Malɨka 2

ɄYesu alɨ nʉ vʉtavʉlɨlua vwa kʉpyanɨla inyɨvi

(Mataayi 9:1-8; Lʉʉka 5:17-26)

ɄYesu akagomoka mʉ lɨkaaja lya Kapelenaumu. Ye fikilile ifighono ndafilɨngi, avaanhu vakapʉlɨka kuuti alɨ kʉ kaaja. 2 Avaanhu vinga vakakongʼhaana, vakamema kyongo na pa mʉlyango napepakava apa kʉkila. Ʉmuo ʉYesu akapʉlɨsyagha ɨlɨsio lyake. 3 Ʉnsiki ghʉghuo vakiisa avaanhu vane vampɨndile ʉmuunhu ʉnya nhamu ɨja lɨteela. 4 Ʉlwakʉva avaanhu valyamemile kyongo, vakakunua kʉkʉntwala kwa Yesu kukilila pa mʉlyango. Pe vakatogha pakyanya pa nyumba, vakatuvula kulʉngama pano pwealyale ʉYesu. Apuo vakamwisia ʉnya lɨteela jʉla mʉ kɨteefu. 5 ɄYesu ye alʉvwene ʉlwɨtɨko lwave kwa mwene, akati kwa ntamu, “Mwanango, ʉpyanilue inyɨvi saako.”

6 Mʉ lɨpʉgha ɨlio mwevalyale avavʉlanɨsi va ndaghɨlo, ye vapʉliike, vakingʼulasyagha mʉ moojo ghaave 7 viiti, “Ʉjʉ ghwe veeni kupyanɨla inyɨvi? Nakwale jʉno anoghiile kupyanɨla inyɨvi, looli alɨ jʉmo mwene, ʉNgʉlʉve. Ʉjʉ, ɨkʉmʉligha kyongo ʉNgʉlʉve.”

8 Neke ʉYesu akasitangʼhania sino vakava visaagha akati, “Kɨki musaagha isio mʉ moojo ghiinu? 9 Lʉhʉʉgʉ lʉlɨku, kʉkʉmʼbʉʉla ʉnya lɨteela kuuti, ‘Ʉpyanilue inyɨvi saako,’ nambe kuuti, ‘Ɨma, veghala ɨkɨteefu kyako, ʉghendaghe’? 10 Lɨno pe mʉkagʉle kuuti, ne Mwana ghwa Muunhu nɨlɨ nʉ vʉtavʉlɨlua ʉvwa kʉpyanɨla inyɨvi mʉ ɨɨsi muno...” Pe akamʼbʉʉla ʉnya lɨteela 11 akati, “Nɨkʉkʉvʉʉla, ɨma, veghala ɨkɨteefu kyako vujagha.” 12 Ʉnsiki ghʉghuo akɨɨma, akaveghala ɨkɨteefu kyake akavʉʉka ivuja. Avaanhu vooni vano pwevalyale pala vakadegha kyongo, kange vakamʉghinia ʉNgʉlʉve vakati, “Isi se natʉsivwene lʉsiku.”

ɄYesu ihanga na vahosi

(Mataayi 9:9-13; Lʉʉka 5:27-32)

13 ɄYesu akalʉta kange mʉlʉbale mʉ lɨsʉmbe, ɨlɨpʉgha lya vaanhu lɨkalʉtagha kwa mwene, ʉkuo akavavʉlanɨsyagha.

14 Pambele ye ighenda, akamwagha ʉmuunhu jʉmonga, ɨlɨtavua lyake ghwe Leevi, ʉnswambe ghwa Alufaayo, ikalile pano isongekesia ɨsongo. Akamʼbʉʉla akati, “Ʉmbɨngɨlɨlaghe.” Pe akavʉʉka, akamʼbɨngɨlɨla. 15 Pambele ʉYesu na vavʉlanɨsɨvua vaake vakalʉta kʉ kaaja kwa Leevi, vakava vilia ɨkyakʉlia. Avasongesia songo vinga na vahosi valikalile vihanga nʉ Yesu palɨkɨmo na vavʉlanɨsɨvua vaake, ʉlwakʉva avaanhu vinga ndavʉle ava, vakamʼbɨngɨliile. 16 Neke avavʉlanɨsi va ndaghɨlo na Vafalisayi, vakamwagha ʉYesu ihanga ɨkyakʉlia na vasongesia songo na vahosi. Pe vakavaposia avavʉlanɨsɨvua vaake vakati, “Ongo ihanga na vasongesia songo na vahosi?” 17 ɄYesu ye apʉliike isio, akavavʉʉla akati, “Avakafu navifumbua kulʉta kwa mʉghanga, looli avatamu. Fye lʉlɨvuo, nanɨlyakɨsisie kʉkʉvakemeela vano vikuvona vagholofu, looli vano vitangʼhinie kuuva vahosi.”

