Malɨka 12

Ɨkɨhwanɨkɨsio ɨkya vavombi avaviivi

(Mataayi 21:33-46; Lʉʉka 20:9-19)

ɄYesu akatengʉla kujova na valongosi va Vayahudi mʉ fihwanɨkɨsio, akati, “Ʉmuunhu jʉmonga alyalɨmile ʉmʉghʉnda, akavyala isabibu. Akajenga ʉlʉvɨgho kusyʉta ʉmʉghʉnda ghwoni. Mʉnkate, akajenga apa kʉhʉjɨla isabibu. Kange, akajenga pa vwɨmo apa kʉlolelelela ʉmʉghʉnda. Akakodesia kʉ vaanhu ʉmʉghʉnda ghʉla, neke ʉmwene akakyʉla. 2 Ye ghʉfikile ʉnsiki ʉghwa kʉdonola isabibu, akansuungʼha ʉmʼbombi ghwake kʉ vano akakodisie, kuuti antolele ɨlɨghavo lyake ɨlya mpeto. 3 Ye afikile ʉmʼbombi jʉla, avaanhu vala vakankola, vakantova na kʉkʉmhʉmia kʉnji kɨsila kʉmpeela kɨɨnu. 4 Akansuungʼha ʉmʼbombi ʉjʉnge, ʉjuo ghwope vakantova, vakamʉlemasia kʉ mutu na kʉkʉmʼbombela sino nasinoghiile. 5 Ʉnya mʉghʉnda jʉla akansuungʼha kange ʉmʼbombi ʉjʉnge, ʉjuo ghwe vakamʼbuda. Alyavasungʼhile na vange vinga, vamo vakatovua, avange vakabudua.

6 “Kʉvʉsililo, ʉnya mʉghʉnda akasighala nʉ mwanaake ʉmʉghanɨke. Pe akansuungʼha jʉjuo, akati, ‘Ʉmwanango ʉjʉ, kyavikʉmwoghopa.’ 7 Neke avaanhu vala ye vamwaghile, vakapʉlɨngʼhana, vakati, ‘Ʉjʉ ghwe nya vʉhaasi ghwa mʉghʉnda ʉghʉ, tʉmʼbude neke ʉvʉhaasi ʉvʉ vuuva vwitu!’ 8 Vakankola, vakamʼbuda, pe vakankwesela kʉnji kuhʉma mʉ mʉghʉnda ghʉla ʉghwa sabibu.

9 “Lɨno, ndepoonu ʉnya mʉghʉnda jʉla kyaivomba kɨki? Ikwisa ɨkʉvabuda avaanhu vala, neke ikodesia kʉ vaanhu avange ʉmʉghʉnda ghʉla. 10 Namʉvalile ɨlɨsio ɨlɨ? Lɨlembilue mʉ Malembe aMɨmɨke kuuti,

‘Ɨlɨvue lɨno avajengi valyalɨkanile,

lye lɨvue ɨlɨvaha ɨlya pa nguto.

11 ɄMʉtwa ʉNgʉlʉve ghwe mwene avombile ɨlɨ,

kange lya kʉdegha pamaaso ghiitu.’ ”

12 Avavaha va vatekesi, avavʉlanɨsi va ndaghɨlo na vavaha va vaanhu, valyakagwile kuuti, mʉ kɨhwanɨkɨsio ɨkio akava ɨkʉvajova aveene, pe vakalondagha ɨsɨla ɨja kʉnkola. Neke ʉlwakʉva vakoghopa ɨlɨpʉgha lya vaanhu, vakamʉleka, vakavʉʉka vilʉta.

Kusonga ɨsongo kwa Kaisali

(Mataayi 22:15-22; Lʉʉka 20:20-26)

13 Pambele avalongosi vala, vakavasuungʼha vamonga mʉ kɨpʉgha ɨkya Vafalisayi na vavɨngɨlɨli va ntwa ʉHelode, kuuti valʉte vamwʉvɨle ʉYesu mʉ masio ghano ijova. 14 Vakamʉlʉtɨla, vakati, “Ghwe Mʼbʉlanɨsi, tʉkagwile kuuti ʉve ʉlɨ muunhu ghwa kyangʼhaani, naghukwoghopa nambe muunhu vwɨmɨla ʉvʉvaha vwake. Ghuvʉlanɨsia mʉ vwakyangʼhaani sino ilonda ʉNgʉlʉve. Asi, indaghɨlo sa Moose sikwɨtɨkɨsia kusonga ɨsongo kwa Kaisali?”

