Ɨkɨpelua ɨkya kʉpʉlɨsia nɨ kya kʉjova ɨnjovele ɨmhia
14
Mʉlongosivwaghe nʉ lʉghano na kughimba kulonda ifipelua ifya Mhepo ʉMwɨmɨke,
kyongo ɨkɨpelua ɨkya kʉpʉlɨsia ɨmhola kuhʉma kwa Ngʉlʉve.
2 Ʉmuunhu jʉno ijova ɨnjovele ɨmhia,
naijova na vaanhu,
looli ijova nʉ Ngʉlʉve,
ʉlwakʉva sino ijova nakwale jʉno ɨkʉsitangʼhania.
Ʉmwene iiva ijova isa kʉ vʉsyefu mʉ mwojo ghwake.a
3 Neke jʉno ipʉlɨsia ɨmhola kuhʉma kwa Ngʉlʉve,
ijova na vaanhu amasio agha kʉvatanga mʉ lwɨtɨko,
agha kʉvanyamasia na kʉkʉvakangasia.
4 Jʉno ijova ɨnjovele ɨmhia,
ikava ʉlʉtango mʉ lwɨtɨko lwake,
neke jʉno ipʉlɨsia ɨmhola kuhʉma kwa Ngʉlʉve itanga ɨkɨpʉgha ɨkya vɨtɨki.
5 Ʉne nilonda ʉmue mweni mʉjovaghe ɨnjovele ɨmhia,
neke kyongo nilonda mʉpʉlɨsyaghe ɨmhola kuhʉma kwa Ngʉlʉve.
Ʉlwakʉva ɨmbombo ɨja kʉpʉlɨsia ɨmhola kuhʉma kwa Ngʉlʉve je mbaha kukila ɨja kʉjova ɨnjovele ɨmhia.
Looli ʉmuunhu,
jʉno ijova ɨnjovele ɨmhia,
aghanʉlaghe kuuti atangaghe ɨkɨpʉgha ɨkya vɨtɨki mʉ lwɨtɨko.
6 Lɨno vanyalʉkolo vango,
nɨngiise kʉlyʉmue na kujova ɨnjovele ɨmhia,
ndepoonu muvʉmbʉlɨla kɨki?
Namʉngavʉmbʉlɨle kɨmonga,
looli nɨngavavʉʉle sino ʉNgʉlʉve ahʉfisie,
nambe nɨvapeele ʉvʉkagʉsi,
nɨpʉlɨsie ɨmhola kuhʉma kwa Ngʉlʉve nambe nɨvʉlanɨsie,
apuo muvʉmbʉlɨla.
7 Fye lʉlɨvuo,
nambe ifiinu ifisila vwʉmi,
pano fikuuta,
kɨɨve kɨlongilongi,
lɨɨve lɨgombo,
nave fikuuta kɨsila vʉtavɨke,
ʉmuunhu ndepoonu ɨkʉlʉkagʉla ndaani ʉlwɨmbo?
8 Nambe ʉlʉkelemo nave lʉkuute,
neke ɨlɨsio lyake lɨleke kukagʉlɨka kʉ vaanhu,
ghwe veeni jʉno kyaikulɨngʼhania kulua ɨlɨlʉgʉ?
9 Fye lʉlɨvuo na kʉlyʉmue,
nave mujova amasio ghano naghikagʉlɨka,
ghwe veeni jʉno ndepoonu ɨkʉkɨtangʼhania kɨno mujova?
Apuo sino mujova siiva silʉta nɨ mhepo.
10 Mʉ ɨɨsi mwesili ɨnjovele sino sili papinga,
neke nakwejɨlɨ nambe jɨmo ɨsila mʉlʉvo.
11 Lɨno,
nave nanɨjɨtangʼhinie ɨnjovele jɨno ijova jʉmonga,
niiva hwene mhesia kwa jʉno ijova,
ghwope jʉno ijova iiva hwene mhesia kʉlyʉne.
