Lʉʉka 4

ɄYesu ighelua nʉ Setano

(Mataayi 4:1-11; Malɨka 1:12-13)

ɄYesu akavʉʉka pa kɨkogha ɨkya Yolidani ilongosivua nʉ Mhepo ʉMwɨmɨke. ɄMhepo ʉMwɨmɨke akantwala kʉ lɨhaka. 2 Ʉkuo akava ighelua nʉ Setano ifighono fijigho fine. Ifighono fyoni ifio naalyaliile kɨmonga, pe jɨkamʼbava kyongo ɨnjala. 3 Pepano ʉSetano akamʼbʉʉla ʉYesu akati, “Nave ʉve ʉlɨ Mwana ghwa Ngʉlʉve, lɨvʉʉle ɨlɨvue ɨlɨ lɨhambʉke lɨɨve nkate.” 4 ɄYesu akamwamʉla akati, “Mʉ Malembe aMɨmɨke lɨlembilue ndɨɨkɨ, ‘Ɨkyakʉlia kyene nakɨkʉmʼbɨɨka ʉmuunhu kuuva mwʉmi.’ ”

5 Pepano ʉSetano akantwala ʉYesu pamonga pano pinwike fiijo, akansoona ɨɨsi sooni palɨkɨmo nʉ vʉvaha vwake mʉ kasiki kamo. 6-7 ɄSetano pe akati, “Ʉngafughame na kʉkʉnyɨmɨka, nɨkʉkʉpeela ʉvʉtavʉlɨlua vwa vʉtwa ʉvʉ vwoni nʉ vʉmofu vwake, ʉlwakʉva ʉvʉtavʉlɨlua ʉvʉ vwoni vwango, neke ʉne nɨkʉmpeela ʉmuunhu ghweni mʉ vughane vwango.” 8 Ʉmwene ʉYesu akamwamʉla akati, “Mʉ Malembe aMɨmɨke lɨlembilue ndɨɨkɨ, ‘Ʉmwɨmɨkaghe ʉMʉtwa ʉNgʉlʉve ghwako, kange ʉmʼbombelaghe jʉjuo mwene.’ ”

9 Pe ʉSetano akamʉlongosia ʉYesu kʉ Yelusalemu, akamʼbɨɨka pakyanya fiijo apa nyumba ɨnyɨmɨke ɨja kufunyila. Akamʼbʉʉla akati, “Nave ʉve ʉlɨ Mwana ghwa Ngʉlʉve, ghujughuje paasi, 10 ʉlwakʉva mʉ Malembe aMɨmɨke lɨlembilue ndɨɨkɨ,

‘ɄNgʉlʉve isuungʼha avanyamhola vaake,

vakʉlolelele.’

11 Kange, ‘vikʉkwangʼa mʉ mavoko ghaave

kuuti ʉleke pighua pa lɨvue na kulemala.’ ”

12 ɄYesu akamwamʉla akati, “Mʉ Malembe aMɨmɨke lɨlembilue kuuti, ‘Nʉngamʉghelaghe ʉMʉtwa, ʉNgʉlʉve ghwako.’ ” 13 ɄSetano ye amalile kʉkʉmʉghela ʉYesu mʉ sɨla sooni isio, akamʉleka taasi.

ɄYesu itengʉla ɨmbombo kʉ Galilaya

(Mataayi 4:12-17; Malɨka 1:14-15)

14 Pepano ʉYesu akagomoka alɨ ni ngʉfu sa Mhepo ʉMwɨmɨke, akalʉta kʉ Galilaya. Imhola saake sikakwɨla mʉ ɨɨsi jɨla jooni. 15 Ʉmwene akava ivʉlanɨsia mʉ masinagogi ghaave, neke avaanhu vooni vano valyampʉliike, vakava vikʉmʉghinia.

