Lʉʉka 20

Ʉlʉposio vwɨmɨla ʉvʉtavʉlɨlua vwa Yesu

(Mataayi 21:23-27; Malɨka 11:27-33)

ɄYesu akavʉlanɨsyagha avaanhu mʉ lʉvɨɨka ʉlwa nyumba ɨnyɨmɨke ɨja kufunyila, na kupʉlɨsia ɨMhola ɨNofu. Ɨkɨghono kɨmonga, avavaha va vatekesi, avavʉlanɨsi va ndaghɨlo, na vagojo va Vayahudi vakamʉlʉtɨla, 2 pe vakamposia vakati, “Ʉtʉvʉʉle, ghuvomba isi mʉ vʉtavʉlɨlua vwani? Ghwe veeni jʉno akʉpeliile ʉvʉtavʉlɨlua ʉvuo?”

3 Akavavʉʉla akati, “Na jʉʉne nɨkʉvaposia lʉmonga, mʉmbʉʉle, 4 ʉvʉtavʉlɨlua ʉvwa Yohani kukwofugha avaanhu, vʉlyahʉmile kwani? Vʉlyahʉmile kwa Ngʉlʉve, kʉ vaanhu?” 5 Apuo, vakatengʉla kuposania veene viiti, “Tʉngati vʉlyahʉmile kwa Ngʉlʉve, kyaiiti, ‘Ongo namʉlyamwɨtiike?’ 6 Nambe tʉngati vʉlyahʉmile kʉ vaanhu, avaanhu vooni ava, kyavikʉtʉtova na mavue, ʉlwakʉva vantangʼhinie ʉYohani kuuti mʼbɨli.” 7 Pambele, vakamʼbʉʉla vakati, “Natʉkagwile ʉvʉtavʉlɨlua ʉvuo kʉno vʉlyahʉmile.” 8 ɄYesu akavavʉʉla akati, “Na jʉʉne, nanɨkʉvavʉʉla kʉno vuhʉma ʉvʉtavʉlɨlua ʉvwa kʉvomba isi.”

Ɨkɨhwanɨkɨsio ɨkya vavombi avaviivi

(Mataayi 21:33-46; Malɨka 12:1-12)

9 Pepano ʉYesu akatengʉla kʉkʉvavʉʉla avaanhu ɨkɨhwanɨkɨsio ɨkɨ, akati, “Kwealyale ʉmuunhu jʉmonga alyalɨmile ʉmʉghʉnda, akavyala isabibu. Akakodesia kʉ vaanhu ʉmʉghʉnda ghʉla, ʉmwene akakyʉla, akalʉta kʉ ɨɨsi ɨja kʉ vʉtali. Ʉkuo akikala ifighono finga.

10 “Ʉnsiki ʉghwa kʉpeta ye ghʉfikile, akasuungʼha ʉmʼbombi ghwake kʉ vaanhu vala kuuti vampeele ɨlɨghavo lyake ɨlya mpeto. Neke ʉmʼbombi jʉla ye afikile, avaanhu vala vakantova na kʉkʉnʼdaga, akagomoka mavoko gheene.

11 “Ʉnya mʉghʉnda, akasuungʼha ʉmʼbombi ʉjʉnge. Neke ghwope vakantova na kʉkʉmʼbombela sino nasinoghiile, pe vakanʼdaga kɨsila kʉmpeela kɨmonga. 12 Akasuungʼha ʉghwa vʉtatu. Ʉjuo ghwope vakamʉlemasia, vakantaagha kʉnji.

13 “Pambele, ʉnya mʉghʉnda akati, ‘Lɨno nɨkɨte kɨki? Ʉnsiki ʉghʉ, nɨkʉnsuungʼha ʉmwanango ʉmʉghanɨke! Pamo ʉjʉ valamwɨtɨka.’ 14 Ʉnswambe akavʉʉka ilʉta, neke avaanhu vala ye vikʉmwagha, vakava vivʉlana viiti, ‘Ʉjʉ ghwe nya vʉhaasi ghwa mʉghʉnda ʉghʉ. Lɨno, tʉmʼbude, neke ʉvʉhaasi vʉʉve vwitu.’ 15 Vakankwesa kʉnji kuhʉma mʉghʉnda ʉghwa sabibu, vakamʼbuda.”

