11
Lɨno,
mwɨghaghe kʉlyʉne,
ndavʉle na jʉʉne vʉle nɨkʉmwɨgha ʉKɨlɨsite.
Ʉvʉtavɨke ʉvwa kufuunya
2 Nɨkʉvapaala,
ʉlwakʉva mʉkʉngʼhʉmbʉka mʉ sooni na kugadɨlɨla imbʉlanɨsio ndavʉle nɨlyavavʉlanisie.
3 Neke lɨno nilonda mʉkagʉle kuuti,
ʉmutua ghwa mʉkɨnhaata ghweni ʉmwɨtɨki,
ghwe Kɨlɨsite;
ʉmutu ghwa mʉkɨjʉʉva,
ghwe mʉghoosi;
ʉmutu ghwa Kɨlɨsite,
ghwe Ngʉlʉve.
4 Lɨno,
ʉmʉkɨnhaata ghweni ʉmwɨtɨki jʉno ikufwɨka kʉ mutu pano ikufuunya,
nambe pano ipʉlɨsia ɨmhola kuhʉma kwa Ngʉlʉve,
ʉjuo ɨkʉnkosia isoni ʉKɨlɨsite jʉno ghwe mutu ghwake.
5 Ghwope ʉmʉkɨjʉʉva ʉmwɨtɨki jʉno naikufwɨka kʉ mutu pano ikufuunya,
nambe pano ipʉlɨsia ɨmhola kuhʉma kwa Ngʉlʉve,
ʉjuo iiva ɨkʉnkosia isoni ʉmʉghoosi jʉno ghwe mutu ghwake,
ʉlwakʉva iiva ndavʉle ʉmʉkɨjʉʉva jʉno aketile ʉlʉpʉyʉ.b
6 Nave ʉmʉkɨjʉʉva naikufwɨka kʉ mutu,
lʉnoghiile akeete ɨlɨnyele lyake.
Neke ʉlwakʉva kɨnyasoni kwa mʉkɨjʉʉva kukeeta ɨlɨnyele,
yekʉba afwɨke ʉmutu ghwake.
7 Nalʉnoghiile kwa mʉkɨnhaata kukufwɨka kʉ mutu,
ʉlwakʉva ʉmwene kɨhwani kya Ngʉlʉve,
kange ihʉfia ʉvʉvaha vwa Ngʉlʉve.
Neke ʉmʉkɨjʉʉva alɨ nʉ vʉvaha ʉvwa mʉkɨnhaata.
8 Ʉlwakʉva ʉNgʉlʉve naalyampelile ʉmʉkɨnhaata kuhʉma kwa mʉkɨjʉʉva,
looli alyampelile ʉmʉkɨjʉʉva kuhʉma kwa mʉkɨnhaata.
9 Kange,
ʉNgʉlʉve naalyampelile ʉmʉkɨnhaata vwɨmɨla ʉmʉkɨjʉʉva,
looli alyampelile ʉmʉkɨjʉʉva vwɨmɨla ʉmʉkɨnhaata.
10 Vwɨmɨla ʉluo,
kange vwɨmɨla avanyamhola,
ʉmʉkɨjʉʉva anoghiile kufwɨka ʉmutu kuhʉfia ʉvʉtavʉlɨlua vwake.
11 Neke mwa Mʉtwa,
ʉmʉkɨjʉʉva ihʉvɨɨla ʉmʉkɨnhaata,
ghwope ʉmʉkɨnhaata ihʉvɨɨla ʉmʉkɨjʉʉva.
12 Ʉlwakʉva ndavʉle ʉmʉkɨjʉʉva vʉle alyapelilue kuhʉma kwa mʉkɨnhaata,
ghwope ʉmʉkɨnhaata iholua nʉ mʉkɨjʉʉva,
apuo ifiinu fyoni fihʉma kwa Ngʉlʉve.
13 Lɨno mʉsaaghe jʉmue,
ndepoonu lʉnoghiile ʉmʉkɨjʉʉva kukufuunya kwa Ngʉlʉve kɨsila kukufwɨka kʉ mutu?
14 Ongo nagha mavɨlɨ ghaghuo ghihʉfia kuuti,
ʉmʉkɨnhaata kuuva nɨ lɨnyele ɨlɨtali kɨnyasoni kwa mwene!
15 Looli ʉmʉkɨjʉʉva kuuva nɨ lɨnyele ɨlɨtali lʉtogo,c
ʉlwakʉva apelilue ɨlɨnyele ɨlɨtali kuuti lɨvisaghe hwene mwenda ghwa kʉmfwɨka kʉ mutu.
16 Neke nave ʉmuunhu ilonda kukania,
ʉsue natʉlɨ nʉ lwiho ndavʉle ʉluo,
nambe mʉ fipʉgha ifya vɨtɨki va Ngʉlʉve.
