Mʉlekaghe kʉkʉnkalasia ʉNgʉlʉve
10
Vanyalʉkolo vango,
nilonda mʉkagʉle vʉnofu kuuti,
avakʉʉlʉ viitu ye vikila mʉ ɨɨsi ɨnya lʉkʉve,
vooni valyale vilongosivua nɨ lɨfunde,a
kange vooni valyakilile pakate pa nyanja.
2 Pano vakalongosivua nɨ lɨfunde na pikila pakate pa nyanja,
vooni vakava vofughue kuuva vavɨngɨlɨli va Moose.b
3 Vooni valyaliile ɨkyakʉlia kɨla ɨkɨhʉma kʉkyanya.c
4 Kange,
vooni valyanywile amalenga ghala ghano ʉNgʉlʉve alyavapeliile kuhʉma mʉ lɨnhalavue mʉ sɨla ɨja kʉdegha.d
Ɨlɨnhalavue ɨlio alyale ghwe Kɨlɨsite jʉno akaghendagha palɨkɨmo na veene.
5 Neke vinga mʉ veene,
vakavombagha sino naikeela ʉNgʉlʉve,
mʉ ʉluo vakatipulua,
amafimba ghaave ghakaselevala kʉ lʉkʉve.
6 Lɨno imhola isi,
fihwanɨkɨsio kʉlyʉsue vwɨmɨla kʉkʉtʉpavɨla,
kuuti natʉnganoghelwaghe imbiivi ndavʉle aveene vʉle valyale vinoghelua.
7 Mʉlekaghe kukufuunya kʉ mangʉlʉve ndavʉle vamonga mʉ veene vʉle valyale vivomba,
ndavʉle lɨlembilue kuuti,
“Avaanhu valikalile vilia na kunyua,
neke pambele vakɨɨma kuseeja.”e
8 Kange,
natʉngavisaghe vaghendamwalu ndavʉle vamonga mʉ veene vʉle vakavombagha,
kuhanga vakatipulua avaanhu imbilima fijigho fivɨlɨ ni mbilima itatu mʉ kɨghono kɨmo.f
9 Kange,
natʉngamʉghelaghe ʉKɨlɨsite ndavʉle vamonga mʉ veene vʉle valyamughelile,
vakangʼenyua ni njoka,
vakafua.g
10 Kange,
mʉlekaghe kungʼuula ndavʉle vamonga mʉ veene vʉle valyangʼulile,
vakabudua nʉ Nyamhola ʉNtipuli.h
11 Lɨno,
isio sooni sino silyavaghile aveene,
silyalembilue kuuti sivisaghe fihwanɨkɨsio kʉkʉtʉpavɨla ʉsue,
twe vano tukukala mʉ fighono ifi ifya vʉsililo.
12 Lɨno,
jʉno ikuvona kuuti ɨmile vʉnono mʉ lwɨtɨko,
ilolelelaghe kuuti aleke pighua.
13 Ingelo sino sivisiile,
sili ndavʉle sino avaanhu avange vighelua jaatu.
Lɨno,
mʉmhʉvɨlaghe ʉNgʉlʉve,
ʉmwene naangavaleke mʉghelue kukila ingʉfu siinu.
Pano ʉmue mughelua,
ɨkʉvapeela ingʉfu isa kuguda nɨ sɨla ɨja kʉkulukila.
Ʉlʉpavɨlo vwɨmɨla ifyɨmɨke ifya Mʉtwa
14 Lɨno vaghanɨke vango,
namʉngifunyaghe kʉ mangʉlʉve!
15 Nijova numue mwe vano mʉlɨ nʉ vʉkagʉsi,
mʉsaghaghe vʉnono sino nijova.
16 Asi,
pano tunyua ɨkɨkombe ɨkya fyɨmɨke ifya Mʉtwa,
vwɨmɨla kʉkʉmhongesia ʉNgʉlʉve,
natuuva vʉhangɨlanɨsi mʉ danda ja Kɨlɨsite?
Kange,
pano tumenyʉla ʉnkate na kulia,
apuo natuuva vʉhangɨlanɨsi mʉ mʼbɨlɨ ghwa Kɨlɨsite?
17 Ʉlwakʉva ʉnkate ghʉlɨ ghʉmo,
nambe ʉsue tʉlɨ vinga,
tʉlɨ mʼbɨlɨ ghʉmo,
ʉlwakʉva ʉsue tweni tuhanga ʉnkate ghʉghuo.