Pe ʉYesu akavaposia akati, “Lɨno, ndepoonu ʉnya mʉghʉnda jʉla kyaɨkʉvavomba kɨki avaanhu vala? 16 Ikwisa ɨkʉvabuda, neke ikodesia kʉ vaanhu avange ʉmʉghʉnda ghʉla.” Avaanhu ye vapʉliike amasio aghuo, vakati, “Isio sileke kuhʉmɨla nambe lʉsiku!” 17 Neke ʉYesu akavalola, akavaposia akati, “Pe amalembe agha, ghalɨ nʉ mʉlʉvo mʉki?

‘Ɨlɨvue lɨno avajengi valyalɨkanile,

lye lɨvue ɨlɨvaha ɨlya pa nguto.’

18 “Ʉmuunhu angaghue pa lɨvue ɨlio, idenyengʼhana, kange ʉmuunhu ghweni lɨngamʉghwɨle, lɨkʉnʼdijania lwoni.”

19 Pe avavʉlanɨsi va ndaghɨlo na vavaha va vatekesi, vakakagʉla kuuti ɨkɨhwanɨkɨsio ɨkio kɨkʉvajova aveene. Pepano vakava vilonda pikʉnkola pala pala, neke vakoghopa ɨlɨpʉgha ɨlya vaanhu.

Kusonga ɨsongo kwa Kaisali

(Mataayi 22:15-22; Malɨka 12:13-17)

20 Pe avavaha va Vayahudi, vakava vikʉmwʉvɨla ʉYesu. Vakasuungʼha avaanhu vano vakivɨɨka hwene vanya vʉfumbue vʉnono, neke vahʉngɨɨle sino ivomba ʉYesu. Vakavombagha ʉluo kuuti vakyaghe ɨkɨteghe vwɨmɨla amasio ghaake, neke vankole na kʉkʉntwala kwa ntwa kuuti ahɨghue.

21 Pepano avaanhu vala vakamposia ʉYesu vakati, “Mʼbʉlanɨsi, tʉkagwile kuuti ghujova na kuvʉlanɨsia isa kyangʼhaani. Kange, naghukwoghopa nambe muunhu vwɨmɨla ʉvʉvaha vwake, looli ghuvʉlanɨsia mʉ vwakyangʼhaani sino ilonda ʉNgʉlʉve. 22 Asi, indaghɨlo sa Moose sikwɨtɨkɨsia kusonga ɨsongo kwa Kaisali?”

23 Neke ʉYesu akakagʉla ʉvʉkedʉsi vwave, akavavʉʉla akati, 24 “Mʉhʉfie ɨhela ɨdinali. Ɨkɨhwani ɨkɨ nɨ lɨtavua ɨlɨ, fyani?” Vakamwamʉla vakati, “Fya Kaisali.” 25 Pe ʉYesu akavavʉʉla akati, “Lɨno, ifya Kaisali, mʉmpelaghe ʉKaisali; ifya Ngʉlʉve, mʉmpelaghe ʉNgʉlʉve.” 26 Avaanhu vala vakadegha kyongo ʉlwamʉlo lwa Yesu, vakajika kɨmihe. Vakakunua ɨkɨteghe ɨkya kʉnkolela, vwɨmɨla amasio ghano ajovile pamaaso gha vaanhu.

Ɨmhola ɨja lʉsyʉko lwa vafue

(Mataayi 22:23-33; Malɨka 12:18-27)

27 AVasadukayi vakavʉlanɨsyagha kuuti, avafue navalasyʉka nambe lʉsiku. Pe vamonga mʉ veene vakalʉta kwa Yesu, vakamposia vakati, 28 “Ghwe Mʼbʉlanɨsi, ʉMoose alyatʉlembiile ʉlʉlaghɨlo kuuti, nave ʉmuunhu afwile, neke amʉlekile ʉnʼdala kɨsila mwana, lʉnoghiile ʉnnine amhaale ʉmfwɨle jʉla, kuuti ampapɨle avaana ʉnyakʉsila. 29 Lɨno, kwevalyale avanamuunhu. Ʉghwa kwanda akatoola ʉnʼdala, akafua kɨsila mwana. 30 Ʉghwa vʉvɨlɨ, akamhaala ʉmfwɨle jʉla, ghwope akafua kɨsila kʉleka mwana. 31 Ghwope ʉghwa vʉtatu akamhaala, lʉkava vʉle vʉle kʉ vooni lekelalʉbale, valyafwile kɨsila kʉleka mwana. 32 Pambele, ʉnʼdala jʉla ghwope akafua. 33 Lɨno, nave kwelʉle ʉlʉsyʉko lwa vafue, ʉmʉkɨjʉʉva jʉla iliiva nʼdala ghwani? Ʉlwakʉva alyatolilue na vala vooni lekelalʉbale.”