12 Na kʉlyʉmue fye lʉlɨvuo.
Lɨno,
ʉlwakʉva mulonda kyongo kuuva ni fipelua ifya Mhepo ʉMwɨmɨke,
mʉghimbaghe fiijo kuuva ni fipelua fino fikʉsia ɨkɨpʉgha ɨkya vɨtɨki.
13 Kwekʉti,
ʉmuunhu jʉno ijova ɨnjovele ɨmhia,
ansʉʉme ʉNgʉlʉve kuuti antange aghanʉle.
14 Ʉlwakʉva nɨngifuunye mʉ njovele ɨmhia,
ʉmwojo ghwango ghwe ghʉno ghuuva ghukufuunya,
neke ʉlʉhala lwango lʉsila lʉvʉmbʉlɨlo kʉ vange.
15 Lɨno,
nɨnoghiile kuvomba kɨki?
Nikufunyagha mʉ mwojo mʉ njovele ɨmhia,
kange nikufunyagha nʉ lʉhala;
nikwɨmbagha mʉ njovele ɨmhia,
kange nikwɨmbagha nʉ lʉhala.
16 Ʉngamʉghiniaghe ʉNgʉlʉve nʉ mwojo ghwene,
pano ʉmalile kʉkʉmhongesia,
ʉmuunhu ʉjʉnge jʉno naakangiile mʉ lwɨtɨko ikwɨtɨkɨlagha ndaani kuuti,
“Ameni,”
pano naasitangʼhinie sino ghujova?
17 Kʉlyʉve ghuuva ʉkʉmhongesia ʉNgʉlʉve kyangʼhaani,
neke ʉjʉnge jʉla nalʉkʉntanga kɨmonga mʉ lwɨtɨko.
18 Nɨkʉmhongesia ʉNgʉlʉve ʉlwakʉva nijova ɨnjovele ɨmhia kukila ʉmue mweni,
19 neke mʉ kɨpʉgha ɨkya vɨtɨki nikeela fiijo kujova amasio ghahaano ghano ghikagʉlɨka nʉ lʉhala kuuti nɨvavʉlanɨsie avange.
Ʉluo lwe lʉnono kukila kujova amasio imbilima kɨjigho mʉ njovele ɨmhia.
20 Vanyalʉkolo vango,
mʉlekaghe kusaagha hwene mʉlɨ vaana,
looli mʉsaghaghe hwene mʉlɨ vaanhu vagoyo.
Neke vwɨmɨla ʉvʉhosi,
apuo mʉvisaghe ndavʉle avaana vʉle vɨmɨke.
21 Mʉ Malembe aMɨmɨke lɨlembilue,
“ɄMʉtwa iiti,
‘Nijova na vaanhu ava kukilila avahesia ava kʉ vʉtali,
vano vijova ɨnjovele ɨhesia,
poope nakyavikʉmhʉlɨkɨsia.’ ”b
22 Kujova ɨnjovele ɨmhia kɨvalɨlo kya ngʉfu sa Ngʉlʉve vwɨmɨla vano navɨtɨki,
nakwekʉti kɨvalɨlo vwɨmɨla avɨtɨki.
Neke ɨmhola kuhʉma kwa Ngʉlʉve jipʉlɨsɨvua vwɨmɨla avɨtɨki,
nakwekʉti vwɨmɨla vano navɨtɨki.
23 Lɨno,
nave avɨtɨki vakongʼhanile pikufuunya,
neke vooni vatengʉle kujova ɨnjovele ɨmhia,
pe vingile avaanhu vano navalʉtangʼhinie,
nambe vano navɨtɨki,
asi,
nakyaviiti mʉlɨ nʉ lʉkwale?
24 Looli mweni mʉngapʉlɨsyaghe ɨmhola kuhʉma kwa Ngʉlʉve,
neke iise ʉmuunhu jʉno naalʉtangʼhinie,
nambe jʉno namwɨtɨki,
sino ipʉlɨka kʉ vooni kyasikʉmpelela kukagʉla ʉvʉhosi vwake.
Kange,
sikʉmpelela kukagʉla kuuti ilondua kulaata.
