1 Vakolinto 1

Ɨkalata ɨja kwanda ɨja Paulo kʉ

Vakolinto

Ʉlʉhʉngɨlo

Ɨkalata ɨjɨ jɨhʉmile kʉlyʉne ne Paulo, ne jʉno ʉNgʉlʉve angʼhemelile mʉ vughane vwake nɨɨve nsungʼhua ghwa Yesu Kɨlɨsite. Ʉne nʉ nyalʉkolo ghwitu ʉSositeni, 2 tʉkʉvahʉngɨla ʉmue mwe kɨpʉgha kya vɨtɨki, mwe vano mʉlɨ mʉ lɨkaaja ɨlya Kolinto, ʉmue mwe vano ʉNgʉlʉve avɨmiike mwa Yesu Kɨlɨsite na kʉkʉvakemeela kuuva vaanhu vaake. Tʉkʉvahʉngɨla palɨkɨmo na vaanhu vooni ava mbale sooni vano vikʉnsʉʉma na kʉkʉmhʉvɨɨla ʉYesu Kɨlɨsite, jʉno ghwe Mʉtwa ghwave kange ghwitu na jʉsue.

3 Ʉlʉsʉngʉ nʉ lʉtengaano kuhʉma kwa Ngʉlʉve ʉNhaata ghwitu, na kwa Mʉtwa ʉYesu Kɨlɨsite, fivisaghe numue.

Ʉlʉhongesio lwa Paulo kwa Ngʉlʉve

4 Nɨkʉmhongesia ʉNgʉlʉve ghwango ifighono fyoni vwɨmɨla ʉmue, ʉlwakʉva ɨkʉvasʉngʉkɨla mwa Yesu Kɨlɨsite. 5 Mwa Kɨlɨsite mwe muno mʉpelilue ʉvʉmofu ʉvwa fipelua fyoni, ndavʉle mʉ njovele jiinu na mʉ vʉkagʉsi vwinu. 6 Isio sihʉfia kuuti, imhola isa Yesu Kɨlɨsite sino tʉkapʉlisie kʉlyʉmue sa kyangʼhaani. 7 Lɨno, namʉkaghilue nambe kɨpelua kɨmo ɨkya Mhepo ʉMwɨmɨke, pano mughulila kugomoka kwa Mʉtwa ghwitu ʉYesu Kɨlɨsite. 8 ɄNgʉlʉve ɨkʉvakangasyagha kuhanga kʉvʉsililo, neke mʉkave vasila nkole ɨkɨghono kɨla kɨno ʉMʉtwa ghwitu ʉYesu Kɨlɨsite ilikwisa kuhɨgha avaanhu. 9 ɄNgʉlʉve ilivomba isi, ʉlwakʉva ʉmwene ghwa kyangʼhaani, ivomba sooni sino alyajovile kuuti ivomba. Ʉjuo ghwe mwene akavakemelile ʉmue, mʉʉve vʉhangɨlanɨsi nʉ Mwanaake ʉYesu Kɨlɨsite ʉMʉtwa ghwitu.

Ʉvʉmo mʉ kɨpʉgha ɨkya vɨtɨki

10 Vanyalʉkolo vango, lɨno nɨkʉvasʉʉma mʉ lɨtavua lya Mʉtwa ghwitu ʉYesu Kɨlɨsite, mʉvisaghe vaanhu vanya kʉpʉlɨngʼhana, apuo pe muvisagha vʉmo. Mʉvisaghe vʉmo mʉ sino mʉfumbilue na mʉ sino musaagha. 11 Vanyalʉkolo vango, avaanhu vamonga ava mʉ nyumba ɨja Kiloe vambʉlile kuuti kʉlyʉmue kʉlɨ mabaatu. 12 Lɨno, sino nilonda pijova se isi: nʉjʉnge mʉlyʉmue ijova lwake, ʉjʉnge iiti, “Ʉne, nɨlɨ ghwa Paulo.” Ʉjʉnge iiti, “Ʉne, nɨlɨ ghwa Apolo.” Ʉjʉnge iiti, “Ʉne, nɨlɨ ghwa Peteli.” Ʉjʉnge iiti, “Ʉne, nɨlɨ ghwa Kɨlɨsite.” 13 Asi, muvomba lʉnono kughavania ɨlɨpʉgha lya Kɨlɨsite enendɨɨkɨ? Ndepoonu ʉPaulo ghwe alyafwile pa kɨkovekano vwɨmɨla ʉmue? Ndepoonu mʉkofughue mʉ lɨtavua lya Paulo?

