Ifipelua ifya Mhepo ʉMwɨmɨke
12
Lɨno vanyalʉkolo vango,
nanilonda mʉjighe kɨsila kʉkagʉla vʉnono ifipelua kuhʉma kwa Mhepo ʉMwɨmɨke.
2 Mukagʉla kuuti ye mʉlɨ vapanji,
mʉlyasyangilue na kulongosivua kukufuunya kʉ mangʉlʉve ghano naghijova.
3 Lɨno nɨkʉvavʉʉla kuuti,
ʉmuunhu ghweni jʉno ilongosivua nʉ Mhepo ghwa Ngʉlʉve naangajove kuuti,
“ɄYesu aghunwaghe.”
Kange,
ʉmuunhu ghweni nave nailongosivua nʉ Mhepo ʉMwɨmɨke naangajove kuuti,
“ɄYesu ghwe Mʉtwa.”
4 Lɨno,
kwefili ifipelua fino fili papinga,
neke jʉno ighava ifipelua ifio ghwe Mhepo jʉjʉjuo.
5 Kange,
kʉkʉmʼbombela ʉMʉtwa kʉlɨ papinga,
neke ʉMʉtwa jʉno vikʉmʼbombela ghwe jʉla jʉla.
6 Kange,
kuvomba ɨmbombo kʉlɨ papinga,
neke ʉNgʉlʉve ghwe jʉla jʉla jʉno ivomba imbombo isio mʉ vaanhu vooni.
7 Nʉjʉnge ʉMhepo ɨkʉntanga kuvomba,
neke avaanhu vooni vavʉmbʉlɨlaghe.
8 Ʉlwakʉva ʉjʉnge apelilue nʉ Mhepo ʉlʉhala ʉlwa kʉjova amasio vʉnono,
ʉjʉnge kujova amasio amanya vʉkagʉsi.
Ifipelua ifi ihʉmia ndavʉle ikeela jʉ Mhepo jʉjʉjuo.
9 ɄMhepo jʉjʉjuo,
ʉjʉnge ɨkʉmpelela kuuva nʉ lwɨtɨko,
ʉjʉnge ɨkʉmpelela kuuva nɨ kɨpelua ɨkya kʉsosia,
10 ʉjʉnge kuvomba ifidegho,
ʉjʉnge kupʉlɨsia ɨmhola kuhʉma kwa Ngʉlʉve,
ʉjʉnge kʉkʉsitangʼhania imhepo imbiivi nʉ Mhepo ghwa kyangʼhaani,
ʉjʉnge kujova ɨnjovele ɨmhia,
ʉjʉnge kughanʉla injovele isio.
11 Neke imbombo isi sooni ivomba jʉ Mhepo jʉla jʉla,
ɨkʉmpeela nʉjʉnge ɨkɨpelua kyake ndavʉle ikeela jʉjuo.
Ʉmʼbɨlɨ ghʉmo ifilʉngo finga
12 Ʉmʼbɨlɨ ghʉlɨ ni filʉngo finga,
neke ifilʉngo finga ifio fili mʼbɨlɨ ghʉmo.
Lɨno,
ndavʉle ʉmʼbɨlɨ vʉle ghʉlɨvuo,
fye lʉlɨvuo na kwa Kɨlɨsite.
13 Na jʉsue tweni,
tʉʉve Vayahudi nambe natʉʉve Vayahudi,
tʉʉve vakami nambe tʉʉve vavʉke,
tʉlyofughue na kʉkʉmwʉpɨla ʉMhepo jʉmo,
kuuti tʉʉve mʼbɨlɨ ghʉmo.
14 Ʉlwakʉva ʉmʼbɨlɨ nakɨlʉngo kɨmo,
looli filʉngo finga.
15 Nave ʉlʉghʉlʉ lʉʉti,
“Ʉlwakʉva ʉne nanɨlɨ lʉvoko,
lɨno nanɨlɨ ghwa mʼbɨlɨ,”
asi,
naluuva lwa mʼbɨlɨ mʉ ʉluo?
