عیسانی اُلدورمِک بارادا دیلبیرلِشیک
۱۴
پِسَح و پِتیر بایرامینا ایکی گون قالیپدی. یُلباشچی کاهینلار، دین عُلَمالار عیسانی حیله بیلِن توتوپ، اُلدورمِگینگ یُلونی آغتاریاردیلار.
مَرقُس ۱۴:۱-۲۶
بیر آیال عیسانینگ باشینا یاغ قوییار
۳ عیسی بِیت‌عَنیادا جُزامی شمعونینگ اُیونده ساچاق باشیندا اُتیرقا، بیر آیال آغزی مُهورلِنِن مِرمِر قاپدا باهالی صاپ-آراسّا سُنبُل یاغینی آلیپ گِلدی، آغزینداقی مُهری دُودی-ده، یاغی اُنونگ دِپه‌سیندِن قویدی.
۴ کَبیرلِری قاهارلانیپ، بیری-بیرلِرینه: «نَمه اوچین بو یاغ بِیله حایپ اِدیلدی؟
۵ مونی بیر ییل‍لیق قازانچ پولوندان هِم قیماتلی ساتیپ، قاریپلارا پایلاپ بُلاردی آخیری» دییشیپ، آیالا کَییندیلِر.
۶ اِمّا عیسی اُلارا: «آیالا دِگمَنگ، نَمه اوچین اُنی اینجیدیارسینگیز؟ اُل مِنینگ اوچین عجاییپ ایش اِتدی.
۷ چونکی قاریپلار هِمیشه سیزینگ یانینگیزدا، اُلارا ایسلَن واقتینگیز یاخشیلیق اِدیپ بیلِرسینگیز، اِمّا مِن هِمیشه یانینگیزدا بُلمارین.
۸ بو آیال اِلینده بارینی اِتدی، اُل بِدِنیمه عاطیر قویوپ، مِنی جایلاماغا اُووندِن تاییارلادی.
۹ سیزه دُغروسینی آیدیارین، خوش خابار دونیَه‌نینگ نیرِسینده آیدیلسا، بو آیالینگ اِدِنی-ده شُل یِرده یادلانار» دییدی.
یهودانینگ خایینلیغی
۱۰ اُنسُنگ اُن ایکیلِرینگ بیری بُلان یهودا اِسخریوطی عیسی خایینلیق اِتمِک اوچین یُلباشچی کاهینلارینگ یانینا گیتدی.
۱۱ اُلار مونی اِشیدیپ بِگِندیلِر، اُنگا پول بِرمَگه سُز بِردیلِر. اُل عیسانی اُلارا تابشیرماق اوچین، قاوی فُرصَتینگ ایزیندا گِزدی.
پِسَح بایرامی
۱۲ پِسَح قربانی اِدیلیَن گونی، یَعنی پِتیر بایرامینینگ اَوَّلکی گونی شَگیرتلِری عیسادان: «پِسَح شامینی اییمِگینگ اوچین، نیرَه باریپ تاییارلیق گُرمِگیمیزی ایسلِیَرسینگ؟» دییّپ سُرادیلار.
۱۳ عیسی شَگیرتلِرینینگ ایکیسینی یُلّاپ، اُلارا: «شَهره بارینگ، کویزه بیلِن سو آلیپ باریان بیر آداما ساتاشارسینگیز، شُنونگ ایزینا دوشوپ گیدینگ.
۱۴ اُل نیرَه باریپ گیرسه، شُل اُیونگ اِیه‌سینه: ”شَگیرتلِریم بیلِن پِسَح شامینی اییِر یالی، میهمان اُتاقی نیرِده دییّپ اُستاد سُرایار“ دییّنگ.
۱۵ اُل هِم یُقارقی مِرتِبه‌دَه دوشِلیپ، تاییار گینگ بیر اُتاقی گُرکِزِر. شُل یِرده تاییارلیق گُرونگ» دییدی.
۱۶ شَگیرتلِر یُلا دوشوپ، شَهره گِلدیلِر. هِمّه زادی عیسانینگ آیدیشی یالی تاپیپ گُردولِر و پِسَح شامینی تاییارلادیلار.
۱۷ آغشام عیسی اُن ایکی شَگیرتلِر بیلِن بیله گِلدی.
