Avavombi vatangwaghe ifya mʼbɨlɨ
9
Asi,
ʉne nanɨlɨ mwavʉke?
Ʉne nanɨlɨ nsungʼhua?
Ʉne nanɨkamwaghile ʉMʉtwa ghwitu ʉYesu?
Kange,
ɨmbombo jɨno nɨkavombile ʉne naje jɨno jɨvavɨkile ʉmue kʉkʉmwɨtɨka ʉMʉtwa?
2 Poope nambe avaanhu avange vikʉmbona kuuti nanɨlɨ nsungʼhua,
neke kʉlyʉmue ʉne nɨlɨ nsungʼhua,
ʉlwakʉva ʉlwɨtɨko lwinu mwa Kɨlɨsite kye kɨvalɨlo kɨno kivonia kuuti ʉne nɨsungʼhilue nʉ Mʉtwa.
3 Lɨno,
avaanhu vano vikʉhɨgha ʉne kuuti nanɨlɨ nsungʼhua,
nijova niiti:
4 Asi,
ʉsue natʉnoghiile kupelua ifya kʉlia ni fya kʉnyuaa vwɨmɨla ɨmbombo ɨjɨ?
5 Musaagha kuuti ʉsue tʉkunilue kukyʉla na vadala avɨtɨki,
ndavʉle ikyʉla ʉPeteli na vasungʼhua avange na vanuuna va Mʉtwa ʉYesu?
6 Asi,
ʉne nʉ Balinaba twesue natʉnoghiile kupelua ifiinu ifya kʉtʉtanga vwɨmɨla ʉvʉsungʼhua vwitu?
7 Ghwe nsikali alɨku jʉno ndepoonu ivomba ɨmbombo ɨja vʉsikali kʉ ndalama saake jʉjuo?
Ghwe veeni jʉno ivyala ifiinu fyake,
neke kyafyelile vilia avange?
Kange,
ghwe veeni jʉno idɨɨma ifidɨmua,
neke aleke kuvʉmbʉlɨla ʉtʉsiva ʉtwa fidɨmua fyake?
8 Amasio agha ghano nijova,
namasaaghe gha vaanhu,
nasi ndaghɨlo isa Moose fye silʉngɨka.
9 Mʉ ndaghɨlo isa Moose lɨlembilue kuuti,
“Ʉlekaghe kʉkʉjɨbunga ɨngʼombe ʉmʉlomo pano jisyonda ɨngano pa lʉvʉgha.”b
Asi,
mʉ masio agha,
kwekʉti ʉNgʉlʉve isaagha lʉlwa ngʼombe?
10 Naajovagha isio vwɨmɨla ʉsue?
Se seene!
Amalembe aghuo ghalyalembilue vwɨmɨla ʉsue!
Ʉlwakʉva jʉno ilɨma ʉmʉghʉnda,
na jʉno ipeta mʉ mʉghʉnda ghʉla,
vooni vanoghiile kuhʉvɨɨla kuuti viiva nɨ lɨghavo lyave.
11 Lɨno,
ʉsue tʉpʉlisie ɨMhola ɨNofu kʉlyʉmue,
ndavʉle ʉmuunhu jʉno ivyala ɨmbeju,
ndepoonu luuva lʉtalamu kupelua ifiinu kuhʉma kʉlyʉmue ifya kʉtʉtanga kɨmʼbɨlɨ,
ndavʉle ʉmuunhu jʉno ipeta?
12 Nave avange vanoghiile kupelua ifiinu kuhʉma kʉlyʉmue,
lɨno ʉsue natʉnoghiile kukila?
Neke ʉsue natwavʉmɨlɨsyagha mʉtʉvombele sino tʉnoghiile kuvombelua numue,
ʉlwene tugudile mʉ sooni kuuti tʉleke kʉkʉvasigha avaanhu kukwɨtɨka ɨMhola ɨNofu ɨja Kɨlɨsite.
13 Asi,
namʉkagwile kuuti vano vivomba ɨmbombo mʉ nyumba ɨnyɨmɨke ɨja kufunyila,
vilia ɨkyakʉlia kyave kuhʉma mʉ nyumba ɨjio?
Voope vano vivomba ɨmbombo ɨja pa kɨtekelelo,
navikwʉpɨla ɨlɨghavo kuhʉma mʉ lɨtekelo?
14 Kange,
ʉMʉtwa alaghiile vʉle vʉle kuuti,
vano vipʉlɨsia ɨMhola ɨNofu,
valisaghe kuhʉma mʉ mbombo ɨjio.
15 Neke ʉne,
nanɨghelile kusʉʉma nambe kamo mʉ isio sino nɨnoghiile kuvombelua.
