عیسی مسیحینگ دُلانیپ گِلمِگینینگ عالاماتلاری
۱۳
عیسی عیباداتخانینگ حایاطیندان چیقاندا، شَگیرتلِرینینگ بیری اُنگا: «اُستاد! سِراِت، نه عجاییپ داشلار، نه عجاییپ بینالار!» دییدی.
مَرقُس ۱۳:۱-۲۷
۲ عیسی اُنگا: «بو بِییک بینالاری گُریَنگمی؟ بو یِرده داش اوستونده داش قالماز، هِمّه‌سی وِیران بُلار» دییدی.
۳ سُنگرا عیسی عیباداتخانینگ قارشیسینداقی زِیتون داغیندا اُتیرقا، پِطرُس، یعقوب، یوحنا و آندرِیاس یِکِلیکده اُندان:
۴ «بیزه آیتسانا، بو زاتلار هاچان بُلار؟ بو زاتلارینگ یِرینه یِتیَندیگینی گُرکِزیَن نَهیلی عالاماتلار بُلار؟» دییّپ سُرادیلار.
۵ اُنسُنگ عیسی اُلارا شِیله دوشوندیرمَگه باشلادی: «خاباردار بُلونگ، هیچ کیم سیزی آلدایماسین!
۶ اِنچِمه‌لِر مِنینگ آدیم بیلِن گِلیپ: ”مِن – شُلدورین“ دییِرلِر. اُلار کَن آداملاری آلدارلار.
۷ سیز اوروش توراندیغی و اوزاقداقی اوروشلار بارادا خابارلاری اِشیدِنینگیزده قُرقمانگ. بولار بُلمالیدیر، یُنه هِنیز دونیَه‌نینگ آخیری دَلدیر.
۸ چونکی میلِّت-میلِّته و حُکومِت-حُکومِته قارشی چیقار. آیری-آیری یِرلِرده یِر تیترِمِلِر و آچلیقلار یوزه چیقار. بو واقالار دُغورما دِردلِرینگ باشلانیانجیسیدیر.
۹ «اِمّا سیز اُزونگیزدِن خاباردار بُلونگ! آداملار سیزی مَحکِمه‌لِره تابشیرارلار، کِنیسه‌لِرینده یِنجِرلِر. مِن سِبَپلی سیز حُکومدارلارینگ، پادیشاهلارینگ اُوونده دورارسینگیز و اُلارا شاهاتلیق اِدِرسینگیز.
۱۰ خوش خابار اَوَّل هِمّه میلِّتلِره حُکمَن واغیظ اِدیلمِلیدیر.
۱۱ سیزی زیندان اِدیپ، مَحکِمَه تابشیرانلاریندا، نَمه دییجِگینگیزی اُووندِن قایغی اِتمَنگ، شُل واقتدا سیزه نَمه بِریلسه، شُنی کِپلَنگ. چونکی کِپلِیَن سیز دَل-ده، مُقادِّس روحدیر.
۱۲ دُغان دُغانینی، آتا فِرزِنتینی اُلومه تابشیرار. فِرزِنتلِر هِم اِنه-آتالارینا قارشی چیقیپ، اُلاری اُلدوردِرلِر.
۱۳ مِنینگ آدیم سِبَپلی هِمّه‌لِر سیزدِن ییگرِنِرلِر، اِمّا آخیرنا چِنلی جیدان نِجات تاپار.
۱۴ «وِیرانچیلیق گِتیریَن ییگرِنجی زادینگ دورمالی دَل یِرده دورانینی گُرِنینگیزده، قُی، یهودیه‌دَکیلِر داغلارا قاچسین. هاووا، دانیال پیغامبارینگ آیدانلارینا اُقییان آدام دُغری دوشونسین.*
۱۵ بامداقی آدام بیر زات آلماق اوچین آشاق دوشوپ، اُیه گیرمِسین.
۱۶ اِکینچیلیگیندَکیلِر دُنونی آلماق اوچین اُیونه دُلانماسین.
۱۷ اُل گونلِرده گُورِلی آیال‍لارینگ و چاغا اِمدیریَنلِرینگ وای گونونه!
