Kusyʉka kwa Kɨlɨsite
15
Lɨno vanyalʉkolo vango,
nɨkʉvakʉmbʉsia ɨMhola ɨNofu jɨno nɨkapʉlisie kʉlyʉmue,
na jʉmue mʉkajʉpɨla.
Ɨjio je jeene jɨkʉvapelela kuuva nʉ lwɨtɨko lʉno mʉlɨ nalwo.
2 Nave mugadɨlɨla ɨMhola ɨNofu ɨjio jɨno nɨkapʉlisie kʉlyʉmue,
apuo mukava ʉvʉpoki.
Looli nave namugadɨlɨla,
ʉlwɨtɨko lwinu luuva lʉsila lʉvʉmbʉlɨlo.
3 Taasi nɨlyavavʉlanisie imbʉlanɨsio imbaha sino nɨlyʉpiile,
ndavʉle lɨlembilue mʉ Malembe aMɨmɨke kuuti,
ʉKɨlɨsite alyafwile vwɨmɨla inyɨvi siitu.a
4 Kange kuuti akasyɨlua,
ɨkɨghono ɨkya vʉtatu akasyʉka ndavʉle lɨlembilue mʉ Malembe aMɨmɨke.b
5 Akihʉfia kwa Peteli,c
neke akihʉfia kʉ vasungʼhua vaake kɨjigho na vavɨlɨ.
6 Pambele akihʉfia kʉ vɨtɨki ifilʉndo fihaano vano valyale palɨkɨmo,
vinga mʉ avuo nambe lɨno vajiighe vʉʉmi,
neke vamo vafwile.
7 Kange,
akihʉfia kwa Yakovo,
pambele akihʉfia kʉ vasungʼhua vooni.
8 Neke kʉvʉsililo ye ihʉfisie kʉ vooni,
akihʉfia kʉlyʉne,
ne jʉno nɨlɨ ndavʉle ʉmuunhu jʉno aholilue ʉnsiki ghʉno naghweghwene.
9 Ʉne nɨlɨ nʼdebe mʉ vasungʼhua,d
nanɨnoghiile nambe kutambʉlua nsungʼhua,
ʉlwakʉva nɨkavapumwisie avɨtɨki.
10 Neke ʉNgʉlʉve asʉngʉkiile ʉne,
fye nambe nɨlɨ enendɨɨkɨ.
Ʉlʉsʉngʉ lwake kʉlyʉne lʉvʉmbʉlɨlo lʉkome,
ʉlwakʉva mʉ ʉluo nɨvombile ɨmbombo kukila avasungʼhua vooni.
Nanɨvombile isio mʉ ngʉfu sango,
looli ʉNgʉlʉve mʉ lʉsʉngʉ lwake ghwe jʉno ivomba ɨmbombo palɨkɨmo nuune.
11 Lɨno,
nɨɨve neene nipʉlɨsia,
nambe vaave ve vasungʼhua avange vala,
tupʉlɨsia ɨmhola jɨla jɨla,
kange je jɨno mwɨtiike.
Ʉlʉsyʉko ʉlwa vafue
12 Lɨno,
nave ʉKɨlɨsite ipʉlɨsɨvua kuuti alyasyʉkile kuhʉma kʉ vafue,
lwandaani vamonga mʉlyʉmue viiti nakwekʉle kusyʉka avafue?
13 Nave nakwekʉle kusyʉka avafue,
kwekʉti ghwope ʉKɨlɨsite naalyasyʉkile.
14 Neke nave ʉKɨlɨsite naalyasyʉkile,
pe kupʉlɨsia kwitu kuuva kʉsila lʉvʉmbʉlɨlo,
nalʉ lwɨtɨko lwinu luuva lʉsila lʉvʉmbʉlɨlo.
15 Kange,
ʉsue tuvoneka kuuva volesi va vʉdesi mʉ mhola ja Ngʉlʉve.
Ʉlwakʉva tukwoleka kuuti,
ʉNgʉlʉve alyansyʉsisie ʉKɨlɨsite kuhʉma kʉ vafue,
hɨmbe naalyansyʉsisie nave avafue navisyʉsɨvua.
16 Ʉlwakʉva nave avafue navisyʉsɨvua,
ghwope ʉKɨlɨsite naalyasyʉkile.
