Lʉʉka 22

ɄYuuda ikwɨtɨka kʉkʉmwohela ʉYesu

(Mataayi 26:1-5, 14, 16; Malɨka 14:1-2, 10-11; Yohani 11:45-53)

Ʉnsiki ʉghwa kyɨmɨke ɨkya makate ghano naghavɨkilue ɨkɨlʉle, ghʉlyale piipi, ɨkyɨmɨke ɨkio kɨkatambʉlwagha Pasaka. 2 Avavaha va vatekesi, palɨkɨmo na vavʉlanɨsi va ndaghɨlo, vakalondagha ɨsɨla ɨja kʉmʼbudila ʉYesu. Neke vakavombagha ʉluo mʉ vʉsyefu, ʉlwakʉva vakoghopagha avaanhu.

3 Neke ʉSetano akamwingila ʉYuuda, jʉno akatambʉlwagha Isikalioti. Ʉmuunhu ʉjʉ alyale ʉmo mʉ vasungʼhua vala kɨjigho na vavɨlɨ. 4 Pepano ʉYuuda akalʉta kʉ vavaha va vatekesi, na kʉ vavaha va vasikali vano vakalolelelagha ɨnyumba ɨnyɨmɨke ɨja kufunyila. Akapʉlɨngʼhana navo mʉlwa kʉnkola ʉYesu. 5 Ʉluo, lʉkavahovosia kyongo avavaha vala, pe vakapʉlɨngʼhana nʉ mwene kʉkʉmpeela indalama. 6 ɄYuuda akɨtɨka, pe akatengʉla kulonda ʉnsiki pano ɨlɨpʉgha ɨlya vaanhu napwelɨlɨ, neke amwohele ʉYesu.

Ʉlʉlɨngʼhanio ʉlwa Pasaka

(Mataayi 26:17-25; Malɨka 14:12-21; Yohani 13:21-30)

7 Ɨkɨghono ɨkya kyɨmɨke kya makate ghano naghavɨkilue ɨkɨlʉle, kɨkafika. Ɨkɨghono ɨkɨ, kye kɨno avaanhu vakabudagha inyanangʼholo sino savɨkilue kuuti sa Pasaka. 8 Pe ʉYesu akansuungʼha ʉPeteli nʉ Yohani, akavavʉʉla akati, “Mʉlʉte mʉkatʉlɨngʼhanɨkɨsie ɨkyakʉlia ɨkya Pasaka.” 9 Vakamposia vakati, “Ghulonda tʉlɨngʼhanie kʉʉghi?” 10 Akavavʉʉla akati, “Kyande mukwingila mʉ lɨkaaja, mutangʼhana nʉ mʉkɨnhaata jʉmonga, itwɨkile ʉlʉsaaji lwa malenga. Mʉmʼbɨngɨlɨlaghe ʉmuunhu ʉjuo, kuhanga ɨnyumba jɨno kyaikwingila. 11 Apuo, mʉmʼbʉʉle ʉnya nyumba kuuti, ‘ɄMʼbʉlanɨsi iiti, kɨlɨ kʉʉghi ɨkyʉmba ɨkya vahesia, pano panoghiile alɨɨle ɨkyɨmɨke ɨkya Pasaka, palɨkɨmo na vavʉlanɨsɨvua vaake?’ 12 Apuo, ɨkʉvasoona ɨkyʉmba ɨkyeleefu ɨkya kʉ gholoofa, kɨno kɨlɨngʼhanɨsivue ʉvukalo. Ʉmuo mwe mʉtʉlɨngʼhanɨkɨsie.”

13 Avavʉlanɨsɨvua vala vakavʉʉka vilʉta. Ye vafikile, vakasivona sooni ndavʉle ʉYesu aveele avavʉlile. Pe vakalɨngʼhania ɨkyakʉlia ɨkya kyɨmɨke ɨkya Pasaka.

Ɨkyakʉlia ɨkyɨmɨke ɨkya Mʉtwa

(Mataayi 26:26-30; Malɨka 14:22-26; 1 Vakolinto 11:23-25)

14 Ʉnsiki ʉghwa kʉlia ghʉkafika. Pepano ʉYesu akikala kulia ɨkyakʉlia palɨkɨmo na vasungʼhua vaake. 15 Akavavʉʉla akati, “Nilonda fiijo kulia ɨkyɨmɨke ɨkɨ ɨkya Pasaka palɨkɨmo numue, pano sikyale kʉkʉnyaagha imhumuko. 16 Nɨkʉvavʉʉla kuuti, nanɨlalia kange ɨkyɨmɨke ɨkya Pasaka, kuhanga ʉNgʉlʉve iliiva avangile avaanhu vaake vooni na kutema.”