ɄYesu ikanua kʉvanave kʉ Nasaleti

(Mataayi 13:53-58; Malɨka 6:1-6)

16 Pambele ʉYesu akafika kʉ kɨkaaja ɨkya Nasaleti, kʉno alyakʉliile. Ɨkɨghono ɨkya Sabati akingila mʉ sinagogi, ndavʉle lwale lwiho lwake. Akɨɨma kuuti ɨmbe aMalembe aMɨmɨke. 17 Akapelua ɨkɨtabu kya mʼbɨli ʉYesaya, pe ʉmwene akavalʉla pa vʉlembe vʉno vwiti,

18 “ɄMhepo ghwa Mʉtwa ʉNgʉlʉve alɨ nuune,

ʉlwakʉva ʉNgʉlʉve asalwile

kʉkʉvavʉʉla avapɨɨna ɨMhola ɨNofu.

Asungʼhile kʉkʉvavʉʉla vano valɨ mʉ ndinde,

ɨmhola ɨja vwavʉke vwave,

nava vabofu ɨmhola ɨja kʉlola kange,

asungʼhile kʉkʉvapoka vano vamenilue.

19 Kange, kupʉlɨsia ʉnsiki ghʉno ʉMʉtwa ʉNgʉlʉve,

ikwisa kʉkʉvafuunya avaanhu.”

20 Ye ɨmbile, akadinda ɨkɨtabu kɨla, akanʼgomokesia ʉmʼbombi ʉghwa mʉ sinagogi, akikala atengʉle kuvʉlanɨsia. Neke avaanhu vooni vano mwevalyale mʉ nyumba jɨla vakamʉlʉngʉvalɨla. 21 Pe akatengʉla kʉkʉvavʉʉla akati, “Isi sino mʉpʉliike nikwɨmba, ʉmʉsyʉghʉ sivoniike.” 22 Vooni vakakeela kyongo, vakava videgha amasio amanono ghano ajovile, vakatisagha, “Ʉjʉ naghwe mwana ghwa Yosefu?”

23 Neke ghwope akavavʉʉla akati, “Nɨkagwile, mulʉta pijova ʉlʉjovo ʉlʉ, ‘Ghwe mʉghanga, isosie jʉʉve!’ Imbombo sino tʉpʉliike ʉvombile kʉ kɨkaaja ɨkya Kapelenaumu, ʉvombe na bahaapa pa kɨkaaja kyako jʉʉve.” 24 Akafijovagha akatisagha, “Kyangʼhaani nɨkʉvavʉʉla, nakwale ʉmʼbɨli jʉno ikwʉpɨlua na vaanhu ava mʉ kɨkaaja kyake.

25 “Ifighono fya Eliya, ɨfula najɨlyatonyile amaaka ghatatu na meesi ntanda, ɨnjala ɨmbaha jɨkaghua mʉ ɨɨsi jooni ɨja Isilaeli. Kyangʼhaani nɨkʉvavʉʉla, ʉnsiki ʉghuo kwevalyale avafwɨle vinga mʉ ɨɨsi jɨla. 26 Neke ʉEliya naalyasungʼhilue kwa jʉmonga nkate mʉ vafwɨle vala ava mʉ ɨɨsi ɨja Isilaeli, looli alyasungʼhilue kwa mfwɨle ʉghwa mʉ ɨɨsi ɨja Sidoni mʉ lɨkaaja lya Saleputa. 27 Kange, ifighono ifya mʼbɨli ʉElisha mʉ ɨɨsi ɨja Isilaeli, kwevalyale avaanhu vinga avanya bʉʉba. Neke nakwealyale nambe jʉmo jʉno alyavalasivue, looli jʉ Naimani mwene ʉmhʉma kʉ ɨɨsi ɨja Silia.”

28 Neke avaanhu vooni vano valyale mʉ sinagogi, ye vapʉliike amasio aghuo, vakakalala kyongo. 29 Pala pala, vakɨɨma, vakamhʉmia ʉYesu mʉ kɨkaaja kyave kɨno kɨlyale pakyanya pa kɨdunda. Apuo pe vakava vilonda kʉkʉnkungʼilisia kʉ lɨghemu kuuti aghue paasi. 30 Neke ʉmwene akakila pakate pa veene, akavʉʉka ilʉta.