17 Neke nave ʉKɨlɨsite naalyasyʉkile,
apuo muuva namʉvʉmbʉliile kɨmonga kʉkʉmwɨtɨka ʉKɨlɨsite,
looli muuva mʉjiighe mʉ nyɨvi siinu.
18 Voope vano vafwile vikʉmwɨtɨka ʉKɨlɨsite,
vasovile lwoni.
19 Nave ʉlʉhʉvɨɨlo lwitu mwa Kɨlɨsite lʉlɨ vwɨmɨla kukava vʉ vwʉmi ʉvwa mʉ ɨɨsi ɨjɨ,
apuo pe tuuva tʉkotwike kukila avaanhu vooni.
20 Neke lɨno ʉvwakyangʼhaani vwe ʉvʉ,
ʉKɨlɨsite asyʉkile kuhʉma kʉ vafue,
ʉjʉ ghwe ghwa kwanda kusyʉka kʉ vano vafwile.
21 Ʉlwakʉva ndavʉle ʉvʉfue vʉle vʉlisile vwɨmɨla ʉmuunhu jʉmo,
enendɨɨkɨ lwope ʉlʉsyʉko lwa vafue lwisile vwɨmɨla ʉmuunhu jʉmo.
22 Ʉlwakʉva ndavʉle avaanhu vooni vʉle vifua vwɨmɨla ʉAdamu,
enendɨɨkɨ avaanhu vooni vilisyʉka vwɨmɨla ʉKɨlɨsite.
23 Neke ʉvʉtavɨke ʉvwa kʉsyʉka vwe ʉvʉ:
ɄKɨlɨsite ghwe ghwa kwanda kusyʉka,
neke pambele vilisyʉsɨvua avaanhu vaake ʉKɨlɨsite iliiva ikwisa.
24 Apuo pe vukwisa ʉvʉsililo vwa fyoni,
pano ʉKɨlɨsite atipwile ʉvʉtemi vwoni nʉ vʉtavʉlɨlua vwoni ni finya ngʉfu fyoni,
na kʉkʉnkotolela ʉNgʉlʉve ʉNhaata ʉVʉtwa.
25 Ʉlwakʉva ʉKɨlɨsite ʉmpaka ateme kuhanga avaleme na kʉkʉvavɨɨka avalʉgʉ vaake mʉ vʉtavʉlɨlua vwake,ef
26 ʉmʉlʉgʉ ʉghwa vʉsililo kutipulua vwe vʉfue.
27 Pano aMalembe aMɨmɨke ghiiti,
“Ilivɨɨka ifiinu fyoni mʉ vʉtavʉlɨlua vwake.”
Nakwekʉti ghwope ʉNgʉlʉve iiva mʉ vʉtavʉlɨlua ʉvuo,
ʉlwakʉva ʉmwene ghwe jʉno avɨkile ifio fyoni mʉ vʉtavʉlɨlua vwa Yesu.g
28 Neke ifiinu fyoni filiiva fivɨkilue mʉ vʉtavʉlɨlua vwa Mwanaake,h
pepano ghwope ʉMwana ilikuvɨɨka mʉ vʉtavʉlɨlua vwa Ngʉlʉve jʉno avɨkile ifiinu fyoni mʉ vʉtavʉlɨlua vwa Mwana ghwake,
kuuti ʉNgʉlʉve aave Ntemi ghwa fyoni.
29 Lɨno,
avaanhu vano vikwofughua vwɨmɨla avafue vihʉvɨɨla ɨkɨɨnu kɨki?
Nave avafue navisyʉka lʉsiku,
kɨki avaanhu avuo vikwofughua vwɨmɨla avafue?
30 Na jʉsue kɨki tukuvɨɨka jaatu mʉ lʉtalamu?
31 Vanyalʉkolo vango,
jaatu ʉne nɨlɨ mʉ lʉtalamu ʉlwa kʉfua.
Ʉlʉghinio lwango vwɨmɨla ʉmue,
lʉno lʉlɨ mwa Yesu Kɨlɨsite ʉMʉtwa ghwitu,
lwe lʉno lʉmheliile kujova amasio agha.