۱۸ سیز بو واقا قیشدا بُلماسین دییّپ دُغا اِدینگ.
۱۹ چونکی اُل گونلِرده شِیله بیر قاتی قینچیلیقلار بُلار، خودایینگ یارادان دونیَه‌سینینگ باشیندان تا شو واقتا چِنلی مونونگ یالی زات هیچ هاچان بُلان دَلدیر و بُلمازام.
۲۰ خودای اُل گونلِری قیسغالتمادیق بُلسا، اُندا هیچ کیم نِجات تاپمازدی. اِمّا خودای سایلانان‌لارینگ، یَعنی اُز سایلانلاری‌نینگ خاطیراسینا اُل گونلِری قیسغالتدی.
۲۱ شُندا بیری سیزه: ”اینه، مسیح بو یِرده“ یا-دا ”حُنّا، اُل یِرده“ دییسه، اینانمانگ.
۲۲ چونکی یالان مسیحلِر، یالان نِبیلِر دُرَپ، سایلانان‌لاری-دا مومکین بُلدیغیچا آزدیرجاق بُلوپ، عالاماتلار، مُعجِزه‌لِر گُرکِزِرلِر.
۲۳ خاباردار بُلونگ! مِن هِمّه زادی سیزه اُووندِن آیتدیم.
۲۴ «اِمّا شُل گونلِرده قینچیلیقلاردان سُنگرا، گون قارالار، آی نورینی بِرمِز.
۲۵ ییلدیزلار آسماندان قاچار و آسمانینگ قودراتلاری تیترِشِر.*
۲۶ شُندا اینسان اُغلونینگ بولوتلاردا اولی قودرات هِم بِییکلیک بیلِن گِلیَنینی گُرِرلِر.
۲۷ شُندا اُل پِریشده‌لِری یُلّاپ، اُز سایلانلارینی دونیَه‌نینگ دُرت بورجوندان، یِرینگ اوجوندان تا آسمانینگ اوجونا چِنلی ییغنار.
اینجیر باغیندان آلینمالی دِرس
۲۸ «اینجیر باغیندان دِرس آلینگ: اُنونگ شاخالاری یومشاپ، یاپراق چیقاران واقتی تُمسونگ قُلایلاندیغینی بیلیَرسینگیز.
مَرقُس ۱۳:۲۸-۳۷
۲۹ شُنونگ یالی-دا، بو زاتلاری گُرِنینگیزده، اینسان اُغلونینگ قُلایلاندیغینی، قاپینینگ آغزیندادیغینی بیلینگ.
۳۰ سیزه دُغروسینی آیدیارین، بو زاتلارینگ هِمّه‌سی بُلیانچا، بو نِسل دونیَه‌دِن اُتمِز.
۳۱ آسمان هِم یِر اُتِر، یُنه مِنینگ سُزلِریم آصلا اُتمِز.
بیلینمِیَن گون و ساغات
۳۲ «اِمّا اُل گونی هِم ساغادی هیچ کیم بیلیَن دَلدیر، نه آسمانداقی پِریشده‌لِر، نه-ده اُغول بیلیَندیر، یِکه بیر آتا بیلیَندیر.
۳۳ خاباردار و اُیا بُلونگ! چونکی سیز اُل واقتینگ هاچان گِلجِکدیگینی بیلمِیَرسینگیز.
۳۴ بو بیر اوزاق یُلا چیقان آدام یالیدیر. اُل اُیوندِن چیقیپ باریارقا، خیدماتکَرلِرینه ایختییار بِرِر، هِر هایسینا بیر ایش تابشیرار. قاپیداقی قاراوولا بُلسا اُیا بُلماغی تابشیردی.
۳۵ شُنونگ اوچین اُیا بُلونگ، چونکی سیز اُی اِیه‌سینینگ آغشامّی، یاری گیجه‌می، خُرُز قیغیراندامی، گون دُغاندامی – هاچان گِلجِگینی بیلمِیَرسینگیز.
۳۶ اُل بیردِن گِلیپ، اوقودا اوستونگیزی باسایماسین.
۳۷ سیزه آیدیانلاریمی هِمّه‌لِره-ده آیدیارین: اُیا بُلونگ!»