دول آیالینگ صاداقاسی
۲۱
عیسی قاباغینی قالدیریپ گُزَنده، بایلارینگ عیباداتخانانینگ خازیناسینا اُز صاداقالارینی آتیپ دورانینی گُردی.
لوقا ۲۱:۱-۲۸
۲ اُل بیر قاریپ دول آیالینگ هِم خازینا ایکی کیچی سِکّه آتانینی گُردی.
۳ عیسی: «سیزه دُغروسینی آیدیارین، بو قاریپ دول آیال هِمّه‌لِردِن کَن آتدی.
۴ بو آداملارینگ هِمّه‌سی خازینا اُزلِریندِن آرتانی آتدیلار، بو آیال بُلسا قاریپلیغینا گُزلِمِدِن، بار-یُغونی، اِلیندَکی هِمّه بار پولونی آتدی» دییدی.
عیسی مسیحینگ اُورولیپ گِلمِگینینگ عالاماتلاری
۵ شَگیرتلِردِن کَبیری عیباداتخانانینگ عجاییپ داشلار هِم خودایا باغیش اِدیلِن صاداقالار بیلِن بِزِلِندیگی بارادا سُز آچدیلار. شُندا عیسی:
۶ «شِیله بیر گونلِر گِلِر، شُندا بو یِرده داش اوستونده داش قالماز، گُریَن زاتلارینگیزدان هیچ زات قالمان، هِمّه‌سی دارغار» دییدی.
۷ اُندان: «اُستاد! بو زاتلار هاچان بُلار؟ بولارینگ بُلجاق ماحالیندا نَهیلی عالامات گُرونِر؟» دییّپ سُرادیلار.
۸ اُل: «خاباردار بُلونگ، هیچ کیم سیزی آلدایماسین! اِنچِمه‌لِر ”شُل قاراشیانینگیز – مِندیرین!“ و ”واقت قُلایلادی!“ دییّپ، مِنینگ آدیم بیلِن گِلِرلِر. اُلارینگ ایزینا دوشمَنگ.
۹ اوروشلار هِم قالماغال‍لار بارادا خابار اِشیدِنینگیزده قُرقمانگ. بو زاتلار اُوونچَک بُلمالیدیر، اِمّا هِنیز دونیَه‌نینگ آخیری دَلدیر» دییّپ جُغاپ بِردی.
۱۰ سُنگرا عیسی اُلارا شِیله دییدی: «میلِّت-میلِّته و حُکومِت-حُکومِته قارشی چیقار.
۱۱ آیری-آیری یِرلِرده گویچلی یِر تیترِمِلِر، آچلیق هِم یُغوشیان مِریضچیلیکلِر، قُرقونچ واقالار و آسماندان اولی عالاماتلار بُلار.
۱۲ «اِمّا بو واقالارینگ هِمّه‌سیندِن اُوال، سیزی ایزارلاپ، آزار بِرِرلِر. سیزی اَکیدیپ، کِنیسه‌لِره بِریپ و زیندانلارا زینگارلار. مِن سِبَپلی سیزی پادیشاهلارینگ، حُکومدارلارینگ حوضورینا اِلتِرلِر.
۱۳ بو بُلسا شاهاتلیق اِتمِک اوچین سیزه بیر فُرصَت بُلار.
۱۴ اِمّا سیز اُزونگیزی نَهیلی قُریجاقدیغینگیزی اُووندِن قایغی اِتمِزلیگی یورِگینگیزه دووونگ.
۱۵ مونونگ اوچین مِن سیزه سُز هِم حِکمِت بِرِرین. سیزه قارشی چیقیانلارینگ هیچ بیری مونگا نه قارشی دوروپ بیلِر، نه-ده بیر زات آیدیپ بیلِر.
۱۶ سیزه اِنه-آتانگیز، دُغانلارینگیز، قارینداشلارینگیز، دُستلارینگیز هِم خایینلیق اِدِرلِر، کَبیرینگیزی اُلدورِرلِر.
۱۷ مِنینگ آدیم سِبَپلی هِمّه‌لِر سیزی ییگرِنِر.
