Malɨka 1

ƗMhola ɨNofu ɨja Yesu Kɨlɨsite

ndavʉle jalembilue nʉ

Malɨka

ɄYohani inosia ɨsɨla ɨja Mʉtwa ʉYesu

(Mataayi 3:1-12; Lʉʉka 3:1-18; Yohani 1:19-28)

ƗMhola ɨNofu ɨja Yesu Kɨlɨsite, ʉMwana ghwa Ngʉlʉve, jatengwile kupʉlɨsɨvua nʉ Yohani ʉMwofughi, 2 ndavʉle lɨlembilue mʉ kɨtabu ɨkya mʼbɨli ʉYesaya pano ʉNgʉlʉve iiti,

“Lolagha, nɨkʉnsuungʼha ʉnyamhola ghwango

akʉlongolele,

ʉjuo ghwe ɨkʉkʉlɨngʼhanɨkɨsyagha ɨsɨla.”

3 “Ɨlɨsio lya muunhu lipʉlɨkɨka kuhʉma kʉ lɨhaka liiti,

‘Mʉnnosekesyaghe ʉMʉtwa ʉNgʉlʉve ɨsɨla

na kulɨngʼhania muno kyaikilila.’ ”

4 Pepano ʉYohani ʉMwofughi akatengʉla kupʉlɨsia kʉ lɨhaka, kuuti avaanhu valataghe inyɨvi saave na kukwofughua, neke ʉNgʉlʉve avapyanɨle. 5 Avaanhu kuhʉma mʉ lɨkaaja ɨlya Yelusalemu na mʉ kɨghavo kyoni ɨkya Yudea, vakalʉtagha kwa Yohani, vakalatagha inyɨvi saave, na kukwofughua mʉ kɨkogha ɨkya Yolidani.

6 ɄYohani akafwalagha ʉmwenda ghʉno ghwatendilue nʉ lwaghe lwa ngamɨla, akipinyagha nʉ lʉkova ʉlwa ngʼhwembe mʉ nsana na kulia imhaasi nʉ vwʉki. 7 Akapʉlɨsyagha akatisagha, “Ikwisa mʉmbele mʉlyʉne jʉno alɨ ni ngʉfu kukila ʉne, jʉno nanɨnoghiile nambe kuuva mʼbanda ghwa kʉhʉdʉla ʉtʉkova twa filatu fyake. 8 Ʉne nɨkʉvofugha na malenga, neke ʉmwene ɨkʉvofughagha nʉ Mhepo ʉMwɨmɨke.”

ɄYesu ikwofughua na kughelua

(Mataayi 3:13–4:11; Lʉʉka 3:21-22; 4:1-13)

9 Ifighono ifio, ʉYesu akahʉma kʉ kɨkaaja ɨkya Nasaleti mʉ kɨghavo ɨkya Galilaya, akalʉta kwa Yohani na kukwofughua nʉ mwene mʉ kɨkogha ɨkya Yolidani. 10 Ye ofughue, ʉnsiki ghʉghuo akahʉma mʉ malenga, akavona ʉvʉlanga vudinduka, najʉ Mhepo hwene ngʼhʉnda akiika pa mwene. 11 Pe ɨlɨsio lɨkahʉma kʉkyanya lɨkati, “Ʉve veeve Mwanango mʉghanɨke, nɨkʉkeliile.”

12 Pepano ʉMhepo akamʉlongosia ʉYesu kulʉta kʉ lɨhaka, 13 akikala ifighono fijigho fine ighelua nʉ Setano. Ʉkuo alyale palɨkɨmo ni fikanu, avanyamhola vakava vikʉmʼbombela.

ɄYesu ɨkʉvakemeela avavʉlanɨsɨvua avatasi

(Mataayi 4:12-22; Lʉʉka 4:14-15; 5:1-11)

14 Pambele ʉYohani akadindilua mʉ ndinde. Ye alɨ mʉ ndinde, ʉYesu akalʉta kʉ Galilaya ipʉlɨsia ɨMhola ɨNofu ɨja Ngʉlʉve, 15 akatisagha, “Ʉnsiki ghʉno ghwavɨlilue ghʉfikile, kange ʉVʉtwa vwa Ngʉlʉve vʉlɨ piipi, mʉlataghe inyɨvi siinu na kukwɨtɨka ɨMhola ɨNofu ɨja Ngʉlʉve.”

16 Ɨkɨghono kɨmonga, ʉYesu ye ighenda mʉlʉbale mʉ lɨsʉmbe ɨlya Galilaya, akavaagha avaanhu vavɨlɨ vanamuunhu, jʉmonga ghwe Simoni ʉjʉnge ghwe Ndeleeya. Avaanhu ava valyale valovi, vakava ni nyaafu vilova isamaki mʉ lɨsʉmbe. 17 ɄYesu akavakemeela akavavʉʉla akati, “Mʉmbɨngɨlɨlaghe! Ʉne nɨkʉvavɨɨka kuuva valovi va vaanhu.” 18 Ʉnsiki ghʉghuo vakasileka inyaafu saave, vakamʼbɨngɨlɨla.

19 ɄYesu akalʉta pavʉlongolo padebe, akamʼbona ʉYakovo nʉ Yohani avakina Sebedaayi valɨ mʉ ngalava vilɨngʼhania inyaafu saave isa kʉlovela isamaki. 20 Voope akavakemeela, vakamʉleka ʉviise ʉSebedaayi mʉ ngalava palɨkɨmo na vavombi vaake, vakavʉʉka vikʉmʼbɨngɨlɨla ʉYesu.

