Mataayi 21

ɄYesu ikwingila mʉ Yelusalemu na kaluulu

(Malɨka 11:1-11; Lʉʉka 19:28-40; Yohani 12:12-19)

ɄYesu na vavʉlanɨsɨvua vaake ye valɨ piipi kufika kʉ Yelusalemu, vakafika mʉ lɨkaaja ɨlya Betifage pa kɨdunda ɨkya Miseituni. ɄYesu akavasuungʼha avavʉlanɨsɨvua vavɨlɨ, 2 akavavʉʉla akati, “Mʉlʉte mʉ kɨkaaja kɨno kɨlɨ kʉvʉlongolo kʉlyʉmue, mʉkʉjaagha ɨdogovi jɨkʉngilue, jɨlɨ nɨ nyanaake, mwavʉle, mʉndetele. 3 Nave ʉmuunhu ɨkʉvaposia, mʉtisaghe, ‘ɄMʉtwa alɨ nʉ vʉfumbue naso,’ ghwope pe kyaɨkʉvɨtɨkɨsia kukwisa naso.” 4 Isi silyavombiike kukwɨlanɨsia ɨlɨsio lɨno lɨlyajovilue nʉ mʼbɨli kuuti,

5 “Vavʉʉle avaanhu ava mʉ lɨkaaja ɨlya Syoni kuuti,

‘Lolagha, ʉNtwa ghwinu ikwisa,

nkoola, ikwisa angaliile ɨdogovi,

pakyanya pa dogovi, ɨnyaana ja dogovi.’ ”

6 Avavʉlanɨsɨvua vala vakalʉta, vakavomba ndavʉle aveele avalaghiile ʉYesu. 7 Vakaleeta ɨdogovi jɨla palɨkɨmo nɨ nyanaake, vakatandɨka amenda ghaave pakyanya pa dogovi, ʉYesu akangalɨla. 8 Avaanhu vinga mʉ lɨpʉgha lɨla vakava vitandɨka amenda ghaave mʉ sɨla, avange vakava videenya amataafi gha mapiki na kukwala mʉ sɨla. 9 Ɨlɨpʉgha lya vaanhu vano valyalongwile na vano valyale mʉmbele mwa Yesu, vakava nɨ njegheelo ɨja lʉkeelo viiti,

“Aghinwaghe ʉMwana ghwa Davɨdi!

Afunyilue jʉno ikwisa mʉ lɨtavua lya Mʉtwa ʉNgʉlʉve!

Aghinwaghe ʉNgʉlʉve jʉno alɨ kʉkyanya!”

10 ɄYesu ye ikwingila mʉ lɨkaaja ɨlya Yelusalemu, avaanhu ava mʉ lɨkaaja ɨlio vakadegha kyongo. Vakava viposia viiti, “Ʉjʉ ghwe veeni?” 11 Avaanhu mʉ lɨpʉgha lɨla vakavamʉla vakati, “Ʉjʉ ghwe mʼbɨli ʉYesu, kuhʉma mʉ kɨkaaja ɨkya Nasaleti, mʉ ɨɨsi ɨja Galilaya.”

ɄYesu ivalasia ɨnyumba ɨnyɨmɨke ɨja kufunyila

(Malɨka 11:15-19; Lʉʉka 19:45-48; Yohani 2:13-22)

12 ɄYesu ye alɨ mʉ lɨkaaja ɨlya Yelusalemu, akingila mʉ lʉvɨɨka ʉlwa nyumba ɨnyɨmɨke ɨja kufunyila, akavadaga vooni vano vakaghʉsyagha na kughʉla ifiinu. Akabɨlɨvandʉla imeesa isa vano vananiagha indalama ni fitengo ifya vaghʉsia ngʼhʉnda. 13 ɄYesu akavavʉʉla akati, “Lɨlembilue mʉ Malembe aMɨmɨke kuuti, ‘Ɨnyumba jango jitambʉlwagha nyumba ja kufunyila.’ Neke ʉmue mʉhambwile kuuva ‘mhanga ja valyasi.’ ”

14 ɄYesu ye alɨ mʉ lʉvɨɨka lwa nyumba ɨnyɨmɨke ɨja kufunyila, avabofu amaaso na valema amaghʉlʉ vakalʉta pa mwene, akavasosia. 15 Avavaha va vatekesi na vavʉlanɨsi va ndaghɨlo vakafyagha ifidegho fino avombile ʉYesu, na kupʉlɨka vʉle avaana vikʉmʉghinia mʉ nyumba ɨnyɨmɨke ɨja kufunyila viiti, “Aghinwaghe ʉMwana ghwa Davɨdi.” Mʉ ʉluo, vakakalala kyongo. 16 Vakamposia ʉYesu vakati, “Ghupʉlɨka sino avaana ava vijova?” ɄYesu akavamʉla akati, “Eena nipʉlɨka! Namwɨmbile mʉ Malembe aMɨmɨke amasio ghano ghiiti,

‘Mʉ vaana vadebe na vafyele,

mwe muno ʉlɨngʼhanisie amalʉmbo’? ”

17 ɄYesu akavaleka avaanhu vala, akavʉʉka mʉ Yelusalemu, akalʉta kʉ kɨkaaja ɨkya Betania, akava ʉkuo ɨkɨlo jooni.

