عیسی توتولیار
۱۸
بو زاتلاری آیدیپ بُلانسُنگ، عیسی شَگیرتلِری بیلِن قِدرون دِره‌دِن گِچیپ، اُل یِردَکی زِیتون باغینا گیردی.
یوحنا ۱۸:۱-۲۷
۲ شَگیرتلِری بیلِن عیسی شُل یِرده کَن واقتلاردا دوشوشیپ دوریاردی. شُنگا گُرَه، اُنگا خایینلیق اِدِن یهودا هِم اُل یِری بیلیَردی.
۳ اُل روم سِربازلارینینگ بیر بُلومی بیلِن بیرلیکده یُلباشچی کاهینلارینگ و فَریسی‌لِرینگ ایبِرِن قاراوول‍لارینی آلیپ گِلدی. اُلارینگ اِل‍لِرینَه پانوس، مِشعِل و یاراق باردی.
۴ عیسی اُز باشینا دوشجِک هِمّه زادی بیلیَردی. شُنونگ اوچینِم اُوه چیقیپ، اُلاردان: «کیمی گُزلِیَرسینگیز؟» دییّپ سُرادی.
۵ اُلار اُنگا: «ناصِره‌لی عیسانی» دییّپ جُغاپ بِردیلِر. عیسی اُلارا: «شُل مِندیرین» دییدی. اُنگا خایینلیق اِدِن یهودا-دا اُلار بیلِن بیله دوردی.
۶ عیسی اُلارا: «شُل مِندیرین» دییِنده، اُلار ایزا چِکیلیپ، یِره ییقیلدیلار.
۷ عیسی اُلاردان یِنه: «کیمی گُزلِیَرسینگیز؟» دییّپ سُرادی. اُلار: «ناصِره‌لی عیسانی» دییدیلِر.
۸ عیسی اُلارا: «مِن سیزه ”شُل مِندیرین“ دییدیم آخیرین. مِنی گُزلِیَن بُلسانگیز، بولاری گُیبِرینگ، گیتسینلِر» دییدی.
۹ عیسی مونی «مانگا بِرِنلِرینگدِن هیچ بیرینی ییتیرمِدیم» دییِن سُزلِرینگ بِرجای بُلماغی اوچین آیتدی.
۱۰ شُل واقت شمعون پِطرُس قیلیجینی قینیندان چیقاردی-دا، باش کاهینینگ خیدماتکَرینی اوروپ، ساغ قولاغینی کِسدی. اُل خیدماتکَرینگ آدی مالخوسدی.
۱۱ عیسی پِطرُسا: «قیلیجینگی جایینا سال. آتامینگ مانگا بِرِن عاذاپ کَسه‌سیندِن ایچمَیینمی؟» دییدی.
۱۲ اُنسُنگ سِربازلار، اُلارینگ باش سِردارسی و یَهودی قاراوول‍لاری عیسانی توتوپ، اِلینی-آیاغینی دانگدیلار.
۱۳ اُنی اَوَّل حَنّانینگ یانینا آلیپ باردیلار. حَنّا شُل ییل باش کاهین سایلانان قیافانینگ قایین آتاسیدی.
۱۴ خالق اوچین بیر آدامینگ اُلمِگی یاخشیدیر دییّپ، یَهودیلِره ماصلاحات بِرِن هِم قیافادی.
پِطرُس عیسانی اینکَر اِدیَر
۱۵ شمعون پِطرُس بیلِن یِنه بیر شَگیرت عیسانینگ ایزینا دوشوپ گیتدیلِر. یانگقی شَگیرت باش کاهین بیلِن اُنگدِن تانیش بُلانسُنگ، اُل عیسی بیلِن بیله باش کاهینینگ حایاطینا گیردی.
۱۶ یُنه پِطرُس داشاردا، قاپینینگ آغزیندا دوردی. اُنسُنگ باش کاهین بیلِن تانیش شَگیرت داشاری چیقدی-دا، قاپچی آیالا بیر زاتلار آیدیپ، پِطرُسی ایچِری سالدی.
۱۷ قاپچی آیال پِطرُسا: «سِن هِم بو آدامینگ شَگیرتلِریندِن-اَ دَلسینگ؟» دییّپ سُرادی. اُل: «یُق» دییّپ جُغاپ بِردی.
۱۸ حَوّانینگ سُووق بُلانی اوچین خیدماتکَرلِر و قاراوول‍لار اُد یاقیپ، چُیونیپ دوردیلار. پِطرُس هِم اُلارینگ یانیندا چُیونیپ دوردی.
باش کاهین عیسانی سُراق اِدیَر
۱۹ باش کاهین عیسادان اُنونگ شَگیرتلِری و تَعلیماتی بارادا سُرایاردی.
۲۰ عیسی اُنگا جُغاپ بِریپ: «مِن دونیَه آچیق آیتدیم. هِمّه یَهودیلِرینگ ییغنانیان کِنیسه‌لِرینده و عیباداتخانادا هِمیشه اُورِتدیم، گوزگینلیکده هیچ زات آیتمادیم.
۲۱ نَمه اوچین مِندِن سُرایارسینگ؟ نَمه آیدانیمی اِشیدِنلِردِن سُرا. اُلار مِنینگ نَمه دییِنیمی بیلیَندیرلِر» دییدی.
۲۲ بو زاتلاری آیدیپ بُلانسُنگ، شُل یِرده دوران قاراوول‍لارینگ بیری عیسانینگ دولوغینا بیر شاپباق اوروپ: «باش کاهینا شِیله جُغاپ بِریَرسینگمی؟» دییدی.
