Ʉvʉmo mʉ mbombo ja Ngʉlʉve
3
Vanyalʉkolo,
ye nɨlɨ kʉlyʉmue,
nanɨkaale nijova numue hwene vaanhu vano vilongosivua nʉ Mhepo ʉMwɨmɨke,
looli nɨkaale nijova numue hwene vaanhu vano vilongosivua nʉ vʉnoghelua vwa mʼbɨlɨ,
kange hwene vaana vafyele kʉkʉmwɨtɨka ʉKɨlɨsite.
2 Avaana avafyele vinyua ʉtʉsiva,
navipelua ɨkyakʉlia ɨkya vaanhu avagoyo,
enendɨɨkɨ na jʉʉne nɨlyavapeliile imbʉlanɨsio imhepe,
ʉlwakʉva mʉkakyale kukangala.
Nambe lɨno mʉkyale,
3 ʉlwakʉva mʉjiighe na maghendele gha ɨɨsi.
Asi,
nave pakate palyʉmue palɨ nɨ giila na mabaatu,
isio nasihʉfia kuuti mʉjiighe na maghendele gha ɨɨsi na kulongosivua nʉ vʉnoghelua vwa mʼbɨlɨ?
4 Nijova ʉluo,
ʉlwakʉva nʉjʉnge ijova lwake,
ʉjʉnge iiti,
“Ʉne nɨlɨ ghwa Paulo,”
ʉjʉnge iiti,
“Ʉne nɨlɨ ghwa Apolo.”
Lɨno,
isio sihʉfia kuuti,
mʉjiighe muvomba hwene vaanhu vano navikʉmwɨtɨka ʉNgʉlʉve.
5 Neke ʉApolo ghwe veeni?
Na jʉʉne ne Paulo neene veeni?
Ʉsue tʉlɨ vavombi vano ʉNgʉlʉve akatʉsungʼhile kʉkʉvatanga ʉmue kʉkʉmwɨtɨka.
Nʉjʉnge avombile ndavʉle apelilue nʉ Mʉtwa.
6 Ʉne nɨlyavyalile ɨmbeju,
ʉApolo akʉsɨliile,
neke ʉNgʉlʉve ghwe mwene akamesisie na kukʉsia.
7 Lɨno,
ʉNgʉlʉve ʉnya kʉkʉsia ghwe ghwa kʉhʉvɨlua,
jeeje ʉnya kʉvyala nambe ʉnya kwʉsɨlɨla.
8 Jʉno ivyala na jʉno ikwʉsa vooni valɨngʼhiine,
ʉNgʉlʉve ilikʉmpeela nʉjʉnge ʉlʉhombo lwake,
ndavʉle avombile ɨmbombo jaake.
9 Ʉlwakʉva ɨmbombo jɨno tuvomba ʉne nʉ Apolo ja Ngʉlʉve,
ʉmue mʉlɨ mʉghʉnda ghwake.
Kange,
mʉlɨ nyumba jaake.
10 ɄNgʉlʉve mʉ lʉsʉngʉ lwake anhangile kujenga ʉlwalo ndavʉle ʉnʼjengi ʉnnono,
ʉnya lʉhala,
lɨno ʉmuunhu ʉjʉnge ijenga pakyanya pa lwalo ʉluo.
Neke ʉmuunhu ghweni alolaghe vʉnofu,
vʉle ijenga pakyanya pa lwalo ʉluo.
11 Ʉlwakʉva ʉlwalo lʉno lʉjengilue ghwe Yesu Kɨlɨsite jʉjuo.
Nakwale ʉmuunhu jʉno ndepoonu ijenga ʉlʉnge.
12 Neke pakyanya pa lwalo ʉluo,
ʉmuunhu ʉjʉnge ndepoonu ijenga ni sahabu,
nambe ni fyʉma,
nambe na mavue agha ndalama nyinga.
Ʉjʉnge ndepoonu ijenga na mapiki,
nambe nɨ lɨsoli,
nambe nɨ lɨpelele.
13 Neke ɨmbombo ɨja muunhu ghweni jilivoneka kuuti jɨlɨ ndaani.
Ɨkɨghono kɨla ɨkya vʉhɨghi imbombo sooni siliiva pa vʉvalafu,
ʉlwakʉva ɨmbombo ja muunhu ghweni,
jilighelua nʉ mwoto ʉghwa vʉhɨghi.
14 Nave ɨmbombo ja muunhu jɨjighe,
ʉmuunhu ʉjuo ilikwʉpɨla ʉlʉhombo.
15 Looli nave ɨmbombo ja muunhu jɨpie,
apuo ilisofia fyoni,
neke ʉmwene jʉjuo ilipokua,
looli iiva hwene muunhu jʉno akulwike mʉ mwoto ʉghwa vʉhɨghi.
16 Asi,
namʉkagwile kuuti ʉmue mʉlɨ nyumba nyɨmɨke ja Ngʉlʉve,
kange ʉMhepo ghwa Ngʉlʉve ikukala nkate mʉlyʉmue?
17 Lɨno,
ʉmuunhu angananganie ɨnyumba ja Ngʉlʉve,
ʉNgʉlʉve ilikʉnnangania ʉmuunhu ʉjuo.
Ʉlwakʉva ɨnyumba ɨja Ngʉlʉve nyɨmɨke,
ɨnyumba ɨjio mwemue.
18 Ʉmuunhu ghweni mʉlyʉmue naangisyangaghe kuuti alɨ nʉ lʉhala.
Ʉmuunhu nave ikuvona kuuti alɨ nʉ lʉhala mʉ ɨɨsi ɨjɨ,
ivɨkaghe nʼjasu kuuti akave ʉlʉhala ʉlwa kyangʼhaani.
19 Ʉlwakʉva ʉlʉhala ʉlwa ɨɨsi ɨjɨ,
vʉjasu pamaaso gha Ngʉlʉve.
Ndavʉle lɨlembilue mʉ Malembe aMɨmɨke kuuti,
“ɄNgʉlʉve ɨkʉvakola avanya lʉhala mʉ vʉsʉfu vwave.”a
20 Kange,
lɨlembilue mʉ Malembe aMɨmɨke,
“ɄMʉtwa aghakagwile amasaaghe gha vanya lʉhala kuuti masila lʉvʉmbʉlɨlo.”b
21 Lɨno,
ʉmuunhu ghweni naangighiniaghe vwɨmɨla sino sivombua na vaanhu.
Ʉlwakʉva ʉsue tweni ʉNgʉlʉve atʉvɨkile kʉkʉvatanga ʉmue,
22 nɨɨve neene,
aave ghwe Apolo,
nambe aave ghwe Peteli.
Kange,
ʉNgʉlʉve avapeliile ifiinu fyoni kʉkʉvatanga,
fiive fya mʉ ɨɨsi,
nambe vwʉmi,
nambe vʉfue;
nambe fino pwefili lɨno,
nambe fino kwefiliiva.
Ifio fyoni fiinu ʉmue,
23 na jʉmue mʉlɨ va Kɨlɨsite,
najʉ Kɨlɨsite ghwa Ngʉlʉve.