Ʉlʉpavɨlo vwɨmɨla ʉvʉtavɨke ʉvwa kyakʉlia ɨkyɨmɨke ɨkya Mʉtwa
17 Lɨno,
vwɨmɨla sino nitapikʉvalaghɨla,
nanɨkʉvapaala,
ʉlwakʉva pano mʉkongʼhanile namuvomba inya lʉvʉmbʉlɨlo,
looli muvomba isila lʉvʉmbʉlɨlo.
18 Nɨpʉliike kuuti pano mukongʼhaana,
namupʉlɨngʼhana.
Mʉ isio sino nɨpʉliike,
simonga nivona sa kyangʼhaani.
19 Kubaghʉlana ʉmpaka kʉhʉmɨle pakate palyʉmue,
kuuti vano vanoghiile pamaaso gha Ngʉlʉve vakagʉlɨke.
20 Lɨno,
pano mukongʼhaana,
namulia ifyɨmɨke ifya Mʉtwa ndavʉle lʉnoghiile,
21 ʉlwakʉva nʉjʉnge ilia ɨkyakʉlia kyake kɨsila kʉghuula avange.
Ʉluo lupelela vamonga kuuva nɨ njala,
avange kughaala.
22 Asi,
mʉlɨ vasila kaaja kʉno ndepoonu mukukala kuuti mʉlie na kunyua?
Kɨki mubenapʉla ɨnyumba ja Ngʉlʉve na kʉkʉvasʉsia avasila kɨmonga?
Nɨvavʉʉle kɨki?
Nɨvapaale?
Jeeje!
Mʉ ʉlʉ nanɨngavapaale.
23 Ʉlwakʉva imbʉlanɨsio sino nɨlyʉpiile kwa Mʉtwa,
se sino nɨkavapeliile ʉmue,
kuuti ʉMʉtwa ʉYesu ɨkɨlo jɨla jɨno akohelua,
akatoola ʉnkate,
24 akamhongesia ʉNgʉlʉve,
akamenyʉlania,
akati,
“Ʉghʉ ghwe mʼbɨlɨ ghwango ghʉno ghutavʉlɨlua vwɨmɨla ʉmue,
mʉvombaghe enendɨɨkɨ kʉkʉngʼhʉmbʉka.”
25 Ye valiile akavomba kange vʉle vʉle,
akatoola ɨkɨkombe ɨkya lʉhʉʉjed akajova akati,
“Ɨkɨkombe ɨkɨ lʉfingoe lʉpia lʉno luvombeka mʉlwa kʉkungʼika ɨdanda jango,
mʉvombaghe enendɨɨkɨ pano munyua mʉlwa kʉngʼhʉmbʉka.”
26 Ʉlwakʉva pano mulia ʉnkate ʉghuo na kunyua ɨkɨkombe ɨkio,
muuva mupʉlɨsia kufua kwa Mʉtwa kuhanga iliiva ikwisa.
27 Ʉmuunhu ghweni jʉno ilia ʉnkate ʉghuo nambe kunyua ɨkɨkombe ɨkio ɨkya Mʉtwa vʉle nalʉnoghiile,
iiva ahokile,
ʉlwakʉva abedile ʉmʼbɨlɨ nɨ danda ja Mʉtwa.
28 Lɨno,
nʉjʉnge isasaniaghe jʉjuo,
neke pe alisaghe ʉnkate na kunyua ɨkɨkombe.
29 Ʉlwakʉva nave ʉmuunhu ilia ʉnkate na kunyua ɨkɨkombe kɨsila kʉkagʉla ʉmʉlʉvo ʉghwa vʉhangɨlanɨsi vwake nʉ mʼbɨlɨ ghwa Mʉtwa,
ʉjuo iiva ikuvɨɨka jʉjuo mʉ vʉhɨghi vwa Ngʉlʉve.
30 Fye nambe mwevale vinga mʉlyʉmue vano vavotevote,
avange vatamu,
kange vamonga vafwile.
31 Looli twale tusasanie jʉsue,
ʉNgʉlʉve naale ɨkʉtʉhɨgha.
32 Neke pano tuhɨghua lɨno nʉ Mʉtwa,
apuo tuuva tuvʉngua kuuti lʉleke kʉkʉtʉvona ʉlʉtalamu,
ndavʉle luliiva kʉ vaanhu vano navikʉmwɨtɨka ʉNgʉlʉve.
33 Lɨno vanyalʉkolo vango,
pano mukongʼhaana kulia,
mʉghulanaghe.
34 Nave ʉmuunhu alɨ nɨ njala,
alisaghe kʉ kaaja kwa mwene kuuti kukongʼhaana kwinu kʉleke kʉkʉvapelela kuhɨghua.
Neke niliiva nisile,
nilikʉsilɨngʼhania imhola isingi sino sisighiile.