Mataayi 26

Ʉvwʉvɨsi ʉvwa kʉmʼbuda ʉYesu

(Malɨka 14:1-2; Lʉʉka 22:1-2; Yohani 11:45-53)

ɄYesu ye amalile kujova amasio aghuo ghooni, akavavʉʉla avavʉlanɨsɨvua vaake akati, 2 “Mʉkagwile kuuti fikyale ifighono fivɨlɨ, kuuva kyɨmɨke kya Pasaka. Ʉne ne Mwana ghwa Muunhu nitapivɨkua mʉ mavoko gha valʉgʉ, kuuti nɨbudue pa kɨkovekano.”

3 Ʉnsiki ʉghuo, avavaha va vatekesi na vagojo valyakongʼhanile mʉ nyumba ɨja ntekesi ʉmʼbaha jʉno akatambʉlwagha Kayafa. 4 Vakapʉlɨngʼhana kʉkʉnkola ʉYesu kɨsyefu kuuti vamʼbude. 5 Pe vakapʉlɨngʼhana vakati, “Tʉleke pivomba ʉluo ɨkɨghono ɨkya Pasaka, avaanhu kyande vileeta amabaatu.”

ɄYesu ipakua amafuta amanofu

(Malɨka 14:3-9; Yohani 12:1-8)

6 Pepano ʉYesu akalʉta mʉ kɨkaaja ɨkya Betania, akikala mʉ nyumba ja Simoni jʉno ʉlʉtasi alyale nɨ bʉʉba. 7 Ye ikalile alɨ pilia, akingila ʉmʉkɨjʉʉva jʉmonga akolile ɨsupa ɨja lɨvue ɨnya mafuta amanofu agha kʉpakala agha ndalama nyinga. Pe akaveela pa Yesu, akakungʼilila amafuta pa mutu ghwa Yesu. 8 Avavʉlanɨsɨvua vaake ye vasivwene isio, vakakalala kyongo mʉ moojo ghaave vakati, “Kɨki ʉmʉkɨjʉʉva ʉjʉ inangania amafuta enendɨɨkɨ? 9 Amafuta agha ghaale ghighʉsɨvua kʉ ndalama nyinga, neke indalama isio sale sikʉvatanga avakotofu!”

10 ɄYesu akakagʉla sino vijova, akavavʉʉla akati, “Kɨki mʉkʉnʼgasia ʉmʉkɨjʉʉva ʉjʉ? Ambombiile ɨmbombo ɨnofu. 11 Ʉlwakʉva avakotofu mʉlɨ navo ifighono fyoni, neke ʉne naniiva numue ifighono fyoni. 12 Ʉmʉkɨjʉʉva ʉjʉ angʼhungʼhiliile amafuta mʉlwa kʉndɨngʼhania kusyɨlua. 13 Kyangʼhaani nɨkʉvavʉʉla niiti, pano ɨMhola ɨNofu jipʉlɨsɨvua mʉ ɨɨsi sooni, najɨ mbombo jɨno avombile ʉjʉ jijovwagha, mʉ ʉluo vikʉnkʉmbʉkagha ʉmʉkɨjʉʉva ʉjʉ.”

ɄYuuda ikwɨtɨka kʉkʉmwohela ʉYesu

(Malɨka 14:10-11; Lʉʉka 22:3-6)

14 Pe ʉYuuda Isikalioti, ʉmo mʉ vasungʼhua vala kɨjigho na vavɨlɨ, akalʉta kʉ vavaha va vatekesi, 15 akavavʉʉla akati, “Kyande mʉkʉmheela kɨki nave nɨkʉmwohela ʉYesu kuuti aave mʉ mavoko ghiinu?” Pe vakampeela indalama fijigho fitatu. 16 Kuhʉma ʉnsiki ʉghuo, ʉYuuda akatengʉla kulonda ɨsɨla ɨja kʉmwohela ʉYesu.