25 Sino sili mʉ mwojo ghwake,
siiva pa vʉvalafu,
pe ifughamagha na kukufuunya kwa Ngʉlʉve itisagha,
“Kyangʼhaani ʉNgʉlʉve alɨ palɨkɨmo numue!”
Ʉvʉtavɨke ʉvwa vɨtɨki kukufuunya
26 Lɨno vanyalʉkolo vango,
tʉʉti kɨki?
Pano mʉkongʼhanile kukufuunya,
ʉjʉnge alɨ nʉ lwɨmbo,
ʉjʉnge alɨ ni mbʉlanɨsio,
ʉjʉnge kujova sino ʉNgʉlʉve ilonda kuhʉfia,
ʉjʉnge alɨ nɨ njovele ɨmhia,
ʉjʉnge kughanʉla,
isi sooni sivombekaghe kukangasia ɨkɨpʉgha ɨkya vɨtɨki.
27 Nave pwevale vano vijova ɨnjovele ɨmhia,
vajovaghe vavɨlɨ nambe vatatu,
valekaghe kukila apuo,
vajovaghe lwandalo,
kange pweavisaghe ʉmuunhu ʉghwa kʉghanʉla sino vijova.
28 Nave napwale ʉghwa kʉghanʉla,
jʉno ijova ɨnjovele ɨmhia avʉhɨlaghe kujova mʉ kɨpʉgha ɨkya vɨtɨki,
looli ajovaghe nʉ Ngʉlʉve mʉ mwojo ghwake.
29 Voope vano vipʉlɨsia ɨmhola kuhʉma kwa Ngʉlʉve,
vapʉlɨsyaghe vavɨlɨ nambe vatatu,
neke avange vaghaghelaghe amasio aghuo.
30 Nave jʉmonga mʉ vano vipʉlɨkɨsia lɨmwisiile ɨlɨsio ɨlya kʉjova kuhʉma kwa Ngʉlʉve,
jʉno aveele ipʉlɨsia ajikaghe.
31 Nʉjʉnge avisaghe nʉ nsiki ʉghwa kʉpʉlɨsia ɨmhola kuhʉma kwa Ngʉlʉve,
apuo avaanhu vooni vivʉlanɨsɨvua na kukangasivua.
32 Ʉlwakʉva ɨkɨpelua ɨkya kʉpʉlɨsia ɨmhola kuhʉma kwa Ngʉlʉve,
kilongosivua nʉ jʉno ipʉlɨsia.
33 ɄNgʉlʉve ghwitu naghwa matilingano,
looli Ngʉlʉve ghwa lʉtengaano.
Ndavʉle lʉlɨvuo mʉ fipʉgha fyoni ifya vɨtɨki,
34 pano vakongʼhanile,
avakɨjʉʉva vavisaghe kɨmihe,
ʉlwakʉva navɨtɨkɨsivue kujova,
looli vavisaghe vapʉlɨki ndavʉle siiti indaghɨlo sa Moose.
35 Nave vilonda kukagʉla lʉmonga,
vavaposyaghe avaghoosi vaave kʉ kaaja,
ʉlwakʉva kɨnyasoni ʉmʉkɨjʉʉva kujova mʉ kɨpʉgha ɨkya vɨtɨki.
36 Ɨlɨsio lya Ngʉlʉve nalɨkatengwile kʉlyʉmue,
kange nalɨkisile kʉlyʉmue mwe veene!
37 Nave ʉmuunhu ikuvona kuuti alɨ nɨ kɨpelua ɨkya kʉpʉlɨsia ɨmhola kuhʉma kwa Ngʉlʉve,
nambe kuuva nɨ kɨpelua kɨmonga kuhʉma kwa Mhepo ʉMwɨmɨke,
akagʉlaghe kuuti,
isi sino nɨkʉvalembela,
ndaghɨlo kuhʉma kwa Mʉtwa ʉYesu.
38 Neke ʉmuunhu jʉno ibenapʉla isi,
ghwope ibenapʉlwagha.