17 Pepano ʉYesu akatoola ɨkɨkombe, akamhongesia ʉNgʉlʉve akati, “Koogho, mʉnywisaghe mweni! 18 Nɨkʉvavʉʉla kuuti, kyangʼhaani nanɨlanyua kange ʉlʉhʉʉje kuhanga ʉVʉtwa vwa Ngʉlʉve vuliiva vukwisa.”

19 Pe akatoola ʉnkate, akamhongesia ʉNgʉlʉve, akamenyʉlania, akavapeela, akati, “Ʉghʉ, ghwe mʼbɨlɨ ghwango, ghʉno ghutavʉlɨlua vwɨmɨla ʉmue. Mʉvombaghe enendɨɨkɨ, kʉkʉngʼhʉmbʉka.” 20 Ye valiile, akatoola ɨkɨkombe akahongesia kwa Ngʉlʉve. Akajova akati, “Ɨkɨkombe ɨkɨ lʉfingo lʉpia, lʉno luvombeka mʉlwa kʉkungʼika ɨdanda jango vwɨmɨla ʉmue.

21 “Looli mʉkagʉlaghe kuuti, ʉmuunhu jʉno itapikʉnyohela, tʉlɨ palɨkɨmo pilia. 22 Kwekʉti, ʉne ne Mwana ghwa Muunhu nilʉta kubudua, ndavʉle ʉNgʉlʉve alyataviike. Neke ɨga, ʉmuunhu ʉjuo jʉno ɨkʉnyohela!” 23 Apuo, avasungʼhua va Yesu vakatengʉla kuposania veene kuuti, ghwe veeni mʉ veene ndepoonu ivomba ʉluo.

Ʉmʼbaha ghwe veeni

24 Avavʉlanɨsɨvua va Yesu vakatengʉla kukanɨngʼhana kuuti, ghwe veeni mʉ veene jʉno ndepoonu iiva mʼbaha. 25 Pepano ʉYesu akavavʉʉla akati, “Avatwa va ɨɨsi, vitema avaanhu vaave ni ngʉfu, neke avatwa avuo vitambʉlua vatangɨli va vaanhu.

26 “Neke ʉmue, mʉlekaghe kuvomba ʉluo. Looli ʉmuunhu jʉno mʼbaha mʉlyʉmue, ʉjuo avisaghe ndavʉle ʉmuunhu jʉno nʼdebe kʉ vooni. Jʉno ilongosia avaanhu, avisaghe ndavʉle ʉmuunhu jʉno ɨkʉvavombela avange. 27 Lɨno, ʉmʼbaha ghwe veeni? Jʉno ikukala pilia! Jʉno itengelela? Asi, naghwe jʉno ikukala pilia? Lɨno, ʉne nɨlɨ palɨkɨmo numue, nɨlɨ ndavʉle ʉmuunhu jʉno ɨkʉvatengelela.

28 “Ʉmue mwemue mukalile nuune, ʉnsiki ghwoni ghʉno nighelua. 29 Lɨno, ʉne nɨkʉvapeela ingʉfu isa kʉtema mʉ Vʉtwa vwango, ndavʉle ʉNhaata ghwango vʉle amheliile ʉvʉtavʉlɨlua ʉvwa kʉtema. 30 Apuo mulisagha na kunyua nuune, mʉ Vʉtwa vwango na kukukala pa fitengo ifya kɨtwa, kuhɨgha ifisina kɨjigho na fivɨlɨ ifya Isilaeli.”

ɄYesu ɨkʉmʼbʉʉla ʉPeteli kuuti kyaɨkʉnkaana

(Mataayi 26:31-35; Malɨka 14:27-31; Yohani 13:36-38)

31 ɄYesu akati, “Simoni, Simoni! Ʉkagʉlaghe vʉnofu kuuti, ʉSetano asʉmile na kupelua kʉkʉvaghela ʉmue, ndavʉle ʉmʼbena ngano vʉle ikwelʉsia ɨngano jaake. 32 Neke ʉne, nɨkʉsʉmiile kwa Ngʉlʉve kuuti, nʉngalʉlekaghe ʉlwɨtɨko lwako kʉlyʉne. Neke kyaʉngomokiile ʉne, ʉvakangasyaghe avanino.” 33 ɄSimoni akamwamʉla akati, “Ghwe Mʉtwa! Ʉne nitavwile kuuva nuuve, nambe kʉʉve kwe kʉdindilua mʉ ndinde, nambe kwe kʉfua!”

34 ɄYesu akamwamʉla akati, “Peteli! Nɨkʉkʉvʉʉla kuuti, ʉmʉsyʉghʉ ɨngʼhongove ye jɨkyale kuvɨka, ghuuva ʉngʼhanile katatu kuuti nʉmanyile ʉne.”