۲۳ عیسی اُنگا: «مِن یالنگیش آیدان بُلسام، مونونگ یالنگیشینی معلیم اِت. اِگِر دُغری آیدان بُلسام، اُندا نَمه اوچین مِنی اوریارسینگ؟» دییدی.
۲۴ اُنسُنگ حَنّا عیسانینگ اِلینی دانگدیریپ، اُنی باش کاهین قیافانینگ یانینا ایبِردی.
پِطرُس عیسانی یِنه اینکَر اِدیَر
۲۵ شمعون پِطرُس اُل یِرده چُیونیپ دوردی. اُندان: «سِن هِم اُنونگ شَگیرتلِریندِن-اَ دَلسینگ؟» دییّپ سُرادیلار. اِمّا اُل: «یُق» دییّپ اینکَر اِتدی.
۲۶ اُل یِرده باش کاهینینگ خیدماتکَرلِریندِن بیری پِطرُسینگ قولاغینی کِسِن آدامینگ قارینداشیدی. اُل خیدماتکَر: «مِن سِنی باغدا اُنونگ بیلِن بیله گُرمِدیمّی نَمه؟» دییدی.
۲۷ پِطرُس یِنه اینکَر اِتدی، اِدیل شُل واقت خُرُز قیغیردی.
عیسی پیلاتُسینگ حوضوریندا
۲۸ اُنسُنگ یَهودیلِر عیسانی قیافانینگ یانیندان روم حاکیمینینگ جایینا آلیپ باردیلار. شُل واقت دانگ آتیپدی. پِسَح شامیندان اییّپ بیلِر یالی و دینی سونِّتلِری پُزمازلیق اوچین یَهودیلِر حاکیمینگ جایینا گیرمِدیلِر.
یوحنا ۱۸:۲۸-۴۰
۲۹ شِیلِلیکده، پیلاتُسینگ اُزی اُلارینگ یانینا گِلیپ: «بو آدامی نَمِده عاییپلایارسینگیز؟» دییّپ سُرادی.
۳۰ اُلار: «بو آدام جِنایاتچی بُلمادیق بُلسا، اُنی توتوپ، سِنینگ یانینگا گِتیرمِزدیک» دییّپ جُغاپ بِردیلِر.
۳۱ پیلاتُس اُلارا: «بِیله بُلسا، اُنی اَکیدینگ-ده، اُز شِریغاتینگیزا گُرَه حُکوم چیقاریبِرینگ» دییدی. یَهودیلِر پیلاتُسا: «بیزینگ کیمدیر بیرینی اُلومه مَحکوم اِتمَگه حاقیمیز یُق» دییدیلِر.
۳۲ بو عیسانینگ اُزونینگ نَهیلی اُلوم بیلِن اُلجِکدیگی بارادا اُنگدِن آیدان سُزلِرینینگ بِرجای بُلماغی اوچیندی.
۳۳ اُنسُنگ پیلاتُس یِنه اُز جایینا گیردی-ده، عیسانی چاغیریپ، اُندان: «سِن یَهودیلِرینگ پادیشاهسیمی؟» دییّپ سُرادی.
۳۴ عیسی اُندان: «مونی اُزونگدِن آیدیارسینگمی یا-دا مِن حاقدا سانگا باشغالار آیتدیمی؟» دییّپ سُرادی.
۳۵ پیلاتُس عیسی: «مِگِر مِن یَهودیمی نَمه؟ سِنی مانگا اُز خالقینگ بیلِن یُلباشچی کاهینلار توتوپ گِتیردیلِر. سِن نَمه ایش اِتدینگ؟» دییدی.
۳۶ عیسی اُنگا: «مِنینگ پادیشاهلیغیم بو دونیَه‌دِن دَل. اِگِر مِنینگ پادیشاهلیغیم بو دونیَه‌دِن بُلسادی، اُندا خیدماتکَرلِریم مِنی یَهودیلِرینگ اِلینه بِردیرمِجِک بُلوپ اوروشاردیلار. اِمّا مِنینگ پادیشاهلیغیم باشغا یِردِندیر» دییدی.
۳۷ پیلاتُس اُنگا: «دییمِک، سِن پادیشاه-دا؟» دییدی. عیسی اُنگا: «پادیشاهدیغیمی اُزونگ آیدیپ دورسونگ. مِن حاقیقاتا شاهاتلیق اِتمِک اوچین دُغدیم، شُنونگ اوچین هِم دونیَه گِلدیم. حاقیقاتینگ طارافداری بُلان هِر بیر آدام مانگا قولاق آسار» دییّپ جُغاپ بِردی.
۳۸ پیلاتُس اُندان: «حاقیقات نَمه؟» دییّپ سُرادی.
مونی دییِندِن سُنگ، اُل یِنه یَهودیلِرینگ یانینا چیقیپ، اُلارا: «مِن اُندان هیچ بیر عاییپ تاپمادیم.
۳۹ اِمّا سیزینگ بیر عاداتینگیز بار، شُل عاداتا گُرَه هِر ییل پِسَح بایرامیندا مِن بیر آدامی زینداندان بُشادیاریم. ایندی سیزینگ اوچین یَهودیلِرینگ پادیشاهسینی بُشاتماغیمی ایسلِیَرسینگیزمی؟» دییدی.
۴۰ شُندا اُلار: «اُنی دَل، بیزه باراباسی بُشات!» دییّپ قیغیریشدیلار. باراباس بُلسا بیر قالماغالچیدی.