34 ɄYesu akavavʉʉla akati, “Avaanhu va lɨno, vitoola na kutolua. 35 Neke avaanhu vano ʉNgʉlʉve ivona kuuti vanoghiile kusyʉsɨvua kuhʉma kʉvʉlʉngʉ na kukukala kʉ ɨɨsi ɨmhia, avuo navalatoola, nambe kutolua. 36 Palɨkɨmo nʉluo navalafua kange, ʉlwakʉva viliiva ndavʉle avanyamhola. Viiva vaana va Ngʉlʉve, ʉlwakʉva vasyʉsivue kuhʉma kʉvʉlʉngʉ.

37 “Najʉ Moose alyajovile kuuti avafue vilisyʉka. Alyajovile ʉluo mʉ Malembe aMɨmɨke mʉ mhola ɨja kɨhanji kɨno kɨlyale kiviika ʉmwoto. Alyantambwile ʉMʉtwa ʉNgʉlʉve kuuti, ‘Ngʉlʉve ghwa Abulahamu, Ngʉlʉve ghwa Isaka, Ngʉlʉve ghwa Yakovo.’ 38 ɄNgʉlʉve naNgʉlʉve ghwa vafue, looli Ngʉlʉve ghwa vʉʉmi, ʉlwakʉva kwa mwene vooni vʉʉmi.”

39 Apuo, avavʉlanɨsi vamonga ava ndaghɨlo vakati, “Mʼbʉlanɨsi, ʉjovile se seene!” 40 Kutengʉlɨla apuo, vakava vikwoghopa kʉkʉmposia.

Ʉlʉposio vwɨmɨla ʉKɨlɨsite

(Mataayi 22:41-46; Malɨka 12:35-37)

41 Neke ʉYesu akavaposia akati, “Asi, lwandaani avaanhu viiti, ʉKɨlɨsite Mwana ghwa Davɨdi? 42 Ʉlwakʉva ʉDavɨdi jʉjuo, alyalembile mʉ kɨtabu kya Sabuli, alyatiile,

‘ɄMʉtwa ʉNgʉlʉve alyamʼbʉlile ʉMʉtwa ghwango,

“Ʉʉve nʉ vʉtavʉlɨlua palɨkɨmo nuune,

43 kuhanga nɨkʉtange ʉvaleme avalʉgʉ vaako,

ʉvateme.” ’

44 “Lɨno, ʉDavɨdi ɨkʉntambʉla ʉKɨlɨsite iiti, ‘Mʉtwa.’ Pe ʉKɨlɨsite ivisagha mwanaake ndaani?”

ɄYesu ɨkʉvapavɨla avaanhu vwɨmɨla avavʉlanɨsi va ndaghɨlo

(Mataayi 23:1-36; Malɨka 12:38-40; Lʉʉka 11:37-54)

45 Avaanhu vooni ye vikʉmpʉlɨkɨsia ʉYesu, ʉmwene akavavʉʉla avavʉlanɨsɨvua vaake akati, 46 “Mulolelelaghe na vavʉlanɨsi va ndaghɨlo, vano viiva nʉ lʉkeelo kughenda vafwalile isopeka, kuuti avaanhu vavahʉngɨlaghe nʉ vwoghofi mʉ mapuulo. Pano valɨ mʉ masinagogi, vilonda kukukala kʉvʉlongolo. Na mʉ fikulukulu vilonda kukukala kʉ fitengo ifya voghopua. 47 Avaanhu ava vikʉvafumba avafwɨle ifiinu fyave. Neke mʉ vʉkedʉsi vwave vikufuunya inyifuunyo inhali, kuuti vavoneke vagholofu. Avuo, ʉNgʉlʉve ilikʉvapeela ʉlʉpumuko ʉlʉkome!”