Ʉlʉpavɨlo vwɨmɨla ʉvʉtolani
7
Lɨno,
nɨkʉvamʉla sino mʉkandembiile.
Lweli,
lʉnofu ʉmʉkɨnhaata alekaghe kughona nʉ mʉkɨjʉʉva.
2 Neke vwɨmɨla ingelo isa kʉghenda mwalu,
ʉmʉkɨnhaata ghweni avisaghe nʉ nʼdala ghwake jʉjuo,
najʉ mʉkɨjʉʉva ghweni avisaghe nʉ mʉghoosi ghwake jʉjuo.
3 Ʉmʉghoosi amʼbombelaghe ʉnʼdala ghwake ndavʉle lʉnoghiile,
ghwope ʉnʼdala amʼbombelaghe ʉmʉghoosi ghwake ndavʉle lʉnoghiile.
4 Ʉnʼdala nsila vʉtavʉlɨlua vwɨmɨla ʉmʼbɨlɨ ghwake,
looli ʉmʉghoosi ghwake.
Ghwope ʉmʉghoosi nsila vʉtavʉlɨlua vwɨmɨla ʉmʼbɨlɨ ghwake,
looli ʉnʼdala ghwake.
5 Namʉngafinyanaghe,
looli nave mʉpʉlɨngʼhiine kuvʉhɨɨla kʉ nsiki nʼdebe vʉvʉle kuuti mutavʉle kukufuunya kwa Ngʉlʉve,
pambele mʉgomokelanɨlaghe kange,
kuuti ʉSetano alekaghe kʉkʉvaghela vwɨmɨla kukunua kukusigha mʉ vʉnoghelua vwinu.
6 Nɨvavʉlile amasio aghuo,
kʉkʉvɨtɨkɨsia kuuti mʉvʉhɨlaghe kʉ nsiki nʼdebe vʉvʉle mʉlwa kufuunya,
nakwekʉti nilonda kʉkʉvʉmɨlɨsia.
7 Vwale vʉʉve vughane vwango nɨveele nikeela avaanhu vooni vaave ndavʉle ʉne,a
neke nafye lʉlɨvuo,
ʉlwakʉva nʉjʉnge ʉNgʉlʉve ampeliile ɨkɨpelua kyake,
jʉmonga ɨkɨpelua ɨkɨ,
ʉjʉnge kɨla.
8 Lɨno,
nɨkʉvavʉʉla vano navatolile na vafwɨle kuuti,
lʉnono vajighe vʉle vʉle ndavʉle nɨlɨvuo ʉne.
9 Neke nave vikunua kukuguda,
apuo lʉnono kutoola nambe kutolua,
ʉlwakʉva yekʉba kuvomba enendɨɨkɨ kukila kuuva nʉ vʉnoghelua vwa mʼbɨlɨ.
10 Lɨno,
nɨkʉvapeela ʉlʉlaghɨlo vano vatoliine.
Ʉlʉlaghɨlo ʉluo nalwango,
looli lʉhʉmile kwa Mʉtwa:
Ʉnʼdala naangamʉlekaghe ʉmʉghoosi ghwake.
11 Neke nave amʉleke,
naangatolwaghe kʉvʉnge,
nave ndali,
asambane nʉ mʉghoosi ghwake na kugomokelanɨla.
Ghwope ʉmʉghoosi,
naangantavʉlaghe ʉnʼdala ghwake.
12 Lɨno nijova na vɨtɨki avange.
Sino nijova isi masaaghe ghango,
nandaghɨlo sa Mʉtwa:
Nave ʉmʉkɨnhaata ʉmwɨtɨki,
atolile ʉnʼdala jʉno namwɨtɨki,
neke ʉnʼdala ʉjuo ɨtiike kukukala nʉ mwene,
alekaghe kʉkʉntavʉla.
13 Ghwope ʉmʉkɨjʉʉva ʉmwɨtɨki,
nave atolilue nʉ mʉghoosi jʉno namwɨtɨki,
neke ʉmʉkɨnhaata ʉjuo ɨtiike kukukala nʉ mwene,
naangamʉlekaghe.
14 Ʉlwakʉva ʉNgʉlʉve ɨkʉmʼbalasia ʉmʉghoosi jʉno namwɨtɨki,
vwɨmɨla ʉnʼdala ghwake.
Ghwope ʉnʼdala jʉno namwɨtɨki,
ʉNgʉlʉve ɨkʉmʼbalasia vwɨmɨla ʉmʉghoosi ghwake.
