Lʉʉka 5

ɄYesu ɨkʉvakemeela avavʉlanɨsɨvua avatasi

(Mataayi 4:18-22; Malɨka 1:16-20)

Ɨkɨghono kɨmonga, ʉYesu alyɨmile palʉbale pa lɨsʉmbe ɨlya Genesaleti, ivʉlanɨsia ɨlɨsio ɨlya Ngʉlʉve. Avaanhu vinga vakavelelelagha kwa mwene kʉkʉmpʉlɨkɨsia, kuhanga kʉkʉmpita. 2 Neke mʉlʉbale mʉ lɨsʉmbe, ʉYesu akasaagha ingalava ivɨlɨ, avalovi avanya ngalava sila namwevalyale, ʉlwakʉva valyale kusuka inyaafu saave. 3 ɄYesu akingila mʉ ngalava, jɨno jaale ja Simoni. Akansʉʉma ʉSimoni ajɨvelelesie padebe nkate mʉ lɨsʉmbe, pepano ʉYesu akikala mʉ ngalava ivʉlanɨsia ɨlɨpʉgha ɨlya vaanhu.

4 Ye amalile kuvʉlanɨsia, akamʼbʉʉla ʉSimoni akati, “Twala ɨngalava pa kyogho, apuo mwisie inyaafu siinu, mʉlove isamaki.” 5 ɄSimoni akamwamʉla ʉYesu akati, “Ghwe Ntwa, tʉvombile ɨmbombo ɨkɨlo jooni, natʉvʉmbʉliile kɨmonga. Lɨno, ʉlwakʉva veeve ʉjovile, apuo nikwisia inyaafu.”

6 ɄSimoni na vajaake vakisia inyaafu saave. Ye visisie, isamaki nyinga kyongo sikaghwɨlɨla, nasi nyaafu sikatengʉla kudumuka. 7 Pe vakavakemeela avajanave vano valyale mʉ ngalava ɨjɨngɨ, kuuti viise kʉkʉvatanga. Vakiisa, vakamemia isamaki ingalava se ivɨɨlɨ, isamaki silyale nyinga kyongo nasi ngalava sikava mʉ lʉtalamu ʉlwa kʉdwiviila.

8 ɄSimoni ʉPeteli ye asivwene isio, akafughama pa Yesu akati, “Ghwe Mʉtwa, nɨkʉkʉsʉʉma ʉvʉʉke palyʉne, ʉlwakʉva ʉne nɨlɨ mhosi.” 9 ɄSimoni alyajovile ʉluo, ʉlwakʉva ʉmwene na vange vooni vano valyale lʉmo, valyadeghile kyongo vwɨmɨla isamaki nyinga sino valovile. 10 Voope avakina Sebedaayi ʉYakovo nʉ Yohani, vano vakavombaniagha nʉ Simoni, vakadegha kyongo. Pepano ʉYesu akamʼbʉʉla ʉSimoni akati, “Nʉngoghopaghe Simoni, kuhʉma lɨno ghuvisagha mʉlovi ghwa vaanhu.” 11 Pambele vakasitwala ingalava saave mʉlʉbale mʉ lɨsʉmbe, apuo vakafileka fyoni vakavʉʉka vikʉmʼbɨngɨlɨla ʉYesu.

ɄYesu ɨkʉnsosia ʉmuunhu ʉnya bʉʉba

(Mataayi 8:1-4; Malɨka 1:40-45)

