Ɨmbombo ɨja vasungʼhua
4
Avaanhu vatʉkagʉlaghe kuuti,
ʉsue tʉlɨ vavombi va Kɨlɨsite,
tʉpelilue ɨmbombo ɨja kʉpʉlɨsia imhola sa Ngʉlʉve sino naalyavahʉfisie avaanhu.
2 Lɨno,
ʉmuunhu jʉno apelilue ɨmbombo,
ilondua avisaghe mʼbombi nnofu.
3 Neke ʉlwango ʉne,
nanitʉngʉmala nambe nɨhɨghue numue,
nambe kuhɨghua na vahɨghi ava pa lʉgono.
Kange,
nambe jʉʉne nanikupɨɨka,
4 ʉlwakʉva nanihɨghua lʉmonga mʉ mwojo ghwango.
Neke ʉluo nalʉkʉmbɨɨka nɨɨve nsila nkole,
ʉMʉtwa ghwe mwene ɨkʉhɨgha.
5 Lɨno,
mʉlekaghe kuhɨgha avaanhu ye ghʉkyale kufika ʉnsiki ghwake,
looli mʉghulaghe kuhanga ɨkɨghono kɨno ʉMʉtwa ilikwisa.
Ʉmwene ghwe ilimulika ifiinu fyoni fino fifisilue kʉ ngʼhiisi na kuhʉfia sino sili mʉ moojo gha vaanhu.
Pepano ʉNgʉlʉve ilighinia vooni vano vanoghiile kughinisivua.
6 Vanyalʉkolo vango,
nɨjovile amasio ghooni aghuo,
vwɨmɨla ʉne nʉ Apolo kuuti tʉʉve kɨhwanɨkɨsio,
neke mʉsitangʼhanie sino sijovua mʉ lʉjovo ʉlʉ,
“Mʉvɨngɨlɨlaghe si sino silembilue mʉ Malembe aMɨmɨke.”
Nave muvɨngɨlɨla ʉluo,
nape muuva vaanhu vano vikughinia vwɨmɨla ʉmʼbʉlanɨsi ʉjʉ na kubenapʉla ʉjʉnge.
7 Asi,
ghwe veeni,
jʉno akʉvɨkile kuuti ʉnoghiile kukila ʉjʉnge?
Kɨɨnu kɨki kɨno ʉlɨ nakyo kɨno nʉpelilue nʉ Ngʉlʉve?
Neke nave ʉpelilue,
kɨki ghukughinia hwene nʉpelilue?
8 Lɨno mukuvona mukwite!
Mukuvona mʉlɨ vamofu!
Mukuvona hwene mʉlɨ vatwa kɨsila ʉsue!
Kɨba mwale mʉʉve vatwa kyangʼhaani,
kuuti ʉsue tʉteme palɨkɨmo numue!
9 Neke kʉlyʉsue twe vasungʼhua,a
nivona ʉNgʉlʉve atʉvɨkile kuuva vaanhu va kʉbedua kukila vooni.
Tʉlɨ hwene vaanhu vano vahɨghilue kulʉta kubudua pamaaso gha vinga.
Tʉvɨkilue hwene kɨdegho mʉ ɨɨsi jooni,
kʉ vanyamhola na kʉ vaanhu.
10 Pano tuvomba ɨmbombo ɨja Kɨlɨsite,
avaanhu vikʉtʉvona ʉsue tʉlɨ vajasu,
looli ʉmue mukuvona mʉlɨ vanya lʉhala mwa Kɨlɨsite.
Ʉsue tuvoneka tʉlɨ vavotevote,
looli ʉmue mukuvona mʉlɨ ni ngʉfu.
Ʉsue tubenapʉlua,
looli ʉmue mukuvona mʉlɨ voghopua.
11 Nambe akavalɨlo aka,
tʉlɨ nɨ njala nɨ kyʉmɨlua,
kange tʉghajile amenda.
Tufitovua kange tʉlɨ vasila nambe vukalo.
12 Tughimba kuvomba imbombo siitu na mavoko ghiitu jʉsue.
Pano avaanhu vikʉtʉligha,
tʉkʉvafuunya;
pano vikʉtʉpumusia,
tukuguda;
13 pano vikʉtʉjova fivi,
tʉkʉvamʉla vʉnofu.
Nambe lɨno,
tuvoneka hwene tʉlɨ makakala,
kange natʉnoghiile mʉ lʉmonga.
14 Nanɨkʉvalembela amasio agha kʉvakosia isoni,
looli nilonda kʉkʉvapavɨla mwe vaana vango mwe vaghanɨke.
15 Ʉlwakʉva nambe mʉlɨ na vaanhu vinga vano vikʉvasʉnga mwa Kɨlɨsite,
looli ʉnhaata ghwinu alɨ jʉmo.
Ʉne neene nhaata ghwinu mwa Yesu Kɨlɨsite,
ʉlwakʉva neene nɨkapʉlisie ɨMhola ɨNofu kʉlyʉmue.
16 Lɨno,
nɨkʉvasʉʉma mʉvombaghe ndavʉle nivomba ʉne.
17 Ʉluo lwe lʉno lʉmheleliile kʉkʉnsuungʼha ʉTimoti,
ʉmwanango ʉmʉghanɨke,
jʉno nɨkʉmhʉvɨɨla mʉ mbombo ja Mʉtwa.
Nɨnsungʼhile kuuti avakʉmbʉsyaghe sino ʉne nivɨngɨlɨla mwa Yesu Kɨlɨsite,
sino nivʉlanɨsia avaanhu mʉ fipʉgha fyoni ifya vɨtɨki.
18 Lɨno,
vamonga mʉlyʉmue valɨ nʉ lughinio,
ʉlwakʉva visaagha kuuti nanilikwisa kange kʉlyʉmue.
19 Neke nave ʉMʉtwa ikeela,
nihʉvɨɨla kukwisa ngʼhaningʼhaani.
Neke apuo pe kyanikagʉla amasio ghano vijova avuo vano vikughinia,
nakwekʉti kukagʉla gha masio gheene,
looli kukagʉla nasi ngʉfu saave isa lwɨtɨko.
20 Ʉlwakʉva ʉVʉtwa vwa Ngʉlʉve,
navuvoneka mʉ masio gheene,
looli na mʉ ngʉfu.
21 Lɨno,
mulonda nɨvombe kɨki?
Asi,
nɨvisile nʉ lʉkwegho?
Nambe nɨvisile mʉ lʉghano na mʉ vʉhʉʉgʉ?