Yohani 1

ƗMhola ɨNofu ɨja Yesu Kɨlɨsite

ndavʉle jalembilue nʉ

Yohani

ɄLɨsio akiisa akava muunhu

Kʉvʉtengʉlɨlo, ɨɨsi ye jɨkyale kupelua, kwealyale ʉLɨsio. ɄLɨsio ʉjuo alyale palɨkɨmo nʉ Ngʉlʉve. Kange, ʉLɨsio alyale ghwe Ngʉlʉve. 2 Kuhʉma kʉvʉtengʉlɨlo, ʉLɨsio ʉjuo alyale palɨkɨmo nʉ Ngʉlʉve. 3 ɄNgʉlʉve alyapelile ifiinu fyoni kukilila ʉmwene. Nakwekɨlɨ nambe kɨmo kɨno alyapelile kɨsila kʉkilila ʉmwene ʉjuo. 4 Mwa mwene mwevʉlyale ʉvwʉmi. Ʉvwʉmi ʉvuo vʉkava lʉmuli kʉ vaanhu vooni. 5 Ʉlʉmuli ʉluo lumulika mʉ ngʼhiisi, ɨngʼhiisi jɨkunilue kʉkʉlʉlema.

6 ɄNgʉlʉve alyansungʼhile ʉmuunhu jʉmonga jʉno akatambʉlwagha Yohani. 7 ɄYohani ʉjuo, alisile kukwoleka imhola isa lʉmuli ʉluo, kuuti avaanhu vooni vɨtɨke. 8 ɄYohani ʉjuo naalyale ghwe lʉmuli ʉluo, looli alisile kukwoleka ʉlʉmuli. 9 Ʉlʉmuli ʉluo lwa kyangʼhaani, lʉno lʉkʉvamulikila avaanhu vooni. Ʉlʉmuli ʉluo lwisile mʉ ɨɨsi.

10 ɄLɨsio mwealyale mʉ ɨɨsi, najɨ ɨɨsi jooni jɨlyapelilue kukilila ʉmwene, neke avaanhu navalyankagwile. 11 Alisile kʉ vaanhu vaake, aveene navalyamwʉpiile. 12 Neke avaanhu vooni vano valyamwʉpiile na kʉkʉmwɨtɨka, akavavɨɨka kuuva vaana va Ngʉlʉve. 13 Nakwekʉti vaana va Ngʉlʉve vwɨmɨla ifisina fyave, nambe mʉlwa kʉholua na vaanhu, nambe mʉ vughane vwa muunhu, looli ʉNgʉlʉve jʉjuo ghwe jʉno avavɨkile kuuva vanaake.

14 ɄLɨsio ʉjuo akava muunhu, akikala palɨkɨmo nusue. Na jʉsue tʉkavʉvona ʉvʉvaha vwake, ʉvʉvaha vʉno vuhʉfia kuuti, ghwe Mwana jʉmo mwene ghwa Ngʉlʉve ʉNhaata. Ʉmwene alɨ nʉ lʉsʉngʉ fiijo nʉ vwakyangʼhaani vwoni.

15 ɄYohani akavoleka avaanhu imhola isa muunhu ʉjuo, akajova fiijo akati, “Ʉjʉ ghwe jʉno najovagha kuuti, ‘Jʉno ikwisa kʉmbele kʉlyʉne, mʼbaha kukila ʉne, ʉlwakʉva kwealyale ye nɨkyale kuholua.’ ” 16 Ʉsue tweni mʉ vʉkwɨlanɨfu vwake, twʉpiile ʉlʉsʉngʉ lwake, kange ifikʉtʉsʉngʉkɨlagha jaatu. 17 Nijova ʉluo, ʉlwakʉva ʉNgʉlʉve alyatʉpeliile indaghɨlo saake, kukilila ʉMoose; ʉlʉsʉngʉ nʉ vwakyangʼhaani, atʉpeliile kukilila ʉYesu Kɨlɨsite. 18 Nakwale ʉmuunhu jʉno aghelile kʉkʉmwagha ʉNgʉlʉve, looli ʉMwana jʉno alɨ jʉmo mwene, ghwope ghwe Ngʉlʉve, alɨ palɨkɨmo nʉ Ngʉlʉve ʉNhaata. Ʉjuo ghwe mwene atʉhʉfisie ʉNgʉlʉve.

