Ifiinu fino vitekela kʉ mangʉlʉve
8
Lɨno,
nijova vwɨmɨla ifyakʉlia fino vitekela kʉ fihwani.a
Nɨkagwile mujova mwiti,
“Ʉsue tweni tʉlɨ nʉ vʉkagʉsi.”
Neke ʉvʉkagʉsi vʉkʉvapelela avaanhu kuuva nʉ lughinio.
Looli ʉlʉghano lwe lʉno lʉkʉvakangasia avaanhu mʉ lwɨtɨko.
2 Nave ʉmuunhu ikuvona kuuti alɨ nʉ vʉkagʉsi vʉmonga,
ʉjuo naalɨ nʉ vʉkagʉsi ndavʉle anoghiile kukagʉla.
3 Neke ʉmuunhu jʉno amʉghanile ʉNgʉlʉve,
ʉjuo ghwe akagʉliike nʉ Ngʉlʉve jʉjuo.
4 Lɨno,
vwɨmɨla kulia ifyakʉlia fino vatekiile kʉ mangʉlʉve,
tʉkagwile kuuti ifihwani fino fikwɨmɨkua,
nakɨmonga mʉ ɨɨsi muno.
Kange,
tʉkagwile kuuti kwale ʉNgʉlʉve jʉmo mwene.
5 Poope nambe kwefili ifiinu fino viiti mangʉlʉve,
fiive kʉkyanya nambe pa ɨɨsi;
nambe kweghale amangʉlʉve minga na vatwa vinga,
6 neke kʉlyʉsue ʉNgʉlʉve alɨ jʉmo mwene,
ghwe Nhaata,
ghwe jʉno apelile ifiinu fyoni.
Ʉsue tukukala vwɨmɨla ʉvʉfumbue vwake.
Kange,
kwale ʉMʉtwa jʉmo mwene,
ghwe Yesu Kɨlɨsite,
vwɨmɨla ʉmwene ifiinu fyoni fipelilue,
kange vwɨmɨla ʉmwene na jʉsue tʉlɨ vʉʉmi.
7 Neke ʉvʉkagʉsi ʉvuo navalɨ navwo avaanhu vooni,
ʉlwakʉva kwevale vamonga vano valyale nʉ lwiho ʉlwa kufuunya kʉ mangʉlʉve,
vajiighe na masaaghe aghuo.
Pano vilia ifyakʉlia ifio,
fikʉvagomosia kusaagha ifiinu fino fitekilue kʉ mangʉlʉve.
Neke ʉlwakʉva navakangiile mʉ lwɨtɨko,
vikuvona mʉ moojo ghaave kuuti vivomba inyɨvi.
8 Lɨno,
ɨkyakʉlia nakɨngatʉvɨɨke kuuva piipi nʉ Ngʉlʉve,
ʉlwakʉva nambe tʉleke kulia,
natusofia kɨmonga,
kange nambe tʉlie,
natʉkwongelesivua kɨmonga.
9 Lɨno,
mulolelelaghe vʉnofu,
ʉvwavʉke vwinu vʉlekaghe kukʉvasia vano navakangiile mʉ lwɨtɨko.
10 Ʉlwakʉva ʉmuunhu jʉno naakangiile mʉ lwɨtɨko,
nave ɨkʉkwagha ghwe jʉno ʉlɨ nʉ vʉkagʉsi ʉlɨ mʉ nyumba ɨja kufunyila kʉ mangʉlʉve ghulia ɨkyakʉlia,
asi,
mʉ mwojo ghwake nakyaisaagha kuuti ghwope anoghiile kulia ifyakʉlia ifitekele kʉ mangʉlʉve?
11 Mʉ ʉluo,
ʉmwɨtɨki jʉno naakangiile mʉ lwɨtɨko,
jʉno ʉKɨlɨsite alyamfwɨliile,
isova vwɨmɨla ʉvʉkagʉsi vwako.