ɄYesu idaga ɨlɨpepo

(Lʉʉka 4:31-37)

21 ɄYesu na vavʉlanɨsɨvua vaake avuo, vakalʉta kʉ lɨkaaja ɨlya Kapelenaumu. Ye kɨfikile ɨkɨghono ɨkya Sabati, vakalʉta mʉ sinagogi, ʉYesu akatengʉla kuvʉlanɨsia. 22 Avaanhu vano mwevalyale vakadegha kyongo vwɨmɨla imbʉlanɨsio saake, ʉlwakʉva alyale ivʉlanɨsia hwene muunhu nya vʉtavʉlɨlua, naakavʉlanɨsyagha ndavʉle avavʉlanɨsi vaave ava ndaghɨlo.

23 Ʉnsiki ghʉghuo ye valɨ mʉ sinagogi ɨjio, mwealyale ʉmuunhu ʉnya lɨpepo ɨlɨlamafu, akakoola 24 akati, “Ʉve ghwe Yesu ghwe Mʉnasaleti, tʉlɨ vʉki nuuve? Ghwisile kʉkʉtʉtipula? Nɨkagwile kuuti ʉve ʉlɨ Mwɨmɨke ghwa Ngʉlʉve.” 25 ɄYesu akalɨhwetʉkɨla ɨlɨpepo ɨlɨlamafu akati, “Kɨmihe! Hʉma mwa muunhu ʉjʉ!” 26 Ɨlɨpepo lɨla lɨkansukania kyongo, lɨkakoola, lɨkamʉleka.

27 Avaanhu vooni vakadegha kyongo, kange vakiposaniagha veene viiti, “Se nyɨki isi? Isi se mbʉlanɨsio imhia inya vʉtavʉlɨlua! Idaga amapepo amalamafu ghoope ghikʉnkʉnda!” 28 Imhola sa Yesu sikakwɨla ngʼhaningʼhaani mʉ kɨghavo kyoni ɨkya Galilaya.

ɄYesu isosia avatamu vinga

(Mataayi 8:14-17; Lʉʉka 4:38-41)

29 ɄYesu na vavʉlanɨsɨvua vaake ʉSimoni, ʉNdeleeya, ʉYakovo nʉ Yohani vakahʉma mʉ sinagogi, vakalʉta kʉ kaaja kwa Simoni nʉ Ndeleeya. 30 Ye vafikile, vakamʼbʉʉla ʉYesu kuuti, ʉnkwive ghwa Simoni, kwekʉti ʉngʼina ghwa nʼdala, alɨ nɨ mhʉngʉ aghonile pa kɨtala. 31 ɄYesu akaveela pa ntamu akankola ʉlʉvoko, akamwinula. Ʉnsiki ghʉghuo akasooka, akatengʉla kʉkʉvatengelela.

32 Ye vwilile, ɨlɨjʉva lɨsemile vakava vikʉmʉletela avatamu vooni na vanya mapepo. 33 Pe avaanhu vooni, ava mʉ lɨkaaja lɨla vakamema panji pa nyumba jɨno mwealyale ʉYesu. 34 ɄYesu akavasosia avatamu vinga, vano valyale ni nhamu sino sili papinga. Akadaga amapepo minga, naakaghalekelagha ghajove nambe padebe, ʉlwakʉva ghalyantangʼhinie.

ɄYesu ikufuunya na kudalɨkɨla

(Lʉʉka 4:42-44)

35 Ɨkɨghono ɨkya vʉvɨlɨ ye kʉkyale kuhenga, ʉYesu akasisimuka, akalʉta pamonga pa vʉsyefu, pavʉsila vaanhu, apuo akifunyagha. 36 ɄSimoni na vanine vakatengʉla kʉkʉmʉlonda. 37 Ye vamwaghile, vakamʼbʉʉla vakati, “Avaanhu vooni vikʉkʉlonda.” 38 ɄYesu akati, “Tʉvʉʉke tʉlʉtaghe kʉ fikaaja fino fili piipi kwope nɨpʉlɨsie, ʉlwakʉva lwe lʉno nalisiile.” 39 Pepano akalʉta imbale sooni isa mʉ kɨghavo ɨkya Galilaya, ipʉlɨsia mʉ masinagogi na kudaga amapepo.

ɄYesu ɨkʉnsosia ʉmuunhu ʉnya bʉʉba

(Mataayi 8:1-4; Lʉʉka 5:12-16)

40 Ɨkɨghono kɨmonga, ʉmuunhu ʉnya bʉʉba akiisa kwa Yesu, akafughama, akampelepesia akati, “Nave ʉkeliile kʉkʉmbalasia, nisʉʉma ʉmbalasie.” 41 ɄYesu akamʼbonela ɨkɨsa, akagholosia ʉlʉvoko lwake, akamwabasia akati, “Nikeela, valala.” 42 Ʉnsiki ghʉghuo ɨbʉʉba jɨkavʉʉka mʉ mʼbɨlɨ ghwake, akavalala. 43-44 Pepano ʉYesu akankaana akati, “Nʉngamʼbʉlaghe nambe muunhu imhola isi! Ʉlwene ʉlʉte ghuhʉfie kwa ntekesi, ʉkahʉmie ɨlɨtekelo ndavʉle alyalaghiile ʉMoose, neke vʉʉve vwolesi kʉ vaanhu vooni kuuti ʉvalasivue.”

45 Neke ʉmwene ye avʉkile, akalʉleka lʉno aveele ankanile, akatengʉla kukwɨsia ɨmhola ɨjio. Ʉluo lʉkampelela ʉYesu kukunua kukwingila mʉ makaaja pa vʉvalafu. Akavisagha kʉnji kʉ makaaja kʉvʉsila vaanhu. Kwope ʉkuo avaanhu ifipʉgha kuhʉma imbale sooni vakalʉtagha kwa mwene.