Kuhɨghana avɨtɨki
6
Nave jʉmonga mʉlyʉmue alɨ nɨ lɨsio nʉ mwɨtɨki ʉnnine,
kɨki itwala ʉnkole ghwake kʉ vano navɨtɨki?
Asi,
naanoghiile kutwala kʉ vɨtɨki avanine kuuti vahɨghe?
2 Namʉkagwile kuuti avɨtɨki ve vano vilihɨgha ɨɨsi ɨjɨ?
Lɨno,
nave ʉmue mwe vɨtɨki mulihɨgha ɨɨsi ɨjɨ,
kɨki mukunua kuhɨgha amakole amapepe pakate palyʉmue?
3 Namʉkagwile kuuti tulikʉvahɨgha avanyamhola?
Nave tulikʉvahɨgha avanyamhola,
mʉnoghiile kudavʉla amasio mʉ mikalɨle ghiinu.
4 Lɨno,
kɨki pano mʉsʉtiine vwɨmɨla amikalɨle ghiinu,
mutwala amakole ghiinu kʉ vaanhu vano navanoghiile mʉ kɨpʉgha ɨkya vɨtɨki?
5 Nijova ʉluo kuuti mʉjejevʉke.
Asi,
pakate palyʉmue napwale nambe jʉmonga ʉnya lʉhala,
jʉno anoghiile kudavʉla amasio ghiinu mwe vɨtɨki?
6 Neke ʉmue,
mʉlɨ nʉ lwiho ʉlwa muunhu kʉkʉmhɨgha ʉmwɨtɨki ʉnnine kʉ vano navɨtɨki!
7 Kuhɨghana ʉkuo kuvonia kuuti mʉkunilue lwoni.
Asi,
nayekʉba kʉkʉmʉleka ʉmuunhu akʉvombele fivi nambe akʉkuunye fimonga?
8 Neke lɨno ʉmue,
mwemue muvomba fivi kyongo na kukuunya ifiinu,
kange muvomba isio kʉ vɨtɨki avajiinu!
9 Namʉkagwile kuuti avahosi navilikwingila mʉ Vʉtwa vwa Ngʉlʉve?
Namʉngisyangaghe!
Avaghendamwalu,
avaanhu vano vikufuunya kʉ mangʉlʉve,
avavwafu,
nambe vano vivwafuka vaghoosi kwa vaghoosi,
10 avahɨɨji,
avagheji,
avaghaasi,
avaheehi,
avakuunyi,
avuo vooni navilikwingila mʉ Vʉtwa vwa Ngʉlʉve.
11 Vamonga mʉlyʉmue fye valyale.
Neke lɨno mʉ lɨtavua lya Mʉtwa ghwitu ʉYesu Kɨlɨsite,
na mwa Mhepo ghwa Ngʉlʉve ghwitu,
mwofughilue ʉvʉhosi vwinu,
mwɨmikue,
na kuvalɨlua kuuva vagholofu pamaaso gha Ngʉlʉve.
Tʉvʉleke lwoni ʉvʉghendamwalu
12 Vamonga mʉlyʉmue viiti,
“Twɨtɨkɨsivue kuvomba ifiinu fyoni fino tulonda.”
Se seene,
neke nakwekʉti ifiinu fyoni fili nʉ lʉvʉmbʉlɨlo kʉlyʉsue.
Nambe mʉʉti,
“Twɨtɨkɨsivue kuvomba ifiinu fyoni fino tulonda,”
neke ʉne nanɨngave nkami ghwa kɨmonga.
13 Vamonga mʉlyʉmue viiti,
“Pano tʉlɨ nɨ njala tʉnoghiile kulia,
ʉlwakʉva amavɨlɨ ghilonda ɨkyakʉlia.”
Se seene,
neke ghukwisa ʉnsiki ghʉno ʉNgʉlʉve ilihambʉsia amavɨlɨ ghiitu ghiliiva masila vʉfumbue vwa kyakʉlia.
Neke lɨno mʉlekaghe piiti tʉnoghiile kuvomba ʉvʉvwafu,
ndavʉle lʉnoghiile kulia pano mʉlɨ nɨ njala.
ɄNgʉlʉve naalyapelile amavɨlɨ ghiitu vwɨmɨla ʉvʉghendamwalu,
looli alyapelile vwɨmɨla kʉkʉmʼbombela ʉMʉtwa,
ghwope ʉMʉtwa ɨkʉghasʉnga amavɨlɨ.
14 Lɨno,
ʉNgʉlʉve ilikʉtʉsyʉsia ʉsue mʉ ngʉfu saake,
ndavʉle alyansyʉsisie ʉMʉtwa kuhʉma kʉvʉlʉngʉ.a
15 Namʉkagwile kuuti amavɨlɨ ghiinu,
filʉngo fya mʼbɨlɨ ghwa Kɨlɨsite?
Lɨno,
ɨkɨlʉngo ɨkya mʼbɨlɨ ghwa Kɨlɨsite ndepoonu ghuvɨɨka kuuva mʼbɨlɨ ghʉmo nʉ mʉghendamwalu?
Jeeje!
16 Ʉmuunhu ghweni jʉno ivwafuka iiva mʼbɨlɨ ghʉmo nʉ mʉghendamwalu.
Ʉlwakʉva lɨlembilue mʉ Malembe aMɨmɨke kuuti,
“Vavɨlɨ ava viiva mʼbɨlɨ ghʉmo.”b
17 Neke ʉmuunhu ghweni jʉno ilʉngana nʉ Mʉtwa,
iiva mwojo ghʉmo nʉ mwene.
18 Lɨno,
namʉngavwafukaghe.
Inyɨvi isingi sooni ʉmuunhu ivomba kʉnji kʉ mʼbɨlɨ ghwake,
neke ʉmuunhu jʉno ivwafuka,
ʉjuo ivomba inyɨvi kʉ mʼbɨlɨ ghwake jʉjuo.
19 Asi,
namʉkagwile kuuti,
amavɨlɨ ghiinu je nyumba ɨnyɨmɨke ɨja Mhepo ʉMwɨmɨke jʉno ʉNgʉlʉve alyavapeliile,
kange ikukala nkate mʉlyʉmue?
Lɨno,
amavɨlɨ aghuo naghiinu,
looli kyʉma kya Ngʉlʉve,
20 ʉlwakʉva mʉlyavangilue ni ndalama nyinga.
Lɨno,
mʉmʉghiniaghe ʉNgʉlʉve mʉ mavɨlɨ ghiinu.