۱۸ اِمّا ساچینگیزینگ بیر قیلی هِم کِمِلمِز.
۱۹ جیداپ دورونگ، شُندا جانینگیزی نِجات بِرِرسینگیز.
۲۰ «قُشونلارینگ اورشلیمی قاباندیغینی گُرِن واقتینگیز، اُنونگ وِیران اِدیلجِک واقتینینگ قُلایلاندیغینی بیلینگ.
۲۱ شُندا یهودیه‌دَکیلِر داغلارا قاچسین، شَهرینگ ایچیندَکیلِر چیقسین، تُوِرِگیندَکیلِر شَهره گیرمِسین.
۲۲ سِبَبی شُل گونلِر هِمّه یازیلانلارینگ بِرجای بُلماغی اوچین جِزا گونلِریدیر.
۲۳ اُل گونلِرده گُورِلی آیال‍لارینگ و چاغا اِمدیریَنلِرینگ وای گونونه! سِبَبی یوردا اولی بِلا-قاضالار اینِر، بو خالق غاضابا دوچار بُلار.
۲۴ اُلار قیلیچدان گِچیریلِر، اِسیر آلنیپ، هِمّه میلِّتلِرینگ آراسینا تَبعید اِدیلِر. بیگانه میلِّتلِر اُزلِرینینگ زامانی دُلیانچا، اورشلیمی یِر بیلِن یِکسان اِدِرلِر.
۲۵ «گونده، آیدا و ییلدیزلاردا عالاماتلار گُرونِر. یِر یوزونده میلِّتلِر دِریا هِم مُوجلِرینگ جُشوپ و سِسلِنِن سِبَپلی راحاتسیز بُلوپ، باشاغایلیغا دوشِرلِر.
۲۶ آداملار قُرقودان، دونیَه‌نینگ باشینا گِلیَن بِلالارا قاراشماقدان یانگا هوشلارینی ییتیرِر، سِبَبی آسمانینگ قودراتلاری تیترِشِر.
۲۷ شُندا اُلار اینسان اُغلونینگ بولوتدا قودرات هِم اولی بِییکلیک بیلِن گِلیَنینی گُرِرلِر.
۲۸ بو زاتلار یِرینه یِتیپ باشلاندا، باشینگیزی قالدیریپ، یُقاری باقینگ، سِبَبی نِجات تاپماغینگیز قُلایلاپ گِلیَندیر.»
۲۹ عیسی اُلارا بیر میثال آیتدی: «اینجیره و هِمّه باغلارا باقینگ.
لوقا ۲۱:۲۹-۳۸
۳۰ اُلارینگ یاپراقلاندیغینی گُروپ، تُمسونگ قُلایلاندیغینی اُز-اُزونگیزدِن بیلیَرسینگیز.
۳۱ شُنونگ یالی هِم، بو واقالارینگ بُلانینی گُرِنینگیزده، خودایینگ پادیشاهلیغینینگ قُلایلاندیغینی بیلینگ.
۳۲ سیزه دُغروسینی آیدیارین، بو زاتلارینگ هِمّه‌سی بُلیانچا، بو نِسل دونیَه‌دِن اُتمِز.
۳۳ آسمان هِم یِر اُتِر، یُنه مِنینگ سُزلِریم آصلا اُتمِز.
۳۴ «خاباردار بُلونگ! عایش-عِشرِت، سِرخُشلیق، یاشایشینگ قایغیلاری یورِگینگیزه یِرلِشمِسین. یُغسام، اُل گون دوزاق کیمین بیردِن اوستونگیزدِن اینِر.
۳۵ چونکی اُل گون تامام یِر یوزونده یاشایانلارینگ هِر بیرینینگ اوستوندِن اینِر.
۳۶ بو بُلجاق واقالارینگ باریندان قاچیپ نِجات تاپار یالی و اینسان اُغلونینگ حوضوریندا دوروپ بیلِر یالی، هِمیشه اُیا بُلوپ، خودایا دُغا اِدینگ.»