Lwale lʉleke kuuva enendɨɨkɨ,
avaana viinu navaale vikwʉpɨlua nʉ Ngʉlʉve,
looli lɨno ʉNgʉlʉve ɨkʉvʉpɨla.
15 Neke nave jʉno namwɨtɨki ilonda kulekana nʉ nʼjaake ʉmwɨtɨki,
mʉleke avombe ʉluo.
Apuo ʉmwɨtɨki ʉjuo naipinyua mʉ vʉtolani ʉvuo.
Looli ʉNgʉlʉve avakemelile kuuti mukalaghe nʉ lʉtengaano.
16 Nʉngakagʉle!
Pamo ʉmʉghoosi ghwako ndepoonu iiva mwɨtɨki vwɨmɨla ʉlwɨtɨko lwako.
Na jʉʉve ghwe mʉkɨnhaata ghwe mwɨtɨki,
nʉngakagʉle kuuti ʉnʼdala ghwako ndepoonu iiva mwɨtɨki vwɨmɨla ʉlwɨtɨko lwako.
Kuuva na maghendele ndavʉle alaghiile ʉNgʉlʉve
17 Ʉmuunhu ghweni ikalaghe ndavʉle ʉMʉtwa vʉle alyamʼbɨkile,
kange ajighaghe ndavʉle alyale ye ʉNgʉlʉve ɨkʉnkemeela.
Ʉlʉ lwe lʉlaghɨlo lwango kʉ fipʉgha fyoni ifya vɨtɨki.
18 Nave ʉmuunhu alyʉpiile ɨngʼhemeelo ɨja Ngʉlʉve ye vamʼbombiile ɨkɨvʉngo ɨkya kʉdumula ɨngola ɨja kɨdɨɨmi,b
ʉjuo alekaghe kukuvɨɨka hwene naakavombilue ʉluo.
Kange,
ʉmuunhu jʉno alyʉpiile ɨngʼhemeelo ɨja Ngʉlʉve ye naavombilue ɨkɨvʉngo ɨkio,
ʉjuo alekaghe kuuti avombelue ʉluo.
19 Kuvombelua ɨkɨvʉngo nambe kɨsila kʉvombelua,
nakʉlɨ lʉvʉmbʉlɨlo,
looli kugadɨlɨla indaghɨlo sa Ngʉlʉve.
20 Lɨno,
ʉmuunhu ghweni ajighaghe ndavʉle alyale ye ʉNgʉlʉve ɨkʉnkemeela.
21 Nave ʉNgʉlʉve alyakʉkemelile ye ʉlɨ nkami,
ʉluo lʉleke kʉkʉkʉpumusia.
Neke nave ʉlɨ nɨ sɨla ɨja kuvɨɨka mʉ vwavʉke,
yekʉba ʉvombe ʉluo.
22 Ʉlwakʉva ʉmuunhu jʉno alyale nkami ye ikemelua nʉ Mʉtwa,
ʉjuo mwavʉke kwa Mʉtwa.
Ghwope jʉno alyale mwavʉke ye ikemelua,
ʉjuo nkami ghwa Kɨlɨsite.
23 Mʉlyaghʉlilue nɨ kyʉma kinga.
Lɨno,
mʉlekaghe piiva vakami va vaanhu.
24 Vanyalʉkolo vango,
ʉmuunhu ghweni pamaaso gha Ngʉlʉve,
avisaghe ndavʉle alyale ye ikemelua nʉ mwene.
Ʉlʉpavɨlo kʉ vano navatolilue, na kʉ vafwɨle
25 Lɨno,
kʉ vahɨnja vano navatolilue,
nɨlɨ nsila lʉlaghɨlo kuhʉma kwa Mʉtwa.
Neke nɨkʉvalʉngɨka kʉ masaaghe ghango ʉne ne jʉno nɨlɨ mhʉvɨlua vwɨmɨla ʉlʉsʉngʉ lwa Ngʉlʉve.
26 Lɨno,
ʉlwakʉva kwelʉle ʉlʉtalamu ifighono ifi,
nisaagha kuuti lʉnofu ʉmuunhu ajighaghe ndavʉle alɨvuo.
27 Asi,
ʉtolile?
Lɨno,
ʉlekaghe pilonda kutavʉla.
Ʉve nʉtolile?
Lɨno,
ʉlekaghe pilonda kutoola.