Ʉlʉlɨngʼhanio ʉlwa Pasaka

(Malɨka 14:12-26; Lʉʉka 22:7-23; Yohani 13:21-30)

17 Ɨkɨghono ɨkya kwanda ɨkya kyɨmɨke kya makate ghano naghavɨkilue ɨkɨlʉle, avavʉlanɨsɨvua vakamposia ʉYesu vakati, “Ghulonda tʉkʉlɨngʼhanɨkɨsie kʉʉghi ʉkwa kʉlɨɨla ɨkyɨmɨke ɨkya Pasaka?” 18 Ʉmwene akavamʉla akati, “Mʉlʉte mʉ lɨkaaja ɨlya Yelusalemu kwa muunhu jʉmonga, mʉmʼbʉʉle kuuti, ‘ɄMʼbʉlanɨsi iiti, ʉnsiki ghwango ghʉlɨ piipi. Ʉne na vavʉlanɨsɨvua vango kyande tulia ɨkyɨmɨke ɨkya Pasaka mʉ nyumba jaako.’ ” 19 Avavʉlanɨsɨvua vala vakalʉta, vakavomba ndavʉle ʉYesu aveele alaghiile, vakalɨngʼhania ɨkyakʉlia ɨkya kyɨmɨke ɨkya Pasaka.

20 Ye vwilile, ʉYesu akikala kulia ɨkyakʉlia palɨkɨmo na vavʉlanɨsɨvua vaake kɨjigho na vavɨlɨ. 21 Ye valɨ pilia, ʉYesu akavavʉʉla akati, “Kyangʼhaani nɨkʉvavʉʉla, jʉmonga mʉlyʉmue itapikʉnyohela.” 22 Avavʉlanɨsɨvua vaake vakasukunala kyongo, nʉjʉnge akatengʉla kʉkʉmposia ʉYesu iiti, “Ghwe Mʉtwa, neene?” 23 ɄYesu akamʉla akati, “Ʉmuunhu jʉno isaasa palɨkɨmo nuune mʉ kɨvʉghaana, ʉjuo ghwe mwene kyaɨkʉnyohela. 24 Ʉne ne Mwana ghwa Muunhu nifua ndavʉle lɨlembilue mʉ Malembe aMɨmɨke. Neke ɨga, ʉmuunhu ʉjuo jʉno ɨkʉnyohela ne Mwana ghwa Muunhu! Kɨba ʉmuunhu ʉjuo, ngale naaholwagha.” 25 Pe ʉYuuda jʉno ilonda kʉkʉmwohela akaposia akati, “Ghwe Mʼbʉlanɨsi, neene?” ɄYesu akamwamʉla akati, “Ʉve ʉjovile.”

Ɨkyakʉlia ɨkyɨmɨke ɨkya Mʉtwa

(Malɨka 14:22-26; Lʉʉka 22:14-23; 1 Vakolinto 11:23-25)

26 Ye valɨ pilia, ʉYesu akatoola ʉnkate, akahongesia kwa Ngʉlʉve, akamenyʉlania, akavapeela avavʉlanɨsɨvua vaake akati, “Koogho mʉlisaghe, ʉghʉ ghwe mʼbɨlɨ ghwango.” 27 Pe akatoola ɨkɨkombe ɨkya lʉhʉʉje, akahongesia kwa Ngʉlʉve, akavapeela akati, “Mʉnywisaghe mweni, 28 ʉlwakʉva ɨjɨ je danda jango ɨja lʉfingo lwa Ngʉlʉve na vaanhu vaake, jɨno jikungʼika vwɨmɨla avaanhu vinga kupyanɨlua inyɨvi saave. 29 Neke nɨkʉvavʉʉla niiti, ʉne nanɨlanyua kange ʉlʉhʉʉje kuhanga pano niliiva ninyua palɨkɨmo numue, ʉlʉhʉʉje ʉlʉpia kʉ Vʉtwa vwa Nhaata ghwango.” 30 Pepano vakɨmba ʉlwɨmbo, pe vakavʉʉka vihʉma kʉnji, vilʉta kʉ kɨdunda ɨkya Miseituni.