Kukulɨngʼhania kutenga mʉ lʉtalamu

35 Pambele ʉYesu akavaposia avavʉlanɨsɨvua vaake akati, “Ye nɨvasungʼhile kɨsila ndalama, nambe kɨtwalo nambe filatu, mʉkaghilue kɨmonga?” Vakamwamʉla vakati, “Jeeje.” 36 Pe ʉYesu akavavʉʉla akati, “Lɨno, nave ʉmuunhu alɨ ni ndalama, nambe ɨkɨtwalo, atoole. Ghwope jʉno nsila bamba, aghʉsie ɨlɨkooti lyake, neke aghʉle. 37 Ʉlwakʉva lɨlembilue, ‘Alyavalilue palɨkɨmo na vahosi.’ Amasio aghuo ghalyalembilue vwɨmɨla ʉne. Lɨno nɨkʉvavʉʉla kuuti, isio ʉmpaka sivombeke kʉlyʉne, kange sili piipi kuvombeka.” 38 Vakamʼbʉʉla vakati, “Ghwe Mʉtwa! Lolagha, apa pwesili ibamba ivɨlɨ.” Ghwope akati, “Namʉngafijovaghe ɨmhola ɨja bamba.”

ɄYesu ikufuunya kʉ kɨdunda ɨkya Miseituni

(Mataayi 26:36-46; Malɨka 14:32-42)

39 Pepano ʉYesu akavʉʉka ilʉta kʉ kɨdunda ɨkya Miseituni, ndavʉle lwale lwiho lwake. Voope avavʉlanɨsɨvua vaake, vakava vikʉmʼbɨngɨlɨla. 40 Ye afikile pa kɨdunda ɨkio, akavavʉʉla akati, “Mʉnsʉmaghe ʉNgʉlʉve kuuti avapeele ingʉfu, neke ingelo sileke kʉkʉvalema.”

41 Pepano, akavaleka pala, akalʉta pavʉlongolo padebe, ʉvʉtali ʉvwa kʉhʉlʉnga ɨlɨvue. Akafughama, akifuunya kwa Ngʉlʉve akati, 42 “Ghwe Nhaata! Nave ʉkeliile, ʉmbʉsɨkɨsie ɨkɨkombe ɨkɨ ɨkya lʉpumuko. Neke, nakwekʉti sivombeke sino nikeela ʉne, looli sivombeke sino ʉkeliile jʉʉve!” 43 Apuo, ʉnyamhola kuhʉma kʉkyanya akamwisila ʉYesu, akava ɨkʉnkangasia. 44 Neke ʉYesu akaghina kukufuunya, ʉlwakʉva alyale nʉ vʉvafi ʉvʉkome. Ye ikufuunya, ɨnhwingʼa hwene danda jɨkava jidomola paasi.

45 Ye ifunyile, akɨɨma, akalʉta pa vavʉlanɨsɨvua vaake, akavona vaghoneliile, ʉlwakʉva valyale nʉ lʉsukunalo. 46 Akavavʉʉla akati, “Kɨki mʉghoneliile? Mʉsisimuke! Mʉnsʉmaghe ʉNgʉlʉve kuuti avapeele ingʉfu, neke ingelo sileke kʉkʉvalema.”

ɄYesu ikolua

(Mataayi 26:47-56; Malɨka 14:43-50; Yohani 18:3-11)

47 ɄYesu ye ajiighe ijova navo, kɨkiisa ɨkɨpʉgha ɨkya vaanhu valongosivue nʉ Yuuda, ʉmo mʉ vavʉlanɨsɨvua vaake kɨjigho na vavɨlɨ. Pepano ʉYuuda akamʼbelelela ʉYesu kuuti annonele. 48 ɄYesu akamposia akati, “Yuuda! Ʉkʉnyohela ʉne ne Mwana ghwa Muunhu mʉlwa kʉnonela?”

49 Pe avavʉlanɨsɨvua va Yesu ye vilola isio na kukagʉla sino kyasivombeka, vakamposia vakati, “Ghwe Mʉtwa! Tʉvatemanie ni bamba?” 50 Nakalɨngi, jʉmonga mʉ veene akantova ʉnkami ʉghwa ntekesi ʉmʼbaha, akanʼdumula ɨmbulughutu ɨja kʉndio. 51 ɄYesu akajova akati, “Vʉhɨɨla kuvomba ʉluo!” Akabasia ɨmbulughutu ɨja nkami jʉla, akansosia.