۱۸ ساچاق باشیندا شام اییّپ اُتیرقالار، اُل: «سیزه دُغروسینی آیدیارین، مِنینگ بیلِن شام اییّپ اُتوران بیرینگیز، مانگا خایینلیق اِدِر» دییدی.
۱۹ اُلار هِم قینانیپ، ایزلی-ایزینا اُندان: «مِن شُل دَلمی؟» دییّپ سُراماغا باشلادیلار.
۲۰ عیسی اُلارا: «اُل اُن ایکیلِردِن بیری، مِنینگ بیلِن بیله اُقارا چُرِک باتیریپ اُتورانینگ بیری.
۲۱ هاووا، اینسان اُغلی اُزی حاقدا یازیلیشی یالی جان بِرِر، اِمّا اینسان اُغلونا خایینلیق اِدِنینگ حالینا وای! اُل آدام اِنه‌دِن دُغمادیق بُلسا، اُنونگ اوچین خاص قاوی بُلاردی» دییدی.
۲۲ شام اییّپ اُتیرقالار، عیسی چُرِک آلیپ، شوکور اِتدی و اُنی بُلوپ شَگیرتلِرینه بِردی-ده: «آلینگ، بو مِنینگ بِدِنیمدیر» دییدی.
۲۳ اُنسُنگ بیر کَسه شِراب آلیپ، شوکور اِدِنیندِن سُنگ، اُلارا بِردی، هِمّه‌سی اُندان ایچدی.
۲۴ سُنگرا عیسی اُلارا: «بو مِنینگ کَن آداملار اوچین دُکولیَن تَزه عَهد قانیمدیر.
۲۵ سیزه دُغروسینی آیدیارین، خودایینگ پادیشاهلیغیندا تَزه‌سینی ایچجِک گونومه چِنلی اوزوم شِرابینی قایتادان ایچمِرین» دییدی.
۲۶ اُلار خودایا اُوگی آیدیمی آیدانلاریندان سُنگ، زِیتون داغینا چیقدیلار.
عیسی پِطرُسینگ اینکَر اِتجِکدیگینی آیدیار
۲۷ عیسی شَگیرتلِرینه: «سیزینگ هِمَّه‌نگیز مِندِن اِل چِکِرسینگیز، سِبَبی ”چُپانی اورارین، قُیونلار پیتراپ گیدِر“ دییّپ یازیلاندیر.*
مَرقُس ۱۴:۲۷-۵۲
۲۸ اِمّا مِن دیرِلِنیمدِن سُنگ، سیزدِن اُنگ جلیلَه بارارین» دییدی.
۲۹ پِطرُس اُنگا: «هِمّه‌لِر سِنی تِرک اِتسه-ده، مِن بِیله اِتمِرین» دییدی.
۳۰ عیسی اُنگا: «سانگا دُغروسینی آیدیارین: شو گون گیجه خُرُز ایکی گِزِک قیغیریانچا، سِن مِنی تانییاندیغینگی اوچ گِزِک اینکَر اِدِرسینگ» دییدی.
۳۱ اِمّا پِطرُس جانچِکیپ: «مِن سِنینگ بیلِن اُلمِلی بُلسام-دا، سِنی آصلا اینکَر اِتمِرین» دییدی. شَگیرتلِرینگ هِمّه‌سی-ده شِیله دییدیلِر.
جِتسیمانی باغیندا
۳۲ اُلار جِتسیمانی دییِن بیر یِره گِلدیلِر. عیسی شَگیرتلِرینه: «سیز شو یِرده قاراشینگ، مِن گیدیپ، خودایا دُغا اِتجِک» دییدی.
۳۳ عیسی پِطرُسی، یعقوبی و یوحنانی اُزی بیلِن اَکیتدی. عیسی آغیر دِرد چِکیپ، قایغیلانماغا باشلادی.
۳۴ اُلارا: «مِنینگ جانیم اُلِر یالی غاملی، سیز بو یِرده قالینگ-دا، اُیا بُلونگ» دییدی.
۳۵ عیسی بیرآز اُوه یُرِدی-ده، یِره یوزین دوشوپ: «مومکین بُلسا، شو قینانچ واقت مِندِن داشلاشسین» دییّپ دُغا اِتدی.
۳۶ اُل: «آبّا*، آتام، سِن هِمّه زادی باشاریارسینگ. بو عاذاپ کَسه‌سینی مِندِن داشلاشدیر، یُنه مِنینگ خاییشیم دَل، سِنینگ ایسلِگینگ بُلسون» دییدی.
