Kupʉlɨsia ɨmhola ɨja Yesu Kɨlɨsite
2
Vanyalʉkolo vango,
ye nisile kʉlyʉmue kupʉlɨsia ɨmhola ɨja Ngʉlʉve jɨno ahʉfisie,
nanɨkapʉlɨsyagha mʉlwa kukuhʉfia kuuti nɨkɨmanyile kujova vʉnono,
nambe kuuti nɨlɨ nʉ lʉhala.
2 Nɨkavombile enendɨɨkɨ,
ʉlwakʉva nɨkalamwile kuuti nanijova ɨkɨɨnu ɨkɨngɨ,
looli kujova imhola isa Yesu Kɨlɨsite,
kyongo kufua kwa mwene pa kɨkovekano.
3 Ʉnsiki ʉghuo ye nɨlɨ kʉlyʉmue,
nɨkaale mʼbotevote,
nɨkaale mwoghofi,
kange natetemagha kyongo.
4 Pano nɨkavʉlanɨsyagha na pano nɨkapʉlɨsyagha,
nanɨkajovagha amasio kuuti mwɨtɨke vwɨmɨla ʉlʉhala lwango,
looli ingʉfu isa Mhepo ʉMwɨmɨke sikahʉfyagha ʉvwakyangʼhaani.
5 Nɨkavombagha ʉluo,
kuuti ʉlwɨtɨko lwinu lʉlekaghe pivɨngɨlɨla ʉlʉhala lwa vaanhu,
looli lʉvisaghe mʉ ngʉfu sa Ngʉlʉve.
Ʉvʉkagʉsi kuhʉma kwa Mhepo ʉMwɨmɨke
6 Lɨno,
ʉsue tujova imhola isa vʉkagʉsi kʉ vaanhu vano vakangiile mʉ lwɨtɨko,
neke ʉvʉkagʉsi ʉvuo navwa ɨɨsi ɨjɨ,
kange navwa vatwa va ɨɨsi ɨjɨ vano valɨ nʉ vʉsililo ʉvwa kʉtema.
7 Ʉsue tujova isa vʉkagʉsi vwa Ngʉlʉve vʉno vʉlɨ mʉ vʉsyefu,
kange vʉfisilue pamaaso gha vaanhu.
Ʉvʉkagʉsi vwake vwe vʉtavɨke ʉvwa kʉtʉvombela inofu vʉno alyataviike ye akyale kupela ɨɨsi.
8 Neke nakwale nambe jʉmo mʉ vatemi va ɨɨsi ɨjɨ jʉno alyalʉtangʼhinie ʉluo,
ʉlwakʉva vale valʉtangʼhanie navaale vikʉnkomelela pa kɨkovekano ʉMʉtwa ʉnya kʉghinisivua.
9 Neke ndavʉle lɨlembilue mʉ Malembe aMɨmɨke kuuti,
“Sino ʉNgʉlʉve alyavalɨngʼhanɨkisie vano vamʉghanile,
nakwale ʉmuunhu jʉno aghelile
kʉkʉsaagha nambe kʉkʉsipʉlɨka,
nakwale ʉmuunhu jʉno aghelile
kʉkʉsivɨɨka mʉ mwojo ghwake.”a
10 Neke ʉsue ʉNgʉlʉve alyatʉhʉfisie isio kukilila kwa Mhepo ghwake ʉMwɨmɨke.
Ʉlwakʉva ʉMhepo ʉMwɨmɨke ilola sooni,
nambe sino sili mʉ vʉsyefu mwa Ngʉlʉve.
11 Ʉlwakʉva nakwale ʉmuunhu jʉno ndepoonu ikagʉla sino isaagha ʉjʉnge,
looli sikagʉlɨka kwa mwene jʉjuo.
Fye lʉlɨvuo,
soope sino ʉNgʉlʉve isaagha nakwale jʉno asikagwile,
looli sikagʉlɨka nʉ Mhepo ghwa Ngʉlʉve.
12 Lɨno,
ʉsue natwʉpiile imhepo isa ɨɨsi ɨjɨ,
looli twʉpiile ʉMhepo jʉno ihʉma kwa Ngʉlʉve,
kuuti tʉsikagʉle sino atʉpeliile ʉNgʉlʉve mʉ lʉsʉngʉ lwake.
13 Kange,
natujova amasio ghano tʉvʉlanɨsivue nʉ vʉkagʉsi vwa vaanhu,
looli amasio ghano tʉvʉlanɨsivue nʉ Mhepo ghwa Ngʉlʉve,
tughanʉla imhola isa Mhepo kʉ vano valɨ nʉ Mhepo ʉjuo.
14 Neke ʉmuunhu jʉno nsila Mhepo ghwa Ngʉlʉve,
naangʉpɨle sino sihʉma kwa Mhepo ghwa Ngʉlʉve,
ʉlwakʉva kwa mwene isio sa kɨjasu,
kange naangasitangʼhanie,
ʉlwakʉva ʉmuunhu ɨkʉsitangʼhania isio mʉ lʉtangɨlo lwa Mhepo mwene.
15 Looli ʉmuunhu jʉno ilongosivua nʉ Mhepo,
ʉjuo ɨkʉsitangʼhania sooni,
neke avaanhu avange navangantangʼhanie ʉmwene.
16 Ʉlwakʉva,
“Ghwe veeni jʉno akagwile amasaaghe gha Ngʉlʉve?
Kange,
ghwe veeni jʉno ɨkʉntanga ʉNgʉlʉve amasaaghe?”b
Neke ʉsue twe vɨtɨki tʉlɨ na masaaghe ghano ghihʉma kwa Kɨlɨsite.