ɄYesu ɨkʉghʉghuna ʉmpiki ʉntini

(Malɨka 11:12-14, 20-24)

18 Palwakɨlo ʉYesu ye igomoka kʉ Yelusalemu, ɨnjala jɨkamʼbava. 19 Pe akaghwagha ʉmpiki ʉntini ghʉmonga piipi nɨ sɨla, akaveela, akavona nsila fipeke nambe kɨmo, looli ghalɨ gha matʉndʉ gheene. Pe akaghʉvʉʉla ʉmpiki ghʉla akati, “Kuhʉma ʉmʉsyʉghʉ naghukomagha ifipeke nambe padebe!” Nakalɨngi, ʉmpiki ghʉla ghʉkʉʉma. 20 Avavʉlanɨsɨvua va Yesu ye vasivwene isio, vakadegha kyongo, vakamposia vakati, “Lwandaani ʉmpiki ʉntini ʉghʉ ye ghwʉmile lɨno lɨno?” 21 ɄYesu akavamʉla akati, “Kyangʼhaani nɨkʉvavʉʉla, mʉngave nʉ lwɨtɨko, kɨsila kuuva ni nganighani, na jʉmue mʉnoghiile kuvomba sino nɨvombile kʉ mpiki ʉghʉ. Nakwekʉti ndepoonu muvomba sisisio seene, looli nambe mʉngakɨvʉʉle ɨkɨdunda ɨkɨ, ‘Kumuka, ghutaaghe mʉ nyanja,’ livombeka! 22 Mʉngave nʉ lwɨtɨko, fyoni fino musʉʉma kwa Ngʉlʉve, hʉvɨlagha kuuti mupelua.”

Ʉlʉposio vwɨmɨla ʉvʉtavʉlɨlua vwa Yesu

(Malɨka 11:27-33; Lʉʉka 20:1-8)

23 ɄYesu akingila kange mʉ nyumba ɨnyɨmɨke ɨja kufunyila. Ye ivʉlanɨsia avaanhu, avavaha va vatekesi, na vagojo va Vayahudi vakalʉta pa mwene vakamposia vakati, “Ghuvomba isi mʉ vʉtavʉlɨlua vwani? Ghwe veeni jʉno akʉpeliile ʉvʉtavʉlɨlua ʉvuo?” 24 ɄYesu akavamʉla akati, “Na jʉʉne nɨkʉvaposia lʉmonga, mʉnganyamʉle, pe na jʉʉne nɨkʉvavʉʉla, nivomba isi mʉ vʉtavʉlɨlua vwani. 25 Asi, ʉvʉtavʉlɨlua vwa Yohani ʉvwa kwofugha avaanhu vʉlyahʉmile kwani? Vʉlyahʉmile kwa Ngʉlʉve, kʉ vaanhu?” Pe vakatengʉla kuposania viiti, “Tʉngati vʉlyahʉmile kwa Ngʉlʉve, kyaɨkʉtʉposia iiti, ‘Ongo namʉlyamwɨtiike?’ 26 Kange, tʉngati vʉlyahʉmile kʉ vaanhu, tukwoghopa ɨlɨpʉgha ɨlɨ, ʉlwakʉva vooni vantangʼhinie ʉYohani kuuti mʼbɨli.” 27 Pe vakamwamʉla ʉYesu vakati, “Natʉkagwile.” Ghwope ʉYesu akavamʉla akati, “Na jʉʉne nanɨkʉvavʉʉla kʉno vuhʉma ʉvʉtavʉlɨlua ʉvwa kʉvomba isi.”

Ɨkɨhwanɨkɨsio ɨkya mwana ʉnkʉndi na jʉno nankʉndi

28 ɄYesu akavavʉʉla kange akati, “Asi, muvona ndaani ɨmhola ɨjɨ? Kwealyale ʉmuunhu jʉmonga jʉno alyale na vaana vavɨlɨ. Akalʉta kwa mwana ghwa kwanda, akamʼbʉʉla akati, ‘Mwanango, ʉmʉsyʉghʉ ʉlʉte kuvomba ɨmbombo kʉ mʉghʉnda ghwa sabibu.’ 29 Ʉmwana jʉla akamwamʉla akati, ‘Baali, nanilʉta!’ Pambele akandʉla amasaaghe ghaake, akalʉta kuvomba ɨmbombo. 30 Ʉmuunhu jʉla akalʉta kwa mwana ʉghwa vʉvɨlɨ, akamʼbʉʉla ndavʉle aveele amʼbʉlile ʉghwa kwanda. Akamwamʉla akati, ‘Eena, nilʉta!’ Neke naakalʉta. 31 Mʉ vaana vavɨlɨ vala, ghwe veeni jʉno alyavombile ʉvughane vwa viise?” Vakamwamʉla vakati, “Ʉghwa kwanda.”