ɄYesu ɨkʉmʼbʉʉla ʉPeteli kuuti kyaɨkʉnkaana

(Malɨka 14:27-31; Lʉʉka 22:31-34; Yohani 13:36-38)

31 Pe ʉYesu akavavʉʉla avavʉlanɨsɨvua vaake akati, “Ɨkɨlo ɨja mʉsyʉghʉ ʉmue mweni kyamʉkʉngʼhɨmbɨla, ʉlwakʉva lɨlembilue mʉ Malembe aMɨmɨke, ‘Nɨkʉntova ʉnʼdɨɨmi, ɨkɨpʉgha ɨkya ngʼholo kipalasana.’ 32 Neke niliiva nɨsyʉkile, nilikʉvalongolela kulʉta kʉ Galilaya.” 33 ɄPeteli akamʼbʉʉla akati, “Nambe avange vooni vakʉleke, ʉne nanɨngakʉleke nambe padebe!” 34 ɄYesu akamwamʉla akati, “Kyangʼhaani nɨkʉkʉvʉʉla, ɨkɨlo jɨjɨɨjɨ ɨngʼhongove ye jɨkyale kuvɨka, ʉve ghuuva ʉngʼhanile katatu.” 35 ɄPeteli akamwamʉla akati, “Ʉne nanɨkʉkʉleka lʉsiku, nambe kʉʉve kwe kʉfua palɨkɨmo nuuve!” Nava vavʉlanɨsɨvua avange vooni vakajova vʉle vʉle.

ɄYesu ikufuunya kʉ Getisemani

(Malɨka 14:32-42; Lʉʉka 22:39-46)

36 Pepano ʉYesu akalʉta na vavʉlanɨsɨvua vaake pamonga pano pakatambʉlwagha Getisemani. Akavavʉʉla akati, “Mukalaghe bahaapa pano ʉne nilʉta pala pikufuunya.” 37 Pe akantoola ʉPeteli na vaana vavɨlɨ ava Sebedaayi, akatengʉla kusukunala na kuhangajɨka mʉ mwojo ghwake. 38 Akavavʉʉla akati, “Ʉmwojo ghwango ghʉlɨ nʉ lʉsukunalo ʉlʉkome, ghunoghanogha mʉlwa kʉfua. Mukale bahaapa, mʉvisaghe maaso palɨkɨmo nuune.”

39 Pepano akalʉta pavʉlongolo padebe, akakupama paasi, akifuunya akati, “Ghwe Nhaata ghwango, nave lʉnoghiile, ɨkɨkombe ɨkɨ ɨkya lʉpumuko, kɨleke kʉkʉnyaagha! Neke nakwekʉti ʉvombe mʉ vughane vwango, looli mʉ vughane vwako.” 40 Pe akagomoka pa vavʉlanɨsɨvua vaake, akavona vaghoneliile. Pe akamʼbʉʉla ʉPeteli akati, “Asi, mʉkunilue kuuva maaso palɨkɨmo nuune nambe akavalɨlo kamo? 41 Mʉʉve maaso, mufunyaghe kuuti ingelo sileke kʉkʉvalema. Ʉmwojo ghutavwile, neke ʉmʼbɨlɨ nʼdwesi.”

42 Akalʉta kange ʉlwa vʉvɨlɨ, akifuunya akati, “Ghwe Nhaata, nave ʉlʉpumuko ʉlʉ nalʉnoghiile kuvʉsɨvua kʉlyʉne, lʉvombeke mʉ vughane vwako.” 43 Pe akagomoka kange, akavona vaghoneliile, ʉlwakʉva vaale ni tʉlʉ nyinga. 44 Apuo pe akavaleka, akalʉta kange kukufuunya ʉlwa vʉtatu, ye ikufuunya, akajova amasio ghala ghala. 45 Pepano akagomoka kʉ vavʉlanɨsɨvua vaake akavavʉʉla akati, “Mʉjiighe mufighona na kupʉʉma? Lolagha, ʉnsiki ghʉfikile ghʉno ʉne ne Mwana ghwa Muunhu nivɨkua mʉ mavoko gha vahosi. 46 Ɨma, tʉlʉtaghe! Lolagha, ʉnya kʉnyohela alɨ piipi.”

