Ʉlʉghano
13
Nambe nɨngajove mʉ njovele isa vaanhu ni njovele isa vanyamhola,
neke nave nɨlɨ nsila lʉghano,
niiva ndavʉle ɨnjegheelo ɨja lɨteneka ɨlɨsila kɨɨnu nambe ɨnjegheelo ɨja lɨjoofu.
2 Kange,
nambe nɨpʉlɨsyaghe ɨmhola kuhʉma kwa Ngʉlʉve na kʉkʉsitangʼhania sooni sino sili mʉ vʉsyefu na mʉ vʉkagʉsi vwoni,
nambe nɨngave nʉ lwɨtɨko ʉlʉkome ʉlwa kʉhamia ifidunda,
neke nave nɨlɨ nsila lʉghano,
nanɨlɨ kɨmonga.
3 Kange,
nɨngatavʉle ɨkyʉma kyango kyoni kʉkʉvapeela avakotofu,
kange ningitavʉle ʉmʼbɨlɨ ghwango kuuti ghʉpie pa mwoto,
nave nɨlɨ nsila lʉghano,
apuo nanivʉmbʉlɨla kɨmonga.
4 Ʉlʉghano lʉkʉmpelela ʉmuunhu kuuva nʉ lugudo,
kuuva nʉ lʉtango,
kuuva nsila giila,
kuuva nsila lughinio,
kange kuuva nsila matingo.
5 Ʉlʉghano lʉkʉmpelela ʉmuunhu kuuva mpʉlɨki,
nalʉkʉmpelela kusaagha lʉlwa mwene,
nambe kukalala ngʼhaningʼhaani,
nambe kuuva nʉ lʉvɨkɨlɨlo.
6 Ʉlʉghano lʉkʉmpelela aleke kukeela ʉvʉhosi,
looli kukeela ʉvwakyangʼhaani.
7 Ʉlʉghano lʉkʉmpelela kukuguda mʉ sooni,
kuuva nʉ lwɨtɨko amasiki ghooni,
kuuva nya lʉhʉvɨɨlo amasiki ghooni,
kange kuuva nkifu mʉ sooni.
8 Ʉlʉghano lʉsila vʉsililo,
looli ifipelua ifingi fili nʉ vʉsililo vwake,
ndavʉle kupʉlɨsia ɨmhola kuhʉma kwa Ngʉlʉve,
kujova ɨnjovele ɨmhia,
na kuuva nʉ vʉkagʉsi vʉmonga.
9 Ʉlwakʉva tʉsikagwile ndebe,
kange imhola kuhʉma kwa Ngʉlʉve tupʉlɨsia si sino tʉsikagwile.
10 Neke vuliiva vukwisa ʉvʉkwɨlanɨfu,
indebe isio silisila.
11 Ye nɨlɨ mwana,
nɨkajovagha isa kyana,
ʉvʉkagʉsi vwale vwa kyana,
nɨkasaghagha isa kyana.
Neke lɨno ʉlwakʉva nɨlɨ nʼgoyo,
isa pa vwana nɨsilekile.
12 Vʉle tulola lɨno,
lʉlɨ ndavʉle kulola kɨmonga mʉ lʉtuuka,
neke pambele tulikʉfyagha fyoni pa vwelu.
Ʉnsiki ʉghʉ nɨkagwile padebe,
neke pambele nilikagʉla lwoni ndavʉle ʉNgʉlʉve vʉle angʼhagwile ʉne.
13 Lɨno,
ifiinu ifi fitatu nafilasila lʉsiku:
ʉlwɨtɨko,
ʉlʉhʉvɨɨlo nʉ lʉghano.
Neke mʉ ifi,
ɨkɨvaha lwe lʉghano.