Mataayi 9

ɄYesu alɨ nʉ vʉtavʉlɨlua ʉvwa kʉpyanɨla inyɨvi

(Malɨka 2:1-12; Lʉʉka 5:17-26)

ɄYesu akapanda ɨngalava, akalovoka ɨlɨsʉmbe ɨlya Galilaya, akagomoka mʉ lɨkaaja lyake ɨlya Kapelenaumu. 2 Pe avaanhu vamonga vakamʉletela ʉmuunhu ʉnya nhamu ɨja lɨteela, aghonile pa kɨteefu. ɄYesu ye alʉvwene ʉlwɨtɨko lwave kwa mwene, akati kwa ntamu, “Mwanango, ghukangasie! Ʉpyanilue inyɨvi saako.”

3 Pe avavʉlanɨsi va ndaghɨlo vamonga vakasaagha mʉ moojo ghaave vakati, “Ʉmuunhu ʉjʉ ɨkʉmʉligha kyongo ʉNgʉlʉve!” 4 Neke ʉYesu akasitangʼhania sino vakava visaagha, akavaposia akati, “Kɨki musaagha imbiivi mʉ moojo ghiinu? 5 Lɨno, lʉhʉʉgʉ lʉlɨku? Kʉkʉmʼbʉʉla ʉnya lɨteela kuuti, ‘Ʉpyanilue inyɨvi saako,’ nambe kuuti, ‘Ɨma, ʉghendaghe’? 6 Lɨno pe mʉkagʉle kuuti, ʉne ne Mwana ghwa Muunhu nɨlɨ nʉ vʉtavʉlɨlua ʉvwa kʉpyanɨla inyɨvi mʉ ɨɨsi muno.” Pe akamʼbʉʉla ʉnya lɨteela akati, “Ɨma, veghala ɨkɨteefu kyako, vujagha.” 7 Ʉmuunhu jʉla akɨɨma, akavʉʉka ivuja. 8 Avaanhu mʉ lɨpʉgha ye vasivwene isio, lʉkavakola ʉlʉdwesi, vakamʉghinia ʉNgʉlʉve jʉno avapeliile avaanhu ʉvʉtavʉlɨlua ndavʉle ʉvuo.

ɄYesu ihanga na vahosi

(Malɨka 2:13-17; Lʉʉka 5:27-32)

9 ɄYesu akavʉʉka pala. Ye ighenda ilʉta, akamwagha ʉmuunhu jʉmonga, ɨlɨtavua lyake ghwe Mataayi, ikalile pano isongekesia ɨsongo. ɄYesu akamʼbʉʉla akati, “Ʉmbɨngɨlɨlaghe.” Pe akavʉʉka, akamʼbɨngɨlɨla. 10 Pe ʉYesu akalʉta kulia ɨkyakʉlia kwa Mataayi. Ye valɨ mʉ nyumba jɨla, vakingila avasongesia songo vinga na vahosi, vakikala vihanga ɨkyakʉlia nʉ Yesu palɨkɨmo na vavʉlanɨsɨvua vaake. 11 AVafalisayi ye vasivwene isio, vakavaposia avavʉlanɨsɨvua vaake vakati, “Kɨki ʉmʼbʉlanɨsi ghwinu ihanga ɨkyakʉlia na vasongesia songo na vahosi?” 12 Neke ʉYesu ye apʉliike isio, akavavʉʉla akati, “Avakafu navifumbua kulʉta kwa mʉghanga, looli avatamu! 13 Lɨno, lʉtagha mʉkamanyɨle ʉmʉlʉvo ghwa masio agha, ‘Nilonda ʉmuunhu avisaghe nya lʉsʉngʉ kukila kuhʉmia ɨlɨtekelo,’ ʉlwakʉva ʉne nanɨlyakɨsisie kʉkʉvakemeela vano vikuvona vagholofu, looli vano vitangʼhinie kuuva vahosi.”

Ʉlʉposio vwɨmɨla kuvʉhɨɨla kulia mʉlwa kufuunya

(Malɨka 2:18-22; Lʉʉka 5:33-39)

14 Pambele avavʉlanɨsɨvua va Yohani ʉMwofughi vakalʉta kwa Yesu, vakamposia vakati, “Ʉsue na Vafalisayi twatuvʉhɨɨla kulia mʉlwa kufuunya, ongo avavʉlanɨsɨvua vaako navivɨngɨlɨla ʉlwiho ʉluo?” 15 ɄYesu akavamʉla akati, “Vano vaghongolilue pa vʉtolani valɨ nʉ ntolanʼdala, lwakɨki vasukunalaghe? Looli filikwisa ifighono, pano ʉntolanʼdala ilivʉsɨvua. Apuo pepano vilivʉhɨɨla kulia mʉlwa kufuunya. 16 Nakwale ʉmuunhu jʉno ihonela ɨkɨgamba ɨkɨpia mʉ mwenda ʉnkʉʉlʉ, ʉlwakʉva ɨkɨgamba ɨkio kidemʉla ʉmwenda ʉnkʉʉlʉ ʉghuo, pe ʉvʉdemʉle vukwongelela kyongo. 17 Kange, avaanhu navivɨɨka ʉlʉhʉʉje ʉlʉpia mʉ nyambe ingʼhʉʉlʉ, nave fye vavombe ʉluo, inyambe sipusuka, ʉlʉhʉʉje lukungʼika nasi nyambe sinangɨka. Looli vivɨɨka ʉlʉhʉʉje ʉlʉpia mʉ nyambe imhia, pe inyambe nʉ lʉhʉʉje fijigha vʉnofu!”

