ngʉlʉve na kʉkʉvasimilisia kuuti voope vamwɨtɨke ʉYesu.
Akavombagha ʉluo mʉlwa kʉvavonia amasio ghano ghijova imhola sa Yesu mʉ ndaghɨlo sa Moose na mʉ fitabu ifya vavɨli.
24 Vamo mʉ Vayahudi vala vakɨtɨka amasio ghano ajovile ʉPaulo,
neke avange navakɨtɨka.
25 Pe vakatengʉla kukanɨngʼhana veene.
Ye vilonda pipalasana,
ʉPaulo akajova ɨlɨsio ɨlɨ,
“ɄMhepo ʉMwɨmɨke alyajovile isa kyangʼhaani kʉ vakʉʉlʉ viitu kukilila kwa mʼbɨli ʉYesaya kuuti,
26 ‘Ʉlʉte kʉ vaanhu ava,
ʉvavʉʉle ʉʉti,
“Kupʉlɨka mupʉlɨkagha,
neke namʉkʉsitangʼhaniagha.
Kulola mulolagha,
neke namʉkʉsivonagha.
27 Ʉlwakʉva avaanhu ava,
vasiiti kukwɨtɨka,
vadindile imbulughutu saave,
vadindile amaaso ghaave.
Vale valeke ʉluo,
amaaso ghaave ghaale ghilolagha,
nasi mbulughutu saave sale sipʉlɨkagha,
nagha moojo ghaave ghaale ghikʉlʉtangʼhaniagha.
Mʉ ʉluo vale vikʉsyetʉkɨla ʉne,
na jʉʉne nale nɨkʉvapoka.” ’b ”
28 ɄPaulo akafikʉvavʉlagha akatisagha,
“Lɨno mʉkagʉle kuuti,
ɨmhola ɨjɨ ɨja vʉpoki kuhʉma kwa Ngʉlʉve,
jɨsungʼhilue kʉ vaanhu vano naVayahudi,
aveene kyavikwʉpɨla.”
29 ɄPaulo ye amalile kujova amasio aghuo,
aVayahudi vala vakavʉʉka kʉmo vikanɨngʼhana kyongo.c