14 Nɨkʉmhongesia ʉNgʉlʉve, ʉlwakʉva nanɨkamwofwighe nambe muunhu kʉlyʉmue, looli jʉ Kilisipo nʉ Gayo. 15 Lɨno, nakwale jʉno ndepoonu ikwɨmɨla kuuti ofughilue mʉ lɨtavua lyango. 16 Kange, nɨlyofwighe avaanhu ava mʉ nyumba ɨja Sitefana. Avuo ve vano nɨlyofwighe, nanikagʉla kuuti nɨkamwofwighe ʉmuunhu ʉjʉnge. 17 Ʉlwakʉva, ʉKɨlɨsite naalyasungʼhile ʉne kukwofugha avaanhu. Alyasungʼhile kupʉlɨsia ɨMhola ɨNofu, kɨsila kʉhʉvɨɨla ʉlʉhala lwango ʉlwa kʉjova vʉnono. Nave nɨvombe ʉluo, luuva hwene ʉvʉfue vwa Kɨlɨsite pa kɨkovekano vʉsila ngʉfu.

Ʉvʉkagʉsi vwa Ngʉlʉve

18 Ɨmhola ɨja kʉfua ʉKɨlɨsite pa kɨkovekano kʉ vano visova vivona ja kɨjasu, looli kʉlyʉsue twe vano tupokua, ɨmhola ɨjio ngʉfu sa Ngʉlʉve. 19 Ndavʉle lɨlembilue mʉ Malembe aMɨmɨke,

“Avaanhu avanya lʉhala ninangania ʉlʉhala lwave,

avakagʉsi nisofia ʉvʉkagʉsi vwave.”

20 Lɨno, valɨ kʉʉghi vano tuuti vanya lʉhala? Valɨ kʉʉghi vano tuuti vavʉlanɨsi va ndaghɨlo, nambe avaanhu vano vakagwile kujova vʉnono ifighono ifi? ɄNgʉlʉve avonisie ngʼhaani kuuti ʉlʉhala ʉlwa mʉ ɨɨsi ɨjɨ, vʉjasu. 21 Ʉlwakʉva ndavʉle vʉlɨvuo ʉvʉkagʉsi vwa Ngʉlʉve, avaanhu navalyantangʼhinie ʉNgʉlʉve mʉ vʉkagʉsi vwave. Ʉlwene ʉNgʉlʉve akakeliile kʉkʉvapoka vano vikʉmwɨtɨka vwɨmɨla ɨmhola jɨno tupʉlɨsia, jɨno avaanhu vano navankagwile ʉNgʉlʉve viiti ja kɨjasu. 22 Ʉlwakʉva aVayahudi vilonda ifivalɨlo neke vɨtɨke, aVayunaani vilonda ʉvʉkagʉsi. 23 Neke ʉsue, tupʉlɨsia ɨmhola ɨja Kɨlɨsite jʉno alyafwile pa kɨkovekano. Ɨmhola ɨjio aVayahudi jɨkʉvakʉvasia, na kʉ vano naVayahudi mhola ja kɨjasu. 24 Neke kʉ vano ʉNgʉlʉve akavakemelile kuuva vaake, vaave Vayahudi nambe vaave Vayunaani, ʉKɨlɨsite se ngʉfu sa Ngʉlʉve, kange vwe vʉkagʉsi vwa Ngʉlʉve. 25 Ʉlwakʉva, sino avaanhu vivona kuuti vʉjasu vwa Ngʉlʉve, sikilile ʉlʉhala ʉlwa vaanhu. Na sino vivona vʉvotevote vwa Ngʉlʉve, sili ni ngʉfu kukila ingʉfu isa vaanhu.

26 Lɨno vanyalʉkolo vango, mʉkʉmbʉkaghe vʉle mʉlyale ye mukemelua nʉ Ngʉlʉve. Vinga mʉlyʉmue vakavonekagha hwene vasila lʉhala pamaaso gha vaanhu. Kange, vinga namʉlyale na matavua amavaha, nambe kuholua mʉ nyumba isa voghopua. 27 Neke ʉNgʉlʉve alyavasalwile avaanhu vano mʉ ɨɨsi vivoneka vajasu, kuuti avajejevʉle avanya lʉhala. Kange, ʉNgʉlʉve alyavasalwile avaanhu vano vivoneka mʉ ɨɨsi vavotevote, kuuti avajejevʉle avanya ngʉfu. 28 ɄNgʉlʉve alyavasalwile avaanhu avakotofu mʉ ɨɨsi, vano vabenapʉlilue, vano vivoneka hwene navaanhu, neke avonie kuuti, avaanhu vano vivoneka vahʉvɨlua kyongo, vasila lʉvʉmbʉlɨlo. 29 Alyavombile ʉluo kuuti ʉmuunhu ghweni alekaghe kukughinia pamaaso gha Ngʉlʉve. 30 Ʉlwakʉva ʉNgʉlʉve ghwe jʉno avavɨkile ʉmue kuuva vaanhu va Yesu Kɨlɨsite. Ʉmwene amʼbɨkile ʉKɨlɨsite kuuva vʉkagʉsi vwitu. Kwekʉti, vwɨmɨla ʉYesu tʉlɨ vagholofu pamaaso gha Ngʉlʉve, tʉlɨ vɨmɨke, kange tʉvangilue. 31 Ndavʉle lɨlembilue mʉ Malembe aMɨmɨke kuuti, “Ʉmuunhu jʉno ikughinia, ighiniaghe vwɨmɨla ʉMʉtwa.”