12 Ɨkɨghono kɨmonga, ʉYesu akingila mʉ lɨkaaja lɨmonga, ʉmuo mwealyale ʉmuunhu ʉnya bʉʉba ʉmʼbɨlɨ ghwoni. Ʉmuunhu jʉla ye amwaghile ʉYesu, akakupama pa mwene, akampelepesia akati, “Ghwe Mʉtwa, nave ʉkeliile kʉkʉmbalasia, nisʉʉma ʉmbalasie.” 13 ɄYesu akagholosia ʉlʉvoko lwake, akamwabasia akati, “Nikeela, valala.” Ʉnsiki ghʉghuo ɨbʉʉba jɨkavʉʉka mʉ mʼbɨlɨ ghwake. 14 Akankaana ʉmuunhu jʉla akati, “Nʉngamʼbʉlaghe muunhu, ʉlwene ʉlʉte ghuhʉfie kwa ntekesi, ʉkahʉmie ɨlɨtekelo mʉlwa kʉvalala, ndavʉle alyalaghiile ʉMoose, vʉʉve vwolesi kʉ vaanhu vooni kuuti ʉvalasivue.” 15 Neke imhola isa Yesu sikaghina kupʉlɨkɨka imbale ni mbale. Avaanhu vinga vakakongʼhanagha kʉkʉmpʉlɨkɨsia, na kusosivua inhamu saave. 16 Neke ʉmwene akalʉtagha kʉno kʉsila vaanhu, kukufuunya.

ɄYesu alɨ nʉ vʉtavʉlɨlua vwa kʉpyanɨla inyɨvi

(Mataayi 9:1-8; Malɨka 2:1-12)

17 Ɨkɨghono kɨmonga, ʉYesu alyale ivʉlanɨsia avaanhu. Mʉ avuo mwevalyale aVafalisayi na vavʉlanɨsi va ndaghɨlo, kuhʉma mʉ fikaaja fyoni ifya Galilaya ni fya Yudea, na mʉ lɨkaaja ɨlya Yelusalemu. Ingʉfu isa Mʉtwa ʉNgʉlʉve silyale nʉ mwene kusosia avatamu.

18 Pepano vakiisa avaanhu vamonga, vampɨndile ʉmuunhu ʉnya nhamu ɨja lɨteela mʉ kɨteefu, vakava vilonda pikʉmwingisia mʉ nyumba kuuti vamʼbɨɨke pa Yesu. 19 Neke vakakunua kʉkʉmwingisia ʉntamu jʉla pa mʉlyango, ʉlwakʉva avaanhu valyamemile kyongo. Pe vakatogha pakyanya pa nyumba, vakatuvula. Apuo vakamwisia ʉnya lɨteela jʉla mʉ kɨteefu, pakate pano pwale ʉYesu.

20 ɄYesu ye alʉvwene ʉlwɨtɨko lwave kwa mwene, akati kwa ntamu, “Nyalʉkolo, ʉpyanilue inyɨvi saako.” 21 Pepano avavʉlanɨsi va ndaghɨlo na Vafalisayi vala vakatengʉla kuposania viiti, “Neke ghwe veeni ʉjʉ jʉno ɨkʉmʉligha ʉNgʉlʉve? Nakwale jʉno anoghiile kupyanɨla inyɨvi, looli jʉ Ngʉlʉve mwene.”

22 ɄYesu akasitangʼhania sino vaveele viposania akati, “Kɨki musaagha isio mʉ moojo ghiinu? 23 Lɨno, lʉhʉʉgʉ lʉlɨku, kʉkʉmʼbʉʉla ʉnya lɨteela kuuti, ‘Ʉpyanilue inyɨvi saako,’ nambe kuuti, ‘Ɨma, ʉghendaghe’? 24 Lɨno pe mʉkagʉle kuuti, ʉne ne Mwana ghwa Muunhu nɨlɨ nʉ vʉtavʉlɨlua ʉvwa kʉpyanɨla inyɨvi mʉ ɨɨsi muno...” Pe akamʼbʉʉla ʉnya lɨteela akati, “Nɨkʉkʉvʉʉla, ɨma, veghala ɨkɨteefu kyako, vujagha.” 25 Ʉnsiki ghʉghuo akɨɨma pamaaso ghaave, akaveghala ɨkɨteefu kyake, akavʉʉka ivuja kʉmo ɨkʉmʉghinia ʉNgʉlʉve. 26 Pepano vooni vakadegha, vakamʉghinia ʉNgʉlʉve. Pe vakava nʉ vwoghofi vakati, “Ʉmʉsyʉghʉ tʉsaghile isa kʉdegha!”