32 Nave ʉvʉfumbue vwango vwale vʉʉve vwa mʉ mʉ ɨɨsi ɨjɨ,
kulua ni fikanu ifikali kʉ Efeso lwale lʉkʉmbʉmbʉlɨla kɨki?
Nave avafue navisyʉsɨvua,
“Ʉsue pe tʉlisaghe,
tʉnywisaghe,
ʉlwakʉva pakɨlaavo tufua.”i
33 Mʉlekaghe kusyangua na vaanhu vano vijova enendɨɨkɨ,
ʉlwakʉva,
“Avamanyaani avaviivi,
vinangania ʉlʉveelo ʉlʉnono.”
34 Mʉpemʉkaghe,
mʉsaaghe vʉnono mʉvʉhɨɨle kuvomba inyɨvi,
ʉlwakʉva vamonga mʉlyʉmue navammanyile ʉNgʉlʉve.
Nijova isio kuuti nɨvajejevʉle.
Ʉmʼbɨlɨ vʉle ghuliiva pa lʉsyʉko
35 Neke ʉmuunhu ndepoonu iposia iiti,
“Avafue visyʉsɨvua ndaani?
Viiva nʉ mʼbɨlɨ ghʉno ghʉlɨ ndaani?”
36 Aghuo masaaghe gha kɨjasu!
Ʉngavyale ɨmbeju,
najɨngamele kɨsila kʉfua.
37 Ɨmbeju jɨno muvyala,
jɨɨve ja ngano nambe ɨmbeju ɨjɨngɨ,
najihwanana nʉ mmela ghwake.
38 Looli ʉmmela ghʉno ghuhʉma mʉ mbeju jɨla,
ʉNgʉlʉve ipela ndavʉle ilonda jʉjuo,
nɨjɨngɨ ɨkʉjɨpeela ʉmʼbɨlɨ ghwake.
39 Ifipelua fyoni fili na mavɨlɨ,
neke amavɨlɨ aghuo naghalɨngʼhiine,
amavɨlɨ gha vaanhu ghalɨ vʉnge,
agha fikanu ghalɨ vʉnge,
injuni ghalɨ vʉnge,
soope isamaki ghalɨ vʉnge.
40 Kange,
kweghale amavɨlɨ agha kʉkyanya na mavɨlɨ agha mʉ ɨɨsi.
Ʉlʉtogo ʉlwa mavɨlɨ agha kʉkyanya lʉlɨ paajo,
ʉlʉtogo ʉlwa mavɨlɨ agha mʉ ɨɨsi lʉlɨ paajo.
41 Ʉvʉnono ʉvwa lɨjʉva vʉlɨ paajo,
ʉvʉnono ʉvwa mwesi vʉlɨ paajo nʉ vʉnono ʉvwa nhondue vʉlɨ paajo.
Soope inhondue nɨjɨngɨ jɨlɨ nʉ vʉnono vwake.
42 Fye lʉlɨvuo avafue valaava visyʉka.
Ʉmʼbɨlɨ ghusyɨlua ghʉno ghunangɨka,
neke ghusyʉsɨvua ghʉno naghunangɨka;
43 ʉmʼbɨlɨ pano ghusyɨlua ghubenapʉlua,
neke pano ghusyʉsɨvua ghuuva nʉ lʉtogo.
Ghusyɨlua ghʉjoghombwike,
neke pano ghusyʉsɨvua ghuuva ni ngʉfu.
44 Ʉmʼbɨlɨ ghʉno tʉlɨ naghwo pano tʉkyale pifua,
mʼbɨlɨ ghwa nyama,
neke pano ghusyʉsɨvua ghuuva mʼbɨlɨ mpia ghʉno tupelua nʉ Mhepo ʉMwɨmɨke.
Nave kweghʉle ʉmʼbɨlɨ ghwa nyama,
naghʉ mʼbɨlɨ ʉmpia kweghʉle ghʉno ʉMhepo ʉMwɨmɨke ilikʉtʉpeela.
45 Mʉ Malembe aMɨmɨke lɨlembilue kuuti,
“Ʉmuunhu ʉghwa kwanda ʉAdamu,
alyapelilue akava muunhu mwʉmi,”j
neke ʉAdamu ʉghwa vʉsililo ʉKɨlɨsite,
ghwe Mhepo jʉno ɨkʉvapeela avaanhu ʉvwʉmi.