Ʉvwolesi vwa Yohani ʉMwofughi

(Mataayi 3:1-12; Malɨka 1:1-8; Lʉʉka 3:1-18)

19 Ɨkɨghono kɨmonga, avalongosi va Vayahudi valyavasungʼhile avatekesi na Valeevi kuhʉma mʉ lɨkaaja ɨlya Yelusalemu. Valyavasungʼhile kʉkʉmposia ʉYohani kuuti ghwe veeni. 20 Ʉmwene akavoleka kɨsila kʉfisa akati, “Ʉne naneene Kɨlɨsite.” 21 Vakamposia kange vakati, “Lɨno, ʉve veeve veeni? Asi, veeve mʼbɨli Eliya?” ɄYohani akavamʉla akati, “Ndali, naneene Eliya.” Vakamposia kange vakati, “Ʉve veeve mʼbɨli jʉla jʉno tʉkʉmʉghuula kuhʉma kwa Ngʉlʉve?” ɄYohani akavamʉla akati, “Ndali, naneene.” 22 Vakamposia kange vakati, “Lɨno, ʉve veeve veeni? Ghukutambʉla veeve veeni? Tulonda tʉgomosie ʉlwamʉlo kʉ vano vatʉsungʼhile.” 23 ɄYohani akavamʉla ndavʉle alyajovile ʉmʼbɨli ʉYesaya akati,

“Ʉne neene lɨsio lya muunhu

lipʉlɨkɨka kuhʉma kʉ lɨhaka liiti,

‘Mʉnnosekesyaghe ʉMʉtwa ʉNgʉlʉve ɨsɨla!’ ”

24 Pepano avaanhu vala vano valyasungʼhilue na Vafalisayi, 25 vakamposia kange vakati, “Nave naveeve Kɨlɨsite, nambe naveeve mʼbɨli Eliya, nambe mʼbɨli jʉla jʉno tʉkʉmʉghuula kuhʉma kwa Ngʉlʉve, ongo ghukwofugha?” 26 ɄYohani akavamʉla akati, “Ʉne nikwofugha na malenga, neke pakate palyʉmue pwale jʉno ʉmue namʉnkagwile. 27 Ʉjuo ghwe jʉno ikwisa kʉmbele kʉlyʉne. Ʉne nanɨnoghiile nambe kuuva mʼbanda ghwa kʉhʉdʉla ʉtʉkova twa filatu fyake.” 28 Isio sooni silyavombiike mʉ kɨkaaja ɨkya Betania. Ɨkɨkaaja ɨkio kɨlyale ʉlʉbale ʉlwa kʉvʉdibulo ʉlwa kɨkogha ɨkya Yolidani. Ʉkuo kwe kʉno ʉYohani alyale ikwofugha avaanhu.

ɄYesu ghwe Kakolo ka Ngʉlʉve

29 Ɨkɨghono ɨkɨvɨngɨlɨli, ʉYohani akamwagha ʉYesu ikwisa kwa mwene. Pe akavavʉʉla avaanhu vano pwevalyale pala akati, “Lolagha, ʉjʉ ghwe Kakolo ghwa Ngʉlʉve, ghwe mwene ivʉsia ʉvʉhosi vwa vaanhu vooni! 30 Ʉjʉ ghwe jʉno najovagha kuuti, ‘Jʉno ikwisa kʉmbele kʉlyʉne, mʼbaha kukila ʉne, ʉlwakʉva kwealyale ye nɨkyale kuholua.’ 31 Na jʉʉne nanɨkakagwile kuuti ghwe Kakolo, looli ʉne nɨlisile kukwofugha avaanhu na malenga, kuuti aVaisilaeli vankagʉle.”

32 Kange ʉYohani akavavʉʉla akati, “Nɨmwaghile ʉMhepo ʉMwɨmɨke ikwika kuhʉma kʉkyanya hwene ngʼhʉnda na kukwɨma pa mwene, 33 nanɨveele nɨkagwile kuuti ghwe veeni. Neke ʉNgʉlʉve jʉno asungʼhile kukwofugha avaanhu na malenga ambʉlile kuuti, ‘Ʉmuunhu jʉno kyaʉkʉmwagha ʉMhepo ikwika na kukwɨma pa mwene, ʉjuo ghwe jʉno ikwofughagha nʉ Mhepo ʉMwɨmɨke.’ ” 34 ɄYohani akafijovagha akatisagha, “Ʉne nɨsivwene isio na maaso ghango, kange nijova isa kyangʼhaani, kuuti ʉjʉ ghwe Mwana ghwa Ngʉlʉve.”