ɄYesu ihanga na vahosi

(Mataayi 9:9-13; Malɨka 2:13-17)

27 Pambele ʉYesu akahʉma, akamwagha ʉnsongesia songo jʉmonga, jʉno akatambʉlwagha Leevi, ikalile pano isongekesia ɨsongo. Akamʼbʉʉla akati, “Ʉmbɨngɨlɨlaghe.” 28 Pe akafileka fyoni, akavʉʉka, akamʼbɨngɨlɨla.

29 Pambele ʉLeevi akamʉlɨngʼhanɨkɨsia ʉYesu ʉlʉlio kʉ kaaja kwa mwene. Pwekɨlyale ɨkɨpʉgha ɨkɨkome ɨkya vasongesia songo na vaanhu avange vihanga ɨkyakʉlia na veene. 30 Neke aVafalisayi na vavʉlanɨsi vaave va ndaghɨlo, vakatengʉla pikungʼulasia kʉ vavʉlanɨsɨvua va Yesu viiti, “Ongo muhanga kulia na kunyua na vasongesia songo na vahosi?” 31 ɄYesu akavamʉla akati, “Avakafu navifumbua kulʉta kwa mʉghanga, looli avatamu. 32 Fye lʉlɨvuo, nanɨlyakɨsisie kʉkʉvakemeela vano vikuvona vagholofu, looli vano vitangʼhinie kuuva vahosi, neke valaate.”

Ʉlʉposio vwɨmɨla kuvʉhɨɨla kulia mʉlwa kufuunya

(Mataayi 9:14-17; Malɨka 2:18-22)

33 Avaanhu vala vakati kwa Yesu, “Avavʉlanɨsɨvua va Yohani na vavʉlanɨsɨvua va Vafalisayi, valɨ nʉ lwiho ʉlwa kʉvʉhɨɨla kulia ifighono fimonga mʉlwa kufuunya. Ongo avavʉlanɨsɨvua vaako vilia na kunyua ifighono fyoni!” 34 Ʉmwene ʉYesu akavamʉla akati, “Vano vaghongolilue pa vʉtolani, valɨ nʉ ntolanʼdala, namʉngati vavʉhɨɨle kulia mʉlwa kufuunya. 35 Looli, filikwisa ifighono fino ʉntolanʼdala ilivʉsɨvua, apuo pepano vilivʉhɨɨla kulia mʉlwa kufuunya.”

36 Akavavʉʉla ʉlʉjovo akati, “Nakwale ʉmuunhu jʉno idemʉla ɨkɨgamba mʉ mwenda ʉmpia, neke ahonele mʉ mwenda ʉnkʉʉlʉ. Nave avombe ʉluo, iiva ademwile ʉmwenda ʉmpia, nakɨ kɨgamba kɨla nakilɨngʼhana nʉ mwenda ʉnkʉʉlʉ. 37 Kange, nakwale ʉmuunhu jʉno ivɨɨka ʉlʉhʉʉje ʉlʉpia mʉ nyambe ingʼhʉʉlʉ, nave fye avombe ʉluo, ʉlʉhʉʉje lʉla lupusula inyambe, ʉlʉhʉʉje lukungʼika nasi nyambe sinangɨka. 38 Looli, ʉlʉhʉʉje ʉlʉpia lʉnoghiile kuvɨkua mʉ nyambe imhia. 39 Kange, nakwale ʉmuunhu jʉno ilonda kunyua ʉlʉhʉʉje ʉlʉpia, pano anywile ʉlʉkʉʉlʉ, ʉlwakʉva viiti, ‘Ʉlʉhʉʉje ʉlʉkʉʉlʉ lwe lʉnono.’ ”