52 ɄYesu akavaposia avavaha va vatekesi, avavaha va vasikali avaloleleli va nyumba ɨnyɨmɨke ɨja kufunyila, palɨkɨmo na vagojo va Vayahudi akati, “Mwisile kʉkʉngʼhola ni bamba ni mbunda hwene nɨlɨ mhɨjimʼbudi? 53 Ongo jaatu, twavisagha palɨkɨmo mʉ nyumba ɨnyɨmɨke ɨja kufunyila, namwangʼholagha! Lɨno, ʉghʉ ghwe nsiki ghwinu, ʉnsiki ghʉno atemile ʉntwa ghwa ngʼhiisi.” 54 Pe avaanhu vala vakankola ʉYesu, vakantwala kʉ nyumba ɨja ntekesi ʉmʼbaha. Neke ʉPeteli akava ivɨngɨlɨla pa vʉtali.

ɄPeteli ɨkʉnkaana ʉYesu

(Mataayi 26:57-58, 69-75; Malɨka 14:53-54, 66-72; Yohani 18:12-18, 25-27)

55 Avaanhu vala ye vafikile pa nyumba ɨja ntekesi ʉmʼbaha, vakapemba ʉmwoto pakate pa lʉvɨɨka, vakikala, vakava vikwota ʉmwoto. Ghwope ʉPeteli akaveela, akikala palɨkɨmo na veene. 56 Neke vwɨmɨla ʉlʉmuli lwa mwoto, ʉmʼbombi jʉmonga ʉmhɨnja, akamʉlola ʉPeteli akati, “Najʉ muunhu ʉjʉ, aveele palɨkɨmo nʉ mwene.” 57 Neke ʉPeteli akakaana akati, “Ghwe mʉkɨjʉʉva ʉve! Ʉne nanɨmmanyile!”

58 Pambele, ʉmuunhu ʉjʉnge akamwagha ʉPeteli akati, “Na jʉʉve ʉlɨ ʉmo mʉ vala.” Neke ʉPeteli akamwamʉla akati, “Ghwe muunhu ʉve! Naneene!”

59 Ye kakilile akavalɨlo kamo ndɨɨkɨ, ʉmuunhu ʉjʉnge akakangasia akati, “Kyangʼhaani, ʉmuunhu ʉjʉ aveele palɨkɨmo nʉ mwene! Ʉlwakʉva ghwope ʉjʉ Nʼgalilaya!” 60 ɄPeteli akamʉla akati, “Ghwe muunhu ʉve! Sino ghujova isio, nanɨsikagwile!”

Pala pala ye ijova isio, ɨngʼhongove jɨkavɨka. 61 ɄMʉtwa akasyetʉka, akamʉlola ʉPeteli. Apuo ʉPeteli akakʉmbʉka ɨlɨsio lɨno ʉMʉtwa amʼbʉʉla kuuti, “Ʉmʉsyʉghʉ, ɨngʼhongove ye jɨkyale kuvɨka, ghuuva ʉngʼhanile katatu.” 62 Pe akahʉma kʉnji, akatengʉla pilɨla kyongo.

Avasikali vikʉmʼbenapʉla ʉYesu

(Mataayi 26:67-68; Malɨka 14:65)

63 Avakɨnhaata vano valyale vikʉmʉlolelela ʉYesu, vakava vikʉmʼbenapʉla na kʉkʉntova. 64 Vakamʉghumbilila nɨ kyenda kʉ maaso, neke vakava vikʉntova na kʉkʉmposia viiti, “Vɨla! Ghwe veeni jʉno akʉtovile?” 65 Vakava vifikʉmʉligha amaligho minga.

ɄYesu ihɨghua na vavaha va Vayahudi

(Mataayi 26:59-66; Malɨka 14:55-64; Yohani 18:19-24)

66 Ye kuhenga, avagojo va Vayahudi, na vavaha va vatekesi, na vavʉlanɨsi va ndaghɨlo, vakakongʼhaana. Neke ʉYesu akatwalua pa kɨpʉgha ɨkio. 67 Pepano vakamposia vakati, “Tʉvʉʉle! Ʉve veeve Kɨlɨsite?” ɄYesu akavamʉla akati, “Nambe nɨvavʉʉle, namʉnganyɨtɨke nambe padebe. 68 Kange nɨngavaposie, namʉnganyamʉle. 69 Neke kutengʉlɨla lɨno, ʉne ne Mwana ghwa Muunhu niiva nɨtemile palɨkɨmo nʉ Ngʉlʉve ʉNyangʉfu Sooni.”

70 Apuo vooni vakati, “Kwekʉti ʉve ʉlɨ Mwana ghwa Ngʉlʉve?” ɄYesu akavamʉla akati, “Ʉmue mwemue mʉjovile kuuti ʉne neene!”

71 Pepano avavaha vala vakati, “Lɨno pe tulonda ʉvwolesi ʉvʉnge vwakɨki? Ongo jʉsue tʉpʉliike ɨlɨsio ɨlɨ, kuhʉma kwa mwene jʉjuo!”