ɄYesu ɨkʉnsosia ʉmʉkɨjʉʉva na kʉkʉnsyʉsia ʉmhɨnja

(Malɨka 5:21-43; Lʉʉka 8:40-56)

18 ɄYesu ye ɨkʉvavʉʉla amasio aghuo, akiisa ʉmʉlongosi jʉmonga, akafughama pa mwene, akamʼbʉʉla akati, “Ʉmwalɨvango afwile ʉnsiki ghʉghʉʉghʉ, sivuo tʉvʉʉke ʉvɨɨke ʉlʉvoko lwako pa mwene, neke aave mwʉmi.” 19 Pe ʉYesu akavʉʉka palɨkɨmo na vavʉlanɨsɨvua vaake, akamʼbɨngɨlɨla ʉmʉlongosi jʉla. 20 Pwealyale ʉmʉkɨjʉʉva jʉmonga jʉno alyale nɨ nhamu ɨja kʉhʉma ɨdanda. Ɨnhamu ɨjio jɨlyampumwisie amaaka kɨjigho na ghavɨlɨ. Ʉmʉkɨjʉʉva ʉjuo akiisa kʉnsana kwa Yesu, akabasia ʉlʉvilo ʉlwa mwenda ghwake. 21 Akavomba ʉluo ʉlwakʉva akasaghagha kuuti, “Nɨngabasie ghʉ mwenda ghwake, nisooka.” 22 Ye abasisie, ʉYesu akasyetʉka, akamwagha, akamʼbʉʉla akati, “Mwalɨvango, kangala! Ʉsokile vwɨmɨla ʉlwɨtɨko lwako!” Ʉnsiki ghʉla ghʉla, ʉmʉkɨjʉʉva jʉla akasooka.

23 ɄYesu ye afikile mʉ nyumba ɨja mʉlongosi jʉla, akavaagha avaanhu vinga vakongʼhanile, vilɨla nʉ lʉsukunalo ʉlʉkome, vamonga vikʉva ifilongilongi. 24 ɄYesu akavavʉʉla akati, “Mʉvʉʉke! Ʉlwakʉva ʉmhɨnja ʉjʉ naafwile, looli aghoneliile!” Avaanhu vala vakanseka kyongo. 25 Ʉmwene akavahʉmia kʉnji avaanhu vala, pe akingila kʉkate kwa mhɨnja jʉla, akankola ʉlʉvoko, ʉmhɨnja jʉla akɨɨma. 26 Imhola isio sikakwɨla mʉ ɨɨsi jooni.

ɄYesu ɨkʉvasosia avabofu amaaso

27 ɄYesu akavʉʉka pa kaaja ja mʉlongosi jʉla. Ye avʉkile pala avabofu amaaso vavɨlɨ, vakamʼbɨngɨlɨla kʉmo vikemeela fiijo viiti, “Ghwe Mwana ghwa Davɨdi, ʉtʉsʉngʉkɨle!” 28 ɄYesu akingila mʉ nyumba, voope avabofu vala vakingila. Pe akavaposia akati, “Asi, mukwɨtɨka kuuti ʉne nɨlɨ ni ngʉfu isa kʉvasosia?” Aveene vakamwamʉla vakati, “Eena, Mʉtwa! Tukwɨtɨka.” 29 Pe ʉYesu akavabasia amaaso ghaave, akavavʉʉla akati, “Sivombeke kʉlyʉmue ndavʉle lʉlɨvuo ʉlwɨtɨko lwinu.” 30 Amaaso ghaave ghakadinduka. Pe ʉYesu akavavʉʉla akati, “Namʉngamʼbʉlaghe nambe muunhu imhola isi!” 31 Neke aveene vakavʉʉka, vakakwɨsia imhola saake mʉ ɨɨsi jɨla jooni.

ɄYesu ɨkʉnsosia ʉkɨnuunu

32 Avaanhu vavɨlɨ avuo ye vavʉkile pala, avaanhu vamonga vakamʉletela ʉYesu ʉmuunhu jʉno alyale nɨ lɨpepo. Ɨlɨpepo ɨlio lɨlyampeleliile kuuva kɨnuunu. 33 Pe ʉYesu akalɨdaga ɨlɨpepo lɨla, ʉnsiki ghʉghuo ʉmuunhu jʉla akatengʉla kujova kange. Avaanhu vano pwevalyale pala vakadegha kyongo, vakati, “Isi nasighelile kuvoneka nambe padebe mʉ ɨɨsi jooni ɨja Isilaeli!” 34 Neke aVafalisayi vakatisagha, “Ʉmuunhu ʉjʉ, idaga amapepo mʉ ngʉfu isa lɨvaha lya mapepo!”

Ifiinu finga neke avanya kʉpeta vadebe

35 Pe ʉYesu akava ilʉta mʉ makaaja ghooni na mʉ fikaaja. Akava ikwingila mʉ masinagogi ghaave ivʉlanɨsia na kupʉlɨsia ɨMhola ɨNofu ɨja Vʉtwa vwa Ngʉlʉve, kange akavasosyagha avatamu inhamu saave sooni. 36 Ye ɨkʉlɨvona ɨlɨpʉgha ɨlya vaanhu, akavavonela ɨkɨsa, ʉlwakʉva valyale vihangajɨka, navalyale nʉ ghwa kʉvatanga, valyale hwene ngʼholo isila nʼdɨɨmi. 37 Pe akavavʉʉla avavʉlanɨsɨvua vaake akati, “Mʉ mʉghʉnda ifiinu fimotwike, neke avanya kʉpeta vadebe. 38 Lɨno, mʉnsʉʉme ʉnya mʉghʉnda, asuungʼhe avaanhu avange avanya kʉpeta.”