Ʉvʉghendamwalu navʉlondua mʉ kɨpʉgha ɨkya vɨtɨki
5
Kyangʼhaani ɨmhola jɨpʉlɨkiike kuuti,
kʉlyʉmue kwevʉle ʉvʉghendamwalu.
Ʉvʉghendamwalu ʉvuo navʉghelile kuvoneka nambe kʉ vano navɨtɨki,
ʉlwa muunhu kughenda nʉ nʼdala ghwa viise.
2 Kɨki ʉmue mukughinia!
Mʉlekile kusukunala na kʉkʉmʼbʉsia ʉmuunhu jʉno ivomba isio pakate palyʉmue!
3 Ʉne nambe nɨlɨ patali numue,
ʉmwojo ghwango ghʉlɨ palɨkɨmo numue,
kange nɨmalile kʉkʉmhɨgha ʉmuunhu jʉno avombile ʉluo.
Ʉluo lwe nale nivomba,
nale nɨɨve ʉkuo.
4 Pano mukongʼhaana mʉ lɨtavua lya Mʉtwa ghwitu ʉYesu,
naghʉ mwojo ghwango ghuuva palɨkɨmo numue,
nasi ngʉfu isa Mʉtwa ghwitu ʉYesu siiva palɨkɨmo numue.
5 Apuo mʉmʉleke ʉmuunhu ʉjuo mʉ mavoko gha Setano,
kuuti ʉmʼbɨlɨ ghwake ghʉpumusivue,
neke ʉmwojo ghwake ghʉpokue ɨkɨghono ɨkya kwisa ʉMʉtwa ʉYesu.
6 Ʉlughinio lwinu nalʉnoghiile.
Asi,
namʉkagwile kuuti ɨkɨlʉle ɨkɨdebe vʉvʉle,
kilʉsia ɨlɨkandua lyoni?
7 Lɨno muvalasyaghe,
mʉlwa kʉmʼbʉsia ʉmuunhu ʉmhosi pakate palyʉmue,
ndavʉle kuvʉsia ɨkɨlʉle ɨkɨkʉʉlʉ,
neke mʉʉve ndavʉle ɨlɨkandua ɨlɨpia ɨlɨsila kɨlʉle,
enendɨɨkɨ fye mʉlɨvuo.
Ʉlwakʉva ʉNgʉlʉve alyantavwile ʉKɨlɨsite kuuva lɨtekelo ndavʉle ɨnyanangʼholo ja Pasaka,a
kuuti atʉpoke.
8 Lɨno,
tʉlekaghe kʉkʉjɨmɨka ɨPasaka nɨ kɨlʉle ɨkɨkʉʉlʉ,
kwekʉti ʉvʉviivi nʉ vʉhosi,
looli tʉjɨmɨkaghe na makate amasila kɨlʉle,b
ghwe mwojo ʉmʼbalafu nʉ vwakyangʼhaani.
9 Mʉ kalata jɨno nɨkavalembiile,
nɨkavavʉlile kuuti,
mʉlekaghe kuuva vʉhangɨlanɨsi na vavwafu.
10 Nakwekʉti niiti mʉlekaghe kuhangɨlanɨla na vano navɨtɨki vano vavwafu,
avanyamwojo,
avakuunyi,
nambe vano vikufuunya kʉ mangʉlʉve.
Ʉlwakʉva kuvomba ʉluo mʉveele mʉnoghiile kuvʉʉka mʉ ɨɨsi ɨjɨ.
11 Ʉlwene nɨkavalembiile kuuti,
mʉlekaghe kuuva vʉhangɨlanɨsi nʉ muunhu jʉno itambʉlua mwɨtɨki ndavʉle ʉmue,
neke mʼbwafu,
nyamwojo,
nambe jʉno ikufuunya kʉ mangʉlʉve,
nambe ʉmhomengʼhani,
nambe ʉmʉghaasi,
nambe ʉnkuunyi.
Ʉmuunhu ndavʉle ʉjuo,
mʉlekaghe nambe kulia nʉ mwene.
12-13 Lɨno,
nambombo jango kuhɨgha vano navɨtɨki,
looli ʉNgʉlʉve jʉjuo ghwe ilikʉvahɨgha.
Neke ʉmue mʉnoghiile kʉkʉvahɨgha vano valɨ mʉ mʉ kɨpʉgha ɨkya vɨtɨki,
ndavʉle lɨlembilue,
“Ʉmuunhu ʉmhosi pakate palyʉmue mʉnʼdagaghe.”c