16 Joope ɨmbulughutu jɨngati,
“Ʉlwakʉva ʉne nanɨlɨ liiso,
lɨno nanɨlɨ ghwa mʼbɨlɨ,”
asi,
najiiva ja mʼbɨlɨ mʉ ʉluo?
17 Nave ʉmʼbɨlɨ ghwoni ghwale ghʉʉve liiso,
lwale luuva ndaani kupʉlɨka?
Nambe ʉmʼbɨlɨ ghwoni ghwale ghʉʉve mbulughutu,
lwale luuva ndaani kunusia?
18 Lɨno,
ʉNgʉlʉve ataviike ifilʉngo ifya mʼbɨlɨ ndavʉle ighanile jʉjuo.
19 Ʉmʼbɨlɨ naghwale ghuuva mʼbɨlɨ,
ghwale ghʉʉve kɨlʉngo kɨmo.
20 Lɨno,
ifilʉngo finga,
neke ʉmʼbɨlɨ ghʉlɨ ghʉmo.
21 Ɨliiso nalɨngati kʉ lʉvoko,
“Ʉve ʉlɨ nsila lʉtango kʉlyʉne.”
Nambe ʉmutu naghʉngaghavʉʉle amaghʉlʉ kuuti,
“Ʉmue mʉlɨ vasila lʉtango kʉlyʉne.”
22 Ʉlwene ifilʉngo fino fivoneka fivotevote mʉ mʼbɨlɨ,
fye fino filondua kyongo.
23 Kange,
ifilʉngo mʉ mʼbɨlɨ fino fivoneka fya kʉbenapʉlua,
fye fino tʉkʉfighinia.
Fyope ifilʉngo fiitu fino fivoneka fikosia isoni,
ifio fye tukolopalɨla kyongo,
24 neke ifilʉngo fiitu ifinya lʉtogo,
nafilonda kukolopalɨlua ndavʉle ifingi.
Looli ʉNgʉlʉve aghʉtaviike vʉnono ʉmʼbɨlɨ,
ifilʉngo fino fibenapʉlua ɨkʉfighinia,
25 kuuti nakwekʉngavisaghe kubaghʉlana mʉ mʼbɨlɨ,
looli ifilʉngo fyoni fitanganaghe.
26 Neke ɨkɨlʉngo kɨmo kɨngalemale,
fyoni filemala palɨkɨmo nɨ kyene.
Kange,
ɨkɨlʉngo kɨmo kɨngaghinisivue,
fyoni fiiva nʉ lʉkeelo palɨkɨmo nɨ kyene.
27 Lɨno,
ʉmue mʉlɨ mʼbɨlɨ ghwa Kɨlɨsite,
nʉjʉnge alɨ kɨlʉngo mʉ mʼbɨlɨ ʉghuo.
28 Mʉ kɨpʉgha ɨkya vɨtɨki,
ʉNgʉlʉve avɨkile,
taasi avasungʼhua,
pe avanya kʉpʉlɨsia ɨmhola kuhʉma kwa Ngʉlʉve,
neke akavɨɨka avavʉlanɨsi.
Pambele akavɨɨka vano vivomba ifidegho,
vano valɨ ni fipelua ifya kʉsosia avatamu,
vano valɨ ni fipelua ifya kʉtanga avange,
vano valɨ ni fipelua ifya kʉlongosia,
na vano valɨ ni fipelua ifya kʉjova ɨnjovele ɨmhia.
29 Asi,
ndepoonu avaanhu vooni vasungʼhua?
Avaanhu vooni vavɨli?
Avaanhu vooni vavʉlanɨsi?
Avaanhu vooni vivomba ifidegho?
30 Avaanhu vooni valɨ ni fipelua ifya kʉsosia avatamu?
Avaanhu vooni vijova ɨnjovele ɨmhia?
Kange,
avaanhu vooni vapelilue kughanʉla?
31 Lɨno,
mʉghimbaghe kulonda ifipelua ifivaha.
Kange,
nitapikʉvavʉʉla vʉle lʉnoghiile kuvomba vʉnono kukila.