46 Neke ʉmʼbɨlɨ ghʉno ghutala,
mʼbɨlɨ ghwa nyama,
pambele ghukwisa ʉmʼbɨlɨ ʉmpia ghʉno tupelua nʉ Mhepo ʉMwɨmɨke.
47 Ʉmuunhu ʉghwa kwanda alyahʉmile mʉ ɨɨsi,
alyapelilue kuhʉma mʉ lɨhanga.
Ʉmuunhu ʉghwa vʉvɨlɨ alyahʉmile kʉkyanya.
48 Lɨno,
ʉmuunhu ghweni alɨ nʉ mʼbɨlɨ ʉghwa mʉ ɨɨsi ndavʉle ʉmʼbɨlɨ ghwa Adamu,
neke amavɨlɨ agha kʉkyanya ghiliiva ndavʉle ʉmʼbɨlɨ ʉghwa Kɨlɨsite.
49 Ndavʉle tʉhwaniine na jʉno alyapelilue kuhʉma mʉ lɨhanga,
fye lʉlɨvuo tulihwanana na jʉno alyahʉmile kʉkyanya.
50 Lɨno vanyalʉkolo vango,
nijova niiti,
ʉmʼbɨlɨ ʉghwa nyama nɨ danda naghʉngingile mʉ Vʉtwa vwa Ngʉlʉve,
nambe kɨno kinangɨka nakɨngave nʉ vwʉmi ʉvwa kʉvʉsila kʉsila.
51 Mʉpʉlɨkɨsyaghe,
nɨkʉvavʉʉla sino sifisilue pamaaso ghiinu.
Ʉsue natʉlafua tweni,
looli ʉNgʉlʉve ilikʉtʉhambʉsia tweni
52 kʉ kasiki kamo,
ndavʉle akasiki aka kʉtinyisia amaaso.
Ʉluo lulihʉmɨla luliiva lukuuta ʉlʉkelemo ʉlwa vʉsililo.
Ʉlwakʉva ʉlʉkelemo ʉluo luliiva lukuuta,
avafue vilisyʉsɨvua,
neke viliiva na mavɨlɨ ghano naghifua kange na jʉsue tulihambʉka.
53 Ʉlwakʉva ʉmʼbɨlɨ ʉghʉ ghʉno ghunangɨka ʉmpaka ghʉhambʉke ghʉʉve mʼbɨlɨ ghʉno naghunangɨka,
ʉmʼbɨlɨ ghʉno ghufua ghʉhambʉke kuuva mʼbɨlɨ ghʉno naghufua.
54 Lɨno,
ʉmʼbɨlɨ ʉghʉ ghʉno ghunangɨka,
ghʉngahambʉke kuuva mʼbɨlɨ ghʉno naghunangɨka;
ʉmʼbɨlɨ ghʉno ghufua,
ghʉhambʉke kuuva mʼbɨlɨ ghʉno naghufua,
apuo liiva lɨvombiike ɨlɨsio lɨno lɨlyalembilue mʉ Malembe aMɨmɨke lɨno liiti,
“ɄNgʉlʉve avʉlemile ʉvʉfue,
vʉkunilue lwoni!” k
55 “Ghwe vʉfue,
ʉkunilue kɨki kulefia?
Sili kʉʉghi ingʉfu saako isa kʉvafia?”l
56 Inyɨvi sipela ʉvʉvafi ʉvwa vʉfue,
kange,
inyɨvi sivoneka vʉhosi vwɨmɨla indaghɨlo.
57 Neke tʉmhongesyaghe ʉNgʉlʉve jʉno ɨkʉtʉpeela kulefia vwɨmɨla ʉMʉtwa ghwitu ʉYesu Kɨlɨsite.
58 Lɨno vanyalʉkolo vango vaghanɨke,
mʉkangalaghe,
mʉlekaghe kudendevʉka,
jaatu mʉghimbaghe kuvomba ɨmbombo ɨja Mʉtwa ʉYesu,
ʉlwakʉva mʉkagwile kuuti,
ɨmbombo jɨno muvomba mwa Mʉtwa ʉYesu,
namukatala vʉvʉle.