۳۷ عیسی شَگیرتلِرینینگ یانینا قایدیپ گِلِنده، اُلار اوقلاپ یاتیردیلار. عیسی پِطرُسا: «اوقلاپ یاتیرسینگمی؟ بیر ساغات-دا اُیا بُلوپ بیلمِدینگمی؟
۳۸ اُیا بُلونگ، وِسوِسَه دوشمِز یالی، دُغا اِدینگ. روح ماییلدیر، اِمّا بِدِن ناتوواندیر» دییدی.
۳۹ عیسی یِنه گیدیپ، شُل اُوالقی سُزلِری آیدیپ دُغا اِتدی.
۴۰ ایزینا قایدیپ گِلِنده، شَگیرتلِری یِنه اوقلاپ یاتیردیلار، سِبَبی اُلارینگ گُزلِری آغیر اوقیدادی. اُلار اُنگا نَمه دییجِکلِرینی بیلمِدیلِر.
۴۱ عیسی اوچونجی گِزِک گِلیپ، اُلارا: «سیز هِنیزِم اوقلاپ یاتیرسینگیزمی؟ دینجینگیزی آلیارسینگیزمی؟ بُلدی، واقت گِلدی، اینسان اُغلی گونَه‌کَرلِرینگ اِلینه بِریلیَر.
۴۲ تورونگ، گیدِلینگ، اینه، مانگا خایینلیق اِدِن قُلایلادی» دییدی.
عیسی توتولیار
۴۳ عیسی هِنیز کِپلَپ دورقا، اُن ایکی شَگیرتلِرینگ بیری بُلان یهودا گُرنوپ باشلادی. اُنونگ یانیندا یُلباشچی کاهینلار، دین عُلَمالار و یاشولیلار طارافیندان ایبِریلِن قیلیچلی، تایاقلی بیر جِماغات باردی.
۴۴ عیسی خایینلیق اِدِن یهودا اُلارا: «مِن کیمی اُغشاسام، عیسی شُلدور. اُنی توتونگ-دا، قُریپ آلیپ گیدینگ» دییّپ کِپلِشیپدی.
۴۵ اُل گِلیپ-گِلمَگَه عیسانینگ یانینا باردی-دا: «اُستاد!» دییّپ، اُنی اُغشادی.
۴۶ اُنسُنگ آداملار عیسانی توتوپ، باسدیلار.
۴۷ عیسانینگ یانیندا دورانلارینگ بیری قیلیجینی چِکیپ، باش کاهینینگ خیدماتکَرینی اوروپ، اُنونگ قولاغینی کِسدی.
۴۸ عیسی اُلارا: «نَمه اوچین بیر یُل کِسِنینگ قارشیسینا چیقیان یالی، مِنی توتماق اوچین قیلیچلی هِم تایاقلی گِلیپسینگیز؟
۴۹ هِر گون عیباداتخانادا آرانگیزدا بُلوپ، سیزه اُورِدیَردیم، شُندا مِنی توتماندینگیز. یُنه، قُی، مُقادِّس یازغیلار بِرجای بُلسون» دییدی.
۵۰ شَگیرتلِرینینگ باری اُنی قُیوپ قاچیپ گیتدیلِر.
۵۱-۵۲ یالانگاچ بِدِنینی پارچا بیلِن اُرتِن بیر یاش ییگیت عیسانینگ ایزینا دوشوپ باریاردی. سِربازلار اُنی هِم توتدولار، اِمّا اُل پارچاسینی زینگیپ، یالانگاچ حالدا اُلاردان قاچیپ گیتدی.
عیسی مِجلِسینگ اُوونده
۵۳ عیسانی باش کاهینینگ یانینا گِتیردیلِر. هِمّه یُلباشچی کاهینلار، یاشولیلار و دین عُلَمالار اُل یِره ییغنانیپدیلار.
مَرقُس ۱۴:۵۳-۷۲
۵۴ پِطرُس باش کاهینینگ حایاطینا چِنلی قارانگقیلیق بیلِن عیسانینگ ایزینا دوشوپ گیتدی. اُل هِم ساقچیلار بیلِن بیله حایاطدا اُدا چُیونیپ اُتیردی.