ɄYesu akavavʉʉla akati, “Kyangʼhaani nɨkʉvavʉʉla, avasongesia songo na vaghendamwalu vilikʉvalongolela kukwingila kʉ Vʉtwa vwa Ngʉlʉve. 32 Ʉlwakʉva ʉYohani alisile kʉlyʉmue kuuti avalʉngɨke ɨsɨla ɨja vʉgholofu, ʉmue namʉlyamwɨtiike. Looli avasongesia songo na vaghendamwalu, valyamwɨtiike. Nambe ye mʉsivwene sooni isio, namʉlyalatile inyɨvi siinu na kukwʉpɨla ɨmhola jaake.

Ɨkɨhwanɨkɨsio ɨkya vavombi avaviivi

(Malɨka 12:1-12; Lʉʉka 20:9-19)

33 “Pʉlɨkɨsia nɨvavʉʉle ɨkɨhwanɨkɨsio ɨkɨngɨ. Pwealyale ʉmuunhu jʉmonga alyalɨmile ʉmʉghʉnda, akavyala isabibu. Akajenga ʉlʉvɨgho kusyʉta ʉmʉghʉnda ghwoni. Mʉnkate akajenga apa kʉhʉjɨla isabibu. Kange, akajenga pa vwɨmo apa kʉlolelelela ʉmʉghʉnda. Akavɨɨka avavombi mʉ mʉghʉnda ghʉla, neke ʉmwene akakyʉla.

34 “Ʉnsiki ʉghwa kʉpeta ye ghʉfikile, akasuungʼha avakami vaake kʉ vavombi vala kuuti vantolele ɨlɨghavo lyake ɨlya mpeto. 35 Neke avavombi vala vakavakola avakami vala vano vasungʼhilue, jʉmo vakantova, ʉjʉnge vakamʼbuda, jʉmonga vakantova na mavue. 36 Ʉnya mʉghʉnda jʉla akavasuungʼha kange avakami avange vinga kukila vano alyavasungʼhile ʉlwa kwanda. Avavombi vala vakavavomba avakami avuo ndavʉle ava kwanda. 37 Kʉvʉsililo akansuungʼha ʉmwanaake jʉjuo, akasaagha akati, ‘Ʉmwanango ʉjʉ, kyavikʉmwoghopa.’ 38 Neke avavombi vala ye vamwaghile ʉmwana ghwa nya mʉghʉnda, vakapʉlɨngʼhana vakati, ‘Ʉjʉ ghwe nya vʉhaasi ghwa mʉghʉnda ʉghʉ, tʉmʼbude, neke tʉtoole ʉvʉhaasi vwake.’ 39 Vakankola, vakankwesela kʉnji kʉ mʉghʉnda ʉghwa sabibu, vakamʼbuda.”

40 ɄYesu akavaposia akati, “Lɨno, ʉnya mʉghʉnda jʉla kyande ikwisa, kyaɨkʉvavomba kɨki avavombi vala?” 41 Aveene vakamwamʉla vakati, “Ɨkʉvabuda kɨsila kʉvavonela ɨkɨsa avahosi vala! Kange, ʉmʉghʉnda ghwake ɨkʉvavɨɨka avavombi avange vano vikʉmpelagha ɨlɨghavo lyake ɨlya mpeto ʉnsiki ghʉno ghʉnoghiile.”

42 ɄYesu akavavʉʉla kange akati, “Namwɨmbile mʉ Malembe aMɨmɨke kuuti,

‘Ɨlɨvue lɨno avajengi valyalɨkanile,

lye lɨvue ɨlɨvaha ɨlya pa nguto.

ɄMʉtwa ʉNgʉlʉve ghwe mwene avombile ɨlɨ,

kange lya kʉdegha pamaaso ghiitu.’

43 “Mʉ ʉluo, nɨkʉvavʉʉla kuuti, ʉNgʉlʉve ivʉsia ʉVʉtwa vwake kʉlyʉmue na kʉkʉvapeela avaanhu va ɨɨsi isingi vano vivomba isa vughane vwake. 44 Ʉmuunhu angaghue pa lɨvue ɨlio, idenyengʼhana. Kange, ʉmuunhu ghweni lɨngamʉghwɨle, lɨkʉnʼdijania lwoni.”

45 Avavaha va vatekesi na Vafalisayi ye vapʉliike ifihwanɨkɨsio fya Yesu, vakakagʉla kuuti ɨkʉvajova aveene. 46 Pepano vakalondagha kʉkʉnkola, neke vakoghopa ɨlɨpʉgha lya vaanhu, ʉlwakʉva avaanhu valyantangʼhinie ʉYesu kuuti mʼbɨli.