15 Neke ʉYesu akakagʉla ʉvʉkedʉsi vwave, akavavʉʉla akati, “Kɨki mʉkʉngela? Mʉndetele ɨhela nɨjɨlole.” 16 Vakampeela. Akavaposia akati, “Ɨkɨhwani nʉ vʉlembe fino fili mʉ hela ɨjɨ fyani?” Vakamwamʉla vakati, “Fya Kaisali.”

17 Apuo ʉYesu akavavʉʉla akati, “Ifya Kaisali, mʉmpelaghe ʉKaisali; ifya Ngʉlʉve, mʉmpelaghe ʉNgʉlʉve.” Pe vakanʼdegha kyongo.

Ɨmhola ɨja lʉsyʉko lwa vafue

(Mataayi 22:23-33; Lʉʉka 20:27-40)

18 Pambele aVayahudi ava kɨpʉgha kya Vasadukayi, vano vakatisagha nakwekʉle kusyʉka avafue, vakalʉta kwa Yesu vakamposia vakati, 19 “Ghwe Mʼbʉlanɨsi, ʉMoose alyatʉlembiile ʉlʉlaghɨlo kuuti, nave ʉmuunhu afwile, neke amʉlekile ʉnʼdala kɨsila mwana, ʉnnine anoghiile kuhaala ʉnʼdala ʉmfwɨle kuuti ampapɨle avaana ʉnyakʉsila. 20 Lɨno, kwevalyale avanamuunhu lekelalʉbale. Ʉghwa kwanda akatoola ʉnʼdala, akafua kɨsila kʉleka mwana. 21 Ʉghwa vʉvɨlɨ, akahaala ʉmfwɨle jʉla, ghwope akafua kɨsila kʉleka mwana. Ghwope ʉghwa vʉtatu, akafua vʉle vʉle. 22 Kʉvʉsililo vooni lekelalʉbale vakafua kɨsila kʉleka mwana. Pambele ghwope ʉnʼdala ʉmfwɨle, akafua. 23 Lɨno, ɨkɨghono ɨkya kʉsyʉka avaanhu vooni, ʉmfwɨle jʉla iliiva nʼdala ghwani mʉ vala lekelalʉbale? Ʉlwakʉva vooni valyantolile.”

24 ɄYesu akavamʉla akati, “Ʉmue mʉsovile, namʉkagwile aMalembe aMɨmɨke, nambe ingʉfu sa Ngʉlʉve. 25 Avafue valaava visyʉka, nakwekʉlaava kutoola nambe kutolua, viliiva ndavʉle avanyamhola kʉkyanya. 26 Mʉ mhola ɨja kʉsyʉka avafue, namʉvalile mʉ kɨtabu ɨkya Moose, pala ɨkɨhanji ye kiviika? Amaaka minga ye ghakilile kuhʉma kufua kwa Abulahamu nʉ Isaka nʉ Yakovo, ʉNgʉlʉve alyamʼbʉlile ʉMoose akati, ‘Ʉne neene Ngʉlʉve ghwa Abulahamu, Ngʉlʉve ghwa Isaka, Ngʉlʉve ghwa Yakovo.’ 27 Ʉmwene naNgʉlʉve ghwa vafue, looli Ngʉlʉve ghwa vʉʉmi. Ʉmue mʉsovile kyongo.”

Ʉlʉlaghɨlo ʉlʉvaha

(Mataayi 22:34-40; Lʉʉka 10:25-28)

28 Ʉmʼbʉlanɨsi jʉmonga ʉghwa ndaghɨlo akafika, akavaagha aVasadukayi vikanɨngʼhana nʉ Yesu. Ye avwene ʉYesu ɨkʉvamʉla vʉnofu, ghwope akamposia akati, “Mʉ ndaghɨlo sooni, lwe lʉlɨku ʉlʉlaghɨlo ʉlʉvaha?”

29 ɄYesu akamwamʉla akati, “Ʉlʉlaghɨlo ʉlʉvaha mʉ sooni lwe ʉlʉ, ‘Pʉlɨkagha ghwe Isilaeli, ʉMʉtwa ʉNgʉlʉve ghwitu ghwe Mʉtwa jʉmo mwene. 30 Ʉmʉghanaghe ʉMʉtwa ʉNgʉlʉve ghwako nʉ mwojo ghwako ghwoni, nʉ lʉhala lwako lwoni, ni ngʉfu saako sooni.’ 31 Ʉlʉlaghɨlo ʉlwa vʉvɨlɨ lwe ʉlʉ, ‘Ʉmʉghanaghe ʉnnino ndavʉle ghukughana jʉʉve.’ Nakwelʉle ʉlʉlaghɨlo ʉlʉnge kukila indaghɨlo isi.”