18 Mʉlolaghe aVaisilaeli,
vano vilia fino vatekiile pa kɨtekelelo,
viiva vʉhangɨlanɨsi.i
19 Lɨno nɨɨti kɨki?
Ndepoonu ifiinu fino vitavʉla kʉ mangʉlʉve fili nʉ lʉvʉmbʉlɨlo lʉmonga?
Kange,
nagha mangʉlʉve ghoope gha kyangʼhaani?
20 Jeeje!
Ɨlɨtekelo lɨno vihʉmia avapanji,
navikʉntavʉlɨla ʉNgʉlʉve,
looli vitavʉla kʉ mapepo.
Ʉne nanilonda kuuti ʉmue mʉvisaghe nʉ vʉhangɨlanɨsi ʉvwa kufuunya kʉ mapepo.
21 Nalulondua kuuti mʉnywisaghe ɨkɨkombe ɨkya Mʉtwa,
kange mʉnywisaghe ɨkɨkombe ɨkya mapepo;
namulondua kulia ifyɨmɨke ifya Mʉtwa,
neke kange mʉlie ɨkyakʉlia ɨkya mapepo.
22 Asi,
tulonda kʉkʉnkalasia ʉNgʉlʉve?
Ndepoonu tʉlɨ ni ngʉfu kukila ʉmwene?
Sino tuvomba simʉghiniaghe ʉNgʉlʉve
23 Vamonga viiti,
“Ifiinu fyoni fyɨtɨkɨsivue kuvombua.”
Neke ʉne niiti nakwekʉti ifiinu fyoni fili nʉ lʉvʉmbʉlɨlo.
Kange viiti,
“Ifiinu fyoni fyɨtɨkɨsivue kuvombua.”
Neke ʉne niiti nakwekʉti ifiinu fyoni fitanga mʉ lwɨtɨko.
24 Ʉmuunhu alekaghe kukolopalɨla sino sikʉntanga jʉjuo,
looli akolopalɨlaghe sino sitanga avajaake.
25 Inyama sino vighʉsia kʉ lɨghʉlɨlo mʉlisaghe kɨsila kʉposiaposia,
kuuti mʉleke kupumuka mʉ moojo ghiinu.
26 Mʉ Malembe aMɨmɨke lɨlembilue ndɨɨkɨ,
“Ɨɨsi palɨkɨmo ni fiinu fyoni fino mwefili fya Mʉtwa.”j
27 Ʉmuunhu jʉno namwɨtɨki nave avakemelile kulia,
na jʉmue mwɨtiike kulʉta,
ifiinu fyoni fino avalɨngʼhanɨkisie,
mʉlisaghe kɨsila kʉposiaposia,
kuuti mʉleke kupumuka mʉ moojo ghiinu.
28 Looli ʉmuunhu angavavʉʉle kuuti,
“Ɨkyakʉlia ɨkɨ vatekiile kʉ mangʉlʉve,”
apuo namʉngalisaghe kuuti ʉmuunhu jʉno avavʉlile aleke kupumuka,
na jʉmue mʉleke kupumuka mʉ moojo ghiinu.
29 Pano niiti,
“Mʉleke kupumuka mʉ moojo ghiinu,”
nanijova ʉmue,
looli nijova ʉmuunhu jʉno avavʉlile.
Neke kɨki sino ipumuka ʉmuunhu mʉ mwojo ghwake,
sipinyilisyaghe ʉvwavʉke vwango?
30 Nave ʉne nilia ɨkyakʉlia ɨkio mʉlwa kʉmhongesia ʉNgʉlʉve,
kɨki nilighua vwɨmɨla ifiinu fino nɨmhongisie ʉNgʉlʉve?
31 Lɨno,
kʉʉve kwe kʉlia,
nambe kunyua,
nambe pano muvomba lʉmonga,
mʉvombaghe mʉlwa kʉmʉghinia ʉNgʉlʉve.
32 Mʉlekaghe kʉkʉvakʉvasia aVayahudi nambe vano naVayahudi nambe ɨkɨpʉgha ɨkya vɨtɨki.
33 Mʉvisaghe ndavʉle ʉne,
nikutanga kuuti vwɨmɨla sooni sino nivomba,
avaanhu vooni vakelaghe.
Nakwekʉti nivomba ʉluo neke nɨvʉmbʉlɨle jʉʉne,
looli vavʉmbʉlɨle avaanhu vinga,
kuuti vakave ʉvʉpoki.