ɄYesu ikolua

(Malɨka 14:43-50; Lʉʉka 22:47-53; Yohani 18:3-12)

47 ɄYesu ye ajiighe ijova navo, ʉYuuda ʉmo mʉ vavʉlanɨsɨvua vaake kɨjigho na vavɨlɨ, akafika nɨ lɨpʉgha ɨlɨvaha, vakolile ibamba ni mbunda. Avaanhu avuo valyasungʼhilue na vavaha va vatekesi na vagojo. 48 ɄYuuda ʉmwohesi alyavavʉliile ngʼhaani avaanhu vala ɨkɨvalɨlo ɨkya kʉmmanya ʉYesu, akati, “Jʉno kyanɨkʉnnonela, ʉjuo iiva ghwe mwene, mʉnkolaghe.” 49 Ye vafikile, ʉYuuda akalʉta pa Yesu, akajova akati, “Mʼbʉlanɨsi, ʉghonile!” Pe akannonela. 50 ɄYesu akamʼbʉʉla akati, “Nyalʉkolo, vomba sino ʉkɨsisie!” Pe avaanhu vala vakankola ʉYesu na kʉkʉmpinya.

51 Ʉmuunhu jʉmonga mʉ vano valyale lʉmo nʉ Yesu, akasomola ɨbamba, akantova ʉnkami ʉghwa ntekesi ʉmʼbaha, akanʼdumula ɨmbulughutu. 52 Neke ʉYesu akamʼbʉʉla akati, “Gomosia ɨbamba jaako mʉ nyambe jaake, ʉlwakʉva ʉmuunhu ghweni jʉno ilwɨla ɨbamba, ibudua nɨ bamba! 53 Asi, musaagha kuuti ʉne nɨkunilue kusʉʉma ʉlʉtango kwa Nhaata ghwango, neke ʉmwene asuungʼhe ʉnsiki ghʉghuo avanyamhola vaake avasikali amapʉgha kɨjigho na ghavɨlɨ na kukila? 54 Lɨno, nave nɨvombe ʉluo, aMalembe aMɨmɨke ghano ghalembilue kuuti, isi sinoghiile kuvombeka mʉ sɨla ɨjɨ, ghaale ghikwɨlanɨsɨvua ndaani?”

55 Pe akavavʉʉla avaanhu vala vano visile kʉkʉnkola akati, “Mwisile ni bamba ni mbunda kʉkʉngʼhola ʉne hwene nɨlɨ mhɨjimʼbudi? Ongo jaatu navisagha numue nivʉlanɨsia mʉ nyumba ɨnyɨmɨke ɨja kufunyila, namwangʼholagha! 56 Isi sooni sihʉmɨla kukwɨlanɨsia sino silyajovilue na vavɨli mʉ Malembe aMɨmɨke.” Pe avavʉlanɨsɨvua vaake vooni vakamʉleka ʉYesu, vakakɨmbɨla.

ɄYesu pa vʉhɨghi

(Malɨka 14:53-65; Lʉʉka 22:54-55, 63-71; Yohani 18:13-14, 19-24)

57 Pepano ɨlɨpʉgha lɨla lɨkankola ʉYesu, lɨkantwala kwa ntekesi ʉmʼbaha ʉKayafa. Ʉkuo kwe kʉno valyakongʼhanile avavʉlanɨsi va ndaghɨlo isa Moose na vagojo. 58 ɄPeteli akava ɨkʉmʼbɨngɨlɨla ʉYesu pa vʉtali kuhanga akafika pa lʉvɨɨka ʉlwa nyumba ɨja ntekesi ʉmʼbaha. Pe akingila mʉnkate, akikala palɨkɨmo na vasikali avaloleleli kuuti alole kɨno kihʉmɨla kwa Yesu.

59 Pepano avavaha va vatekesi nɨ kɨpʉgha kya valongosi va Vayahudi vakava vilonda ʉvwolesi ʉvwa vʉdesi vwɨmɨla ʉYesu kuuti vamʼbude. 60 Napano avaanhu vinga vakalʉtile kukwoleka isa vʉdesi, neke navakalʉvona lʉmonga lʉno lukwɨtɨngʼhana. Pambele vakiisa avolesi vavɨlɨ vakati, 61 “Ʉmuunhu ʉjʉ alyatiile, ‘Ʉne nɨlɨ ni ngʉfu isa kʉmemʉla ɨnyumba ɨnyɨmɨke ɨja Ngʉlʉve na kujenga kange mʉ fighono fitatu.’ ”