32 Pepano ʉmʼbʉlanɨsi jʉla ʉghwa ndaghɨlo akati, “Lweli Mʼbʉlanɨsi! Ʉjovile se seene kuuti, ʉNgʉlʉve alɨ jʉmo mwene, nakwale ʉjʉnge looli ghwe jʉjuo. 33 Lʉnoghiile kʉkʉmʉghana ʉmwene nʉ mwojo ghwoni, nʉ lʉhala lwoni, ni ngʉfu sooni na kʉkʉmʉghana ʉnnino ndavʉle ghukughana jʉʉve. Ʉluo lwe lʉvaha kukila ɨlɨtekelo lyoni lɨno litavʉlua kwa Ngʉlʉve.” 34 ɄYesu ye avwene ʉmʼbʉlanɨsi ʉghwa ndaghɨlo amwamwile nʉ lʉhala, akamʼbʉʉla akati, “Nʉlɨ patali kukwingila mʉ Vʉtwa vwa Ngʉlʉve.” Kuhʉma ʉnsiki ʉghuo, naalyandiile muunhu kʉkʉmposia mʉlwa kʉmʉghela.

Ʉlʉposio vwɨmɨla ʉKɨlɨsite

(Mataayi 22:41-46; Lʉʉka 20:41-44)

35 ɄYesu ye ivʉlanɨsia ɨlɨpʉgha lya vaanhu mʉ nyumba ɨnyɨmɨke ɨja kufunyila, akavaposia akati, “Lwandaani avavʉlanɨsi va ndaghɨlo viiti ʉKɨlɨsite Mwana ghwa Davɨdi? 36 Ongo ʉDavɨdi jʉjuo vwɨmɨla kulongosivua nʉ Mhepo ʉMwɨmɨke, alyatiile,

‘ɄMʉtwa ʉNgʉlʉve alyamʼbʉlile ʉMʉtwa ghwango,

“Ʉʉve nʉ vʉtavʉlɨlua palɨkɨmo nuune,

kuhanga nɨkʉtange ʉvaleme avalʉgʉ vaako,

ʉvateme.” ’ ”

37 ɄYesu akafijovagha akatisagha, “ɄDavɨdi jʉjuo ɨkʉntambʉla ʉKɨlɨsite iiti, ‘Mʉtwa.’ Lɨno, pe ʉKɨlɨsite ivisagha mwanaake ndaani?” Ɨlɨpʉgha lya vaanhu lɨkampʉlɨkɨsyagha nʉ lʉkeelo.

ɄYesu ɨkʉvapavɨla avaanhu vwɨmɨla avavʉlanɨsi va ndaghɨlo

(Mataayi 23:1-36; Lʉʉka 20:45-47)

38 ɄYesu mʉ lʉvʉlanɨsio lwake akati, “Mughelaghe na vavʉlanɨsi va ndaghɨlo vano viiva nʉ lʉkeelo kughenda vafwalile isopeka inhali, kuuti avaanhu vavahʉngɨlaghe nʉ vwoghofi mʉ mapuulo. 39 Pano valɨ mʉ masinagogi, vilonda kukukala kʉvʉlongolo, na mʉ fikulukulu vilonda kukukala kʉ fitengo ifya voghopua. 40 Vikʉvafumba avafwɨle ifiinu fyave, neke mʉ vʉkedʉsi vwave vikufuunya inyifuunyo inhali kuuti vavoneke vagholofu. Avuo, ʉNgʉlʉve ilikʉvapeela ʉlʉpumuko ʉlʉkome.”

Ɨlɨtekelo lya mʉkɨjʉʉva ʉmfwɨle

(Lʉʉka 21:1-4)

41 ɄYesu ye alɨ mʉ nyumba ɨnyɨmɨke ɨja kufunyila, alikalile alʉngiime kʉ kyombo ɨkya kʉsopela ɨlɨtekelo. Apuo akava ilola avaanhu vinga vano vakava vitavʉla ɨlɨtekelo. Avamofu vinga vakatavʉlagha indalama nyinga. 42 Ʉnsiki ʉghuo akiisa ʉmʉkɨjʉʉva ʉmfwɨle kange nkotofu, akatavʉla isendi ivɨlɨ.

43 Pepano ʉYesu akavakemeela avavʉlanɨsɨvua vaake, akavavʉʉla akati, “Kyangʼhaani nɨkʉvavʉʉla, ʉmʉkɨjʉʉva ʉmfwɨle ʉjʉ ʉnkotofu atavwile kukila avange vooni vano vasopile. 44 Ʉlwakʉva avange vooni vatavwile fidebe mʉ finga fino valɨ nafyo. Looli ʉmʉkɨjʉʉva ʉjʉ mʉ vʉkotofu vwake, atavwile fyoni fino fyava fya kʉntanga mʉ vwʉmi vwake.”