Kange,
nanilemba isi kuuti nɨvombelue isio.
Kʉlyʉne yekʉba kufua kukila ʉmuunhu ghweni kʉkʉsigha ʉne kukughinia vwɨmɨla kupʉlɨsia ɨMhola ɨNofu kɨsila lʉhombo.
16 Neke ʉne nanɨnoghiile kukughinia vwɨmɨla kupʉlɨsia ɨMhola ɨNofu,
ʉlwakʉva ʉluo lwe lʉno nilaghilue kuvomba.
Kange ɨga kʉlyʉne,
nave nanipʉlɨsia ɨMhola ɨNofu ɨjio.
17 Nale nɨɨve nivomba ɨmbombo ɨjɨ mʉ vughane vwango,
ngale nihʉvɨɨla ʉlʉhombo,
neke lɨno nilondua kuvomba,
ʉlwakʉva ʉNgʉlʉve amheliile ɨmbombo ɨjɨ mʉ vughane vwake.
18 Lɨno,
ʉlʉhombo lwango kye kɨki?
Ʉlʉhombo lwango kwe kʉpʉlɨsia ɨMhola ɨNofu kɨsila kʉhombua,
kɨsila kʉsighila sino nɨnoghiile kupelua vwɨmɨla kupʉlɨsia ɨMhola ɨjɨ.
Sino avasungʼhua vanoghiile kuvomba
19 Ʉne nanɨlɨ nkami ghwa muunhu ghweni,
nɨlɨ mwavʉke.
Neke vwɨmɨla kʉkʉvatanga avaanhu vinga vamwɨtɨke ʉKɨlɨsite,
nivɨkile kuuva nkami ghwa vaanhu vooni.
20 Kʉ Vayahudi,
nɨkaale ndavʉle ʉMʉyahudi,
kuuti nɨvatange aVayahudi vamwɨtɨke ʉKɨlɨsite.
Kʉ vano vivɨngɨlɨla indaghɨlo isa Moose,
nɨkaale ndavʉle ʉmʼbɨngɨlɨli ghwa ndaghɨlo napano nanɨkaale nkami ghwa ndaghɨlo,
kuuti nɨvatange avavɨngɨlɨli va ndaghɨlo kʉkʉmwɨtɨka ʉKɨlɨsite.
21 Kʉ vano navasikagwile indaghɨlo,
nɨkaale ndavʉle ʉmuunhu jʉno naasikagwile indaghɨlo kuuti nɨvatange vamwɨtɨke ʉKɨlɨsite,
nakwekʉti nɨlɨ nsila ndaghɨlo pamaaso gha Ngʉlʉve,
jeeje,
nɨlɨ naso,
ʉlwakʉva nilongosivua ni ndaghɨlo isa Kɨlɨsite.
22 Kʉ vano navakangiile mʉ lwɨtɨko,
nɨkaale ndavʉle jʉno naakangiile mʉ lwɨtɨko kuuti nɨvatange vamwɨtɨke ʉKɨlɨsite.
Nɨkavombile sooni kʉ vaanhu vooni,
kuuti ndalʉve ndaani nɨvapoke vamonga mʉ veene.
23 Nivomba isi sooni vwɨmɨla ɨMhola ɨNofu kuuti nɨhange na vange inyifuunyo saake.
24 Namʉkagwile kuuti avaanhu vano vighelana ʉlʉvɨlo,
vooni vikɨmbɨla,
neke jʉno ikwʉpɨla ʉlʉvonolo alɨ jʉmo?
Lɨno,
mʉkɨmbɨlaghe fiijo kuuti na jʉmue mʉkʉpɨle ʉlʉvonolo.
25 Vano vighelana mʉ lʉneeno,
vikulolelela mʉ nyinga vwɨmɨla kughelana.
Vivomba isio kuuti vʉpɨle ʉlʉvonolo ʉlwa nsiki nʼdebe vʉvʉle.
Looli ʉsue tuvomba ʉluo kuuti twʉpɨle ʉlʉvonolo lʉno nalunangɨka lʉsiku.
26 Enendɨɨkɨ na jʉʉne nanikɨmbɨla ndavʉle ʉmuunhu jʉno ikɨmbɨla kɨsila vʉfumbue,
kange nanitovana ndavʉle ʉmuunhu jʉno ikuhʉʉta imbuli pavʉvʉle.
27 Looli nɨkʉghʉpumusia na kʉkʉghʉhonga ʉmʼbɨlɨ ghwango kukuguda kuuti kyande nɨvapʉlisie avaanhu ɨMhola ɨNofu,
nɨleke kukanua pamaaso gha Ngʉlʉve.