Avavʉlanɨsɨvua va Yesu avatasi

35 Ɨkɨghono ɨkɨvɨngɨlɨli, ʉYohani ʉMwofughi akava pala pala, palɨkɨmo na vavʉlanɨsɨvua vaake vavɨlɨ. 36 Pe akamwagha ʉYesu ikila, akajova akati, “Lolagha, ʉKakolo ghwa Ngʉlʉve!” 37 Avavʉlanɨsɨvua vavɨlɨ vala ye vampʉliike ʉYohani ijova amasio aghuo, vakamʼbɨngɨlɨla ʉYesu. 38 Pe ʉYesu akasyetʉka, akavona vikʉmʼbɨngɨlɨla, akavaposia akati, “Mulonda kɨki?” Aveene vakamwamʉla vakati, “Labi, kwekʉti Mʼbʉlanɨsi, ghukukala kʉʉghi?” 39 ɄYesu akati, “Mwise, mʉkʉpaagha.” Pe vakamʼbɨngɨlɨla. Pakɨvwilile, akavalɨlo aka kɨjigho, vakafika pano ikalagha, vakava lʉmo ɨkɨghono kɨla.

40 Ʉmo mʉ vavʉlanɨsɨvua vavɨlɨ vano vakapʉliike amasio gha Yohani na kʉkʉmʼbɨngɨlɨla ʉYesu, alyale ghwe Ndeleeya, ʉnnuuna ghwa Simoni ʉPeteli. 41 Ɨkɨɨnu ɨkya kwanda kɨno ʉNdeleeya akavomba, akalʉta kʉkʉmʉlonda ʉnkʉlʉ ʉSimoni, akamʼbʉʉla akati, “Tʉmwaghile ʉMesiya!” Mesiya kwekʉti Kɨlɨsite. 42 Pe ʉNdeleeya akantwala ʉSimoni kwa Yesu. ɄYesu akamʉlola ʉSimoni, akamʼbʉʉla akati, “Ʉve veeve Simoni mwana ghwa Yohani, lɨno ghutambʉlwagha Keefa,” mʉ Kɨyunaani viiti Peteli, ʉmʉlʉvo ghwake kwekʉti Lɨnhalavue.

ɄYesu ɨkʉvakemeela avavʉlanɨsɨvua avange vavɨlɨ

43 Ɨkɨghono ɨkɨvɨngɨlɨli, ʉYesu akalamʉla kulʉta kʉ kɨghavo ɨkya Galilaya. Ʉkuo akamwagha ʉFilipo, akamʼbʉʉla akati, “Ʉmbɨngɨlɨlaghe.” 44 ɄFilipo alyale mhʉma mʉ lɨkaaja ɨlya Betisaida. Ghwope ʉNdeleeya nʉ Peteli vakahʉmagha mʉ lɨkaaja ɨlio. 45 ɄFilipo akamwagha ʉNatanaeli, akamʼbʉʉla akati, “Tʉmwaghile ʉmuunhu jʉno imhola saake silyalembilue nʉ Moose mʉ kɨtabu ɨkya Ndaghɨlo, na mʉ fitabu ifya vavɨli. Ʉjuo ghwe Yesu ʉmwana ghwa Yosefu ʉmhʉma kʉ Nasaleti.”

46 ɄNatanaeli akamposia ʉFilipo akati, “Ɨkɨɨnu ɨkɨnono ndepoonu kihʉma mʉ kɨkaaja ɨkɨdebe ɨkya Nasaleti?” ɄFilipo akamwamʉla akati, “Ghwise, ʉlole!” 47 ɄYesu ye amwaghile ʉNatanaeli ikwisa kwa mwene, akajova akati, “Lolagha, ʉjuo ghwe Mʉisilaeli ghwa kyangʼhaani, nsila vʉkedʉsi nkate mwa mwene.”

48 ɄNatanaeli akamposia ʉYesu akati, “Ghwe Mʉtwa, ʉngʼhagwile ndaani?” ɄYesu akamwamʉla akati, “Nambe ʉFilipo ye akyale pikʉkʉkemeela, ʉne nɨveele nɨkwaghile, ghukalile paasi pa mpiki ʉntini.” 49 Pe ʉNatanaeli akamwamʉla akati, “Ghwe Mʼbʉlanɨsi, lɨno nɨkagwile kuuti, ʉlɨ Mwana ghwa Ngʉlʉve! Ʉlɨ Ntwa ghwa Isilaeli!” 50 ɄYesu akamposia akati, “Ghukwɨtɨka ʉlwakʉva nɨkʉvʉlile kuuti nɨveele nɨkʉvwene ye ghukalile pa mpiki ʉntini? Lɨno, ghʉkʉsivona isingi imbaha kukila isi!” 51 Akavavʉʉla akati, “Kyangʼhaani nɨkʉvavʉʉla, mulivona ʉvʉlanga vudinduka na vanyamhola va Ngʉlʉve vitogha na kukwika palyʉne ne Mwana ghwa Muunhu.”