28 Poope nambe ghutoola,
naghuuva ʉhokile nkole.
Najʉ mhɨnja ghwope nave itolua,
naiiva ahokile nkole.
Ʉlwene,
vano vatoliine viiva mʉ vʉkamɨngʼhanɨlua ʉvwa ɨɨsi.
Neke ʉne nilonda kʉkʉvapavɨla kuuti sileke pikʉvavona isio.
29 Vanyalʉkolo vango,
nijova niiti,
ʉnsiki ghʉno ghʉsighiile nʼdebe.
Lɨno,
mʉvombaghe ɨmbombo ja Mʉtwa,
kuhʉma ʉnsiki ʉghʉ vano vatolile,
valekaghe pi pisaagha avadala vaave.
30 Voope vano vilɨla,
vano vahovwike,
vano vighʉla ifiinu,
31 na vano vitiigha ni fiinu ifya mʉ ɨɨsi ɨjɨ,
vavombaghe ɨmbombo ja Mʉtwa,
valekaghe kutʉngʉmala mʉ isio,
ʉlwakʉva ɨɨsi ɨjɨ ndavʉle tʉkʉjaagha,
jɨlakila.
32 Lɨno nilonda kuuti,
mʉlekaghe kuuva ni nganighani vwɨmɨla isa mʉ ɨɨsi.
Ʉmuunhu jʉno naatolile,
ikutavʉla kuvomba ɨmbombo ɨja Mʉtwa,
isaagha vʉle kyaɨkʉmhovosia ʉMʉtwa.
33 Looli ʉmuunhu jʉno atolile,
ikutavʉla kuvomba isa mʉ ɨɨsi,
isaagha vʉle kyaɨkʉmhovosia ʉnʼdala ghwake,
34 amasaaghe ghaake ghiiva imbale ivɨlɨ.
Ghwope ʉmʉkɨjʉʉva ʉnsila mʉghoosi nambe ʉmhɨnja,
ikutavʉla kuvomba ɨmbombo ja Mʉtwa kuuti aave mʉgholofu ʉmʼbɨlɨ nʉ mwojo.
Looli ʉmʉkɨjʉʉva jʉno alɨ nʉ mʉghoosi,
ikutavʉla kuvomba isa mʉ ɨɨsi,
isaagha vʉle kyaɨkʉmhovosia ʉmʉghoosi ghwake.
35 Amasio agha ghano nɨkʉvavʉʉla nakwekʉti nilonda kʉkʉvasigha,
looli nilonda kʉkʉvatanga.
Nilonda kuuti mukalaghe mʉ sɨla jɨno jɨnoghiile,
mʉmʼbombelaghe ʉMʉtwa nʉ mwojo ghwoni.
36 Ʉmuunhu ghweni jʉno ivona naiiva ivomba lʉnono kuvʉhɨɨla kʉkʉntoola ʉmhɨnja jʉno antunile,
kange nagha maaka ghaake agha kʉtolua ghakilile,
neke ʉmuunhu ʉjuo ivona lʉnoghiile vatolane,
avombe ndavʉle ilonda,
vatolane.
Apuo naiiva avombile inyɨvi.
37 Neke nave ʉnʼdɨɨmi alamwile jʉjuo kuuti naitoola,
neke ikuguda na kukulolelela,
kange alamwile kʉkʉmʉleka ʉmhɨnja ndavʉle alɨvuo,
iiva avombile vʉnofu.
38 Lɨno,
jʉno itoola ʉmhɨnja ghwake jʉno antunile ivomba vʉnofu.
Ghwope jʉno naitoola,
ivomba vʉnofu kukila.c
39 Kange,
ʉmʉkɨjʉʉva jʉno atolilue,
ajighaghe mʉ vʉtolani,
ʉnsiki ghwoni ghʉno ʉmʉghoosi ghwake mwʉmi.
Neke nave ʉmʉghoosi ghwake afwile,
apuo iiva mwavʉke kutolua nʉ muunhu ghweni jʉno ɨkʉmʉlonda,
looli ʉmʉghoosi ʉjuo avisaghe mʼbɨngɨlɨli ghwa Mʉtwa.
40 Neke yekʉba ʉmfwɨle ʉjuo ajighaghe kɨsila kʉtolua.
Aghuo masaaghe ghango,
nisaagha kuuti na jʉʉne ʉMhepo ʉghwa Ngʉlʉve ɨkʉndongosia kujova amasio aghuo.