۵۵ یُلباشچی کاهینلار و هِمّه مِجلِس عیسی اُلوم جِزاسینی بِرمِک اوچین، اُنگا قارشی یالان دِلیل‍لِر آغتاردیلار، یُنه تاپیپ بیلمِدیلِر.
۵۶ کَن آداملار اُنگا قارشی یالان شاهاتلیق بِرسِلِر-ده، اُلارینگ شاهاتلیغی بیر چیقمادی.
۵۷ اُنسُنگ کَبیرلِری توروپ، اُنگا قارشی یالان شاهاتلیق بِریپ:
۵۸ «بیز اُنونگ: ”مِن اینسان اِلی بیلِن سالنان شو عیباداتخانانی ییقیپ، اوچ گونونگ ایچینده اِل بیلِن سالینمادیق باشغا بیر عیباداتخانا سالارین“ دییِنینی اِشیتدیک» دییدیلِر.
۵۹ اِمّا اُلارینگ شاهاتلیقلاری بیر چیقمادی.
۶۰ سُنگرا باش کاهین مِجلِسینگ اُرتاسیندا یِریندِن توروپ، عیسادان: «سِنده هیچ هیلی جُغاپ یُقمی؟ بو آداملارینگ سِنینگ قارشینگا بِریَن شاهاتلیغی نَمه؟» دییّپ سُرادی.
۶۱ عیسی کِپلِمِدی، هیچ بیر جُغاپ بِرمِدی. باش کاهین یِنه اُندان: «بِییک خودایینگ اُغلی – مسیح سِنمی؟» دییّپ سُرادی.
۶۲ عیسی: «مِندیرین! سیز اینسان اُغلونینگ قودراتلی‌گویچلینینگ ساغیندا اُتورانینی و آسمانینگ بولوتلاریندا گِلیَنینی گُرِرسینگیز» دییدی.
۶۳ باش کاهین شُندا یاقاسینی ییرتیپ: «بیزه موندان باشغا شاهاتلیق نَمه گِرِک؟
۶۴ اُنونگ خودایا دیل یِتیرِنینی اُزونگیز اِشیتدینگیز آخیرین. نَمه قارارا گِلیَرسینگیز؟» دییّپ سُرادی. اُلارینگ باری عیسانی اُلوم جِزاسینا لاییق دییّپ مَحکوم اِتدیلِر.
۶۵ کَبیرلِری اُنونگ اوستونه تویکوریپ باشلادیلار، گُزلِرینی دانگیپ، اُنی یومروقلاپ: «وِلیلیک اِت!» دییّشیَردیلِر. ساقچیلار-دا اُنی آرالارینا آلیپ اوردولار.
پِطرُس عیسانی اینکَر اِدیَر
۶۶ پِطرُس حایاطینگ آشاق طارافیندا دورقا، باش کاهینینگ کِنیزلِریندِن بیری گِلدی.
۶۷ اُل چُیونیپ اُتوران پِطرُسی گُرِنده، اُنگا دیقّاتلی: «سِن هِم شُل ناصِره‌لی عیسی بیلِندینگ» دییدی.
۶۸ اِمّا پِطرُس مونی اینکَر اِدیپ: «مِن سِنینگ نَمه حاقدا کِپلِیَنینگی بیلمِیَریم، دوشونمِیَریم» دییدی-ده، حایاطینگ داشینا چیقدی. شُل واقت هِم خُرُز قیغیردی.
۶۹ کِنیز پِطرُسی گُرِنده، یانینداقیلارا: «بو آدام شُلارینگ بیری» دییّپ، یِنه-ده آیتدی.
۷۰ اِمّا پِطرُس مونی یِنه-ده اینکَر اِتدی. آز سالیمدان اُل یِرده دورانلار پِطرُسا یِنه-ده: «دُغرودان-دا، سِن هِم شُلارینگ بیری، سِبَبی دیلینگدِن بِلّی سِن جلیل‌لی سِن» دییدیلِر.
۷۱ اِمّا اُل قاسام ایچیپ: «خودای اورسون! سیزینگ آیدیان بو آدامینگیزی مِن تانیمییارین» دییدی.
۷۲ اِدیل شُل واقت خُرُز ایکینجی گِزِک قیغیردی. پِطرُس عیسانینگ: «خُرُز ایکی گِزِک قیغیریانچا، سِن مِنی اوچ گِزِک اینکَر اِدِرسینگ» دییِن سُزلِرینی یادلاپ، مُنگّوریپ آغلادی.