ɄYesu idaga ɨlɨpepo

(Malɨka 1:21-28)

31 Pambele, ʉYesu akalʉta kʉ lɨkaaja ɨlya Kapelenaumu, lɨno lyale mʉ kɨghavo ɨkya Galilaya. Ɨkɨghono ɨkya Sabati, akingila mʉ sinagogi, akatengʉla kuvʉlanɨsia avaanhu. 32 Avaanhu vakadegha kyongo vwɨmɨla imbʉlanɨsio saake, ʉlwakʉva silyale nʉ vʉtavʉlɨlua.

33 Neke mʉ sinagogi jɨla, mwealyale ʉmuunhu ʉnya lɨpepo ɨlɨlamafu, akakoola fiijo, 34 akati, “Ʉve ghwe Yesu ghwe Mʉnasaleti, tʉlɨ vʉki nuuve? Ghwisile kʉkʉtʉtipula? Nɨkagwile kuuti ʉve ʉlɨ Mwɨmɨke ghwa Ngʉlʉve.” 35 ɄYesu akalɨhwetʉkɨla ɨlɨpepo ɨlɨlamafu akati, “Kɨmihe! Hʉma mwa muunhu ʉjʉ!” Ɨlɨpepo lɨla lɨkamʉghwɨsia pakate pa veene, lɨkahʉma kɨsila kʉmʉlemasia. 36 Avaanhu vooni vakadegha kyongo, vakijovasyagha veene viiti, “Isi sa kʉdegha kyongo! Ʉmuunhu ʉjʉ idaga amapepo amalamafu mʉ ngʉfu nʉ vʉtavʉlɨlua vwake, neke ghoope ghihʉma!” 37 Imhola isa Yesu sikakwɨla mʉ ɨɨsi jɨla jooni.

ɄYesu isosia avatamu vinga

(Mataayi 8:14-17; Malɨka 1:29-39)

38 ɄYesu akahʉma mʉ sinagogi jɨla, akalʉta kʉ nyumba ja Simoni. Ye afikile, akamwagha ʉnkwive ghwa Simoni, kwekʉti ʉngʼina ghwa nʼdala, jɨnkolile kyongo ɨmhʉngʉ, vakansʉʉma ʉYesu ansosie. 39 Pepano akɨɨma piipi nʉ ntamu, akajɨdalɨkɨla ɨmhʉngʉ jɨla, pala pala ʉntamu akasooka, akɨɨma akatengʉla kʉkʉvatengelela.

40 Ɨlɨjʉva ye liseema, avaanhu vooni vano valyale na vatamu avanya nhamu sino sili papinga, vakantwalɨla ʉYesu avatamu vaave. Ʉmwene akavabasyagha, vooni akavasosia. 41 Kange, akaghadaga amapepo mʉ vaanhu vinga, neke ghakahʉma ghikoola ghiiti, “Ʉve ʉlɨ Mwana ghwa Ngʉlʉve!” Akaghadalɨkɨla, naakaghaleka ghajove nambe padebe, ʉlwakʉva ghalyantangʼhinie kuuti ghwe Kɨlɨsite.

42 Ɨkɨghono ɨkɨngɨ ye kʉkiile, ʉYesu akahʉma mʉ lɨkaaja lɨla akalʉta pamonga pa vʉsyefu pavʉsila vaanhu. Ɨlɨpʉgha ɨlɨvaha ɨlya vaanhu vakatengʉla kʉkʉmʉlonda, vakafika pano pwealyale. Ye vamwaghile, vakatengʉla pikʉnsigha kuuti aleke pivʉʉka kʉ veene. 43 Neke ʉmwene akavavʉʉla akati, “Nɨnoghiile kupʉlɨsia ɨMhola ɨNofu ɨja Vʉtwa vwa Ngʉlʉve na mʉ makaaja aghange, ʉlwakʉva ʉluo lwe nɨlyasungʼhilue kuvomba.” 44 Pepano ʉYesu akalʉta mʉ makaaja minga agha Yudea, ipʉlɨsia mʉ masinagogi ghaave.