Ʉlʉposio vwɨmɨla kuvʉhɨɨla kulia mʉlwa kufuunya

(Mataayi 9:14-17; Lʉʉka 5:33-39)

18 AVafalisayi na vavʉlanɨsɨvua va Yohani valyale nʉ lwiho ʉlwa kʉvʉhɨɨla kulia mʉlwa kufuunya ifighono fimonga. Pe avaanhu vamonga vakamposia ʉYesu vakati, “Kɨki avavʉlanɨsɨvua vaako navivɨngɨlɨla ʉlwiho ʉlwa kʉvʉhɨɨla kulia, ndavʉle avavʉlanɨsɨvua va Yohani na vavʉlanɨsɨvua va Vafalisayi?” 19 ɄYesu akavamʉla akati, “Vano vaghongolilue pa vʉtolani, valɨ nʉ ntolanʼdala, navangavʉhɨɨle kulia mʉlwa kufuunya. Ʉnsiki ghwoni pano valɨ nʉ ntolanʼdala navangavʉhɨɨle kulia. 20 Looli, filikwisa ifighono fino ʉntolanʼdala ilivʉsɨvua, apuo pepano vilivʉhɨɨla kulia mʉlwa kufuunya.

21 “Nakwale ʉmuunhu jʉno ihonela ɨkɨgamba ɨkɨpia mʉ mwenda ʉnkʉʉlʉ, nave avombe ʉluo, ɨkɨgamba ɨkio kilekana nʉ mwenda, pe ʉvʉdemʉle vukwongelela kyongo. 22 Kange, avaanhu navivɨɨka ʉlʉhʉʉje ʉlʉpia mʉ nyambe ingʼhʉʉlʉ, nave fye vavombe ʉluo, ʉlʉhʉʉje lupusula inyambe, na kukungʼika. Looli vivɨɨka ʉlʉhʉʉje ʉlʉpia mʉ nyambe imhia.”

ɄYesu Mʼbaha kʉ Sabati

(Mataayi 12:1-8; Lʉʉka 6:1-5)

23 Ɨkɨghono kɨmonga ɨkya Sabati, ʉYesu na vavʉlanɨsɨvua vaake vakava vikila mʉ maghʉnda gha ngano. Pe avavʉlanɨsɨvua vakava videenya amasoojo gha ngano, visoghojola na kulia. 24 AVafalisayi vakamposia ʉYesu vakati, “Kɨki avavʉlanɨsɨvua vaako vivomba lʉno nalʉnoghiile mʉ kɨghono ɨkya Sabati?” 25-26 ɄYesu akavamʉla akati, “Namʉvalile ndavʉle ʉDavɨdi vʉle alyavombile ifighono ifya ntekesi ʉmʼbaha ʉAbiatali? Namukʉmbʉka kuuti ye jɨvavile ɨnjala ʉmwene palɨkɨmo na vanine, akingila mʉ nyumba ɨnyɨmɨke ɨja Ngʉlʉve, akapelua amakate agha pa kɨtekelelo ghano ghaale gha mbombo ɨnyɨmɨke, akalia, akavapeela na vanine? Amakate aghuo navakɨtɨkɨsɨvwagha avaanhu avange kulia, ʉlwene va vatekesi veene.” 27 ɄYesu akafijovagha akatisagha, “ƗSabati javɨkilue kʉkʉntanga ʉmuunhu, jeeje ʉmuunhu kuuva nkami ghwa Sabati. 28 Kwekʉti, ʉne ne Mwana ghwa Muunhu nɨlɨ Mʼbaha kʉ Sabati.”