62 Pepano ʉntekesi ʉmʼbaha akɨɨma, akamʼbʉʉla ʉYesu akati, “Kɨki naghukwamʉla nambe lɨsio? Avaanhu ava vikwoleka kɨki vwɨmɨla ʉve?” 63 Ʉmwene akajika kɨmihe. Pe ʉntekesi ʉmʼbaha jʉla akamʼbʉʉla kange akati, “Nɨkʉkʉvʉʉla mʉ lɨtavua lya Ngʉlʉve jʉno mwʉmi, ʉtʉvʉʉle nave veeve Kɨlɨsite, Mwana ghwa Ngʉlʉve.” 64 ɄYesu akamwamʉla akati, “Ʉve ʉjovile. Neke nɨkʉvavʉʉla kuuti, kutengʉlɨla lɨno mʉlambona ne Mwana ghwa Muunhu nɨtemile palɨkɨmo nʉ Ngʉlʉve ʉNyangʉfu Sooni, nikwisa mʉ mafunde kuhʉma kʉkyanya.”

65 Ʉntekesi ʉmʼbaha ye apʉliike amasio aghuo, akakalala, akademʉla ʉmwenda ghwake iiti, “Ɨkʉmʉligha kyongo ʉNgʉlʉve! Lɨno pe mulonda vwakɨki ʉvwolesi ʉvʉnge? Mʉpʉliike vʉle ɨkʉmʉligha ʉNgʉlʉve. 66 Mwiti ndaani ʉmuunhu ʉjʉ?” Aveene vakati, “Anoghiile kubudua.” 67 Pe vakatengʉla kʉkʉmfunyila amati kʉ maaso, vikʉntova ni mbuli. Avange vakava vitova na mapi 68 kʉmo viiti, “Ghwe Kɨlɨsite! Vɨla, ghwe veeni jʉno akʉtovile?”

ɄPeteli ɨkʉnkaana ʉYesu

(Malɨka 14:66-72; Lʉʉka 22:56-62; Yohani 18:15-18, 25-27)

69 Ʉnsiki ʉghuo ʉPeteli alikalile kʉnji kʉ lʉvɨɨka. Pe ʉmʼbombi jʉmonga ʉmhɨnja akaveela pa Peteli, akamʼbʉʉla akati, “Na jʉʉve ʉveele lʉmo nʉ Yesu ʉghwa kʉ Galilaya.” 70 ɄPeteli akakaana pamaaso gha vala vooni akati, “Nanɨkagwile sino ghujova!”

71 Pe akavʉʉka pala, akalʉta kʉnji kʉ mʉlyango ʉghwa lʉvɨɨka. Ʉmʼbombi ʉjʉnge ʉmhɨnja akamwagha, akavavʉʉla avaanhu vano pwevalyale pala akati, “Ʉmuunhu ʉjʉ aveele lʉmo nʉ Yesu ʉghwa kʉ Nasaleti.” 72 ɄPeteli akakaana kange, akajɨɨgha akati, “Nijɨɨgha, nanɨmmanyile ʉmuunhu ʉjuo!”

73 Ʉnsiki nʼdebe vʉvʉle, avaanhu vano valyɨmile pala vakamʼbelelela ʉPeteli, vakamʼbʉʉla vakati, “Kyangʼhaani ʉve ʉlɨ ʉmo mʉ vala, ʉlwakʉva nambe ɨnjovele jaako jivoneka kuuti ʉlɨ ghwa kʉ Galilaya!” 74 ɄPeteli akakaana, akajɨɨgha akati, “Nave nɨjovile ʉvʉdesi, nɨghunwaghe! Nanɨmmanyile ʉmuunhu ʉjuo!” Ʉnsiki ghʉghuo ɨngʼhongove jɨkavɨka. 75 Apuo ʉPeteli akakʉmbʉka ɨlɨsio lɨno ʉYesu amʼbʉʉla kuuti, “Ɨngʼhongove ye jɨkyale kuvɨka, ghuuva ʉngʼhanile katatu.” Pe akahʉma kʉnji, akatengʉla pilɨla kyongo.